Kamachiqninchikqa hinallam anchata llamkachkan

‘Lloqsirqam vencestin aswanraq vencenanpaq.’ (APO. 6:2.)

1, 2. a) ¿Imaynatam Biblia qawachin Rey Jesucristota hinaspa 1914 watamanta imakuna rurasqantapas? b) ¿Imakunatam Cristoqa rurarun kamachiyta qallarisqan tiempomanta?

REY kananpaqmi 1914 watapi Jesusta Jehová Dios churarqa. ¿Imayna Rey kasqantataq Mesiasmanta piensanchik? ¿Mana preocupakuspa trononpi tiyakuqta hinaspa kay Pachapi congregacionnin imayna kasqanta yachananpaq wakin kutillapi qawarimuqta hinatachu? Chaynata piensaspaqa cambiananchikmi piensasqanchikta, payqa manam chaynachu. Salmoswan Apocalipsis librom Cristota qawachin tukuy ima rurayniyoq Rey kasqanta, payqa caballonpi sillakuykuspanmi “vencestin [richkan tukuyta] aswanraq vencenanpaq” (Apo. 6:2; Sal. 2:6-9; 45:1-4).

² Kamachiyta qallarispanmi ‘Dragontawan angelninkunata’ puntata vencerqa. Angelkunapa kamachiqnin Miguel kaspanmi angelninkunapiwan Satanastawan demoniokunata cielomanta qarqomurqa, chaymantapacham paykunaqa kay Pachallapiña imatapas ruranmanku (Apo. 12:7-9). Chaymantañam ‘contratomanta willakuq’ kaspan Taytanta yanaparqa Jehová Diospa templon imayna tarikusqanta qawamuypi (Mal. 3:1). Chaymi ‘Hatu-hatun Babiloniapa’ parten aswan mana allin ruraqta otaq cristiano tukuqkunata tarirurqaku runakuna wañuchisqankumanta hinaspa gobiernokunawan pierdekuypi hina kasqankumanta huchayoq kasqankuta (Apo. 18:2, 3, 24).

Kay Pachapi sirviententam chuyanchan

3, 4. a) ¿Imatam qawarqa Jehová Diospa ‘willakuqnin’ Cristo? b) ¿Imatam tarirurqaku templota qawaspanku? c) ¿Pitam nombrarqa congregacionpa Uman Cristo?

³ Jehová Dioswan ‘willakuqninmi’ templopa kay allpa pachapi pation imayna kasqanta  qawaspanku cheqap cristianokunatapas tarirurqaku, paykunaqa manam cristiano tukuqkunapa partenchu karqaku. Chaywanpas hanaq pachaman riqkunaqa otaq ‘Leviy castakunaqa’ manam chuyay-chuyaychu karqaku. Dios serviyninkupim chuyanchanaraq kananku karqa Malaquiaspa nisqanman hina: ‘[Diosmi] tiyaykunqa qori-qollqe chulluchichkaq hina Leviy castakunata chuyanchananpaq. Chaymantañam paykunaqa imaynam ruranankuman hina Tayta Diosman ofrendankuta apamunqaku’ (Mal. 3:3). Paykunata chuyanchananpaqmi Diosqa servichikurqa ‘contratomanta willakuq’ Cristota.

⁴ Cristoqa qawarqam chay kasukuq cristianokuna, Dioswan allin kanankupaq lliw iñiqkunaman mikuyta qonankupaq ancha kallpanchakusqankuta. 1879 watapi lloqsimuq kay revistata servichikuspankum sasachakuy kaptinpas Diospa Gobiernonmanta willarqaku. Jesusmi nirqa tukupay tiempopi serviqninkunata qawaq hamuspan paykunata ‘imam horapi mikuchiqnin’ sirvienteta tarinanmanta. Nirqataqmi kusisqa kanankumanta hinaspa ‘tukuy kapuqninkunapiña nanachikunanpaq’ churananmantapas (Mat. 24:3, 45-47). Chaynamá karqa. Congregacionpa Uman Cristom kay Pachapi kapuqninkunata nanachikunanpaq churarun ‘allin yuyayniyoq confianza sirvienteta’. Cieloman riy suyaqkunatawan ‘sapaq ovejakunata’ pusananpaqmi Jesusqa servichikun Diospa Llaqtanpi Punta Apaqkunata (Juan 10:16).

