KinPuxkukan chuntiyaku lhuwa skujma
KinPuxkukan chuntiyaku lhuwa skujma
«Na timaxkika akgtum xcoronaj, na titlajanalh.» (APOCALIPSIS 6:2)
1, 2. 1) ¿La lichuwinan Biblia Mapakgsina Jesucristo chu tuku tsukulh tlawa kata 1914 asta la uku? 2) Akxni mapakgsina tlawaka, ¿tuku lakkaxwililh natlawa?
KATA 1914, Jehová mapakgsina tlawalh Jesús. ¿La lakpuwanaw pi wilacha Mapakgsina Mesías? ¿Lakpuwanaw pi chatum mapakgsina, kaj wi kxpumapakgsin chu akxni lakapastaka lakamin unu kKatiyatni xlakata naʼakxilha la wilakgolh congregaciónes? Komo chuna lakpuwanaw, ni chuna kalakpuwaw xlakata ni chuna. Salmos chu Apocalipsis lichuwinankgo pi Cristo chatum mapakgsina nema lhuwa skujma chu kgawi xkawayu xlakata “tlajanama”, chu chuntiya skujma xlakata “natlajanan nak guerra” (Apocalipsis 6:2; Salmos 2:6-9; 45:1-4).
2 Xapulana tiku katlajalh Jesús akxni mapakgsina tlawaka wa «luwa wa ntu nkgalhiy xpakgan; [...] chu xʼángeles». Xlakata xla litaxtu Miguel xPuxkukan ángeles, kapulalilh xlakata tamakxtukgolh kʼakgapun Satanás chu xdemonios, tiku asta la uku kaj kKatiyatni kamaxkikanit talakaskin natawilakgo (Apocalipsis 12:7-9). Alistalh, Jesús litaxtulh «makatsinina xla talakkaxlan», chu makgtayalh xTlat xlakata nalakputsananikgo templo xaʼespiritual (Malaquías 3:1). Akxni lakputsaninankgolh, tiku wankgo pi kstalaninanin Cristo —pulaktu nema tlakg lixkajni likatsi nema tapakgsi «xaLanka Babilonia»— makglhtekgska pi lhuwa latamanin xkamakgninit chu xmaxkajwanikgonit xaxlikana takanajla xlakata xtatalakgxtumikgonit mapakgsinanin xalak kakilhtamaku (Apocalipsis 18:2, 3, 24).
Lakputsanani xlakskujni kKatiyatni
3, 4. 1) ¿Tuku taskujut tlawalh Cristo xlakata «xmakatsinina» Jehová litaxtu? 2) ¿Tuku takatsilh akxni lakputsananika templo? 3) Cristo xʼakgxekga congregación ¿tiku liwayalh akgtum taskujut?
3 Akxni Jehová chu «xmakatsinina» lakputsananikgolh xkilhtin templo xaʼespiritual xalak katiyatni tekgskgolh makgapitsi xaxlikana kstalaninanin Cristo tiku ni xtatapakgsikgo tiku kaj wankgo pi kstalaninanin Cristo. Pero umakgolh kstalaninanin Cristo tiku xkalaksakkanit xlakata naʼankgo kʼakgapun —nema Biblia xkalimapakuwi «xkamanan Leví»— na xkgalhikgo tuku xlixkajwanankgonit. Xtalakaskin namakgxtakgkgo tuku xmaxkajwanima xtakanajlakan chuna la xlichuwinanit Malaquías: «[Jehová] natawila la tiku lakxaka plata chu nakamapanuni tuku lixkajwanankgonit xkamanan Leví, chu lakswan nakatlawa la oro chu plata, chu xlakan namakamaxkikgo Jehová xaʼakgstitum tamakamastan» (Malaquías 3:3). Xlakata nakamapanuni tuku xlixkajwanankgonit umakgolh israelitas xaʼespirituales, Dios limaklakaskin «[x]makatsinina xla talakkaxlan», wa Jesucristo.
