Ñande Ruvicha kyreʼỹme ombaʼapohína

‘Osẽ ipuʼaka hag̃ua iñenemigokuérare, ha omohuʼã hag̃ua iñorairõ.’ (REV. 6:2, NM)

1, 2. a) Mbaʼeichagua Rréipa Jesucristo ha mbaʼépa ojapo 1914 guive? b) Mbaʼépa ojapo Jesucristo oñepyrũ guive oisãmbyhy?

 ÁÑO 1914-pe Jehová omoĩ Jesúspe Rréiramo. Mbaʼeichagua Rréipa Jesús? Ñapensápa haʼeha peteĩ rréi nopenáiva mbaʼevére, oguapy ha omaña sapyʼapyʼánteva ko yvýre ohecha hag̃ua mbaʼéichapa oĩ umi kongregasión? Tuicha jajavyñaína ñapensáramo upéicha. La Biblia heʼi Salmo ha Revelaciónpe Jesucristo haʼeha peteĩ Mburuvicha guasu ikatupyrýva, ohóva ikavaju ári ‘ipuʼaka hag̃ua iñenemigokuérare, ha omohuʼã hag̃ua iñorairõ’. Jesús katuete osẽ porãta, ndaipóri ojokovaʼerã chupe (Rev. 6:2; Sal. 2:6-9; 45:1-4).

² Jesús oñepyrũre oisãmbyhy omosẽ yvágagui pe Aña ruvicha ha hiʼanhelkuérape. Péicha Miguel el arkánhel hiʼanhelkuéra ndive, omosẽ Satanás ha idemoniokuérape yvága marangatúgui ha ou hikuái ko yvy ape ári. Ha upe guive haʼekuéra ndaikatuvéima oike yvágape (Rev. 12:7-9). Upe rire Ñandejára “remimbou” Jesús, omoirũ Itúvape ohecha hag̃ua mbaʼéichapa yvyporakuéra omombaʼeguasuhína Ñandejárape (Mal. 3:1). Upérõ ohecha hikuái umi rrelihión japu, heʼíva ojeroviaha Jesús rehe, ojapoha heta mbaʼe vai ha heta hénte omanoha ikáusare. Avei koʼã rrelihión ojeheʼa politikokuérare. Upévare la Biblia ombojoja chupekuéra, peteĩ kuña rekovaíre (Rev. 18:2, 3, 24).

 Omomarangatu hembiguaikuérape

3, 4. a) Mbaʼépa ojapo Jehová ‘remimbou’ Jesucristo? b) Mbaʼépa ohecha Jesús ko yvy ape ári, ha mávapepa omoĩ oisãmbyhy hag̃ua hembiguaikuérape?

³ Jehová ha “hemimbou” Jesucristo oúrõ guare ohecha mbaʼéichapa oñemombaʼeguasu Chupe ko yvy ape ári, otopa oĩha peteĩ aty michĩva oñehaʼãva ojapo Ñandejára heʼíva, ndahaʼéi umi kristiáno guaʼúicha. Upéicharõ jepe, koʼã “Leví ñemoñare” térã unhído naipotĩmbái. Upérõ tekotevẽ gueteri okambia hikuái heta mbaʼépe ipotĩ hag̃ua Ñandejára oipotaháicha. Proféta Malaquías heʼi: ‘Ñandejára omopotĩta Leví ñemoñarépe, ku oñemopotĩháicha pláta ha óro tatápe, ha upe rire ae haʼekuéra ombaʼekuaveʼẽta Ñandejárape hekoitépe’ (Mal. 3:3, ÑÑB). Ha Ñandejára ojevale hemimbou Jesucristo rehe, omomarangatu hag̃ua umi unhídope.