‘Kay pachapi cosechatam’ huñun

5. Juanpa qawasqan revelacionpi, ¿imatam ruran Rey Mesiasqa?

⁵ Juanmi revelacionninpi qawarqa ‘Señorpa punchawninpi’ Cristopa huk rurasqantapas, chay punchawmi qallarirqa 1914 watapi Rey churasqa kaptin. Qellqarqam: ‘Rikurqanim yuraq puyuta, hawanpim tiyachkasqa Diosmanta Hamuq Runaman [otaq runapa churinman] rikchakuq, payqa kachkasqa qorimanta coronayoq hinaspa makinpi ñawchi rutunayoqmi’ cosechayta qallarinanpaq (Apo. 1:10; 14:14). Uyarirqataqmi Diospa angelnin Reyman kayna nisqanta: “Rutuy, [. . .] kay pachapi cosechaqa ñam poqosqaña kachkan” (Apo. 14:15, 16).

6. Jesuspa nisqanman hina, ¿imaynam tukuy imapas pasanan karqa cosechakama?

⁶ ‘Cosechamanta’ nisqanqa yuyarichiwanchikmi trigomantawan mana allin qoramanta rikchanachiyta. Chaypim Jesus tupachikun allin trigo muhuta tarpuspan allin cosechata suyaq runawan. Trigoqa tupanmi ‘Diospa munaychakusqanpa churinkunawan’ otaq Cristowan cielomanta kamachiqkunawan. Jesusqa nirqataqmi trigo tarpusqanman huk enemigo otaq ‘Diablo’ tutapi qorata tarpusqanmanta, chay qoraqa tupanmi ‘mana allin ruraqpa churinkunawan’. Tarpuqmi sirvientenkunata nirqa trigowan kuska chay mana allin qora wiñananta hinaspa cosechakama otaq ‘tukuy imapa tukupaynin tiempokama’ saqenankupaq. Chaymantañam angelninkunata kachamunman mana allin qoramanta trigota rakinankupaq (Mat. 13:24-30, 36-41, NM).

7. ¿Imaynatam Cristoqa ‘kay pachapi cosechata’ huñuchkan?

 ⁷ Revelacionninpi Juanpa qawasqanman hinam, Cristoqa enteron ‘pachapi cosechata’ huñuchkan. Puntatam huñun 144.000 kaqkunamanta puchuqkunata, paykunam “Diospa munaychakusqanpa churinkuna” otaq Jesuspa rikchanachisqanpi ‘trigoman’ rikchakuqkuna. Allpantinpi punta kaq guerra tukusqan qepatam, aswan sutillata qawakurqa pikunam cheqap otaq mana cheqap cristiano kasqanku. Tukuy chaykunam yanaparqa qatiqnin ‘cosecha’ qallarinanpaq, chaypiqa sapaq ovejakunam huñusqa kanku. Paykunaqa manam ‘Diospa munaychakusqanpa churinkunachu’, aswanqa chay Gobiernopa munaychakusqan ‘achkallaña runakunam’. Paykunaqa kanku tukuy llaqtamanta, ‘nacionmanta’ hinaspa tukuy ‘rikchaq rimayniyoqkunam’, kusikuywanmi munanku cielopi Gobiernowan kamachisqa kayta, chaypim kachkanku Jesus hinaspa ‘Diospaq sapaqchasqa’ 144.000 runakunapas (Apo. 7:9, 10; Dan. 7:13, 14, 18).

