Kamachikuqninchisqa llankʼashallanmi
Kamachikuqninchisqa llank’ashallanmi
“Atipaspa lloqsirqan astawan atipananpaq.” (APO. 6:2.)
1, 2. a) ¿Imaynatan Biblia qhawarichin Jesucristota 1914 watamantapacha? b) ¿Imakunatan Cristo ruwarqan Rey kasqanmantapacha?
JEHOVÁ DIOSMI 1914 watapi Jesusta Reyta churarqan. ¿Imatan Jesús ruwashanman chaymantapacha? ¿Trononpi tiyaspallachu kashanman, maynillanpi kay pachapi kaq iñiq t’aqata qhawarimuspa? Manan. Salmos qelqapipas Apocalipsis qelqapipas allintan rikuchiwanchis Cristoqa ruwananta makilla hunt’aq kasqanta. Apocalipsis qelqapin willawanchis caballonpi sillaykuspa “astawan atipananpaq” lloqsisqanmanta, ‘llallinanpaq ñawparisqanmantawan’ (Apo. 6:2; Sal. 2:6-9; 45:1-4).
2 ¿Imatan Jesús ñawpaqta ruwarqan Rey kaspaña? ‘Dragontan angelninkunatawan atiparqan. Cristoqa arcángel Migueltaq chayqa, angelninkunapiwanmi hanaq pachamanta qarqomurqanku Satanasta supayninkunantinta, chaymi paykunaqa kay pachallapiña imatapas ruwayta atinku (Apo. 12:7-9). Chaymantataq Diospa ‘rimanakusqanta willakuq’ kaspa Taytanta qhawaysirqan espiritual ‘yupaychana wasita’ (Mal. 3:1). Chayta ruwaspankun “cristianon kayku” niq religionkunata huchachanapaq hinata tarirqanku kay pachapi política nisqanman chapukusqankurayku, runa wañuchiypi yanapakusqankuraykupiwan (Apo. 18:2, 3, 24).
Kay pachapi kamachinta ch’uyanchan
3, 4. a) ¿Imatan ruwarqan Jehová Diospa ‘rimanakusqanta willakuq’ Cristo? b) ¿Imatan tarikurqan yupaychana wasita qhawarikuqtin? c) ¿Pitan iñiq t’aqaq Umallin Cristo churarqan kaqninkunata qhawananpaq?
3 Jehová Diosqa ‘rimanakusqanta willakuq’ Cristopiwanmi espiritual yupaychana wasiq pationta qhawarispanku tarillarqankutaq wakin cheqaq cristianokunata, paykunaqa manan chay yanqa “cristianon kayku” niqkuna hinachu karqanku. Chay akllasqa cristianokunatan Biblia sutichan “Levipa mirayninkuna”, nispa. Manan ichaqa paykunapas ch’uyapunichu kasharqanku, chayraykun Jehová Diosqa ‘ch’uyayachinanpaq tiyaykurqan, imaynan qolqetapas qoritapas ch’uyayachinku hinatan paykunata ch’uyayachirqan. Chayraqmi paykunaqa Señor Diosman ofrendakunata haywarqanku imaynan haywanankuta hinapuni’ (Mal. 3:3). ¿Piwanmi Jehová Dios paykunata ch’uyanchachirqan? ‘Rimanakusqanta willakuq’ Jesucristowanmi.
4 Paymi rikurqan chay hunt’aq cristianokunaqa Diospa llaqtanman tiempollanpi mikhunata qonankupaq tukuy atisqankuta ruwashasqankuta, paykunaqa 1879 watamantapachan kay revistawan willasharqanku Diospa Gobiernonmanta allin willakuykunata, contrankupiña hatarirqanku chaypas. Jesusmi nisqaña ‘kay tiempo p’uchukapunanpaqña kashaqtin’ kamachinkunata qhawananpaq “kutimuspa” huk hunt’aq kamachita tarinanta, paymi kamachinkunaman ‘tiempollanpi mikhunata qonan karqan’. Paytan Jesusqa “kusisamiyoqmi” ninan karqan, ‘tukuy kaqninkunata qhawananpaqtaq’ churanan karqan (Mat. 24:3, 45-47). Chhaynapunitaqmi karqan. Paymi ‘allin yuyayniyoq hunt’aq kamachita’ churarqan kay pachapi tukuy kaqninkunata qhawananpaq. Jesusqa hanaq pachapaq akllasqa ‘kamachinkunata’, ‘wak ovejakunatapas’ Umalli T’aqawanmi pusashan (Juan 10:16).