⁴ Cristo ohecha avei umi unhído oñehaʼãmbaite hague omeʼẽ hag̃ua kongregasionkuérape opa mbaʼe oikotevẽva ojerovia mbarete hag̃ua. Oĩramo jepe heta oñemoĩva umi unhídore, áño 1879 guive oiporu hikuái ko rrevísta omyesakã hag̃ua Ñandejára Rréino ojapótava. Jesús heʼivaʼekue voi ‘ko múndo ára paha aja’, outaha ohecha mbaʼéichapa oĩ hogayguakuéra. Heʼi avei upévo ‘otopataha’ peteĩ tembiguái omeʼẽva ‘tembiʼu hiʼoraitépe’ hembiguaikuérape, ha oguerohorytaha chupe hembiapóre ha ‘opa mbaʼe orekóva omoĩtaha ipoguýpe’ (Mat. 24:3, 45-47, NM). Ha upeichaite oiko. Jesucristo, pe kongregasión omoakãva omoĩ ‘tembiguái jeroviahápe’ oñangareko hag̃ua opa mbaʼe Jehová orekóvare ko yvy ape ári. Ha omoĩ pe Cuerpo Gobernante, oisãmbyhy hag̃ua ‘hogayguakuéra’ térã umi unhído, ha avei ambue ovechakuérape (Juan 10:16).

Oñemonoʼõ ‘pe kóga yvy arigua’

5. Mbaʼépa ohecháraʼe apóstol Juan peteĩ visión rupive?

⁵ “Jesucristo ára” oñepyrũ áño 1914-pe. Ha apóstol Juan, peteĩ visión rupive ohecha mbaʼépa ojapovéta upévo pe Rréi omoĩvaʼekue Jehová. Haʼe ohai: ‘Amaʼẽ ha ahecha peteĩ arai morotĩ, ha hiʼári oguapy peteĩ ojoguáva Yvypóra Raʼýpe oguerekóva iñakãre peteĩ koróna de óro ha ipópe peteĩ fóisa haimbéva’ okosecha hag̃ua (Rev. 1:10; 14:14, ÑÑB). Ohendu avei peteĩ ánhel Jehová rembijokuái heʼíva pe Rréipe: ‘Pe kóga yvy arigua ningo otyarõmbáma, eju nde fóisa reheve ha emonoʼõ’ (Rev. 14:15, 16, NM).

6. Mbaʼépa Jesús heʼi oikotaha oñemonoʼõ mboyve pe kóga?

⁶ Heʼívo oñemonoʼõtaha ‘pe kóga yvy arigua’ ñanemomanduʼa pe ehémplo oñeʼẽva ñana ha trígo rehe. Upe ehémplope Jesús oñembojoja peteĩ kuimbaʼe oñotỹvare semílla iporãitereíva ha ohaʼarõva osẽ porã chupe omonoʼõ heta hag̃ua. Pe trígo orrepresenta  ‘pe rréino yvagapegua ñemoñare’, térã umi unhído oisãmbyhýtava Jesucristo ndive yvágape. Péro Jesús heʼi peteĩ pyhare ou hague peteĩ kuimbaʼe ndaijaʼéiva hese, upéva hína pe ‘Aña ruvicha’, ha oñotỹ ñana ikokuépe. Upe ñana orrepresenta ‘umi aña ñemoñare’. Pe kokue jára heʼi hembiguaikuérape oheja hag̃ua pe ñana ha trígo okakuaa oñondive kosécha tiémpo peve. Pe kosécha tiémpo heʼisehína ‘ko múndo ára paha’. Upévo Jesús omboúta hiʼanhelkuéra omboyke hag̃ua umi ñana pe trígogui (Mat. 13:24-30, 36-41).

7. Mbaʼéichapa Jesucristo omonoʼõhína ‘pe kóga yvy arigua’?

⁷ Apóstol Juan ohecha haguéicha, Jesucristo omonoʼõhína ‘pe kóga yvy arigua’. Tenonderã ombyatypáta umi unhído ofaltáva, haʼevahína pe trígo térã ‘rréino yvagapegua ñemoñare’. Añetehápe primera guerra mundial opa rire, ojekuaa porãitereive ohóvo mávapa umi kristiáno teete ha umi kristiáno guaʼu. Upéicha rupi ikatu avei oñembyaty upe rire ‘pe kóga yvy arigua’ térã umi ambue ovechakuérape. Koʼãva ndahaʼeihína ‘pe rréino yvagapegua ñemoñare’, síno peteĩ ‘aty guasu oúva opa tetã, táva, trívu ha ñeʼẽgui’. Ko aty guasu vyʼápe oñemoĩ Ñandejára Rréino poguýpe. Pe rréinope oisãmbyhy Jesús ha omoirũta chupe umi 144.000 imarangatúva, ojeporavovaʼekue ogoverna hag̃ua hendive yvágape (Rev. 7:9, 10; Dan. 7:13, 14, 18).

