Ang Aton Aktibo nga Lider sa Karon
Ang Aton Aktibo nga Lider sa Karon
“Naglakat sia nga nagapangdaug kag sa pagtapos sang iya pagpangdaug.”—BUG. 6:2.
1, 2. (a) Paano ginpakita sa Biblia ang aktibo nga hilikuton ni Cristo subong hari sugod sang 1914? (b) Ano ang ginhimo ni Cristo sugod sang nangin hari sia?
SI Cristo ginpalingkod subong Hari sang Mesianikong Ginharian ni Jehova sang 1914. Ano sa banta mo ang ginahimo niya sa karon? Ginahunahuna mo bala sia subong isa ka hari nga nagapahimunong lang sa iya trono kag kon kaisa nagatan-aw sa duta para hibaluon ang kahimtangan sang iya kongregasyon? Kon amo sina ang imo ginahunahuna, kinahanglan mo ini bag-uhon. Ginapakita sang mga Salmo kag sang tulun-an sang Bugna nga isa sia ka aktibo nga hari nga nagasakay sa kabayo “nga nagapangdaug” kag nagapadayon tubtob “magmadinalag-on.”—Bug. 6:2; Sal. 2:6-9; 45:1-4, NW.
2 Ang una nga ginhimo ni Cristo subong hari amo ang pagdaug sa ‘dragon kag sa mga anghel sini.’ Subong ang arkanghel nga si Miguel nga may awtoridad sa iya mga anghel, gintagbong ni Cristo si Satanas kag ang iya mga demonyo sa duta. (Bug. 12:7-9) Dayon, subong “mensahero sang katipan” ni Jehova, nag-abot si Jesus upod sa iya Amay sa pag-usisa sa espirituwal nga templo. (Mal. 3:1, NW) Ginhukman niya ang Cristiandad, ang pinakamakasasala nga bahin sang “Babilonia nga Daku,” nga amo ang may daku nga salabton sa pagpaagay sang dugo kag sa espirituwal nga pagpanghilahi sa pulitikal nga sistema sining kalibutan.—Bug. 18:2, 3, 24.
Pagtinlo sa Iya mga Ulipon sa Duta
3, 4. (a) Ano nga hilikuton ang ginhimo ni Cristo subong “mensahero” ni Jehova? (b) Ano ang nasapwan sang gin-usisa ang templo, kag subong Ulo sang kongregasyon, ano nga pagtangdo ang ginhimo ni Jesus?
3 Sang gin-usisa ni Jehova kag sang iya “mensahero” ang dutan-on nga luwang sang espirituwal nga templo, nakita man nila ang isa ka grupo sang matuod nga mga Cristiano nga indi bahin sang mga relihion sang Cristiandad. Apang, ining hinaplas nga mga Cristiano, ukon “mga anak ni Levi,” kinahanglan man nga matinluan. Si manalagna Malaquias nagtagna: “Magalingkod [si Jehova] subong sang manugtunaw kag manug-ulay sang pilak, kag putlion niya ang mga anak ni Levi kag ulayon sila subong sang bulawan kag pilak, tubtub nga magdolot sila sa GINOO sing mga halad sa pagkamatarung.” (Mal. 3:3) Gingamit ni Jehova ang iya “mensahero sang katipan,” si Cristo Jesus, sa pagtinlo sa espirituwal nga Israel.
4 Nasapwan man ni Cristo nga ining matutom nga hinaplas nga mga Cristiano nagahimo sang ila labi nga masarangan sa pag-aman sang espirituwal nga pagkaon sa nagakaigo nga tion sa panimalay sang pagtuo. Sugod sang 1879, bisan sa idalom sang mabudlay nga kahimtangan, padayon nila nga ginabalhag ang mga kamatuoran sa Biblia tuhoy sa Ginharian sang Dios paagi sa sini nga magasin. Si Jesus nagtagna nga “sa iya pag-abot” agod usisaon ang iya panimalay sa tion sang “katapusan sang sistema sang mga butang,” masapwan niya ang isa ka ulipon nga nagaaman sa ila sang “pagkaon sa nagakaigo nga tion.” Ipahayag niya nga malipayon inang ulipon kag “tangduan niya sia nga magdumala sa tanan niya nga pagkabutang” sa duta. (Mat. 24:3, 45-47) Subong Ulo sang Cristianong kongregasyon, ginagamit ni Cristo ining “matutom kag mainandamon nga ulipon” agod magdumala sang mga intereses sang Iya Ginharian sa duta. Ginatuytuyan niya ang hinaplas nga “panimalay” kag ang ila kaupod nga “iban nga mga karnero” paagi sa Nagadumala nga Hubon.—Juan 10:16.