‘Hallp’a pachapi cosechata’ huñun
5. ¿Ima ruwashaqtan Rey Jesusta Juan rikurqan?
5 1914 watapi Jesús Rey churasqa kaqtinmi qallarirqan ‘Señorpa p’unchaynin’, chay “p’unchaypi” Jesuspa huk ruwananmantawanmi apóstol Juan qelqarqan: “Qhawarispataq yuraq phuyuta rikurqani, phuyu patapitaq Runaq Churinman rikch’akuq tiyashaqta rikurqani, umanpi qori coronayoqta makinpipas kiruchasqa ichhunayoqta rikurqani”, nispa (Apo. 1:10; 14:14). Chaymantataq huk angelta uyarirqan Reyman: “Ichhunaykiwan ichhuy, hinaspa cosechay, [...] hallp’a pachapi cosecha poqosqaña kasqanrayku”, nishaqta (Apo. 14:15, 16).
6. ¿Iman sucedenan karqan manaraq cosechata hoqarikushaqtin?
6 “Hallp’a pachapi cosecha” nisqaqa trigomanta qoramantawan rikch’anachiytan yuyarichiwanchis. Chaypin Jesusta rikch’anachikun allin trigo muhuta t’akaq runawan, chhaynapi askha cosechata hoqarinanpaq. Allin muhuqa representan ‘hanaq pacha qhapaqsuyu wawakunatan’, paykunan Cristowan kuska kamachimunqaku. Chay rikch’anachiypin chakrayoqpa enemigon hamuspa chirisuela qora muhuta trigo chakraman t’akaykurqan, chay enemigoqa ‘saqran’, chirisuelataq “saqraq wawankuna”. Muhu t’akaqmi kamachinkunata nirqan: “Trigo ichhuykama hinalla wiñashachunku”, nispa; ichhuy tiempoqa representan ‘kay tiempo p’uchukayta’ otaq tukukuy p’unchaykunata. Chaypin angelninkunata kachamunan karqan trigota chirisuela qoramanta t’aqanankupaq (Mat. 13:24-30, 36-41).
7. ¿Imaynatan Cristo ‘hallp’a pachapi cosechata’ hoqarishan?
7 Juanpa rikusqan hinan Cristoqa kay ‘hallp’a pachapi cosechata’ hoqarishan. Ñawpaqtan hoqarin 144.000 ‘qhapaqsuyu wawakunata’, paykunan kanku Jesuspa willasqan trigo. Primera guerra mundial tukupusqanmantapachan aswan sut’ita rikukushan pikunan kanku cheqaq cristianokuna pikunataq mana chayta. Chaymi cosechapi hoqarikushallantaq wak ovejakunatapas. Paykunaqa manan ‘qhapaqsuyu wawakunachu’ kanku, aswanmi “llapa suyukunamanta, ayllukunamanta, llaqtakunamanta, tukuy rimaykunamantawan” “mana piqpa yupay atinan ancha askha runakuna”. Paykunaqa tukuy sonqowanmi suyakushanku Diospa Gobiernon kamachimunanta, chaypin Jesús kamachimunqa 144.000 “akllasqa” cristianokunapiwan (Apo. 7:9, 10; Dan. 7:13, 14, 18, NM).
Llapan iñiq t’aqakunata umallishan
8, 9. a) ¿Imaynapin yachanchis Jesús sapankanchista qhawamuwashasqanchista? b) 26 paginapi foto rikusqanchisman hina, ¿imakunan kanman Satanaspa wakin pakasqa yachachikuyninkuna?
