Say Aktibon Lider Tayo Natan

“Sikatoy linma pian manalo tan sumpalen toy panatalo to.”​—APO. 6:2.

1, 2. (a) Panoy impaneskribe na Biblia ed si Kristo nanlapu la nen nagmaliw ya Ari nen 1914? (b) Antoray ginawa nen Kristo nanlapu la nen nagmaliw ya Ari?

SI Kristo et nagmaliw ya Ari na Mesianikon Panarian nen Jehova nen 1914. Antoy naiimadyin yon gagawaen to natan ed tawen? Kasin marendeen ed trono to, a sagpaminsan et onnenengneng diad dalin pian amtaen no komusta lay kongregasyon to? No bilang et ontan so iisipen tayo, nepeg tayon umanen itan. Dedeskribien na Salmos tan Apocalipsis si Kristo bilang akakabayon ari, a mamapasya “pian manalo tan sumpalen toy panatalo to.”​—Apo. 6:2; Sal. 2:6-9; 45:1-4.

² Say inmunan ginawa nen Kristo bilang ari et say impilaban to ed “dragon” tan ed saray demonyo to. Bilang Miguel ya arkanghel a komandante na saray anghel, imbasileng nen Kristo si Satanas tan saray demonyo to diad dalin. (Apo. 12:7-9) Insan, bilang “igaganggan na sipan,” si Jesus et kaiba nen Ama to ya angusisa ed espiritual a templo. (Mal. 3:1) Inukom toy sankaugesan a kabiangan na “Makapanyarin Babilonia,” say Kakristianoan, lapud dakel so dalan impaagus na satan tan “akilawanan” ed sistema na politika na sayan mundo.​—Apo. 18:2, 3, 24.

Nilinisan nen Kristo Iray Aripen To Diad Dalin

3, 4. (a) Anton kimey so sinumpal nen Kristo bilang “igaganggan” nen Jehova? (b) Antoy nalmoan sanen inusisa so espiritual a templo, tan bilang Ulo na kongregasyon et sioparay tinuro nen Jesus a mangasikaso ed “amin a kayarian to” diad dalin?

³ Diad impangusisa nen Jehova tan say “igaganggan” to ed espiritual a templo, nalmoan da a diad saban na satan diad dalin et walay grupo na saray tuan Kristiano ya agkabiangan na saray relihyon na Kakristianoan. Balet ta kaukolan met a nalinisan irayan alanaan a  Kristiano, odino “saray anak nen Levi.” Ontan so impropesiya nen propetan Malaquias: “[Si Jehova] onyurong naani a singa say manlinis tan mangogol na pilak, et gogolan to naani so saray anak nen Levi, et linisan to ra naani a singa say balitok tan say pilak; et sikara manbagat ira naani ed Jehova na saray bagat ed inkatunong.” (Mal. 3:3) Inusar nen Jehova so “igaganggan na sipan,” si Kristo Jesus, pian linisan irayan espiritual ya Israelita.

⁴ Anggaman ontan, nalmoan nen Kristo a gagawaen na sarayan matoor ya alanaan a Kristiano so anggaay nayarian da pian mangitaryay nipanpanaon ya espiritual a naakan parad sankaabungan to. Manlapu la nen 1879 et iyaabawag da lay katuaan a walad Biblia nipaakar ed Panarian na Dios panamegley na sayan magasin, maabig man so sirkumstansya odino andi. Impropesiya nen Jesus a sano usisaen to la ‘iray lingkor na sankaabungan to’ legan na “kasampotan na sistema na mundo,” nasabian toy sakey ya aripen a mangitataryay “naakan da diad dugan panaon.” Ibaga ton maliket itan ya aripen tan “turoen ton mangasikaso ed amin a kayarian to” diad dalin. (Mat. 24:3, 45-47) Bilang Ulo na Kristianon kongregasyon, inusar nen Kristo iyan “matoor tan makabat ya aripen” pian asikasoen so amin a kimey na kongregasyon To diad dalin. Tan panamegley na Mananguley ya Ulop et ididirehi toy alanaan ‘iran lingkor na sankaabungan to’ tan say kaiba ran ‘arum a karnero.’​—Juan 10:16.

Panag-ani Diad Dalin

5. Antoy anengneng nen Juan ed sakey a pasingawey a gawaen na Mesianikon Ari?

⁵ Wala ni anengneng nen apostol Juan diad pasingawey a gawaen na Mesianikon Ari ed “agew na Katawan” kayari Ton nitrono nen 1914. Insulat nen Juan: “Nia! anengneng koy sakey ya amputin lurem, tan diad lurem et walay akayurong a singa anak na too, a walay balitok a korona diad ulo to tan akaegna na sakey a makdem a palot.” (Apo. 1:10; 14:14) Arengel nen Juan so anghel nen Jehova ya imbaga to’d Manag-ani ya ‘usaren to lay palot to ta alutoluto la so aanien diad dalin.’​—Apo. 14:15, 16.

