Mueteleli Wa Luna Ya Sebeza
Mueteleli Wa Luna Ya Sebeza
“A taha ili ya tuzi, mi a ya kwa ku tula.”—SIN. 6:2.
1, 2. (a) Bibele i talusa cwañi musebezi wa Kreste wa bulena ku zwa ka 1914? (b) Ki lika mañi za ezize Kreste ku zwa fa beelwa fa bulena?
KRESTE naa beilwe ku ba Mulena wa Mubuso wa Jehova ka 1914. Lu mu nga cwañi kacenu? Kana lu mu nga sina mulena ya inzi mwa lubona lwa hae, inze a nahanisisa ni ku talimela fa lifasi kuli a bone puteho ya hae mo i ezeza? Haiba ku cwalo, lu swanela ku cinca mubonelo wa luna. Libuka za Lisamu ni Sinulo li mu bonisa kuli ki mulena ya maata ya zulami pizi, ya “taha ili ya tuzi, mi a ya kwa ku tula.”—Sin. 6:2; Samu 2:6-9; 45:1-4.
2 Nto ya pili ya naa ezize Kreste hamulaho wa ku fiwa bulena ne li ku tula ‘drakoni ni mangeloi a yona.’ Ka ku ba Mikaele ya li nduna wa mangeloi, Kreste naa lunduzi Satani ni badimona mwa mahalimu a kenile ni ku ba wiseza fa lifasi. (Sin. 12:7-9) Ku zwa fo, Jesu ka ku ba “Lingeloi la bulikani,” naa tile ni Ndatahe ku to tatuba tempele ya swanisezo. (Mala. 3:1) Naa atuzi Bakreste ba buhata, ba ba li kalulo ye swabisa maswe ya “Babilona yo mutuna,” kakuli naa ba fumani ni mulatu wa ku sulula mali ni wa ku isilafaza ka ku ikenya mwa litaba za linaha.—Sin. 18:2, 3, 24.
Kreste U Kenisa Mutangaa Hae
3, 4. (a) Kreste naa petile musebezi mañi ka ku ba “Lingeloi” la Jehova? (b) Jehova ni Jesu ne ba fumaniñi ha ne ba tatubile tempele? (c) Jesu ka ku ba Toho ya puteho, naa file mutanga musebezi mañi?
3 Hape, Jehova ni “Lingeloi” la hae ha ne ba tatubile tempele ya swanisezo, ne ba fumani Bakreste ba niti be ne ba sebeleza mwa lapa la fa lifasi la tempele yeo, ili be ne ba sa swalisani ni likeleke za Bukreste bwa buhata. Kono nihaiba Bakreste ba ba tozizwe bao, kamba “bana ba Livi,” ne ba tokwa ku keniswa. Mupolofita Malaki naa polofitile ka za taba yeo kuli: “[Jehova] u ka ina inzaa shengunukisa ni ku kenisa silivera; u ka kenisa bana ba Livi, a ba kenise mo ku kenisezwa gauda ni silivera; mi ba ka tahiseza Muñaa Bupilo matabelo ka mukwa o lukela.” (Mala. 3:3) Jehova naa itusisize ‘Lingeloi la hae la bulikani,’ ili Kreste Jesu, ku kenisa “Isilaele wa Mulimu” yo.—Magal. 6:16.
4 Nihakulicwalo, Kreste naa fumani Bakreste ba ba tozizwe ili be ne ba sepahala bao inze ba ikataza ku lukiseza balumeli lico za moya ka nako ye lukela. Ku zwa ka 1879, ba zwezipili ku hasanya litaba za niti ze mwa Bibele ze ama Mubuso wa Mulimu ka ku itusisa magazini ye. Jesu naa polofitile kuli ka “nako ya [naa] ka fita” ku to tatuba batanga ba hae mwa nako ya “ku fela kwa lifasi,” naa ka fumana mutanga inzaa ba fa “lico ka nako ye lukela.” Naa ka bulelela mutanga yo kuli u na ni mbuyoti mi naa ka “mu beya fa bukombwa bwa za luwile kaufela” fa lifasi. (Mat. 24:3, 45-47) Ka ku ba Toho ya puteho ya Sikreste, Kreste u itusisize “mutanga ya sepahala, ya na ni kutwisiso” yo ku babalela lika kaufela ze ama Mubuso wa Hae fa lifasi. U zamaisa “batanga” ba hae ba ba tozizwe ni balikani ba bona ba “lingu ze ñwi” ka ku itusisa Sitopa se si Etelela.—Joa. 10:16.