8 Ñawpaq estudiopi yachasqanchis hina, apostolkunaq tiemponpiqa Cristoqa allintan yacharqan Diospa llaqtanpi sapanka iñiq t’aqa imayna tarikusqankuta. Tukuy atiytataq chaskirqan “hanaq pachapipas kay pachapipas” chayqa, Kamachikuqninchis Cristoqa makillan umallishan pachantinpi kaq iñiq t’aqakunata, hinallataq umallikunatapas (Mat. 28:18; Col. 1:18). Diosmi paytaqa churarqan hanaq pachapaq akllasqakuna t’aqapi “tukuy imaymanapi qollanata” (Efe. 1:22). Chaymi payqa makilla qhawamushan pachantinpi pachak waranqa más iñiq t’aqakunata.
9 Tiatira llaqtapi kaq iñiq t’aqatan Jesusqa nirqan: “Rawrashaq nina ñawikunayoq [...] Diospa Churinmi kay hinata nin: Ñoqan yachani ruwasqaykikunata”, nispa (Apo. 2:18, 19). Chhayna allin ñawiyoq kaspan payqa rikurqan chaypi kaq wakin cristianokunaqa viciokunapi qhelli huchapi ima purisqankuta, chaymi nirqan: “[Lliwmi] yachanqaku sonqokunatapas, yuyaytapas t’aqwiq kasqayta. Sapankaykichistataq ruwasqaykichisman hina muchuchisqaykichis”, nispa (Apo. 2:23). Chaywanmi yachanchis sapankanchista qhawamuwashasqanchista. Chaymantapas Jesusqa Tiatira llaqtapi wakin cristianokunataqa “allinmi” nirqanmi “Satanaspa pakasqa yachayninkuna[ta]” mana reqsisqankurayku (Apo. 2:24). Kunanpas Jesusta qatikuqkunaqa cuidakunanchismi ‘Satanaspa pakasqa yachayninkunamanta’, manataqmi chayta maskhananchischu Internetpipas, videojuego nisqapipas, huchata allinpaq qhawarichiq yachachikuykunapipas, hinan Jesusqa allinpaq qhawariwasunchis. Maytachá payqa kusikun waranqa-waranqa yachachisqankuna tukuy ruwasqankupi kasukusqankumanta.
10. a) ¿Imaynapin yachanchis umallikunata Cristo pusashasqanta? b) ¿Pikunatan paykuna kasukunallankutaq?
10 Jesusqa umallikunawanmi iñiq t’aqakunata munakuywan pusashan (Efe. 4:8, 11, 12). Apostolkunaq tiemponpi umallikunatan Apocalipsis qelqa rikch’anachin Cristoq paña makinpi kashaq qanchis qoyllurkunawan (Apo. 1:16, 20). Chay tiempopiqa llapan umallikunan hanaq pachapaq waqyasqa karqanku. Kunan tiempopin ichaqa yaqa llapan umallikuna wak oveja t’aqamanta kanku, paykunatapas Criston umallishan, chaymi nisunman “paña makinpin kashanku”, nispa. Chaymantapas Diosmanta mañakuywan santo espirituq yanapayninwan iman paykunaqa akllasqa karqanku (Hech. 20:28). Llapankutaqmi kasukunku Jesuspa churasqan Umalli T’aqata, chaywanmi payqa lliw cristianokunata pusashan (leey Hechos 15:6, 28-30).
“¡Hamuy, Señor Jesús!”
11. ¿Imanaqtinmi makilla suyakushanchis Kamachikuqninchis hamunanta?
