Orhemen Wase U A Lu Eren Tom Nyian Kpoghuloo la
Orhemen Wase U A Lu Eren Tom Nyian Kpoghuloo la
“A due, lu hemban, man lu sha u una hemba kpaa.”—MPA. 6:2.
1, 2. (a) Bibilo tese tom-tor u Kristu hii u eren ken inyom i 1914 la nena? (b) Kristu hila er nyi akaa nahan hii shighe u i na un tor la je?
YANGE i na Kristu Tor u Tartor u Mesiya u Yehova ken inyom i 1914. Se mba nengen a na ken ishima yase hegen nena? Se mba nengen ser ngu tor u a tem sha ikyônough ki torough nagh, a lu henen kwagh ken ishima zulee, geman ashe kenger shin tar sha ashighe ashighe sha er una nenge er tiônnongo na a lu zan yôô? Aluer kape se nengen un la yô, gba u se gema mnenge la. Upasalmi man takerada u Mpase ôr kwagh na ér ngu tor u ageegh, u a tem sha nyinya, a dugh a lu ‘hemban, man i lu sha u una hemba’ shi una za ikyura “doo doo” yô.—Mpa. 6:2; Ps. 2:6-9; 45:1-4.
2 Kwagh u Kristu hii eren zum u i na un tor yô, lu ityav mbi a hemba “Darakon a mbatyomov nav” la. Er Kristu a lu Mikael, ortyom u hemban, u mbatyomov cii ve lu sha ikyev na yô, yange daa Satan a azôv a na sha icighan ijiir u usha la, gema gbihi ve shin tar. (Mpa. 12:7-9) Ka been yô, Yesu u a lu “Ortyom u ikyuryan” u Yehova la va vea Ter na va sôr tempel u ken jijingi la. (Mal. 3:1) A ôr Mbakristu mba aiegh, mba ve lu vegher u “Zegebabilon” u hemban vihin la ijir, nahan a zua ve a ibo sha awambe a haan inya man idya i ken jijingi i ve er sha u yan ikyar a ugomoti mba tar ne la.—Mpa. 18:2, 3, 24.
Kristu Wanger Wanakiriki Na u Shin Tar
3, 4. (a) Ka tom u nyi Kristu u a lu “ortyom” u Yehova la a ere? (b) Mser u i sôr tempel la tese nyi? (c) Yesu u a lu ityough sha tiônnongo la ver ior sha tom u nyi?
3 Shi mser u Yehova man “ortyom” na sôr tempel la kpa yange tese nongoior ugen ken ityembe i tempel u ken jijingi u shin tar la; lu nôngo u Mbakristu mba mimi, mba ve lu ken ucôôci mba kwaghaôndo u aiegh ga yô. Nahan cii kpa, Mbakristu mba i shigh ve mkurem, shin “ônov mba Levi” mban je kpa yange gba u a wanger ve. Kwagh ne er, er profeti Malaki tsengaôron nahan, ér: “[Yehova] Una tema er orsoughon man orsôron azurfa sha u a̱ hingir wang yô, Una wanger ônov mba Levi, Una wanger ve wang er zanaria man azurfa nahan; nahan vea na TER nagh sha perap̣era.” (Mal. 3:3) Yehova yange yar tom a Kristu Yesu, ‘Ortyom na u ikyuryan’ la sha u wanger Mbaiserael mba ken jijingi mban.