Kreste U Kutula Lukau Lwa Lifasi
5. Muapositola Joani naa boni Mulena ya li Mesia inze a ezañi mwa pono?
5 Muapositola Joani naa boni pono ya nto ye ñwi ya naa ka eza Mulena ya li Mesia mwa “lizazi la Mulena,” hamulaho wa ku beiwa fa bulena ka 1914. Joani naa ñozi kuli: “Na talima, mi na bona lilu le lisweu; mi fa lilu ku na ni yo muñwi ya inzi, ya swana inge Mwanaa mutu, a apezi kuwani ya bulena ya gauda kwa toho, mi a sweli ka lizoho cekesi ye buhali.” (Sin. 1:10; 14:14) Joani naa utwile lingeloi le liñwi le ne li zwa ku Jehova ha ne li bulelela Mukutuli yo kuli a pose cekesi ya hae kakuli “lukau lwa lifasi lu buzwize kale.”—Sin. 14:15, 16.
6. Ki nto mañi ye ne ka ezahala mwa simu ye ne cezwi buloto, nako ya kutulo i si ka fita kale?
6 Ku kutulwa kwa “lukau lwa lifasi” lo, ku lu hupulisa nguli ya Jesu ya buloto ni mufuka. Jesu naa ipapanyize ni muuna ya naa cezi peu ya buloto mwa simu ya hae, ya naa na ni sepo ya ku kutula lukau lwa buloto bo bunde. Mi buloto bo bu yemela “bana ba mubuso,” bona Bakreste ba niti ba ba tozizwe ba ba ka busa ni Kreste mwa Mubuso wa hae. Kono ka nako ya busihu, sila, yena “Diabulosi,” naa tilo cala mufuka, o yemela “bana ba ya maswe,” mwa simu yeo. Mucali a laela babeleki ba hae kuli ba tuhele buloto ni mufuka li hulele hamoho ku fitela nako ya kutulo, yona “nako ya ku fela kwa lifasi.” Ka nako yeo, naa ka luma mangeloi a hae ku to kauhanya buloto kwa mufuka.—Mat. 13:24-30, 36-41.
7. Kreste u kutula cwañi “lukau lwa lifasi”?
7 Jesu u zwezipili ku zamaisa musebezi wa ku kutula mwa lifasi kaufela, mi ka ku eza cwalo u talelelize pono ya naa boni Joani. Ku kutulwa kwa “lukau lwa lifasi” ne ku kalile ka ku kubukanywa kwa “bana ba mubuso” ba ba sa li teñi fa lifasi. Palo kaufela ya “bana ba mubuso” ki 144,000 mi ki bona ba ba li “buloto” bo bu bulezwi mwa nguli ya Jesu. Shutano ye mwahalaa Bakreste ba niti ni ba buhata ne i bonahezi hande hasamulaho wa Ndwa ya Lifasi ya Pili. Shutano yeo ne i tusize hahulu mwa ku kubukanywa kwa lingu ze ñwi, ze li kalulo ya bubeli ya ku kutulwa kwa “lukau lwa lifasi.” Batu bao haki “bana ba mubuso,” kono ki “buñata bo butuna” bwa batu ba ba tabela ku busiwa ki Mubuso wo. Ba kutulwa mwahalaa batu “ba mishobo kaufela, ni ba macaba, ni ba lipuo kaufela.” Ba ipeya kwatasaa Mubuso wa Mesia, o mwa mazoho a Kreste Jesu ni “ba ba kenile” ba 144,000 ba ba ka busa ni yena mwa mulonga wa kwa lihalimu wo.—Sin. 7:9, 10; Dan. 7:13, 14, 18.