6. Antoy imbaga nen Jesus a nagawa antis na panaoy panag-ani?

⁶ Ipapanonot na sayan ‘panag-ani diad dalin’ imay ilustrasyon nen Jesus nipaakar ed trigo tan sisanyas. Inkompara nen Jesus so inkasikato ed laki ya angisibwag na bini na trigo diad uma to, tan iilaloan ton makapan-ani na maong a klase na trigo. Irerepresenta na saray trigo so “ananak na panarian”​—saray alanaan a tuan Kristiano a nakaiba ton manuley ed Panarian to. Balet diad labi et sinmabi so kabusol, “say Diablo,” tan angitanem met ditan na saray sisanyas​—saray “ananak na samay mauges.” Ingganggan na samay angisibwag na trigo iray komikimey to a paulyan da labat a manbansag ya ontubo iray trigo tan sisanyas anggad panaoy panag-ani, ya ontutukoy ed “sampot a panaon na sayan mundo.” Diad satan a panaon et ibaki to ray anghel to pian  ibiig iray trigo ed saray sisanyas.​—Mat. 13:24-30, 36-41.

7. Panon a susumpalen nen Kristo so ‘panag-ani diad dalin’?

⁷ Bilang kasumpalan na samay pasingawey ya anengneng nen Juan, indaulo nen Jesus so panag-ani diad interon mundo. Ginmapo so ‘panag-ani diad dalin’ sanen tinipon so nakekeraan a membro na 144,000 ya “ananak na panarian,” saramay “trigo” ed ilustrasyon nen Jesus. Kayari Sankamundoan a Guerra I, nagmaliw a mas mapatpatnag so pandumaan na saray tua tan palson Kristiano tan akatulong itan ed komaduan kabiangan na ‘panag-ani diad dalin’​—say panipon ed arum a karnero. Aliwa irayan “ananak na panarian” balet ta sakop ira na satan a Panarian tan tinawag iran “baleg ya ulop.” Sikaray anien ed ‘amin a baley, nasyon tan pansasalita.’ Maliket iran manpapasakop ed Mesianikon Panarian, a tugyopen nen Kristo Jesus tan say 144,000 a ‘masanto’ a miuley ed sikato diad satan a gobierno’d tawen.​—Apo. 7:9, 10; Dan. 7:13, 14, 18.

Panangidaulo ed Saray Kongregasyon

8, 9. (a) Antoy mangipapanengneng ya aliwa labat a say kondukta na interon kongregasyon so oobserbaan nen Jesus noagta ontan met ed kabibilay na kada membro? (b) Anton “aralem iran bengatla nen Satanas” so nepeg tayon paliisan, a singa nanengneng ed pahina 26?

⁸ Naaralan tayo ed imbeneg ya artikulo a si Kristo et interesadon maong tan mangoobserba ed espiritual a kipapasen na kada kongregasyon nen inmunan siglo C.E. Diad panaon tayo, bilang manuuley lan Ari et inter ed sikato so “amin a pakauley ed tawen tan diad dalin,” tan bilang Lider tayo et siansia nin idadaulo to iray kongregasyon ed interon mundo tan saray manangasikaso na saratan. (Mat. 28:18; Col. 1:18) Sikatoy ginawa nen Jehova ya “ulo na amin a bengatla parad kongregasyon” na saray alanaan. (Efe. 1:22) Kanian, nanenengneng toy amin a nagagawa ed masulok a 100,000 a kongregasyon na saray Tasi nen Jehova.

⁹ Oniay mensahe nen Jesus ed kongregasyon ed Tiatira nensaman: “Saraya so inkuan na Anak na Dios, a saray mata to et singa mandarlang ya apoy, . . . ‘Amtak iray gagawaen mo.’” (Apo. 2:18, 19) Binaat to ray membro na satan a kongregasyon lapud imoral tan makasarilin kabibilay da, ya inkuan to’d sikara: “Siak imay manguusisa ed saray bato tan puso, tan iter ko ed balang sakey ed sikayo so unong ed gagawaen to.” (Apo. 2:23) Napatnagan ed satan ya imbaga nen Kristo ya aliwa labat a say kondukta na interon kongregasyon so oobserbaan to noagta ontan met ed kabibilay na kada membro na kongregasyon. Kinomendaan balet nen Jesus iray Kristiano ed Tiatira ya “agmakaamta ed . . . ‘aralem iran bengatla nen Satanas.’” (Apo. 2:24) Natan et aabobonan to met so amin ya agla manasalin mandiskobri ed “aralem iran bengatla nen Satanas” diad Internet odino diad saray bayulentin video game odino diad saray pilosopiya na totoo. Seguradon naliliketan si Kristo sano naoobserbaan toy pansasagpot tan pansasakripisyo na saray Kristiano natan a gagawaen day anggaay nayarian dan tumboken so panangidaulo to ed amin ya aspekto na kabibilay da!