Oisãmbyhy kongregasionkuérape

8, 9. a) Mbaʼérepa jaʼekuaa Jesús ojesarekoha káda uno rehe? b) Jahechaháicha pe taʼanga oĩva páhina 26-pe, mbaʼépa hína umi ‘mbaʼe ypytũ Satanás’ oiporúva ha tekotevẽva ñamboyke?

⁸ Pe ótro artíkulope jahechákuri Jesucristo ojesarekoha kongregasionkuérare primer síglope. Koʼág̃a katu haʼe oisãmbyhýma ha ‘opa mbaʼe oĩva yvága ha yvýpe oñemoĩ ipoguýpe’. Haʼe kyreʼỹme omoakã ansianokuérape ha umi kongregasión oĩva ko yvy tuichakue (Mat. 28:18; Col. 1:18). Péicha Jehová ‘omoĩ Jesucrístope omoakã’ hag̃ua umi unhído ha opaite kongregasiónpe (Efe. 1:22). Upéicha rupi mbaʼevete nokañýi chugui, ohechapaite opa mbaʼe oikóva umi cien mil rasa kongregasiónpe.

⁹ Yma Jesús oguerahauka ko marandu kongregasión Tiatírape: ‘Kóicha heʼi Ñandejára Raʼy, pe hesa haʼetéva tatarendy: “Che aikuaa opa rejapóva”’ (Rev. 2:18, 19). Jesús ohecha upe kongregasiónpe oĩha oikóva iñakãre ha hekovaíva. Upévare heʼi chupekuéra: ‘Che aikuaa opa mbaʼe oĩva guive yvypóra akãme térã ipyʼapýpe, ha che amyengoviáta peteĩteĩme hembiapokuére’ (Rev. 2:23, ÑÑB). Jesús heʼivaʼekuére jahechakuaa haʼe ojesarekoha káda uno rehe, ndahaʼéi umi kongregasión rehe añónte. Ha jahechakuaa avei oguerohory hague ambue ermáno Tiatirayguápe omboyke haguére ‘umi mbaʼe ypytũ Satanás’ oiporúva oporombotavy hag̃ua (Rev. 2:24). Koʼág̃a avei Jesús oguerohory umi omoirũvape chupe, tahaʼe itujáva térã imitãva ndoikóiramo omakanea ohechávo umi ‘mbaʼe ypytũ Satanás’ oiporúva. Tahaʼe umi mbaʼe vai osẽva Internet ha videohuégope, térã umi hénte oikóva iñakãre heʼíva. Oiménepa Jesús ovyʼaite ohechávo hetaiterei kristiáno oñehaʼãha iñeʼẽrendu chupe opa mbaʼépe, ijetuʼúramo jepe.

10. Mbaʼéichapa Revelaciónpe ojehechauka oĩha umi ansiáno, ha mbaʼépa ohechakuaavaʼerã hikuái?

¹⁰ Jesús mborayhúpe oisãmbyhy kongregasionkuérape ha upearã ojevale umi ansiáno rehe (Efe. 4:8, 11, 12). Revelaciónpe heʼi Jesús orekoha ipo deréchape siete estrélla, umíva orrepresenta umi ansiáno oĩvaʼekue síglo primérope (Rev. 1:16, 20). Upérõ enterove omoakãva kongregasión unhído vaʼekue. Koʼág̃a katu haimete opavave ansiáno haʼe ‘ambue ovechakuerapegua’. Péro ñanemanduʼavaʼerã koʼãvape ojeporavo hag̃ua heta oñeñemboʼe hague, ha ojedesidi espíritu sánto rupive. Upéicharõ ikatu jaʼe umi  ansiáno oĩha avei koʼág̃a Cristo po deréchape, térã ohejaha haʼe oisãmbyhy chupekuéra (Hech. 20:28). Ha umi ansiáno ohechakuaa Jesús oiporavo hague umi unhído apytégui pe Cuerpo Gobernante omoakã hag̃ua kristianokuérape (jaleemína Hechos 15:6, 28-30).

‘Eju ore Ruvicha Jesús!’