Nzila ya Etelela ka Yona Liputeho Kreste
8, 9. (a) Ki nto mañi ye bonisa kuli Kreste ha talimangi feela muzamao wa puteho mukatumbi kono u bonanga ni muzamao wa mañi ni mañi mwa puteho? (b) Sina mo si boniseza siswaniso se si fa likepe la 26, ki lifi “ze tungile za Satani” ze lu swanela ku ambuka?
8 Mwa taba ye felile, lu itutile kuli Kreste naa bona muinelo wa puteho ni puteho ya mwa miteñi ya baapositola. Kacenu, Mueteleli wa luna Kreste ya busa ili ya filwe “bulena kaufela mwa lihalimu ni mwa lifasi,” ki yena ya zamaisa liputeho za mwa lifasi lote ni baokameli ba zona. (Mat. 28:18; Makolo. 1:18) Jehova “u mu file kuli fahalimwaa linto kamukana ibe yena toho” ya puteho ya ba ba tozizwe. (Maef. 1:22) Kacwalo, Kreste wa bona lika kaufela ze ezahala mwa liputeho za Lipaki za Jehova ze fitelela 100,000.
9 Jesu naa lumezi puteho ya Tiyatira wa ikale lushango lo: “Ki ze za bulela Mwanaa Mulimu, ye meeto a hae a bonahala sina lulimi lwa mulilo, . . . u li: Ni ziba misebezi ya hao.” (Sin. 2:18, 19) Naa kalimezi batu ba mwa puteho yeo kakuli ne ba na ni mizamao ye maswe mi ne ba lata ku eza feela se si latwa ki lipilu za bona. Naa ize ku bona: “Ki Na ya tatuba liteka ni lipilu; mi ni ka fa mutu ni mutu ka ku ya ka misebezi ya hae.” (Sin. 2:23) Manzwi ao a bonisa kuli Kreste ha bonangi feela muzamao wa puteho mukatumbi kono u talimanga ni muzamao wa mañi ni mañi mwa puteho. Jesu naa babalize Bakreste ba mwa Tiyatira be ne ba “si ka ziba ze tungile za Satani.” (Sin. 2:24) Kacenu hape, u tabela batu kaufela ba ba sa ikenyi mwa lika “ze tungile za Satani” ka ku itusisa Intaneti kamba lipapali za lindwa za fa kompyuta kamba ku latelela mihupulo ya butu ye lumeleza likezo ze fosahalile. U tabile hahulu ku bona Bakreste ba bañata kacenu ba ba itombola ni ku ikataza ku eza mo ba konela kaufela ku latelela zamaiso ya hae mwa bupilo bwa bona!
10. Buka ya Sinulo i bonisa cwañi kuli Kreste u zamaisa maeluda ba liputeho, kono maeluda ba swanela ku lemuha nto mañi?
10 Kreste u etelela ka lilato liputeho za hae za fa lifasi ka ku itusisa maeluda. (Maef. 4:8, 11, 12) Mwa miteñi ya baapositola, baokameli kaufela ne ba tozizwe ka moya. Mwa buka ya Sinulo ne ba bonisizwe sina linaleli ze mwa lizoho la bulyo la Kreste. (Sin. 1:16, 20) Kacenu, maeluda ba bañata mwa liputeho ki ba lingu ze ñwi. Ni bona ba konwa ku bulelwa kuli ba zamaiswa ki Kreste kakuli ba ketiwanga hamulaho wa ku lapela hahulu ni ka zamaiso ya moya o kenile. (Lik. 20:28) Nihakulicwalo, ba lemuha kuli Kreste u zamaisa balutiwa ba hae ba ba li fa lifasi ka ku itusisa sikwatanyana sa baana ba Sikreste ba ba tozizwe ba ba li Sitopa se si Etelela.—Mu bale Likezo 15:6, 28-30.