Congregacionkunatam yanapachkan

8, 9. a) ¿Imanasqam ninchik Cristoqa manam congregacionpa imayna kasqallantachu qawan, aswanqa sapakama iñiqkunapa imayna kasqantam nispa? b) 26 paginapi foto qawasqanchikman hina, ¿imakunam kanman “Satanaspa pakasqa” wakin yachachikuyninkuna karunchakunanchikpaq?

⁸ Ñawpaq estudiopim yacharqanchik punta pachak watapi congregacionkunapa imayna kasqanta Cristo qawasqanta. Kunanqa rey kaspan, ‘tukuy atiyta hanaq pachapiwan kay pachapipas’ chaskiruspanmi, Kamachiqninchikqa yanapachkan allpantinpi congregacionkunatawan ancianokunatapas (Mat. 28:18; Col. 1:18). Diosmi churarun hanaq pachaman riy suyaq ‘iñiqkunapa uman kananpaq’ (Efe. 1:22). Chaymi rikuchkan Jehová Diospa testigonkunapa 100 waranqa masnin congregacionkunapi imakuna pasasqanta.

⁹ Ñawpaq tiempopim, Tiatirapi congregacionta Jesus nirqa: “Kancharichkaq nina hina ñawiyoq [. . .] Diospa Churinmi nin kaynata: ‘Ñoqaqa reqsinim rurasqaykikunata’”, nispa (Apo. 2:18, 19). Chayna rikuq kaspanmi chay congregacionpi wakinpa llumpay mana allin rurasqankutawan huchapakusqankuta rikurqa, chaymi nirqa: ‘Yuyayninkupas chaynataq sonqonkupas yachaq kaspaymi, sapakamaman qosqaykichik rurasqaykichikman hina’, nispa (Apo. 2:23). Payqa manam huk congregacionpa imayna kasqallantachu qawachkan, aswanqa sapakama iñiqkunapa imayna kawsasqankutam. Ichaqa, Tiatirapi wakin cristianokunatam alabarqa “Satanaspa pakasqa” yachachikuyninta mana yachasqankumanta (Apo. 2:24). Kunanpas Internetpi, maqanakuymanta pukllanapaq videopi hinaspa yanqa willakuykunapi lloqsimuq “Satanaspa pakasqa” yachachikuyninkunata qepanchaq qatiqninkunatam, payqa chaskin hayka watayoq kaptinkupas. ¡Maynatam Jesusta kusichin cristianokunapa imatapas saqespa tukuy kawsakuyninpi kasukunankupaq kallpanchakusqankuqa!

10. a) ¿Bibliapa ima nisqantaq qawachin ancianokunata Cristo yanapasqanta? b) ¿Imatam paykunaqa reqsikunanku pikunawan Jesus dirigisqanmanta?

¹⁰ Jesusmi congregacionkunata kuyakuywan yanapan ancianokunata servichikuspan (Efe. 4:8, 11, 12). Punta pachak watapi ancianokunatam Apocalipsis libro tupachin Cristopa alleq makinpi kaq lucerokunawan (Apo. 1:16, 20, NM). Chay tiempopiqa hanaq pachaman riy suyaqkunallam karqaku. Kunan yaqa lliw ancianokuna sapaq ovejakunamanta kaptinkupas, nichwanmi Cristopa alleq makinpi otaq paypa yanapasqan kasqankuta, oracionpiwan chuya espiritupa yanapayninwan nombrasqa kasqankurayku (Hech. 20:28). Ichaqa lliwmi reqsikunku hanaq pachaman riy suyakuyniyoq Diospa Llaqtanpi Punta Apaqkunata Jesus servichikuspa cristianokuna pusasqanta (leey Hechos 15:23, 28-30).

“¡Hamuy Señor Jesus!”

11. ¿Imanasqataq munanchik Kamachiwaqninchik chaylla hamunanta?