Pag-ani sa Duta
5. Sa palanan-awon ni Juan, ano ang nakita niya nga himuon sang hari?
5 Sa iya palanan-awon, nakita ni apostol Juan kon ano pa ang himuon sang Mesianikong Hari “sa adlaw sang Ginuo,” sa tapos Sia ginpapungko sa trono sang 1914. Si Juan nagsulat: “Nagtulok ako, kag, yari karon! isa ka puti nga panganod, kag sa panganod may isa nga nagalingkod nga kaangay sa anak sang tawo, nga may bulawan nga korona sa iya ulo kag matalom nga garab sa iya kamot.” (Bug. 1:10; 14:14) Nabatian ni Juan ang isa ka anghel ni Jehova nga nagsiling sa sini nga Mangangani nga ihabyog ang iya garab bangod “ang alanyon sang duta luntay na.”—Bug. 14:15, 16.
6. Ano ang ginsiling ni Jesus nga mahanabo sa pagligad sang tion?
6 Ini nga “alanyon sang duta” nagapahanumdom sa aton sang parabola ni Jesus tuhoy sa trigo kag gamhon. Ginpaanggid ni Jesus ang iya kaugalingon sa isa ka tawo nga nagsab-ug sa iya uma sang binhi sang trigo sa tuyo nga makaani sang maayo nga trigo. Ang trigo nagarepresentar sa “mga anak sang ginharian,” sa matuod nga mga Cristiano nga ginhaplas agod mangin kaupod niya sa iya Ginharian. Apang sang gab-i, ang kaaway nga amo “ang Yawa,” nagsab-ug sa uma sang mga gamhon, “ang mga anak sang isa nga malauton.” Ang manugsab-ug nagsiling sa iya mga ulipon nga pabay-an anay nga magtubo sing dungan ang trigo kag ang mga gamhon tubtob sa tion sang pag-ani, sa “katapusan sang sistema sang mga butang.” Sa sina nga tion, magapadala sia sang iya mga anghel sa pagpain sang mga trigo gikan sa mga gamhon.—Mat. 13:24-30, 36-41.
7. Paano ginadumalahan ni Cristo ang ‘pag-ani sa duta’?
7 Subong katumanan sang palanan-awon nga nakita ni Juan, gindumalahan ni Jesus ang bug-os kalibutan nga pag-ani nga hilikuton. ‘Ang pag-ani sa duta’ nagsugod sang gintipon ang nagkalabilin sang 144,000 nga “mga anak sang ginharian,” nga amo ang ginapatuhuyan sang “mga trigo” sa parabola ni Jesus. Ang kinatuhayan sang matuod kag butig nga mga Cristiano nangin labi kaathag sa tapos sang Bug-os Kalibutan nga Inaway I, kag amo ini ang nagdul-ong sa ikaduha nga bahin sang ‘pag-ani sa duta’—ang pagtipon sa iban nga mga karnero. Indi sila “mga anak sang ginharian” sa baylo, sila ang “dakung kadam-an” nga nagapasakop sa sina nga Ginharian. Ginatipon sila gikan sa tanan nga “mga katawohan, mga pungsud, kag mga hambal.” Nagapasakop sila sa Mesianikong Ginharian nga ginahuman ni Cristo Jesus kag sang 144,000 nga “mga balaan” nga mangin kaupod niya sa sinang langitnon nga panguluhan.—Bug. 7:9, 10; Dan. 7:13, 14, 18.
Pagpanguna sa mga Kongregasyon
8, 9. (a) Ano ang nagapakita nga ginabantayan ni Cristo indi lamang ang paggawi sang bug-os nga kongregasyon kundi ang pagkabuhi man sang tagsa ka katapo sini? (b) Subong sang ginapakita sa pahina 26, anong “madalom nga mga butang ni Satanas” ang dapat naton likawan?