“Taha Mulena Jesu”
11. Ki kabakalañi ha lu nyolezwi ku bona Mueteleli wa luna ha taha kapili?
11 Mwa sinulo ya naa filwe muapositola Joani, Jesu naa bulezi ka ku kuta-kutela kuli wa taha kapili. (Sin. 2:16; 3:11; 22:7, 20) Ku si na ku kakanya, naa talusa za ku taha ku to atula Babilona yo Mutuna ni lifasi la Satani le li maswe. (2 Mates. 1:7, 8) Bakeñisa kuli naa nyolezwi ku bona bupolofita bo bunde bo ha bu talelezwa, muapositola Joani wa musupali naa ize: “Amen; taha Mulena Jesu!” Ni luna ba ba pila mwa nako ya maungulelo a lifasi le li maswe le, lu nyolezwi ku bona Mueteleli ni Mulena wa luna ha taha sina mubusi wa Mubuso wa Mulimu ku to kenisa libizo la Ndatahe ni ku to bonisa kuli bubusi bwa Mulimu ki bo bu lukile.
12. Ki musebezi ufi wa ka peta Kreste pili lifasi le li si ka sinyiwa kale?
12 Pili Jesu a si ka taha ku to sinya lifasi la Satani, ba mafelelezo ku ba 144,000 ba ka be ba swailwe lwa mafelelezo. Bibele i bulela ka ku utwahala kuli lifasi la Satani ha li na ku sinyiwa ku fitela ba 144,000 ha ba ka swaiwa lwa mafelelezo kaufelaa bona.—Sin. 7:1-4.
13. Kreste u ka bonisa cwañi kuli u tile ka nako ya kalulo ya pili ya “ñalelwa ye tuna”?
13 Batu ba bañata mwa lifasi ha ba si ka lemuha “ku taha” kwa Kreste sina Mulena ka 1914. (2 Pit. 3:3, 4) Kono ona cwale-cwale fa, u ka bonisa kuli u tile ka ku tahisa likatulo za Jehova fahalimu a lifasi kaufela la Satani. Ku sinyiwa kwa “mutu wa sibi,” ya yemela baeteleli ba Bukreste bwa buhata, ku ka ba sisupo sa ku “iponahalisa [kwa Kreste], fa ku taha kwa hae.” (Mu bale 2 Matesalonika 2:3, 8.) Nto yeo i ka bonisa hande fo ku sweu kuli Kreste ki Muatuli ya ketilwe ki Jehova. (Mu bale 2 Timotea 4:1.) Bukreste bwa buhata, ili kalulo ya Babilona yo Mutuna ye na ni muzamao o maswe hahulu, bu ka sinyiwa pili, kihona bulapeli kaufela bwa buhata bu ka sinyiwa. Jehova u ka susumeza babusi ba lifasi ku sinya lihule leo. (Sin. 17:15-18) Yeo ikaba kalulo ya pili ya “ñalelwa ye tuna.”—Mat. 24:21.
14. (a) Ki kabakalañi kalulo ya pili ya ñalelwa ye tuna ha i ka fukuzwa? (b) “Sisupo sa Mwanaa mutu” si ka ama cwañi batu ba Jehova?
14 Jesu naa bulezi kuli mazazi a ñalelwa ye tuna a ka fukuzwa “kabakala ba ba ketilwe,” ili Bakreste ba ba tozizwe ba ba sa li teñi fa lifasi. (Mat. 24:22) Jehova ha na ku lumeleza kuli Bakreste ba ba tozizwe ni balikani ba bona ba lingu ze ñwi ba sinyiwe hamoho ni bulapeli bwa buhata. Jesu naa zwezipili ku bulela kuli “ñalelwa ya mazazi ao i mano fela,” ku ka ba ni lisupo fa lizazi, fa kweli, ni fa linaleli, “mi sisupo sa Mwanaa mutu si ka bonahala mwa lihalimu.” Nto yeo i ka tahisa kuli ‘macaba kaufela a lifasi a ikalelwe.’ Kono ba ba tozizwe, ba ba na ni sepo ya ku yo pila kwa lihalimu, ni balikani ba bona ba ba na ni sepo ya ku pila fa lifasi, ha ba na ku ikalelwa. Ba ka ‘talimisa meeto kwahalimu mi ba ka inuka, kakuli ku liululwa kwa bona ku se ku li fakaufi.’—Mat. 24:29, 30; Luka 21:25-28.