4 Nahan kpa, Kristu va kohol Mbakristu mbajighjigh mba i shighe ve mkuren mban eren tom sha afatyô ve cii sha u koson ya u mbananjighjigh sha kwaghyan u ken jijingi sha ashighe vough vough. Hii ken inyom i 1879 la je, ve lu pasen ior akaa a mimi a ken Bibilo a sha kwagh u Tartor u Aôndo ken ngeren mba i gberen ken magazin ne; man ve lu eren kwagh ne sha ian i doon man sha ian i doon ga kpaa. Yesu yange tsengeôron ér zum u “una hide” u va sôron ya na sha shighe u “mkurtar” la, una kohol wanakiriki ugen una lu nan ve “kwaghyan sha ashighe ashighe.” Nahan a saan wanakiriki la iyol shi akaa na a shin tar cii ‘una wa nan . . . sha ikyev.’ (Mat. 24:3, 45-47) Er Kristu a lu ityough sha tiônnongo u Kristu yô, a yar tom a “wanakiriki u jighjigh man u fan kwagh” ne sha u nengen sha akaa a Tartor Na shin tar. A na kwaghwan sha ikyev i Mbahemenev mba Shin Tine sha ci u mba ken “ya” mba i shigh ve mkurem la kua “iyôngo igen,” i i lu akar a ve la. —Yoh. 10:16.
Msondo u i Sunda Tar La
5. Yohane yange nenge a mpase u nyi sha kwagh u tom u Tor Mesiya laa?
5 Apostoli Yohane yange nenge a mpase sha kwagh ugen u Tor Mesiya una er sha “iyange i Ter,” shighe u a na un tor ken inyom i 1914 a bee kera yô. Yohane nger ér: “M ver ashe, nenge, ibeenegh ki pupuu lu, or tema sha mi lu inja er wan u or nahan, lu a tsar u zenaria sha ityou shi lu a louji u esen tsor tsor sha uwe.” (Mpase 1:10; 14:14) Yohane ungwa ortyom ugen hen Yehova kaa a Orsunda ne ér a naregh loji na, sha u ci “sunda u shin tar kpaa via tsembelee.”—Mpa. 14:15, 16.
6. Lu nyi Yesu kaa ér ia za hemen shighe a karaa?
6 “Sunda u shin tar” ne umbur se injakwagh i Yesu ôr sha kwagh u uwua man ivor i dedoo la. Yesu tôô iyol na kar sha orgen u yange lôô uwua ken sule na a ishimaverenkeghen ér una va sunda iyiav mbi uwua u dedoo, u u lu “ônov mba tartor” la poo yô, ka Mbakristu mba mimi mba i shigh ve mkurem ér ve za tema tor a na imôngo ken Tartor na je la. Kpa tugh mbu il yô, orihyom ugen, “Diabolo” va lôô ivor ibo, i i lu “ônov mba iferor” la ken sule la cica cii. Ortanivor la gema kaa a mbatomov nav ér ve de uwua u vese a ivor i ibo la imôngo zan zan shighe u sunda, inja na yô, sha shighe u “mkurtar.” Hen shighe la, una tindi mbatyomov nav vea za sange uwua ken ivor i bo la.—Mat. 13:24-30, 36-41.
7. Kristu ngu eren tom u “sunda u shin tar” la nena?
7 Yesu ngu nengen sha tom u sunda tar sha won cii sha u kuren mpase u Yohane nenge a mi la. Yange i hii “sunda u shin tar” la sha u kohol mba 144,000 mba ve shi her la, ka “ônov mba tartor” mba ve lu “uwua” u ken injakwagh i Yesu la je la. Shighe u Ityav mbi Tar cii Mbi sha I la bee kera la, mkposo u Mbakristu mba mimi man Mbakristu mba aiegh hemba duen ken igbar cii, je kwagh shon na yô, i hide i yar “sunda u shin tar” la sha kwa har, sha u kohol iyôngo igen. Mban ka “ônov mba tartor” ga, kpa ka “zegeikpelaior,” mba ve we ayol a ve sha ikyev i Tartor la yô. I sunda ve ken hanma “ikyurior man hanma nongo man hanma nongoior man hanma zwa kpaa.” Ve lumun u lun sha ikyev i Tartor u Mesiya, u Kristu Yesu man “uicighanmbaiorov” mba 144,000, mba vea hemen a na imôngo ken gomoti u sha la.—Mpa. 7:9, 10; Dan. 7:13, 14, 18.