10. Panon a deniskribe so panangidirehi nen Kristo ed saray elder ed kongregasyon, balet anton uksoyan so kaukolan dan bidbiren?

¹⁰ Maaron aasikasoen nen Kristo iray kongregasyon to diad dalin panamegley na saray aturon elder. (Efe. 4:8, 11, 12) Nen inmunan siglo, amin a manangasikaso ed kongregasyon et alanaan. Diad Apocalipsis et nikompara ira ed bibitewen ed lima nen Kristo. (Apo. 1:16, 20) Natan, karaklan ed saray elder ed kongregasyon et kabiangan na arum a karnero. Saraya et tinuro kayari na impanpikasi tan diad panangiwanwan na masanton espiritu, kanian nibagan ididirehi met ira nen Kristo, odino igigiya na lima to. (Gawa 20:28) Anggaman ontan, bibidbiren da ya uusaren nen Kristo so melag a grupo na alanaan a Kristiano bilang Mananguley ya Ulop pian idaulo tan idirehi iray disipulo to diad dalin.​—Basaen so Gawa 15:6, 28-30.

 “Gala, Katawan a Jesus”

11. Akin et labalabay tayo lan nanengneng so isabin tampol na Lider tayo?

¹¹ Diad saramay pasingawey ya anengneng nen apostol Juan, aminpigan imbaga nen Jesus a sikatoy onsabin tampol. (Apo. 2:16; 3:11; 22:7, 20) Andi duaruwan say tutukoyen to dia et say isabi to pian deralen so Makapanyarin Babilonia tan amin a kabiangan na mauges a sistema nen Satanas. (2 Tes. 1:7, 8) Lapud labalabay lan nanengneng na maedad lan si apostol Juan so kasumpalan na sarayan makapakelkelaw a nagawa ed arapen, oniay inkuan to: “Amen! Gala, Katawan a Jesus.” Sikatayo ran manbibilay ed sayan panaon na anggaan et labalabay tayo met lan nanengneng so isabi na Lider tan Ari tayo pian pasantosen so ngaran nen Ama to tan iyalangon so soberanya To.

12. Antoy gawaen nen Kristo antis ya ibulos iray dagem a maneral ed sistema nen Satanas?

¹² Antis a deralen nen Jesus so sistema nen Satanas, saray nakekeraan ni’d dalin a membro na 144,000 ya espiritual ya Israel so permanente lan natatakan. Malinew ya ibabaga na Biblia a saray “dagem” a maneral ed sistema nen Satanas et ag-ibulos anggad agni permanentin atatakan so amin a membro na 144,000.​—Apo. 7:1-4.

13. Panon a malinlinew ya ipatnag nen Kristo so kiwawala to legay unonan kabiangan na “baleg a kairapan”?

¹³ Say “kiwawala” nen Kristo manlapu la nen 1914 et ag-atebek na karaklan ed saray totoo diad dalin. (2 Ped. 3:3, 4) Magano to la balet ya ipatnag so kiwawala to diad paneral to ed nanduruman elemento na sistema nen Satanas. Singa bilang, malinlinew a “napatnagan lay panaon na kiwawala to” sano deralen toy “too na kaugsan,” ya ontutukoy ed klero na Kakristianoan. (Basaen so 2 Tesalonica 2:3, 8.) Satan so mangiter na mabiskeg ya ebidensya a kinmiwas lay Kristo bilang tinuron Ukom nen Jehova. (Basaen so 2 Timoteo 4:1.) Say sigpot a kaderal na Kakristianoan, a sankaugesan a kabiangan na Makapanyarin Babilonia, so gapoan na sigpot met lan kaderal na sayan mauge-uges ya empiryo na palson relihyon. Iyan nen Jehova ed kapusoan na saray lider na politika so paneral ed sayan espiritual a balangkantis. (Apo. 17:15-18) Satan so unonan kabiangan na “baleg a kairapan.”​—Mat. 24:21.

14. (a) Akin et napatikeyan so unonan kabiangan na baleg a kairapan? (b) Antoy epekto ed saray lingkor nen Jehova sano omparungtal la’d tawen so “tanda na Anak na too”?

