Tûn Laia Min Hruaitu Thatho Tak
Tûn Laia Min Hruaitu Thatho Tak
“Hneh chung leh hneh zêl tûrin a chhuak ta a.”—THUP. 6:2.
1, 2. (a) Kum 1914 aṭanga Isua’n lal anga a thiltih chu Bible-ah eng anga târ lan nge a nih? (b) Lal anga a ṭhut aṭangin Krista’n engtin nge hma a lâk?
KRISTA chu kum 1914 khân Pathian Jehova Messia Lalramah lal angin a ṭhu a. Ani chu eng angin nge kan mitthla? Lal thil ngaihtuah mûk tak, a lalṭhutthlênga ṭhua a kohhranho awm dân hre tûra a châng chânga rawn hawi thla ṭhîn mai angin em ni? Chutiang a nih chuan kan ngaih dân kan thlâk a ngai tihna a ni. Sâm leh Thu Puan bu chuan ani chu sakawr chung chuang lal thatho tak, ‘hneh chung leh hneh zêl tûra’ chhuak, a tâwp thlenga “hmuingîl” zêl tûr angin a târ lang a ni.—Thup. 6:2; Sâm 2:6-9; 45:1-4.
2 Lala a ṭhut hnua Krista thiltih hmasa ber chu “drakon leh a tirhkohte” a tihtlâwm hi a ni a. A vântirhkohte chunga thuneitu vântirhkoh chungnungber Mikaela a nih angin, Krista chuan Setana leh a ramhuaite chu vân thianghlim aṭangin lei lamah a paih thla a ni. (Thup. 12:7, 9) Tichuan, Pathian Jehova “thuthlung tirhkoh” a nih angin, Isua chu a Pa nên thlarau lam biak in enfiah tûrin an lo kal a. (Mal. 3:1) ‘Babulon Khaw Ropui’ zînga demawm ber, Kristianna ram chu thisen chhuahna avâng leh he khawvêl politics laka thlarau lama a uirêna avânga thiam loh chantîrin, a chungah ro a rêl a ni.—Thup. 18:2, 3, 24.
Lei Lama A Bâwih Thenfaina
3, 4. (a) Krista chuan Pathian Jehova “tirhkoh” a nih angin eng hna nge a hlen chhuah? (b) Biak in enfiahna chuan eng nge a târ lan a, kohhran Lû a nih angin, Isua’n eng ruahmanna nge a siam?
3 Pathian Jehova leh a “tirhkoh,” Isua’n thlarau lam biak in an enfiahna chuan chu biak in lei lam hungchhûng kawtlaiah Kristianna ram kohhrante zînga tel lo Kristian dik pâwl pakhat a awm tih a târ lang bawk. Amaherawhchu, chûng hriak thih Kristiante, a nih loh leh “Levia fate” ngei pawh chu thenfai an ngai a ni. Chu chu zâwlnei Malakia hrilh lâwkna: “[Jehova chu] tangkaraw rawhtuitu leh tithianghlimtu angin a ṭhu ang a, Levia fate a tithianghlim ang a, rangkachak leh tangkarua angin anmahni a tifai ang a; LALPA tân chuan felnaa thil hlântute an ni ang,” tih ang chiah a ni a. (Mal. 3:3) Pathian Jehova chuan a “thuthlung tirhkoh” Krista Isua chu thlarau lam Israelte thianfaitu atân a hmang a ni.