8 Natun-an naton sa nagligad nga artikulo nga ginbantayan ni Cristo sing maayo ang espirituwal nga kahimtangan sang tagsa ka kongregasyon sang unang siglo C.E. Sa karon, subong nagagahom nga Hari nga ginhatagan sang “bug-os nga awtoridad sa langit kag sa duta,” aktibo nga ginatungdan ni Cristo nga aton Lider ang iya pagkaulo sa mga kongregasyon sa bug-os nga kalibutan kag sa ila mga manugtatap. (Mat. 28:18; Col. 1:18) “Ginhimo sia [ni Jehova] nga ulo sa ibabaw sang tanan nga butang sa kongregasyon” sang mga hinaplas. (Efe. 1:22) Bangod sini, wala sang nagakatabo sa kapin sa 100,000 ka kongregasyon sang mga Saksi ni Jehova nga indi niya mahibaluan.
9 Si Jesus nagpadala sang mensahe sa dumaan nga kongregasyon sang Tiatira: “Amo ini ang mga butang nga ginasiling sang Anak sang Dios, sia nga ang iya mga mata kaangay sang nagadabdab nga kalayo, . . . ‘Nahibaluan ko ang imo mga buhat.’” (Bug. 2:18, 19) Ginsaway niya ang mga katapo sina nga kongregasyon sa ila imoral, nagapaayaw sa kaugalingon nga pagkabuhi, kag ginsilingan sila: “Ako amo ang nagausisa sa mga batobato kag mga tagipusuon, kag ihatag ko sa tagsatagsa sa inyo ang suno sa inyo mga buhat.” (Bug. 2:23) Ina nga pinamulong nagapakita nga ginabantayan ni Cristo indi lamang ang paggawi sang bug-os nga kongregasyon kundi ang pagkabuhi man sang tagsa ka katapo sini. Ginhatagan ni Jesus sing komendasyon ang mga Cristiano sa Tiatira nga “wala makahibalo sang ‘madalom nga mga butang ni Satanas.’” (Bug. 2:24) Sa karon, nahamuot man sia sa mga indibiduwal, bata man ukon tigulang, nga nagalikaw sa pag-usisa sa “madalom nga mga butang ni Satanas” paagi sa Internet ukon sa masingki nga video games kag sa mga nagasikway sa matinuguton nga mga pangatarungan sang tawo. Nalipay gid sia nga makita nga ginatinguhaan sang madamo nga Cristiano sa karon nga himuon ang ila labi nga masarangan nga sundon ang iya pagpanguna sa tanan nga aspekto sang ila kabuhi!
10. Paano ginlaragway ang pagpanguna ni Cristo sa mga gulang sang kongregasyon, apang ano nga kahimusan ang dapat nila kilalahon?
10 Mahigugmaon nga ginatatap ni Cristo ang iya mga kongregasyon sa duta paagi sa gintangdo nga mga gulang. (Efe. 4:8, 11, 12) Sang unang siglo, ang tanan nga manugtatap mga hinaplas sang espiritu. Ginlaragway sila sa Bugna subong mga bituon sa tuo nga kamot ni Cristo. (Bug. 1:16, 20) Sa karon, ang kalabanan nga gulang sang kongregasyon katapo sang iban nga mga karnero. Gintangdo sila pagkatapos sang pangamuyo kag sa idalom sang panuytoy sang balaan nga espiritu, gani makabig man sila nga yara sa idalom sang pagpanguna ukon panuytoy ni Cristo. (Binu. 20:28) Apang, ginakilala nila nga nagagamit si Cristo sang isa ka gamay nga grupo sang hinaplas nga Cristianong mga lalaki subong Nagadumala nga Hubon agod magpanguna kag magtuytoy sa iya mga disipulo sa duta.—Basaha ang Binuhatan 15:6, 28-30.