¹⁴ Imbaga nen Jesus a napatikeyan iray agew na kairapan “nisengeg ed saramay pinili,” saray nakekeraan ya alanaan a Kristiano diad dalin. (Mat. 24:22) Ag-iyabuloy nen Jehova a napibali irayan alanaan a Kristiano tan say kaiba ran arum a karnero sano atakien la so palson relihyon. Imbaga ni nen Jesus a “kayarin tuloy na kairapan ed saratan ya agew,” walaray tanda ed agew, bulan, tan bibitewen, “tan diad satan et omparungtal ed tawen so tanda na Anak na too.” Lapud saya et “tapoktapoken [na saray nasyon so] pagew da ed pantagleey.” Aliwan ontan balet so nagawa ed saray alanaan, a say ilalo da et diad tawen, tan ed kaiba ran arum a karnero, a say ilalo da et diad dalin. ‘Onalagey ira tan itangwa ray ulo ra lapud asingger lay kililiktar da.’​—Mat. 24:29, 30; Luc. 21:25-28.

15. Anto ni gawaen nen Kristo diad isabi to?

¹⁵ Antis a sumpalen na Anak na too so panatalo to, sikatoy onsabi ed arum nin paraan. Impropesiya to: “Sano say Anak na too et onsabi ed gloria to, tan kaiba to so amin ya anghel,  diad satan et sikatoy onyurong ed maglorian trono to. Tan natipon ed arap to so amin a nasyones, tan pambibiiganen to iray totoo, a singa sakey a managpastol ya ibibiig to iray karnero ed saray kanding. Tan saray karnero et ipasen to diad kawanan to, balet saray kanding et diad kawigi to.” (Mat. 25:31-33) Saya imay isabi nen Kristo bilang Ukom pian pambibiiganen iray totoo ed “amin a nasyones” diad duaran grupo: “saray karnero” ya ontutukoy ed saramay aktibon sinmuporta ed espiritual ya agagi to (alanaan iran Kristiano diad dalin), tan “saray kanding” ya ontutukoy ed “saramay agmanguunor ed maong a balita nipaakar ed Katawan tayon Jesus.” (2 Tes. 1:7, 8) Saray karnero a deniskribe a “matunong” et makaawat na “bilay ya andi-anggaan” diad dalin, balet saray kanding et “managmak na andi-anggaan a kadederal.”​—Mat. 25:34, 40, 41, 45, 46.

Sumpalen nen Jesus so Panatalo To

16. Panon a sumpalen nen Kriston Lider tayo so panatalo to?

¹⁶ Sano permanente lan atatakan so amin a membro na 144,000 tan abidbiran la iray karnero tan wala la ra’d kawanan nen Kristo parad kilalaban, ‘sumpalen to la so panatalo to.’ (Apo. 5:9, 10; 6:2) Idaulo to so armada na makapanyari iran anghel tan saray apaoli lan agagi to diad paneral ed interon sistema nen Satanas ed politika, militar, tan komersyo diad dalin. (Apo. 2:26, 27; 19:11-21) Sumpalen nen Kristo so panatalo to sano deralen to lay mauges a sistema nen Satanas. Insan to la ibasileng si Satanas tan saray demonyo ed kaaralman tan mansiansia ra ditan anggad kasumpal na sanlibon taon.​—Apo. 20:1-3.

17. Iner itonton nen Kristo iray arum a karnero legay Sanlibon Taon ya Uley to, tan antoy nepeg a determinasyon tayo?

¹⁷ Oniay impropesiya nen apostol Juan nipaakar ed “baleg ya ulop” na arum a karnero a makaliktar ed baleg a kairapan: “Say Kordero, a walad pegley na trono, et pastolan to ra tan itonton to ra diad saray subol na danum na bilay.” (Apo. 7:9, 17) On, legay Sanlibon Taon ya Uley nen Kristo et siansia nin idaulo to iray arum a karnero, a talagan ondedengel ed boses to, tan itonton to ra ed bilay ya andi-anggaan. (Basaen so Juan 10:16, 26-28.) Komon ta matoor tayon tumboken so Ari tan Lider tayo, natan tan anggan diad insipan nen Jehova a balon mundo!

Bilang Repaso

• Antoy ginawa nen Kristo kayari ton nagmaliw ya Ari?

• Sioparay uusaren nen Kristo pian idaulo iray kongregasyon?

• Diad anto ni ran paraan ya onsabi si Kriston Lider tayo?

• Panon itayon itultuloy ya idaulo nen Kristo diad balon mundo?

[Tepetepet Parad Panagaral]

[Litrato ed pahina 29]

Malinlinew a napatnagan so kiwawala nen Kristo sano naderal lay mauges a sistema nen Satanas