4 Mahse, Krista chuan chûng hriak thih Kristian rinawmte’n rinnaa an chhûngte tân a hun apianga thlarau lam chaw pe tûrin theih tâwp an chhuah tih a hmu a. Anni chuan kum 1879 aṭangin, hun khirh tak kârah pawh Pathian Ram chungchâng thutak chu he magazine-ah hian an la chhuah char char a ni. “Khawvêl tâwpna” hun chhûnga a chhûngte endik tûra “a lo kal” hunah, Isua chuan ‘a hun apianga thlarau lam chaw’ semtu bâwih chu a rawn hmu dâwn tih a sawi lâwk a. Ani chuan chu bâwih chu engthâwl a ti ang a, leia “a neih zawng zawng chungah hotuah a siam ang.” (Mt. 24:3, 45-47) Krista chuan Kristian kohhran Lû a nih angin, he “bawi rinawm, fing tak” hi leia Lalram kaihhnawih thil zawng zawng enkawltu atân a hmang a ni. Ani chuan hriak thih “a chhûngte” leh an ṭhian “berâm dang” tân Governing Body kal tlangin kaihhruaina a pe a ni.—Joh. 10:16.
Lei Buh Sengna
5. Tirhkoh Johana’n inlârnaah lal anga Krista thiltih eng nge a hmuh?
5 Kum 1914-a lal anga a ṭhut hnua Messia Lalin ‘Lalpa nîa’ a tih tûrte chu tirhkoh Johana chuan inlârnaah a hmu a. Ani chuan: “Ka han en a, tin, ngai teh, chhûm vâr ka hmu a; tin, chhûm chungah chuan mihring fapa ang tak hi rangkachak lallukhum khuma favah hriam tak kenga ṭhu ka hmu bawk,” tiin a ziak a ni. (Thup. 1:10; 14:14) Johana chuan Pathian Jehova vântirhkohvin ‘lei buh a ngui tawh’ avânga ât tûra Buh Sengtu a hrilh lai chu a hria a ni.—Thup. 14:15, 16.
6. Hun a liam zêla thil lo awm tûr Isua’n eng nge a sawi?
6 He ‘lei buh sengna’ hian Isua bu lem leh buh tak tehkhin thu min hriat chhuahtîr a ni. Isua chuan buh tak hlîr seng inbeiseia buh chi thehtu nên a intehkhin a, buh takin a entîr “ram fate” chu a Lalrama a rorêlpuitu tûr hriak thih Kristian dikte an ni. Mahse, zânah hmêlma pa “Diabola” chuan chu lovah chuan buh lem “mi sual fate” a lo theh a. Buh chi thehtu chuan a hnathawktute hnênah chuan buh lem leh buh takte chu ‘khawvêl tâwp’ thlenga ṭo zatîr tûrin a hrilh a ni. Chutih hunah chuan buh lem zîng ata buh tak thliar hrang tûrin a vântirhkohte chu a tîr ang.—Mt. 13:24-30, 36-41.
7. Engtin nge Krista chuan ‘lei buh sengna’ hna a thawh?
7 Johana hnêna inlârna pêk thlen famkim nân, Isua chuan khawvêl puma buh seng hna chu a huaihawt mêk a. ‘Lei buh seng’ hna chu Isua’n tehkhin thua a sawi “buh tak,” “ram fate” mi 144, 000 la bângte seng khâwmnaa ṭan a ni. Khawvêl Indopui I-na hnu chuan Kristian dik leh dik lo danglamna chu a lo lang chiang lehzual a, chu chuan ‘lei buh sengna’ hnuhnûng zâwk, berâm dangte seng khâwmna a awmtîr a ni. Chûng mite chu “ram fate” ni lovin, chu Lalrama khua leh tui tihnuam tak “mipui tam tak” an ni zâwk a ni. Anni chu ‘hnam tin, chi tin, leh ṭawng tin’ zîng aṭanga seng khâwm an ni a. Krista leh vân sawrkâra a rorêlpui tûr a ‘mi thianghlim’ 1,44,000-te hmanga din Messia Lalram hnuaiah an intulût a ni.—Thup. 7:9, 10; Dan. 7:13, 14, 18.
Kohhrante A Kaihhruaina
8, 9. (a) Krista chuan kohhran tinte nungchang a en bâkah, a chhûnga mi mal tinte nun kawng pawh a en tel bawk tih engin nge târ lang? (b) He mi phêka târ lan angin, “Setana thil thûk” engte nge kan pumpelh ang?