4 Pero Cristo xʼakxilhnit pi tiku xkalaksakkanit xlakata naʼankgo kʼakgapun lhuwa xliskujkgonit xlakata nakamaxkikgo putum tiku xalak kcongregación liwat nema nalimatliwakglhkgo xtakanajlakan. Xlimaklakaskinkgo uma revista, nema tsukulh tatlawa kkata 1879, chu xlichuwinamakgolh tuku xaxlikana xlakata Tamapakgsin maski lhuwa taʼakglhuwit xlikgalhikgo. Jesús xlichuwinanit pi akxni «xmilh» xlakata nakalakputsanani xlakskujni «akxni nasputa nkatuxawat» o kakilhtamaku, xtekgsli chatum lakskujni tiku «xkilhtamaku namaxkikgoy ntu nawakgoy» tiku xalak congregación. Na xlichuwinanit pi tlan xʼama lichuwinan chu lakgayawa «xlipaks ntu nkgalhiy» (Mateo 24:3, 45-47). Chu chuna lalh. Cristo xʼakgxekga congregación, maxkinit uma «skujni, luwa xatalipaw, chu na luwa akgskgalalh» xlakata nakuentajtlawa tuku kgalhi kKatiyatni. Xlakata napulalin «kxchik», tiku kalaksakkanit xlakata naʼankgo kʼakgapun chu «amakgapitsi borregos», Jesús limaklakaskin tiku kawanikan Lakgkgolotsin tiku Pulalinankgo (Juan 10:16, NM).
Maki «lananat» o tuku tamakgalanit
5. Akxni wi tuku maʼakxilhnika Juan, ¿tukuya taskujut tlawama Mapakgsina Mesías?
5 Apóstol Juan maʼakxilhnika atanu tuku xʼama tlawa Mapakgsina Mesías «xkilhtamaku nkimPuchinakan», uma kilhtamaku tsukulh akxni mapakgsina tlawaka kkata 1914. Juan tsokgnalh: «Ktilakalh, ktiʼukxilhli mpuklhni luwa snapapa; cha nchu kxokgspun puklhni anta xwi nchatum [...] xtachuna Xkam nchixku, na xkgalhiy xcorona xla oro kxakgxakga, chi nchu wa kxmakan xchipanit xmachiti, luwa stakaka», xtakaxnit xlakata namaki tuku tamakgalanit (Apocalipsis 1:10; 14:14). Na kgaxmatli tuku wanilh chatum ángel nema Jehová xmalakgachanit, wanilh Mapakgsina: «Kamaxtu machiti, na kachukuki lananat; xampi wa xkilhtamaku lananat, ya akchanit, wa lananat xakatlata» (Apocalipsis 14:15, 16).
6. Chuna la lichuwinalh Jesús, ¿tuku xʼama la asta xmakika tuku tamakgalanit?
6 Tachuwin «lananat» xalak katiyatni kinkamalakapastakan liʼakxilhtit xla trigo chu cizaña o nitlan tuwan. Kʼuma liʼakxilhtit Jesús wan pi xla litaxtu chixku tiku chalh kxpukuxtu tlakg xatlan xtalhtsi trigo, chu xlakpuwan pi lhuwa xʼama makgala. Trigo litaxtukgo «nti ntapakgsinikgoy xtapakgsin Dios» uma wamputun kstalaninanin Cristo tiku kalaksakkanit natamapakgsinankgo kʼakgapun. Pero Jesús na wan pi katsisni chatum tiku xtalamakgasitsin wa «akgskgawini» lakchamilh cizaña, uma litaxtu «nti ntapakgsinikgoy nti ni tlan» o Akgskgawini. Xmalana trigo kawanilh xlakskujni pi xmakgxtakgkgolh katastakli trigo uma nixatlan tuwan asta xchalh kilhtamaku namakikan tuku tamakgalanit uma wamputun «akxni xlikgatsputni katuxawat». Ama kilhtamaku xkamalakgachalh xʼángeles xlakata tanu nawilikgo trigo chu nixatlan tuwan (Mateo 13:24-30, 36-41).
7. ¿La makima Cristo «lananat» xalak kkatiyatni?
7 Xlakata kgantaxtuma tuku maʼakxilhnika Juan, Cristo makima tuku tamakgalanit xlikalanka kakilhtamaku: makima «lananat» xalak kkatiyatni. Xapulana tiku kamaki wa 144,000 «nti ntapakgsinikgoy xtapakgsin Dios» o na watiya wamputun «trigo» nema lichuwinalh Jesús. Akxni sputli xapulana guerra nema tatlawalh xlikalanka kakilhtamaku, tlakg liwana tasiyalh tiku xaxlikana kstalaninanin Cristo chu tiku ni. Lu tasiyalh tiku xatlan chu tiku nixatlan wa xlakata tsukuka makgstokgwilikan tiku xlipulakti «lananat» xalak kkatiyatni, wa amakgapitsi borregos. Umakgolh kstalaninanin Cristo ni wa «nti ntapakgsinikgoy xtapakgsin Dios» wata litaxtukgo «lhuwa ntachixkuwitat» o latamanin chu kamapakgsi xTamapakgsin Dios. Chu «tanu tanu kachikinin, laklanka kachikinin chu tanu tanu tachuwin» minkgo chu xatapaxuwan makgamakglhtinankgo xTamapakgsin Mesías wa Jesús chu 144,000 santos tiku natamapakgsinankgo kʼakgapun (Apocalipsis 7:9, 10; Daniel 7:13, 14, 18).