Orhemen u Atôônanongo
8, 9. (a) Kanyi i tese ér Kristu nengen kwagh u hanma tiônnongo jimin cii a eren la tseegh ga, kpa nengen kwagh u hanma or ken tiônnongo nan erene? (b) Er i tese sha peeji 26 nahan, ka “akaa a cimin a Satan” a nyi i doo u se palegha?
8 Ken ngeren u a kar la, se nenge er Kristu yange fa hanma kwagh u lu zan hemen ken atôônanongo a sha derianyom u hiihii la yô. Sha ayange a ase ne, Orhemen wase Kristu u i we un “tahav mbu Sha man mbu sha won cii” sha ikyev, a lu Tor u a lu eren tom kpoghuloo la, ngu hemen atôônanongo a sha tar kua mbakuran mba a cii. (Mat. 28:18; Kol. 1:18) Yehova “ver Un ngu ityough sha akaa cii ken nongo” u Mbakristu mba i shigh ve mkurem la. (Ef. 1:22) Sha nahan yô, ken atôônanongo a Mbashiada mba Yehova a a hembe 100,000 la cii, Yesu ngu nengen hanma kwagh u a ze hemen ken hanma tiônnongo yô.
9 Yesu yange tindi loho hen tiônnongo u Tiatire u sha ayange a tsuaa la ér: “Wan u Aôndo u A lu a ashe er nomborusu nahan . . . la, ngu ôron akaa ne nahan ér: M fa aeren a ou.” (Mpa. 2:18, 19) Yange venda mba ken tiônnongo la sha ci u ve de ijimba i eren lu zan hemen ken tiônnongo la, a kaa a ve ér: “M tim ahi man asema . . . Me na ne injar sha inja i aeren a en ser ser.” (Mpa. 2:23) Mkaanem mara tese ér Kristu nengen kwagh u hanma tiônnongo jimin cii a eren la tseegh ga, kpa nengen kwagh u hanma or ken tiônnongo nan eren cii. Yesu yange wuese Mbakristu mba ken Tiatire ‘mba ve fa akaa a cimin a Satan ga’ la. (Mpa. 2:24) Nyian kpa, kape a lumun a agumaior shin mbabeenyol mba ve palegh ieren i tôvon ‘akaa a cimin a Satan’ sha Intanet shin anumbe a pilagh a sha vidio shin sha u nyôron iyol ken ieren i haan iyol inya la je la. Saan Yesu iyol nyian u nengen mne u Mbakristu kpishi ve ne ayol a ve shi ve lu nôngon sha afatyô ve cii ér vea dondo hemen na ken uuma vev la kpen kpen!
10. I ôr kwagh u gbenda u Kristu a hemen mbatamen mba ken tiônnongo la ér nyi, kpa kanyi i gbe u vea fa?
10 Kristu tsua mbatamen mba lun a dooshima mba ashe na ken atôônanongo na a shin tar ne. (Ef. 4:8, 11, 12) Ken derianyom u hiihii la, mbakuran mbara cii lu mba i shighe ve mkurem sha jijingi yô. Takerada u Mpase ôr kwagh ve ér ve lu asan ken uwegh ku yanegh ku Kristu. (Mpa. 1:16, 20) Nyian ne, mbatamen mba ken tiônnongo kpishi ka mba ve lu ken iyôngo igen yô. Mba tsough ve sha msen u eren man sha iwasen i icighan jijingi, nahan ve kpa a fatyô u nengen ve ér mba sha ikyev i hemen u Kristu. (Aer. 20:28) Nahan kpa, ve fa ér Kristu ngu yaren tom a Mbahemenev mba Shin Tine, mba ve lu annongo u kpeghee u Mbakristu mba nomso mba i shigh ve mkurem la sha u hemen shi wan mbahenen nav kwagh shin tar.—Ôr Aerenakaa 15:6, 28-30.