8 Thuziak hmasaah khân, Krista’n C.E. kum zabi khatnaa kohhran tinte thlarau lam dinhmun a bih chian dân kan hmu tawh a. Tûn lai hian, “lei leh vâna thuneihna zawng zawng” neitu Lalber a nih angin min Hruaitu Krista chuan khawvêl puma kohhranho leh chûnga rawngbâwl hotute chungah thatho takin lû a nihna chu a hmang a ni. (Mt. 28:18; Kol. 1:18) Pathian Jehova chuan ani chu ‘engkim zawng zawng chunga lû atân [hriak thih] kohhranho hnênah chuan a pe a.’ (Eph. 1:22) Chutiang a nih avângin, Jehova Thuhretute kohhran 1,00,000 chuang chhûnga thilthleng a engamah chu a hmuh hmaih hauh lo vang.
9 Hmân lai Thuatira kohhran hnênah, Isua chuan he thu: ‘Pathian Fapa, mit meialh ang neia . . . khân hêng thu hi a sawi a ni: I thiltihzia . . . ka hria,’ tih hi a thawn a. (Thup. 2:18, 19) Chu kohhrana mite chu nungchang bawlhhlawhna leh nawmsip bâwlna an ûm avânga hauvin: “Kei rilru leh thinlung entu ka ni, . . . tin, in thiltih ang zêlin ka pe ṭheuh ang che u,” tiin a hrilh a ni. (Thup. 2:23) Chu thu chuan Krista’n kohhran tinte nungchang a en bâkah, a chhûnga mi mal tinte nun kawng pawh a en tel bawk tih a târ lang. Isua chuan “Setana thil thûk . . . hre lo,” Thuatira khuaa Kristiante chu a fak a ni. (Thup. 2:24) Chutiang bawkin tûn laiah pawh Internet leh tharum thawhna video games emaw, a nih loh leh mihringte ngaihzamna rilru put hmang neihna emaw hmanga “Setana thil thûk” bih chian tum lo apui apangte chu a fak a ni. An nun kawng zawng zawnga a kaihhruaina zui tûra theih tâwp chhuah tûn laia Kristian tam takte thawh rimna leh inpêkna hmuh chu nuam a va ti dâwn êm!
10. Engtin nge Krista’n kohhran upate a kaihhruai dân chu târ lan a nih a, anni chuan eng nge an pawm ngai?
10 Krista chuan upate kal tlangin lei lama a kohhranho chu hmangaih takin a enkawl a. (Eph. 4:8, 11-13) Kum zabi pakhatnaa kohhran enkawltu zawng zawngte chu thlarauva hrin hriak thih an ni vek a. Thu Puan bu-ah chuan Krista kut ding lama arsite anga sawi an ni. (Thup. 1:16, 20) Tûn laiah chuan, kohhran upa a tam zâwkte chu berâm dang an ni a. Anni chu ṭawngṭaina leh thlarau thianghlim kaihhruaina hnuaia ruat an ni a, chuvângin Krista kaihhruaina hnuai, a nih loh leh a kut hnuaia awm anga ngaih ve theih an ni. (Tirh. 20:28) Mahse, anni chuan Krista’n leia a zirtîrte kaihruai tûrin Kristian mipa hriak thih tlêm tête chu Governing Body angin a hmang tih an pawm a ni.—Tirhkohte 15:6, 28-30 chhiar rawh.