“Kari Ka, Ginuong Jesus”
11. Ngaa nakunyag kita nga makita ang madali nga pag-abot sang aton Lider?
11 Sa bugna nga ginhatag kay apostol Juan, pila ka beses nga nagsiling si Jesus nga magaabot sia sing madali. (Bug. 2:16; 3:11; 22:7, 20) Wala sing duhaduha nga ang ginapatuhuyan niya amo ang iya pag-abot para hukman ang Babilonia nga Daku kag ang iban pa nga bahin sang malaut nga sistema sang mga butang ni Satanas. (2 Tes. 1:7, 8) Bangod nakunyag sia nga makita ang katumanan sang mga tagna, ang tigulang na nga si apostol Juan nagsiling: “Kabay pa! Kari ka, Ginuong Jesus.” Kita nga nagakabuhi sa tion sang katapusan sining malaut nga sistema sang mga butang nakunyag man nga makita ang aton Lider kag Hari nga magaabot nga may gahom sang Ginharian agod pakabalaanon ang ngalan sang iya Amay kag ibindikar ang Iya pagkasoberano.
12. Ano nga hilikuton ang tapuson ni Cristo antes buy-an ang mga hangin sang kalaglagan?
12 Antes si Jesus mag-abot para laglagon ang kitaon nga organisasyon ni Satanas, ang tanan nga katapo sang 144,000 makabaton na sang katapusan nga pagpat-in. Maathag nga ginapakita sang Biblia nga ang mga hangin nga magalaglag sang sistema ni Satanas indi pagbuy-an kon indi pa matapos ini nga pagpat-in.—Bug. 7:1-4.
13. Paano ipahayag ni Cristo ang iya presensia sa una nga bahin sang “dakung kapipit-an”?
13 Ang “presensia” ni Cristo sugod sang 1914 wala natalupangdan sang kalabanan nga pumuluyo sa duta. (2 Ped. 3:3, 4) Apang sa indi madugay, ipahayag niya ang iya presensia paagi sa pagpadapat sang paghukom ni Jehova sa nanuhaytuhay nga elemento sang sistema sang mga butang ni Satanas. Ang paglaglag sa “tawo sang pagkamalinapason,” ang klero sang Cristiandad, mangin isa gid ka indi mapangduhaduhaan nga “pagpadayag sang iya presensia.” (Basaha ang 2 Tesalonica 2:3, 8.) Mangin isa ini ka mabakod nga pamatuod nga si Cristo nagapanghikot subong ang gintangdo nga Hukom ni Jehova. (Basaha ang 2 Timoteo 4:1.) Ang paglaglag sa Cristiandad, ang pinakamakasasala nga bahin sang Babilonia nga Daku, amo ang umpisa sang bug-os nga kalaglagan sinang malauton nga emperyo sang butig nga relihion. Ibutang ni Jehova sa tagipusuon sang pulitikal nga mga lider nga laglagon ining makihilawason sa espirituwal nga babayi. (Bug. 17:15-18) Amo ina ang mangin una nga bahin sang “dakung kapipit-an.”—Mat. 24:21.
14. (a) Ngaa ang una nga bahin sang dakung kapipit-an palip-uton? (b) Ano ang kahulugan sang “tanda sang Anak sang tawo” para sa katawhan ni Jehova?
14 Si Jesus nagsiling nga ang mga adlaw sinang kapipit-an palip-uton “bangod sa mga pinili,” ang nagkalabilin nga hinaplas nga mga Cristiano sa duta. (Mat. 24:22) Indi pagtugutan ni Jehova nga ining paglaglag sa butig nga relihion magapapas pati sa hinaplas nga mga Cristiano kag sa ila kaupod nga iban nga mga karnero. Si Jesus nagsiling pa nga “sa tapos sang kapipit-an sa amo nga mga adlaw,” may mga tanda sa adlaw, bulan, kag mga bituon, “kag nian makita sa langit ang tanda sang Anak sang tawo.” Bangod sini, ang mga pungsod sa duta “magapukpok sang ila kaugalingon sa kalisod.” Apang indi ina mabatyagan sang mga hinaplas nga may langitnon nga paglaum kag sang ila mga kaupod nga may dutan-on nga paglaum. ‘Magatindog sila kag magahangad sang ila ulo, bangod ang pagtubos sa ila malapit na.’—Mat. 24:29, 30; Luc. 21:25-28.