“Va, Ter Yesu”
11. Sar se tsung u Orhemen wase a va fefa sha ci u nyi?
11 Ken mpase u i na apostoli Yohane la, Yesu kaa kwa imôngo ér un ngu van fefa. (Mpa. 2:16; 3:11; 22:7, 20) Yange lu ôron kwagh u mve na u va ôron Zegebabilon ijir kua tar u ifer u Satan ne jimin cii la je ka u henen a hen ga. (2 Tes. 1:7, 8) Er sar apostoli Yohane, u bee iyol kpishi la u nengen er akaa a dedoo a i tsengaôron la aa kure yô, a kaa ér: “Amen, va, Ter Yesu.” Se mba se lu uma ken ayange a masejime a tar u ifer ne kpa sar se tsung u nengen er Orhemen man Tor wase una va ken tahav mbu Tartor u va tseghan iti i Ter na shi tesen er A hembe shawon cii yô.
12. Ka tom u nyi Kristu una er cii man a mase pasen ahumbe a timin tara?
12 Saa a ver hanma or ken nongo u Iserael u ken jijingi, mba ve lu iorov 144,000 mbara ikyav sha icul a bee cii man Yesu una mase timin nongoior u Satan shin tar ne kera ye. Bibilo pase wang ér a pase ahumbe a timin tar u Satan ne cii man a mase veren mba 144,000 mbara ikyav sha atsul a ve been ga.—Mpa. 7:1-4.
13. Kristu una tese mve na man m-ande na ken vegher u hiihii u “zegecan” la nena?
13 Ior kpishi ken tar ne kav er “m-ande” u Kristu la a hii ken 1914 ga. (2 Pet. 3:3, 4) Nahan kpa, ica ia kera gba ga tsô, una tese m-ande na ken igbar zum u una kure awashima u Yehova sha u timin ityartor i shin tar u Satan ne cii la. Mtim u “or u vendan atindi,” ua lu mbahemenev mba Mbakristu mba aiegh la una lu ikyav i tesen “mve Na man m-ande Na” ken igbar. (Ôr 2 Mbatesalonika 2:3, 8.) Kwagh la una tese ikyav wang ér Kristu ngu eren tom u orjir, u Yehova a ne un la. (Ôr 2 Timoteu 4:1.) Mtim u a va tim tartor u kwaghaôndo u aiegh sha won cii la una hii sha mtim u Mbakristu mba aiegh, mba ve lu vegher u Zegebabilon u hemban vihin cii la. Yehova una wa ken asema a mbahemenev mba tar ne sha u ve tim idyakwase u ken jijingi ne gburu gburu yô. (Mpa. 17:15-18) A lu vegher u hiihii u “zegecan” la je la.—Mat. 24:21.
14. (a) A pande ayange a vegher u hiihii u zegecan la sha ci u nyi? (b) “Ikyav i Wan u or” la ia lu tesen nyi hen ior mba Yehovaa?
14 Yesu yange kaa ér a pande ayange a zegecan la “sha ci u uicuwanmbaiorov,” ka Mbakristu mba i shigh ve mkuren mba ve shi shin tar ne mbara je la. (Mat. 24:22) Yehova una de ér ityav mbi a ta sha kwaghaôndo u aiegh sha u timin un mbira mbi tim Mbakristu mba i shigh ve mkurem kua akar a ve aa lu iyôngo igen la ga. Yesu shi kaa ér “ken masejime u ican i her ayange la yô,” uivande vea lu sha iyange man uwer man asan. “Tsô zum la ikyav i Wan u or ia due sha aôndo.” Kwagh ne una na akuraior a sha won cii aa “gber kwelegh.” Kpa mba i shigh ve mkurem mba ve lu a ishimaverenkeghen i yemen sha la kua akar a ve, aa a lu a ishimaverenkeghen i zuan a uma u tsôron shin tar la yô, kwagh ve una lu nahan ga. ‘Vea nenge sha, vea kende ityouv vev sha, gadia mpaa ve mgbôghom.’—Mat. 24:29, 30; Luka 21:25-28.