Kapulalin congregaciones
8, 9. 1) ¿La likatsiyaw pi Jesús ni kaj akxilha la wi akgtum congregación, wata kaʼakxilhma la limakgolh xtayatkan chatunu chatunu? 2) Chuna la tasiya dibujo xla página 28, ¿tuku kilhchani «tlanka xtalakapastakni akgskgawini» nema ni kilimakgtanutkan?
8 Artículo nema akxilhwi pulana, katsiw pi kxapulana siglo Cristo xkaʼaxilha la xwi xtakanajlakan akgatunu congregación. Chu la uku xlakata Mapakgsina litaxtu chu kgalhi «Xlipaks limapakgsin, [...] nkakgapun, chu nkatiyatna», kinPuxkukan kapulalima congregaciones nema wilakgolh xlikalanka Katiyatni chu na kapulalin lakgkgolotsin tiku pulalinkgo congregaciones (Mateo 28:18; Colosenses 1:18). Jehová wilinit xlakata «xakgxakga [...] nkgamputum nkanajlanin [o congregación]» xla tiku kalaksakkanit naʼankgo kʼakgapun (Efesios 1:22). Wa xlakata putum akxilhma tuku lama kliwaka akgtum ciento mil congregaciones xla xtatayananin Jehová.
9 Makgasa, Jesús malakgachanilh uma tamakatsin congregación xalak Tiatira: «Wa xKam Dios nti nkgalhiy xlakgastapu xtachuna lhkuyat [...] wan yuma ntachuwin: “Klakgapasa mintatlaw[”]» (Apocalipsis 2:18, 19). Akxilhli pi makgapitsi xalak ama congregación lu xmalakatsalimakgolh, xtlawamakgolh talakgxtumit nema ni xlitatlawat wa xlakata kawanilh: «Kit nti kputsananiy ntapuwan, chu naku [o anima], na chatunu nakmaxkiy wixin wa lantlata mininiy xpalakata xtatlaw» (Apocalipsis 2:23). Uma tachuwin kinkamaʼakxilhan pi ni kaj akxilha la wi xtayat akgtum congregación, wata naʼakxilhma la limakgolh xlatamatkan chatunu chatunu. Nachuna Jesús tlan kalichuwinalh makgapitsi natalan xalak Tiatira xlakata ni xlakgapaskgo «xtalakapastakni akgskgawini» (Apocalipsis 2:24, Hua Xasasti Talaccaxlan, 1999). La uku na tlan kaʼakxilha kstalaninanin tiku ni makgtanukgo tuku «xtalakapastakni akgskgawini», maski namatitaxtikan kʼInternet, videojuegos niku latlawanikan tuku nitlan o tiku lakpuwankgo pi putum tlan tlawakan. ¡Lu lipaxuwa Jesús akxni akxilha pi kstalaninanin liskujmakgolh chu lhuwa tuku limakgxtakgmakgolh xlakata nakgalhakgaxmatkgo xliputum xlatamat!
10. 1) ¿Tuku katamalakxtumikan lakgkgolotsin xalak congregación nema limasiya pi kapulalin Cristo? 2) ¿La xliʼakxilhatkan lakgkgolotsin xlakata tiku Jesús kaliyawanit xlakata nakinkapulalinan?
10 Jesús xatapaxuwan kapulalin congregaciones chu limaklakaskin lakgkgolotsin (Efesios 4:8, 11, 12). Umakgolh lakchixkuwin tiku kapulalinkgo congregación katamalakxtumikan klibro xla Apocalipsis la staku nema wilakgolh kxpakgastakat Cristo (Apocalipsis 1:16, 20). Ama kilhtamaku kaj xpulalikgo congregaciones tiku xkalaksakkanit naʼankgo kʼakgapun. Maski la uku tlakg lhuwa lakgkgolotsin litaxtukgo amakgapitsi borregos, tlan nawanaw pi wilakgolh xpakgastakat Jesúscristo —uma wamputun pi Cristo kapulalima—, xlakata akxni kalaksakkan tlawakan oración chu kamakgtaya espíritu santo (Hechos 20:28). Pero xlakan, katsikgo pi Jesús limaklakaskin ni lhuwa kstalaninanin Cristo nema kalaksakaknit xlakata naʼankgo kʼakgapun nema kawanikan Lakgkgolotsin tiku Pulalinankgo xlakata kapulalinkgo kstalaninanin Cristo (kalikgalhtawakga Hechos 15:6, 28-30).