“Lo Kal Ta Che, Lalpa Isu”
11. Engvângin nge kan Hruaitu chu lo kal thuai tûra kan duh?
11 Tirhkoh Johana hnêna pêk inlârnaah, Isua chuan a rawn kal thuai tûr thu vawi engemaw zât a sawi a. (Thup. 2:16; 3:11; 22:7, 20) Babulon Khaw Ropui leh Setana kalhmang suaksual pêng dang zawng zawng chunga rorêl tûra a lo kal tûr thu a sawina a ni tih a chiang hle. (2 Thes. 1:6-8) Thil ropui tak tak lo thleng tûr sawi lâwkte thlen famkimna chu hmuh nghâkhlel takin tirhkoh upa tawh tak Johana chuan: “Amen. Lo kal ta che, Lalpa Isu,” tiin a sawi chhuak a ni. Keini he khawvêl suaksual tak tâwpna huna chêngte pawh hian kan Hruaitu leh Lal chu a Pa hming tithianghlim tûr leh A lalchungnunna thiam chantîr tûra Lalram thuneihna nêna a lo kal hmuh chu kan nghâkhlel ve a ni.
12. Tihchhiatna thli chelh din lai mêk thlah a nih hmain Krista’n eng hna nge a thawh zawh ang?
12 Setana inawpna pâwl hmuh theih tichhe tûra Isua a lo kal hmain, thlarau lam Israel mi 1,44,000 la bângte chuan chhinchhiahna hnuhnûng ber an dawng ang. Bible chuan mi 1,44,000-te chhinchhiah kim an nih hma loh chuan Setana khawvêl tichhetu tûr thli chu chelh din a ni ang tih chiang takin a sawi.—Thup. 7:1-4.
13. Engtin nge Krista’n “hrehawm nasa tak” inṭan tirh lamah lal anga a lo thlen tawhzia a lantîr ang?
13 Kum 1914 aṭanga Lal anga Krista “lo thlenna” chu leia mi a tam zâwkte chuan an hre lo va. (2 Pet. 3:3, 4, New World Translation) Mahse, Setana khawvêl kalhmang hrang hrang chunga Pathian Jehova rorêlna thlentîrin, a lo thlen tawhzia chu a lantîr thuai ang. Kristianna ram sakhaw hruaitu “Dân Bawhchhepa” tihboralna chu ‘a lo kala inlârna,’ a nih loh leh lal anga a lo thlen tawhzia târ lanna chiang tak a ni ang. (2 Thessalonika 2:3, 8 chhiar rawh.) Chu chuan Krista’n Pathian ruat Rorêltu a nih anga thil a tihzia chiang takin a târ lang ang. (2 Timothea 4:1 chhiar rawh.) Babulon Khaw Ropui zînga demawm ber, Kristianna ram tihchhiatna chu he khawvêl suaksual taka sakhaw dik lo zawng zawng tihchhiat vekna bul inṭanna a ni ang. Pathian Jehova chuan he thlarau lam nawhchizuar hi tiboral tûrin politics hruaitute thinlungah a tîr dâwn a ni. (Thup. 17:15-18) Chu chu “hrehawm nasa tak” inṭanna a ni ang.—Mt. 24:21.
14. (a) Engvângin nge hrehawm nasa tak inṭanna chu tihtawi a nih ang? (b) “Mihring Fapa chhinchhiahna” chuan Pathian Jehova mite tân eng awmzia nge a neih?
14 Isua chuan chûng nî hrehawmna nasat tak chu leia Kristian hriak thih, “thlante avâng chuan” tihtawiin a awm dâwn tih a sawi a. (Mt. 24:22) Pathian Jehova chuan politics hruaitute’n sakhaw dik lo an beihnain hriak thih Kristiante leh an ṭhian berâm dangte a nuai bo tel chu a phal lo vang. Isua chuan “chûng ni hrehawm hnu lawkah” chuan nîah te, thlaah te, leh arsiahte chhinchhiahna a awm ang a, chutah, “Mihring Fapa chhinchhiahna chu vânah a lang ang” tih a sawi belh a ni. Chu thilthleng avâng chuan leia hnamte chu “an âwmte an inchûm ang.” Vân lam beiseina nei hriak thihte leh an ṭhian lei lam beiseina neite erawh chuan chutiang chuan an ti ve lo vang. Anni chuan ‘an en chhovin, an dâk chhuak ang; an tlanna tûr chu a hnaih tâk avângin.’—Mt. 24:29, 30; Lk. 21:25-28.