11. Mbaʼérepa jaipotaitereíma ou ñande Ruvicha?

¹¹ Revelación kuatiañeʼẽme jatopa Jesús heta vése heʼi hague apóstol Juánpe pyaʼe ou jeytaha (Rev. 2:16; 3:11; 22:7, 20). Jaʼekuaa Jesús heʼise hague ou jeytaha okondena hag̃ua Babilonia Guasúpe ha opa mbaʼe oĩva ko múndo aña poguýpe (2 Tes. 1:7, 8). Apóstol Juan ohechasetereíma mbaʼéichapa oñekumplíta upe ohechavaʼekue visión rupive, upévare hatã heʼi: ‘Taupéicha, eju ore Ruvicha Jesús!’. Koʼẽrõite ñande Ruvicha, Rréi Jesús oúta tuicha puʼaka reheve ohechauka hag̃ua Itúva añoite orekoha derécho oisãmbyhývo ha omopotĩta Héra. Ñande jaikóva ko ára pahápe jahechasetereíma avei upéva oiko vove.

12. Mbaʼépa ojapovaʼerã Jesús okastiga mboyve Satanás múndo añáme?

¹² Umi ohótava yvágape ojesellapaite rire ae Jesús oúta okastiga hag̃ua Satanás organisasión oĩva ko yvy ape ári. La Biblia heʼi porã umi “yvytu” ohundítava Satanás múndo aña oipejutaha ojesellapaite rire ae umi 144.000 unhídope (Rev. 7:1-4).

13. Mbaʼéichapa Jesús ohechaukáta oñepyrũmaha oisãmbyhy?

¹³ Heta hénte ndohechakuaái Jesucristo oisãmbyhymaha áño 1914 guive (2 Ped. 3:3, 4). Péro koʼẽrõitéma opavave ohecháta upéva. Mbaʼéichapa? Okastiga vove ko múndo oĩva Satanás poguýpe. Pór ehémplo Jesús ‘ohechaukáta oĩmaha’, ohundívo ‘pe kuimbaʼe oñemoĩva opaichagua léi rehe’, térã umi paʼikuéra omoakãva umi rrelihión japu heʼíva ojeroviaha Jesús rehe (jaleemína 2 Tesalonicenses 2:3, 8). Péicha ñande Ruvicha Cristo ohechaukáta Jehová omoĩ hague chupe Huésramo (jaleemína 2 Timoteo 4:1). La Biblia heʼiháicha Babilonia Guasu oñehundíta, primeroite voi umi rrelihión japu heʼi guaʼúva ojeroviaha Jesús rehe. Upéi katu oñehundíta opaichagua rrelihión japu nomombaʼéiva Ñandejárape. Ha Jehová oiporúta umi polítikope ohundi hag̃ua pe kuña rekovaípe térã pe rrelihión japu. Ñandejára omoĩta ikorasõmekuéra ojapose hag̃ua upéva (Rev. 17:15-18). Péicha oñepyrũta pe ‘jehasa asy guasu’ (Mat. 24:21, NM).

14. a) Mbaʼérepa umi ára oñemombykýta pe jehasa asy guasu oiko vove? b) Mbaʼépa ojapóta Jehová rembiguaikuéra ojehecha vove ‘yvágare pe Yvypóra Raʼy techapyrã’?

¹⁴ Jesús heʼivaʼekue pe jehasa asy guasu oiko vove ‘umi ára oñemombykytaha Ñandejára oiporavovaʼekue rehehápe’, koʼãva hína umi unhído oĩva ko yvy ape ári (Mat. 24:22). Goviernokuéra opuʼã vove pe rrelihión japúre, Jehová ndohejamoʼãi ohundipa hikuái umi unhído ni ambue ovechakuérape. Jesús heʼive: ‘Upe jehasa asy riremínte pe kuarahy iñypytũmbáta, jasy ndohesapemoʼãi, umi estrélla hoʼáta. Upévo ojehecháta yvágare pe Yvypóra Raʼy techapyrã, ha opa tetãnguéra tasẽme ojepytiʼa nupãta’. Péro umi unhído ohótava yvágape ni ambue ovechakuéra oikótava ko yvy ape ári, ndokyhyjemoʼãi koʼã mbaʼe oiko vove. Upéva rangue ojapóta hikuái Jesús heʼivaʼekue: ‘Peñemboʼy ha peñakãrapuʼã, peikuaágui Ñandejára peneguenohẽtamaha  jejopy vaígui’ (Mat. 24:29, 30; Luc. 21:25-28, NM).