15. Ano nga hilikuton ang himuon ni Cristo kon magkari sia?
15 Antes niya tapuson ang iya pagpangdaug, ang Anak sang tawo magakari sa tuhay pa nga paagi. Nagtagna sia: “Kon ang Anak sang tawo mag-abot sa iya himaya, kag ang tanan nga anghel kaupod niya, nian magalingkod sia sa iya mahimayaon nga trono. Kag tipunon sa atubangan niya ang tanan nga pungsod, kag painpainon niya ang katawhan, subong sang manugbantay nga nagapain sang mga karnero sa mga kanding. Kag ipahamtang niya ang mga karnero sa iya tuo, apang ang mga kanding sa iya wala.” (Mat. 25:31-33) Nagapatuhoy ini sa pagkari ni Cristo subong Hukom agod painpainon ang katawhan sang “tanan nga pungsod” sa duha ka grupo: “mga karnero,” ang aktibo nga nagasakdag sa iya espirituwal nga mga kauturan (hinaplas nga mga Cristiano sa duta) kag “mga kanding,” ang “mga wala nagatuman sa maayong balita tuhoy sa aton Ginuong Jesus.” (2 Tes. 1:7, 8) Ang mga karnero nga ginlaragway subong “mga matarong magabaton sang kabuhi nga walay katapusan” sa duta, apang tuhoy sa mga kanding, “maagom nila ang kamatayon nga walay katapusan,” ukon kalaglagan.—Mat. 25:34, 40, 41, 45, 46.
Tapuson ni Jesus ang Iya Pagpangdaug
16. Paano tapuson sang aton Lider nga si Cristo ang iya pagpangdaug?
16 Kon mapat-inan na ang tanan nga kaupod niya nga hari kag saserdote kag mapain na ang mga karnero sa iya tuo nga kamot para sa kaluwasan, ‘tapuson na ni Cristo ang iya pagpangdaug.’ (Bug. 5:9, 10; 6:2) Upod sa gamhanan nga mga anghel kag sa iya ginbanhaw nga kauturan, laglagon niya sing bug-os ang pulitikal, militar, kag komersial nga sistema ni Satanas sa duta. (Bug. 2:26, 27; 19:11-21) Matapos na ang pagpangdaug ni Cristo kon malaglag na niya ang malauton nga sistema ni Satanas. Dayon itagbong niya sa kadadalman si Satanas kag ang mga demonyo sa sulod sang isa ka libo ka tuig.—Bug. 20:1-3.
17. Sa ano tuytuyan ni Cristo ang iban nga mga karnero sa sulod sang iya Isa ka Libo ka Tuig nga Paggahom, kag ano dapat ang aton determinasyon?
17 Tuhoy sa “dakung kadam-an” sang iban nga mga karnero nga makalampuwas sa dakung kapipit-an, si apostol Juan nagtagna nga “ang Kordero, nga yara sa tunga malapit sa trono, magabantay sa ila, kag magatuytoy sa ila sa mga tuburan sang tubig sang kabuhi.” (Bug. 7:9, 17) Huo, sa sulod sang iya Isa ka Libo ka Tuig nga Paggahom, padayon nga tuytuyan ni Cristo ang iban nga mga karnero nga nagapamati gid sa iya tingog, kag giyahan niya sila padulong sa kabuhi nga walay katapusan. (Basaha ang Juan 10:16, 26-28.) Kabay nga magsunod kita sing matutom sa aton harianon nga Lider—sa karon kag tubtob sa ginsaad nga bag-ong kalibutan ni Jehova!
Repaso
• Ano ang ginhimo ni Cristo sa tapos sia ginpapungko sa trono?
• Anong kitaon nga instrumento ang ginagamit ni Cristo sa pagpanguna sa mga kongregasyon?
• Sa ano nga mga paagi magaabot ang aton Lider nga si Cristo?
• Paano kita padayon nga pangunahan ni Cristo padulong sa bag-ong kalibutan?
[Mga Pamangkot sa Pagtinuon]
[Retrato sa pahina 29]
Ang paglaglag sa malaut nga sistema ni Satanas magapahayag sang presensia ni Cristo