¹¹ Juanpa revelacionninpim Jesus achka  kutita nirqa chaylla hamunanta (Apo. 2:16; 3:11; 22:7, 20). Chaywanmi nirqa Hatun Babiloniatawan Satanaspa munaychakusqanpi puchuqkunata chinkachinanpaq hamunanmanta (2 Tes. 1:7, 8). Admirakuypaq qawasqan cumplikunanta suyaspam Juan qaparisparaq nirqa: “Amén. ¡Hamuy Señor Jesus!”, nispa. Tukupay tiempopi kawsaqkunapas munanchikmi Reyninchik hinaspa Kamachiwaqninchik, Taytanpa Llapallan Kamachiq kasqanta defiendenanpaqwan sutinta chuyanchananpaq tukuy atiyninwan hamusqan qawayta.

12. ¿Ima ruraytam Cristo tukunqaraq puchukachinanpaq ‘wayrawan’ tupachisqa kaq manaraq kacharisqa kachkaptin?

¹² Satanaspa munaychakusqankunata chinkachinanpaq Jesus manaraq hamuchkaptinmi, hanaq pachaman riy suyaqkunamanta faltaqkuna sellasqa kananku. Bibliapa nisqanman hinaqa, 144.000 akllasqakuna lliw sellasqa kaptinkuñam Satanaspa munaychakusqan kaqkunata puchukachinanpaq ‘wayrawan’ tupachisqa kacharisqa kanqa (Apo. 7:1-4).

13. ¿Imaynatam Cristo qawachinqa ñoqanchikwanña kasqanta “llumpa-llumpay ñakariy” tiempopa qallariyninpi?

¹³ Yaqa lliwmi mana yachankuchu 1914 watamanta Cristo ñoqanchikwanña kasqanta (2 Ped. 3:3, 4). Ichaqa, Jesusmi chayllaña rikuchinqa mana allinkunapa contranpi Diospa juicionta ruraspan. Ñoqanchikwanña “kasqan tiempopi” kasqantam astawan qawachinqa ‘mana allin ruraq runata’ otaq cristiano tukuq religionpi punta apaqkunata chinkachispan (leey 2 Tesalonicenses 2:3, 8 *). Chaynatam qawachinqa Jehová Diospa Juez churasqan hina rurasqanta (leey 2 Timoteo 4:1). Hatun Babiloniapa puchukayninqa qallarinqa aswan mana allin ruraqwan otaq cristiano tukuq religionwanmi, chaymantañam chinkachinqa allpantinpi puchuq pantasqa religionkunata. Diosmi politicokunapa sonqonpi churanqa chuchumikaman rikchakuq religionkunata chinkachiyta munanankupaq (Apo. 17:15-18). Chaynam kanqa “llumpa-llumpay ñakariy” tiempopa qallariynin (Mat. 24:21).

14. a) ¿Imanasqam asllayanqa llumpa-llumpay ñakariypa qallariynin tiempo? b) ¿Ima ninantaq Diospa llaqtanpaq ‘Diosmanta Hamuq Runapa señalnin’ rikurisqan?

¹⁴ Jesusmi nirqa ‘akllasqankunarayku’ otaq hanaq pachaman riqkunamanta kay Pachapi puchuqkunarayku, llumpa-llumpay ñakariy tiempo ‘asllayananmanta’ (Mat. 24:22). Diosqa manam saqenqachu gobiernokuna pantasqa religionkunapa contranpi hatarispanku, hanaq pachaman riy suyaqkunatawan wakin ovejakunatapas puchukachinantaqa. Jesusqa nirqataqmi ‘chay punchawkunapi ñakariy pasaruptillan’ Intipi, Killapi hinaspa lucerokunapi señalkuna kananmanta, ‘hinaptin Diosmanta Hamuq Runapa señalnin puyupi rikurinantapas’. Chaywanmi nacionkunaqa “qaparkachaspa waqanqaku”. Ichaqa, manam chaynachu kanqaku cieloman riy suyaqkunawan kay Pachapi kawsakuy suyaqkunaqa. Aswanmi Jesuspa kayna nisqanta kasukunqaku: “Kallpanchakuspayá qawarikuychik, librasqa kanaykichikqa hichpamuchkanñam” (Mat. 24:29, 30; Luc. 21:25-28).