15. Mbaʼépa ojapóta Jesucristo ou vove?

¹⁵ Péro pe Yvypóra Raʼy Jesucristo omohuʼã mboyve iñorairõ, oúta ambue hendáicha. Haʼe heʼivaʼekue: ‘Pe Yvypóra Raʼy oúta tuicha puʼaka reheve ha hendive oúta umi anhelkuéra; upérõ haʼe oguapýta itróno omimbipávape. Ha opa tetãnguéra oñembyatýta henondépe, ha haʼe oiporavóta umi héntepe, pe ovecháre oñangarekóva oipeʼaháicha ovecha kavarágui. Omoĩta umi ovecha ijakatúape ha umi kavara ijasu gotyo’ (Mat. 25:31-33, NM). Péicha jahechakuaa Jesucristo omoĩtaha peteĩ atýpe umi ovechakuéra oipytyvõva umi unhído ko yvy ape ári oĩvape. Ha ambue atýpe oĩta umi kavara, naiñeʼẽrendúiva ‘pe marandu porãme’ (2 Tes. 1:7, 8). ‘Umi hekojojáva oikovéta tapia g̃uarã’, ha umi kavara katu ‘oñehundietéta opa ára g̃uarã’. (Mat. 25:34, 40, 41, 45, 46, NM.)

Jesús omohuʼã iñorairõ

16. Mbaʼéichapa ñande Ruvicha omohuʼãta iñorairõ?

¹⁶ Mbaʼépa oikóta umi oisãmbyhýtava yvágape ojesellapaite rire ha umi hekojojáva oĩvo Jesús akatúape ojesalva hag̃ua? Upévo ñande Ruvicha osẽta ‘omohuʼã hag̃ua iñorairõ’ (Rev. 5:9, 10; 6:2). Haʼe omotenondéta umi anhelkuéra ha umi unhídope ohundi hag̃ua umi polítiko, militár ha opa mbaʼe oĩva Satanás poguýpe (Rev. 2:26, 27; 19:11-21). Añetehápe Jesús omohuʼãta iñorairõ ohundívo ko múndo añáme. Upe rire omoingéta Satanás ha idemoniokuérape yvykua pypukúpe ha nosẽmoʼãi upégui mil áñore (Rev. 20:1-3).

17. Moõ gotyopa Jesucristo ogueraháta ambue ovechakuérape Mil Áño aja, ha mbaʼépa akóinte jajedesidivaʼerã jajapo?

¹⁷ Mbaʼépa heʼi apóstol Juan pe ‘aty guasu’ opytátavare pe jehasa asy guasu rire? Haʼe heʼi: ‘Pe Ovecharaʼy oĩva itrónope oñangarekovaʼerã hesekuéra ovecha rerekuáicha, ha oguerahavaʼerã chupekuéra omboyʼu hag̃ua yvu oporomoingovéva oĩháme’ (Rev. 7:9, 17). Jahechaháicha Mil Áño ogoverna aja, Jesucristo osegíta oñangareko ha oisãmbyhy umi ambue ovechakuérape. Ha koʼãva iñeʼẽrendu rupi chupe ohupytýta jeikove opaʼỹva (jaleemína Juan 10:16, 26-28). Akóintekena ñamoirũ ñande Ruvicha ha Rréi Jesucrístope! Haʼe ñandegueraháta Ñandejára múndo pyahúpe.

Ñañemomanduʼa hag̃ua

• Mbaʼépa ojapo Jesucristo oñepyrũre oisãmbyhy?

• Máva máva rupivépa Jesucristo oisãmbyhy kongregasión?

• Mbaʼéichapa ñande Ruvicha ou jeýta?

• Mbaʼépa osegíta Jesucristo ojapo pe múndo pyahúpe?

[Porandu ñahesaʼỹijóva]

[Nóta oĩva taʼanga ndive páhina 29]

Jesús ‘ohechaukáta oĩmaha’, ohundívo ko múndo añáme