15. Ka tom u nyi Kristu una er zum u una va laa?
15 Shi, cii man Wan u or a hemba ityav a kure doo doo yô, una va sha gbenda ugen kpaa. A tsengaôron ér: “zum u Wan u or Una va sha iengem Na a mbatyomov mba Shaav cii a Na imôngo yô, zum la Una tema sha ikônough Nagh ki torough ki engem la; á kohol akuraior cii sha ishigh Nagh, Una pav ve kposo er orkuranilev ka nan pav iyôngo a ivo nahan. Una ver iyôngo ken uwegh Nagh ku yanegh, kpa ivo yô, Una ver i ken uwegh Nagh ku imesegh.” (Mat. 25:31-33) Mkaanem man ma ôron kwagh u mve u Kristu una va sha inja i orjir sha u va paven “akuraior cii” avegher ahar la: una pav “iyôngo,” ka mba una va kohol ve vea lu suen anmgbianev nav mba ken jijingi (Mbakristu mba i shigh ve mkurem mba vea shi shin tar) je la, una ver ve kposo a “ivo,” ka “mba ve we Loho u Dedoo u Ter wase Yesu ikyo ga” je la. (2 Tes. 1:7, 8) Iyôngo i i yer ér “mbaperapera” la yô, vea zua a “uma u tsôron” sha tar, kpa mba ve lu ivo la yô, “vea yem ken mtsaha u tsôron” shin mtim.—Mat. 25:34, 40, 41, 45, 46.
Yesu Una Hemba Ityav
16. Orhemen wase Kristu una hemba ityav nena?
16 A veren upristi mba vea tema tor a Kristu imôngo mbara ikyav sha atsul a ve cii shi a paven iyôngo a veren i ken uwer nagh ku yanegh sha ci u myom yô, Kristu una za hemen u hemban zan zan “una hemba” cii. (Mpa. 5:9, 10; 6:2) Una hemen ikyumutya i mbatyomov mba ageegh la kua anmgbianev nav mba una nder ve shin ku la sha u timin ityartor i Satan man akumautya a na kua mbakasuav nav mba sha tar cii eleghee. (Mpa. 2:26, 27; 19:11-21) Kristu una mase hemban cii zum u una tim tar u ifer u Satan ne kera yô. Maa una kange Satan vea a azôv a na una gbihi ve shin ihungwa i i ze kweng la, vea lu shimi uikyangen anyom dubu.—Mpa. 20:1-3.
17. Ken Anyom Dubu a Hemen u Kristu la, una hemen mba ve lu iyôngo na igen la una za a ve hana, man kanyi i doo u se kange ishima u erene?
17 Apostoli Yohane yange tsengaôron kwagh u “zegeikpelaior” i i lu iyôngo igen, i ia war zegecan la ér “Waniyôngo u A lu ker atô u ikyônough ki torough la Una hemen ve, Una za a ve hen ambor a mngerem ma umam.” (Mpa. 7:9, 17) Ken Anyom Dubu a Kristu una Hemen la cii, una za lu hemen mba ve lu iyôngo igen, ve lu ungwan imo na sha mimi la, shi una za a ve ken uma u tsôron. (Ôr Yohane 10:16, 26-28.) Sha nahan yô, se kange nen ishima u dondon tor u a lu Orhemen wase la sha mimi hegen zan zan ken tar u he u Yehova a tende zwa a vese la!
U Hiden Saven a Sav
• Kristu yange er nyi shighe u i na un tor kera la?
• Ka unô Kristu a yaren tom a ve sha u nengen sha tiônnongo na shin tara?
• Ka sha igbenda i nyi nahan Kristu Orhemen wase a lu a va ga?
• Kristu una za hemen u hemen se ken tar u he la nena?
[Mbampin mba ngeren u henen]
[Foto u sha peeji 29]
Mve man m-ande u Kristu la una due ken igbar zum u a tim tar u ifer u Satan ne kera la