“Katat, kimPuchinakan Jesús”
11. ¿Tuku xlakata lakaskinaw pi kinPuxkukan ni katamakgapalilh?
11 Tuku maʼakxilhnika Juan, Jesús makglhuwa wa pi ni xʼama makgapala (Apocalipsis 2:16; 3:11; 22:7, 20). Xlichuwinama akxni xʼama min xlakata namasputu Babilonia xaLanka chu putum xalixkajni xkakilhtamaku Satanás (2 Tesalonicenses 1:7, 8). Xlakata apóstol lu xakxilhputun tuku lu lilakgatit xaʼakxilhtit wa: “Katat, kimPuchinakan Jesús”. Akinin tiku lamaw kxaʼawatiya kilhtamaku na akxilhputunaw la namin kinPuxkukan chu Mapakgsina xlakata nalimasiya pi xTlat lakgchan namapakgsinan xlikalanka kakilhtamaku chu nasantujtlawa xtukuwani.
12. ¿Tukuya taskujut namakgatsi Cristo chu alistalh namakgxtakgkan un nema namasputunan?
12 Akxni Jesús namin malakgsputu xkakilhtamaku Satanás, pulana nakasellarlikan tiku akgataxtukgo nema tapakgsikgo kʼIsrael xaʼespiritual. Biblia lichuwinan pi «un» nema namalakgsputukgo xkakilhtamaku Satanás nakamakgxtakgkan akxni takgatsinita nawan 144,000 tiku kalaksakkanit naʼankgo kʼakgapun (Apocalipsis 7:1-4).
13. ¿La nalimasiya Cristo pi kinkatawilan akxni natsuku xlipulaktum «lanka takatsanajwat»?
13 Lhuwa latamanin ni kuentaj tlawakgo pi chanita kilhtamaku «akxni kinkatawilan Cristo» nema tsukulh kata 1914 (2 Pedro 3:3, 4, NM). Pero Jesús nialh makgas nalimasiya. ¿La natlawa? Akxni namalakgsputu makgapitsi tuku anan unu kkakilhtamaku. Tuku nalitaʼakxilha «xmakgaxkgakganat ntu natamin» wa akxni namalakgsputu «nchixku xla talakgalhin» uma tiku pulalinkgo tiku wankgo pi kstalaninanin Cristo (kalikgalhtawakga 2 Tesalonicenses 2:3, 8). Chuna Jesús nalimasiya pi litaxtu Juez nema Jehová laksaknit (kalikgalhtawakga 2 Timoteo 4:1). Akxni namasputukan Babilonia xaLanka, pulana wa namalakgsputukan tiku wankgo pi kstalaninanin Cristo, tiku tlakg lixkajni likatsikgo, alistalh putum nixaxlikana takanajla nema wilakgolh xlikalanka Katiyatni. Jehová natlawa pi políticos namalakgsputuputunkgo tiku litaxtu la chatum puskat tiku sta xmakni (Apocalipsis 17:15-18). Wa uma nalitsuku xlipulaktum «lanka takatsanajwat» (Mateo 24:21).
14. 1) ¿Tuku xlakata namaktsuwikan kilhtamaku xlipulaktum akxni namin lanka takatsanajwat? 2) ¿La namakgkatsikgo xkachikin Jehová akxni natasiya «Xkam nchixku»?
14 Jesús lichuwinalh pi «nkilhtamaku namaktsuwikan» akxni namin lanka tapatin «xpalakata ntalaksaknin» uma kilhchani tiku kalaksakkanit naʼankgo kʼakgapun nema wilakgolhku kKatiyatni (Mateo 24:22). Jehová ni katimastalh talakaskin pi akxni mapakgsinanin namalakgsputukgo nixaxlikana takanajla na namalakgsputukgo tiku kalaksakkanit naʼankgo kʼakgapun chu amakgapitsi borregos. Jesús na wa pi «akxni nchu sputnitta nawan ntakatsanajwa xla yama nkilhtamaku» wi tuku natasiya kChichini, kPapaʼ chu kstaku, akxni nchu natasiya «Xkam nchixku anta nkakgapun». Akxni chuna nala, laklanka kachikinin «natsukukgoy tasakgoy». Pero tiku kalaksakkanit naