Nlomboli Yetu Wunakudikita Makonu

“Hakuya nakwimika mushindu kulonda nawa akemikaña mushindu ho-o.”—CHIM. 6:2.

1, 2. (a) Indi mudimu waKristu wawanta watachikili mu 1914 awulumbulula ñahi muBayibolu? (b) Mudimwinyi wunakukoñayi Kristu kufuma hamuswanyikiluwu?

 KRISTU amuswanyikili hetanda nakwikala Mwanta waWanta wawuMesiya waYehova mu 1914. Indi chayinu mpinji twamufwikijaña ñahi? Komana twamufwikijaña neyi himwanta watoñojokaña chikupu, wasumbilaña hamaseki mpinji yejima kulonda yamoni chinakuhanda chipompelu chindi? Neyi dichitwamufwikijaña, twatela kuhimpa yitoñojoka yetu. Mumukanda waMasamu niChimwekeshu amulumbulula Yesu nawu himwanta wunakandami hakawalu, nakuya “nakwimika mushindu kulonda nawa akemikaña mushindu ho-o,” nakutwalekahu ‘kushinda.’—Chim. 6:2; Mas. 2:6-9; 45:1-4.

² Chuma chatachi chakoñeliyi Kristu kufuma hamuswanyikiluwu hetanda wamushindili ‘chazañombi nawañelu jindi.’ Hakwikala mukulumpi wawañelu Mikeli walombolaña añelu jindi, Kristu wanatili Satana niandemoni jindi kufuma mwiwulu mwajila nakuyumbila hamaseki. (Chim. 12:7-9) Kuhiñahu, hakwikala “ntemesha yachitiyañenu” chaYehova, Yesu wenjili naTata yindi nakutala mutembeli yakuspiritu. (Mal. 3:1) Wamusompesheli Kristendomu, “Babiloni muneni” wasweja kutama, wamuwanini namuloña wamashi niwakwila wuvumbi wakuspiritu nakaayi kansañu jamatuña nachiyuulu.—Chim. 18:2, 3, 24.

 Kristu Watookeshaña Nduñu Yindi Waheseki

3, 4. (a) Mudimwinyi wakalakeliyi Kristu hakwikala “ntemesha” yaYehova? (b) Chenjiluwu nakutala tembeli awaninidi, nawa hakwikala Mutu wachipompelu, Yesu waheni mudimwinyi?

³ Yehova ‘nintemesha’ yindi chenjeluwu nakutala tembeli yakuspiritu yekala muchipañu chaheseki awaninumu izanvu dawakwaKristu alala, abula kwikala mumachaachi aKristendomu. Hela chochu, awa akwaKristu awayishewa, hela “anyana kaLevi,” niwena ateleleli kuyitookesha. Kwesekeja nachashimwineñahu dehi kaprofwetu Malaki nindi: “[Yehova] wakashakama neyi mukwakuzakasa, neyi mukwakutookesha siliva, wakatookesha anyana kaLevi, wakayizakasa neyi chazakasañawu wuru nasiliva, nichakamulambulawu Yehova nyilambu yakuloña.” (Mal. 3:3) Yehova wazatishili “ntemesha yachitiyañenu,” Kristu Yesu, kulonda yatookeshi aIsarela akuspiritu.

⁴ Eñañi, Kristu wawanini awa akwaKristu ashinshika awayishewa anakudikita chikupu nakwinka akwetala dawu achikuhwelelu yakudya yakuspiritu hampinji yatelela. Kufuma mu 1879, anatwalekuhu nakusoneka nsañu yalala yamuBayibolu yahoshaña haWanta waNzambi muyinu magazini, mumpinji yayiwahi hela yakala. Yesu waprofweteleñahu dehi nindi, “hakenzayi” nakutala yuma yindi hampinji ‘yakukuma nyaka yamakonu,’ wakawana nduñu yindi nakuhana ‘yakudya hampinji yatelela.’ Iwu nduñu akamutena nawu wakooleka nawa “wakamwinka mudimu wakuhemba yuma yindi yahetayi yejima” hamaseki. (Mat. 24:3, 45-47) Hakwikala Mutu wachipompelu chawakwaKristu, Kristu wazatishaña iwu ‘nduñu wamaana nikashinshi’ hakulombola yuma Yindi yaWanta hamaseki. Kuhitila Mwizaza Dalombolaña, Yesu walombolaña “amwitala” dindi awayishewa niamabwambu jawu “anyikoku acheñi.”—Yow. 10:16.

Mudimu Wakumuna Hamaseki

5. Chumanyi chamweniyi kapostolu Yowanu muchimwenu chakoñeleñayi Mwanta wawuMesiya?

⁵ Kapostolu Yowanu wamweni chuma chikwawu muchimwenu chikakoña Wanta wawuMesiya ‘mwifuku daMwanta,’ hanyima yakumuswanyika hetanda mu 1914. Yowanu wasonekeli nindi: “Nami nitali, hinukumona ivu ditooka. Hevu odu hashakama wumu wudi neyi mwana kumuntu; kamutu windi kudi chibaaba chawuru, kuchikasa chindi kudi chikwakwa chatwa.” (Chim. 1:10; 14:14) Yowanu watiyili kañelu atemesheluwu kudi Yehova nakuleja Mukwakumuna yazuyizuyi chikwakwa chindi muloña “mpinji yakumuna yinashiki dehi.”—Chim. 14:15, 16.

6. Chumanyi chahosheliyi Yesu nindi chakamwekana mukuhita kwampinji?

⁶ Iwu mudimu ‘wakumuna yuma yaheseki’ watwanukishaña chishimu chaYesu chatidiku namatahu. Yesu wadesekejeli namuntu wakuwili mbutu yatidiku mwitempa dindi nakukuhwelela nindi wakañula tidiku yayiwahi chikupu, yemenañaku “anyana kawanta,” dikwila nawu akwaKristu alala awayishewa amba kayuula hamu nindi muWanta windi. Ilaña nampinji  yawufuku, chilumbu, ‘Diyabolu,’ wayili nakukuwamu matahu, dikwila nawu “anyana kawatama.” Mukwakukuwa walejeli ankoñi jindi aleki tidiku nimatahu akulili hamu kushika nihampinji yakumuna, “hamba kakuma nyaka yinu.” Chiyakashika iyi mpinji, wakatemesha añelu jindi kulonda akambuli tidiku namatahu.—Mat. 13:24-30, 36-41.

7. Indi Kristu nakuzata ñahi mudimu ‘wakumuna yuma yahamaseki’?

⁷ Hakushikijewa kwachimwenu chamumwekesheleluwu Yowanu, Yesu nakulombola mudimu wakumuna mukaayi. Mudimu ‘wakumuna yuma yaheseki’ watachikili nakupompesha ashalahu a 144,000 “anyana kawanta,” “tidiku” yashimwiniyi Yesu muchishimu. Chaambu chekala hakachi kawakwaKristu alala niakutwamba chamwekeni nankashi hanyima yaNjita yaKaayi Kejima Yatachi, nawa chaleñeleli kwikali chibalu chamuchiyedi ‘chayuma yaheseki yakumunawu,’ dikwila nawu kupompesha anyikoku acheñi. Awa bayi neyi ‘hiyanyana kawantaku,’ ilaña ‘hiizaza deneni,’ dawantu anakukeña kwikala muniwu Wanta. Anakuyifumisha hadi “antu amwacheñi namwacheñi ejima, ninyuza yawantu yejima, niakwamadimi eñi naeñi.” Ovwahilaña Wanta waMesiya, watuñewa naKristu Yesu nia 144,000 “akwakujila” akayula nindi munfulumendi yamwiwulu.—Yish. 7:9, 10; Dan. 7:13, 14, 18.

Chalombolañayi Yipompelu

8, 9. (a) Chumanyi chamwekeshaña nawu Kristu watalaña yililu yayipompelu yejima nichihandilu chawantu ejima amuchipompelu? (b) Kwesekeja nachinamwekeshuwu hefu 26, ‘yuma yaSatana yakunama’ yitwatela kutondolwela hiyumanyi?

⁸ Muchibaaba chinafumuhu twamweni Kristu chatalileñayi chihandilu chakuspiritu chawantu amuchipompelu chamuyaaka nkulakaji yatachi C.E. Makonu, hakwikala Mwanta wunakuyula wenkawu “Ñovu jamwiwulu nijahamaseki jejima,” Kristu Nlomboli yetu nakulombola chikupu yipompelu yamukaayi kejima niankoñi amuniyi yipompelu. (Mat. 28:18; Kol. 1:18) Yehova “wamukunjika dehi kwikala mutu wahewulu dayuma yejima kuchipompelu” chawawayishewa. (Efwes. 1:22) Dichi, wamonaña yuma yejima yamwekanaña muyipompelu yawaYinsahu jaYehova yakubadika ha 100,000.

⁹ Yesu watemesheli mazu kuchipompelu chakushankulu chaTiyatira nindi: “Nahoshi yumiyi, yowu Mwana kaNzambi, wukweti mesu adi neyi muzuzu wakesi, . . . Neluki nyidimu yeyi.” (Chim. 2:18, 19) Wahosholeli antu amuchipompelu hamuloña wayililu yawu yatama, yakwikala nalwisu, wayilejeli nindi: “Natalatalaña munyichima mwivumu; nakanyika wejima wenu hamuntu hamuntu mwesekela nyidimu yenu.” (Chim. 2:23) Awa mazu anakumwekesha nawu Kristu watalaña hayililu yayipompelu yejima nihachihandilu chamuntu nimuntu wamuchipompelu. Yesu wahamekeli akwaKristu amuTiyatira ‘abulili kwiluka yuma yaSatana yakunama.’ (Chim. 2:24) Chochimu nimakonu, wetejaña atwansi hela akulumpi, abulaña kudiñija ‘muyuma yaSatana yakunama’ kuhitila mumaIntaneti hela muyisela yavidiyo yamadombu hela kuhitila mukwiteja yuma yahoshañawu antu yabula kutelela. Wazañalalaña chamonayi akwaKristu amavulu makonu anakuzata nañovu nawa anakudihana chikupu kulonda alondeleña wunlomboli windi muyuma yejima muchihandilu chawu!

10. Indi njila yalombwelañamu Kristu aeluda amuchipompelu anayilumbululi ñahi, nawa chumanyi chatela kwilukawu?

¹⁰ Kristu wanlombolaña chachiwahi yipompelu yindi yahamaseki kuhitila mudi aeluda atondawu. (Efwes. 4:8, 11, 12) Muyaaka nkulakaji yatachi, ankoñi ejima adiña atondewa naspiritu. Mumukanda waChimwekeshu ayilumbulwili nawu hitutumbwa tudi muchikasa chaKristu chachidiilu. (Chim. 1:16, 20) Makonu, aeluda amavulu amuyipompelu ekala mwizaza dawanyikoku acheñi. Niwena tunateli kuyimona netu ayilombolaña kudi Kristu muloña hakutonda aeluda kwekalaña kulomba nankashi nikulondela wunlomboli waspiritu yajila. (Yil. 20:28) Hela chochu, eluka nawu Kristu nakuzatisha kadizanvu kanyanya kawamayala akwaKristu awayishewa ekala Mwizaza Dalombolaña kulonda alomboleña nikutala  atumbanji twindi heseki.—Tañenu Yililu 15:6, 28-30.

“Inzaña Mwanta Yesu”

11. Muloñadi chitwakeñeshelaña netu Nlomboli yetu yenzi swayi?

¹¹ Muchimwekeshu chamumwekesheleluwu kapostolu Yowanu, Yesu wahosheli kakavulu nindi nakwinza swayi. (Chim. 2:16; 3:11; 22:7, 20) Chakadi kujina, wadiña nakutena chakenzayi nakujilumuna Babiloni Muneni nikaayi kaSatana katama kejima. (2 Tesa. 1:7, 8) Hamuloña wakukeña kumona kushikijewa kwayuma yayiwahi yejima yashimwinuwu dehi, kapostolu Yowanu wakashinakaji wahosheli nindi: “Amena, inzaña Mwanta Yesu.” Etu tunakushakama mumpinji yakukuma kwakanu kaayi katama twatalilaña chakenzayi Nlomboli nawa Mwanta wetu muñovu jaWanta kulonda yakalemeshi ijina daTata yindi nikuyiñisha chiyuulu Chindi.

12. Mudimwinyi wakamanishayi Kristu henohu kanda ombuku mpepela yakujilumuna nachu?

¹² Henohu Yesu kanda yajilumuni chiyuulu chaSatana chitunakumona namesu, muntu wakukumishaku wahezaza dawa 144,000 aIsarela akuspiritu wakatambwila chilamiku chakukumishaku. Bayibolu yalumbulula chikupu nawu mpepela yakujilumuna nachu kaayi kaSatana hiyakayumbakuku sampu mudimu wakulamika a 144,000 ejima wunamani.—Chim. 7:1-4.

13. Indi Kristu wakamwekesha ñahi kumwekana kwindi muchibalu chatachi ‘chalukadi lwasweja’?

¹³ ‘Kumwekana’ kwaKristu kwatachikili mu 1914 hiyakwiluka kudi antu amavulu hamasekiku. (2 Pet. 3:3, 4) Hela chochu, katataka yamwekeshi kumwekana kwindi kuhitila mukuleta wunsompeshi waYehova wakujilumuna yuma yamboka-mboka yamukaayi kaSatana. Chakamujilumunawu “muntu wanshidi,” akulumpi amuKristendomu, akeluka “chakamwekanayi Mwanta Yesu hakenzayi.” (Tañenu 2 Atesalonika 2:3, 8.) Kukamwekesha chikupu nawu Kristu diyi Nsompeshi atondawu kudi Yehova. (Tañenu 2 Timotewu 4:1.) Kujilumuka kwaBabiloni Muneni watama kwakatachikilahu henohu kanda ajilumuni kaayi katama kawanta wansakililu yakutwamba. Yehova wakasha munyichima yawakulumpi jansañu jamatuña nachiyulu kulonda akamukisañani iwu chivumbi. (Chim. 17:15-18) Ichi dichakekala chibalu chatachi ‘chalukadi lwasweja.’—Mat. 24:21.

14. (a) Muloñadi chibalu chatachi chalukadi lwasweja chakachikeheshelawu? (b) Indi “chinjikijilu chaMwana kamuntu” chakalumbulukadi kudi antu jaYehova?

¹⁴ Yesu wahosheli nindi mafuku anilu lukadi akayikehesha muloña ‘wanyijimba yawatondewa,’ akwaKristu ashalahu awayishewa achidi heseki. (Mat. 24:22) Yehova hamba keteja nsakililu yakutwamba kulukuka nakujilumuna akwaKristu awayishewa niamabwambu jawu anyikoku acheñuku. Yesu wabombeleluhu nindi ‘hanyima yamafuku akalondashana mulukadi olu,’ hetañwa hakamwekana yinjikijilu, nihakakweji, nikututumbwa, “kulondela henohu, mwiwulu mwakamwekana chinjikijilu chaMwana kamuntu.” Ichi chakaleñela nyunza yahamaseki “yejima akatumpa.” Ilaña awayishewa, akweti kuchiñeja kwakuya mwiwulu, niamabwambu jawu, akweti kuchiñeja kwakushakama hamaseki hiyakatumpaku. Wena ‘akatala mwiwulu, akabandula nyitu yawu, muloña kukuula kwawu kwakashika kwakwihi.’—Mat. 24:29, 30; Luka 21:25-28.

15. Mudimwinyi wakazatayi Kristu chakenzayi?

¹⁵ Mwana kamuntu wakamwekena cheñi munjila yikwawu, henohu kanda yamanishi kwimika mushindu. Waprofweteli nindi: “Ilaña  chakenzayi Mwana kamuntu nalubanji lwakulema kwindi, hamu nawañelu jindi ejima, wakashakama hetanda dawanta dakulema kwindi. Akapompesha nyuza yejima kumesu indi; wakaambola muza namuza, neyi chaambulañayi kabiña anyikoku nawampembi. Anyikoku wakayisha kuchikasa chindi chachidiilu, ampembi kuchimunswa.” (Mat. 25:31-33) Iyi nsañu yinakutalisha kudi Kristu chakenzayi neyi Nsompeshi nakwambula antu ‘akunyuza yejima’ muyibalu yiyedi: “anyikoku,” hiyantu anakukwasha ana kwindi akuspiritu (akwaKristu awayishewa adi heseki) nawa “ampembi,” diwu “antu abula kwovwahila nsañu yaMwanta wetu Yesu yayiwahi.” (2 Tesa. 1:7, 8) Anyikoku, anatenuwu nawu “aloña,” akatambwila ‘wumi wahaya nyaka’ hamaseki, ilaña ampembi “akaya kwawu mukubabesha kwahaya nyaka,” hela kuyijilumuna.—Mat. 25:34, 40, 41, 45, 46.

Yesu Nakwimika Mushindu

16. Indi Kristu Nlomboli yetu wakamanisha ñahi kwimika mushindu?

¹⁶ Chakakumishayi kulamika anyanta jindi akekala atupristu akayulayi nawu nichakamanishayi kwambula anyikoku nakuyisha kuchikasa chindi chachidilu kulonda akayipulwishi, Kristu wukatwesha ‘kwimika mushindu.’ (Chim. 5:9, 10; 6:2) Chakalombolayi mukanka windi wawañelu añovu, chakadi kujina niana kwindi akasañulawu, wakajilumuna nyidimu yaSatana yejima yansañu jamatuña, njita, nimaheta aheseki. (Chim. 2:26, 27; 19:11-21) Kristu wakamanisha kwimika mushindu hampinji yakajilumunayi kaayi kaSatana. Kuhiñahu wakamumbila Satana niandemoni mwikela hadi ikombakaji dayaaka.—Chim. 20:1-3.

17. Kudihi kwakalombolayi Kristu anyikoku acheñi Muchiyuulu Chekombakaji daYaaka, nawa twatela kufwila kwiladi?

¹⁷ Kutalisha kudi “izaza deneni” dawanyikoku acheñi, akapuluka lukadi lweneni, kapostolu Yowanu waprofweteli nindi: “Kana kamukoku wekala mukachi ketanda dawanta, wakekala kabiña kawu, wakayilombolaña kutuseloki twameji awumi.” (Chim. 7:9, 17) Eñañi, Muchiyuulu chindi Chekombakaji daYaaka, Kristu wukatwalekahu nakulombola anyikoku acheñi, atiyililaña chikupu izu dindi, nakuyilombola kuwumi wahaya nyaka. (Tañenu Yowanu 10:16, 26-28.) Tufwilenu kutwalekahu nakulondela chikupu Nlomboli yetu nawa mwanta, chayinu mpinji nichitwakeñila mwituña dadiha datukanayi Yehova!

Tuhitulukenumu

• Chumanyi cheliliyi Kristu hanyima yakumuswanyika hetanda?

• Anyi anakuzatishayi Kristu hamaseki hakulombola yipompelu?

• Indi Kristu Nlomboli yetu wakenza munjilanyi?

• Indi Kristu wakatwalekahu ñahi nakutulombola kushika nimwituña dadiha?

[Malwihu aKuzatisha haKudiza]

[Mwevulu wudi hefu 29]

Kujilumuna kwakaayi katama kaSatana kwakamwekesha kumwekana kwaKristu