15. Kreste u ka eza musebezi mañi ha ka taha?
15 Pili a si ka feleleza kale ku tula kwa hae, Mwanaa mutu u ka taha ka nzila ye ñwi hape. Naa polofitile kuli: “Mwanaa mutu nako ya ka taha mwa kanya ya hae, a na ni mangeloi a hae kaufela, u ka ina fa lubona lwa kanya ya hae. Ku ka kopana fapilaa hae macaba kaufela; mi u ka keta ba bañwi ku ba bañwi, sina mulisana ha keta lingu mwa lipuli. U ka beya lingu ku la hae la bulyo, a beye lipuli ku la nzohoto.” (Mat. 25:31-33) Fo ku talusa kuli Kreste u ka taha sina Muatuli ku to ketahanya batu ba “macaba kaufela” ka likwata ze peli: “lingu,” ili batu ba ba tusize banyani ba hae (Bakreste ba ba tozizwe ba ba li fa lifasi), ni “lipuli,” ili batu “ba ba sa ipeyi kwatasaa Evangeli ya Mulena Jesu.” (2 Mates. 1:7, 8) Lingu li taluswa kuli ki “ba ba lukile,” mi ba ka fiwa “bupilo bo bu sa feli,” kono ba ba li lipuli bona “ba ka ya mwa manyando a sa feli,” ili ku yundiselezwa.—Mat. 25:34, 40, 41, 45, 46.
Jesu U Feleleza ku Tula Kwa Hae
16. Mueteleli wa luna Kreste u ka feleleza cwañi ku tula kwa hae?
16 Ba ba ka busa ni Kreste sina malena ni baprisita ha se ba swailwe kaufelaa bona mi lingu ha se li zibahalile ni ku beiwa kwa lizoho la hae la silyo kuli li piliswe, Kreste u ka feleleza “ku tula” kwa hae. (Sin. 5:9, 10; 6:2) Jesu u ka etelela mpi ya mangeloi a hae a maata ni banyani ba hae ba ba zusizwe kwa bafu kuli a sinye lifasi kaufela la Satani. (Sin. 2:26, 27; 19:11-21) Kreste u ka feleleza ku tala kwa hae ha ka sinya lifasi le li maswe la Satani. Ku zwa fo, u ka nepela Satani ni badimona mwa mukoti ka lilimo ze sikiti.—Sin. 20:1-3.
17. Kreste u ka isa kai lingu ze ñwi za hae mwa Puso ya Lilimo ze Sikiti, mi lu swanela ku tundamena ku ezañi?
17 Ha naa bulela ka za “buñata bo butuna” bwa lingu ze ñwi, ze ka punyuha mwa ñalelwa ye tuna, muapositola Joani naa polofitile kuli “Ngunyana ya mwahali a Lubona u ka ba lisa, a ba ise kwa maweluwelu a mezi a bupilo.” (Sin. 7:9, 17) Kaniti, mwa Puso ya Lilimo ze Sikiti, Kreste u ka zwelapili ku etelela lingu ze ñwi, ze teeleza luli kwa linzwi la hae, mi u ka li isa kwa bupilo bo bu sa feli. (Mu bale Joani 10:16, 26-28.) Kacwalo ha lu lateleleñi ka busepahali Mueteleli wa luna ya li mulena—ku zwa ka nako ya cwale mane ku yo li ti mwa lifasi le linca la lu sepisize Jehova!
Lundululo
• Kreste naa ezizeñi ha mano beiwa fa lubona?
• Kreste u itusisa bo mañi kuli a etelele liputeho?
• Mueteleli wa luna Kreste u ka taha hape ka linzila lifi?
• Kreste u ka zwelapili ku lu etelela mwa lifasi le linca ka mukwa ufi?
[Lipuzo za Tuto]
[Siswaniso se si fa likepe 29]
Kreste u ka bonahalisa kuli u tile ha ka sinya lifasi le li maswe la Satani