11 Apocalipsis libropin Jesusqa askha kutita nirqan: “Yaqañan hamusaq”, nispa (Apo. 2:16; 3:11; 22:7, 20). Payqa Hatun Babiloniata kay pachapi Satanaspa tukuy kaqninkunatawan chinkachinanpaq hamunanmantan rimasharqan (2 Tes. 1:7, 8). Sumaq promesakuna hunt’akunanta munaspan apóstol Juanqa nirqan: “Amén. ¡Hamuy, Señor Jesús!” nispa. Ñoqanchispas maytan munanchis Kamachikuqninchis Cristo tukuy atiywan hamuspa Taytanpa sutinta ch’uyapaq qhawarichinanta, Dioslla kamachinanpaq derechoyoq kasqanta rikuchinantapas.
12. ¿Ima ruwaytan Cristo tukunqa manaraq Diospa phiñakuynin ‘wayrakuna’ kacharisqa kaqtin?
12 Satanaspa tukuy kaqninkunata chinkachinanpaq Jesús manaraq hamushaqtinmi kay pachapiraq kashaq akllasqakuna wakmanta sellaykusqa kanqaku. Bibliaq nisqan hina, 144.000 akllasqakuna sellowan marcasqa kaqtillankun kay pachapi Satanaspa kaqninkunata chinkachinanpaq ‘wayrakunata’ kacharikamunqa (Apo. 7:1-4).
13. ¿Imaynatan Cristo ‘hamusqanta’ rikuchinqa ‘manchay ñak’ariy’ qallariqtin?
13 Yaqa llapa runakunan mana reparankuchu Jesuspa ‘hamusqanta’ otaq 1914 watamantapacha hanaq pachapi Reyña kasqanta (2 Ped. 3:3, 4). Ichaqa pisi tiempollamantan lliwpas chayta yachanqaku Diospa phiñakuyninta kay pachapi Satanaspa lliw kaqninkunaman chayachimuqtin. ‘Kutimusqantan’ (otaq hamusqanta) rikuchinqa “millay-millay awqa sonqo runa[ta]” wañuchispa, chayqa “cristianon kayku” niq religionkunapi umallikunan (leey 2 Tesalonicenses 2:3, 8). Chhaynapin Jesusqa rikuchinqa Jehová Diospa churasqan Juez kasqanta (leey 2 Timoteo 4:1). Hatun Babiloniaq chinkachisqa kananqa qallarinqa yanqa cristianokunaq ch’usaqyachisqa kasqanwanmi, paykunan aswan huchachanapaq hina kanku; chaymantataq wakin pantasqa religionkunapas chinkachisqa kallanqataq. Jehová Diosmi kamachikuqkunata kallpachanqa chay “rabona warmita” ch’usaqyachinankupaq (Apo. 17:15-18). Tukuy chaykunawanmi qallarinqa ‘manchay ñak’ariyqa’ (Mat. 24:21).
14. a) ¿Imanaqtinmi manchay ñak’ariy p’unchaykuna ‘pisiyachisqa’ kanqa? b) ¿Imatan Jehová Diospa llaqtan ruwanqa “Runaq Churinta hanaq pachamanta hamushaqta” rikuspa?
14 Jesuspa nisqan hina, kay pachallapiraq kashaq ‘akllasqakunaraykun’ manchay ñak’ariy p’unchaykunaqa ‘pisiyachisqa’ kanqa (Mat. 24:22). Gobiernokuna pantasqa religionkunata ch’usaqyachishaqtinqa Jehová Diosqa manan dejanqachu hanaq pachapaq akllasqakunatawan wak ovejakunatawan wañuchinankuta. Jesusqa willallarqantaqmi “chay ñak’ariy p’unchaykuna pasaqtin hina’ Intipi, Killapi, qoyllurkunapipas señalkuna kananta. Hinaqtinmi “Runaq Churinta hanaq pachamanta hamushaqta rikunqaku”, chaymi kay pachapi llapa runakuna “khuyayta waqaykunqaku”. Hanaq pachapaq akllasqakuna, kay pachapi kawsanankupaq suyakuyniyoqkunan ichaqa mana manchakunqakuchu. Jesusmi nirqan: “Chaykuna sucedeqtinqa makillaña qhawapakushaychis, Diospa kacharichinasuykichis tiempon chayamushanña”, nispa (Mat. 24:29, 30; Luc. 21:25-28).