15. Krista chu a lo kal hunah eng hna nge a rawn thawh ang?
15 Hnehna a lâk zawh hmain, mihring Fapa chu kawng chi dangin a lo kal bawk a. Ani chuan: “Mihring Fapa hi chu, a vântirhkohte zawng zawng nên, a ropuinaa inthuama a lo kal hunah chuan, a ropuina ṭhutphahah a ṭhu ang a; a hmaah chuan hnam tin an inkhâwm ang a: berâm vêngtuin kêl zîng ata a berâmte a hlîr angin anniho chu a hlîr ang a; berâmte chu a ding lamah a dah ang a, kêlte erawh chu a vei lamah a dah ang,” tiin a sawi lâwk a ni. (Mt. 25:31-33) Hei hian ‘hnam tina’ mite pâwl pahniha thliar tûra Krista lo kalna a kâwk a ni: thlarau lama a unaute (leia hriak thih Kristiante) phûr taka ṭanpuitu tûr “berâmte” leh “kan Lalpa Isua chanchin ṭha âwih lo” “kêlte” hlîrna chu. (2 Thes. 1:6-8) “Mi felte” anga sawi berâmte chuan leia “kumkhaw nunna” an chang ang a; kêlte erawh chu “kumkhaw hremnaah,” a nih loh leh tihboralnaah an kal thung ang.—Mt. 25:34, 40, 41, 45, 46.
Isua’n A Hneh Famkim
16. Engtin nge min Hruaitu Krista’n a hneh famkim ang?
16 Krista’n lal leh puithiam ni tûr a ṭhiante a chhinchiah a, berâmte hlîr chhuaka chhandam ni tûra a ding lama a dah tawh bawk avângin, “hneh zêl” tûrin a kal chhuak thei a ni. (Thup. 5:9, 10; 6:2) Vântirhkoh sipai chak takte leh tholeh a unaute hruaitu ber a nih angin, ani chuan he leia Setana awpna hnuaia awm politics te, sipaiho te, leh sumdâwnna te chu a tiboral vek ang. (Thup. 2:26, 27; 19:11-21) Setana khawvêl suaksual a tihboral hunah Krista hnehna chu a famkim tawh ang. Tichuan, Setana leh a ramhuaiho chu kum sâng khat chhûng a tân leilâwtah a paih ang.—Thup. 20:1-3.
17. Krista chuan Kum Sâng Rorêl chhûngin a berâm dangte chu khawiah nge a hruai thlen ang a, eng nge tih kan tum tlat ang?
17 Hrehawm nasa taka dam khawchhuak tûr berâm dang zînga “mipui tam tak” chungchângah, tirhkoh Johana chuan “Berâm No, lalṭhutphah laia awm chu an vêngtu a ni ang a, nunna tuikhurahte a hruai ang,” tiin a sawi lâwk a ni. (Thup. 7:9, 17) Ni e, Krista chuan a Kum Sâng Rorêl chhûngin a thuâwih tak zettu berâm dangte chu a hruai zêl ang a, chatuan nunnaah a hruai thleng ang. (Johana 10:16, 26-28 chhiar rawh.) Min Hruaitu kan lal chu rinawm takin i zui zêl ang u—tûn aṭanga Pathian Jehova tiam khawvêl thar thlengin! (w10-E 09/15)
Ennawn Nân
• Lala ṭhuttîr a nih hnuah Krista chuan eng nge a tih?
• Krista chuan kohhranho kaihruai tûrin hmuh theih hmanrua eng nge a hman?
• Eng kawngin nge min Hruaitu Krista chu a lo la kal dâwn?
• Engtin nge Krista chuan khawvêl tharah min kaihhruai zêl dâwn?
[Zirlai Atâna Zawhnate]
[Phêk 31-naa milem]
Setana khawvêl suaksual tihboralna chuan Krista lal anga a lo thlen tawhzia a târ lang ang