15. ¿Imatam hamuspan Cristo ruranqa?

¹⁵ Manaraq lliwta vencechkaspam Cristoqa nisqanman hina kaytawan rurananpaq hamunqa: “Diosmanta Hamuq Runa angelniykunawan  hamuspay suma-sumaq tiyanaypi tiyaykuptiymi, llapallan nacionkunamanta runakuna huñunakamunqa ñawpaqniyman hinaptinmi michiq rakichkaq hina rakisaq cabrakunamanta ovejakunata. Ovejakunatam rakisaq alleqniy lawman, cabrakunatañataq ichoqniy lawman” (Mat. 25:31-33). Chayna nisqanmi qawachin Juez hina hamuspan ‘lliw nacionpi’ runakunata iskaypi rakinanmanta. Hukninmi ‘ovejakuna’ kanku, paykunam yanapanku Reypa wawqenkunata otaq hanaq pachaman riqkunamanta kay pachapi puchuqkunata, hukninñataq ‘cabrakuna’ kanku otaq ‘Jesusmanta allin noticia mana kasukuqkuna’ (2 Tes. 1:7, 8). Ovejakuna otaq ‘allin ruraqkunam’ kay Pachapi ‘wiñaypaq kawsakuyta’ chaskinqaku, cabraman rikchakuqkunañataq ‘wiñaypaq castigasqa’ otaq wiñaypaq puchukachisqa kanqaku (Mat. 25:34, 40, 41, 45, 46).

Jesusmi vencenanta tukun

16. ¿Imaynatam Kamachiqninchikqa vencenanta tukunqa?

¹⁶ Cieloman riy suyaq cristianokuna lliw sellasqa hinaspa ovejakunapas salvasqa kanankupaq Jesuspa alleqninpi kaptinkuñam, Kamachiqninchikqa ‘vencestin’ lloqsinqa vencenanta tukunanpaq (Apo. 5:9, 10; 6:2). Atiyniyoq angelninkunapiwan kawsarimuq wawqenkunawan kuskam Satanaspa makinpi kaq lliw gobiernokunata, qollqellapi piensachiq negociokunatawan tropakunata puchukachinqa (Apo. 2:26, 27; 19:11-21). Vencenantam tukunqa kay pachapi mana allin ruraqkunata puchukachispan. Chaymantam Satanastawan demoniokunata uku pozopi otaq qaqapi waranqa wata wichqanqa (Apo. 20:1-3).

17. ¿Maymanmi Waranqa Wata Cristo Kamachisqanpi ovejankunata pusanqa, hinaspa imatam hinalla rurananchik?

¹⁷ Llumpa-llumpay ñakariymanta lloqsiq ‘achkallaña runakunamanta’ rimaspanmi, Juan nirqa ‘Diospa tiyananpa chawpinpi kaq Carnero’ michiqninku kananta hinaspa ‘kawsachikuq yakukunaman pusanantapas’ (Apo. 7:9, 17). Waranqa Wata Cristo Kamachispanmi vozninta uyariq sapaq ovejakunata hinalla yanapanqa hinaspam wiñay kawsayta haypanankupaq pusanqa (leey Juan 10:16, 26-28). ¡Amayá haykapipas saqesunchu Reyninchik hinaspa Kamachiwaqninchik Cristo qatiytaqa, paymi mosoq pachaman chayachiwasun!

[Willakuy]

Yuyarisun

• ¿Imatam Cristo rurarqa Rey churasqa kasqan qepata?

• ¿Pikunawanmi Jesusqa congregacionta yanapan?

• ¿Imakunata rurananpaqmi Kamachiwaqninchik hamunqa?

• ¿Imaynatam Cristoqa mosoq pachapipas hinalla yanapawasun?

[Kay yachachikuypa tapukuyninkuna]

[29 kaq paginapi dibujo]

Ñoqanchikwanña kasqantam Jesus qawachinqa Satanaspa munaychakusqankunata puchukachispan