15. ¿Imatan Jesús ruwanqa hamuspa?
15 Manaraq runaq Churin Jesucristo hukpaqkama atipashaspaqa huk-hinamantan hamullanqataq. Pay kikinmi chaymanta nirqan: “Runaq Churinqa llapa angelninkunapiwan lliphlli-kayninpi hamuspanmi ancha hatun qhapaq tiyananpi tiyaykunqa. Hinan ñawpaqenman llapa runa huñukamunqa. Chaymi paykunata t’aqanqa, imaynan michiqpas ovejakunata cabrakunamanta t’aqan hinata. Ovejakunatan paña ladonman t’aqanqa, cabrakunatataq lloq’e ladonman”, nispa (Mat. 25:31-33). Chaypi nisqan hina, Criston juzgaq hamuspa ‘llapa runata’ iskayman t’aqanqa. Hukninpin kashanqaku ‘ovejakuna’, paykunan yanaparqanku Rey Jesuspa akllasqa wawqenkunata, hukninpitaq ‘cabrakuna’ kashanqaku, paykunaqa ‘Señorninchis Jesucristoq allin willakuyninkunatapas manan kasukurqankuchu’ (2 Tes. 1:7, 8). “Chanin” nisqa ovejakunaqa kay pachapi ‘wiñay kawsaymanmi ripunqaku’, cabrakunataq ichaqa “wiñay ñak’ariyman [“wiñay wañuyman”, NM] ripunqaku” (Mat. 25:34, 40, 41, 45, 46).
Jesusmi ‘astawan atipanqa’
16. ¿Imaynatan Kamachikuqninchis ‘astawan atipanqa’?
16 Reykuna sacerdotekuna kanankupaq akllasqakuna llapanku sellaykusqa kaqtin, wak ovejakunapas qespichisqa kanankupaq Jesuspa paña ladonpi kaqtinqa Kamachikuqninchis Criston ‘astawanraq atipanqa’ (Apo. 5:9, 10; 6:2). Chaytaqa ruwanqa kay pachapi gobiernokunata, ejercitokunata, comerciantekunatapas chinkachinanpaq angelninkunantin hanaq pachapiña kashaq wawqenkunantin ima hamuspan (Apo. 2:26, 27; 19:11-21). Chhaynapin kay pachapi Saqraq tukuy kaqninkunata wiñaypaq chinkachinqa. Hinaspanmi Satanasta supayninkunatawan ‘chinkay-chinkay ukhuman’ waranqa watapaq wikch’uykunqa (Apo. 20:1-3).
17. ¿Imatan Waranqa Watapi Cristo ruwanqa ovejankunarayku? ¿Imatan ruwashanallanchis?
17 Apóstol Juanmi manchay ñak’ariymanta lloqsimuq ‘ancha askha runakunamanta’ nirqan: “Tiyana chawpipi kashaq Corderon paykunataqa michinqa, kawsay unu pukyukunamantaqmi paykunataqa pusanqa”, nispa (Apo. 7:9, 17). Cristoqa Waranqa Wata Kamachimusqanpiqa pusashallanqan kunkanta uyariq ovejankunata wiñay kawsayman chayachinankama (leey Juan 10:16, 26-28). Chhaynaqa qatikushallasun Kamachikuqninchis Cristota, paymi mosoq pachaman chayachiwasun.
¿Yuyarishankichu?
• ¿Imatan Cristo ruwarqan Rey churasqa kasqan qhepaman?
• ¿Pikunawanmi Jesús pusashan iñiq t’aqakunata?
• ¿Imakunamanmi Kamachikuqninchis hamunqaña?
• ¿Imaynatan Cristo pusawashallasun mosoq pachapipas?
[Tapuykuna]
[29 paginapi dibujo]
Jesusqa ‘hamusqantan’ rikuchinqa kay pachapi Satanaspa tukuy kaqninkunata ch’usaqyachispa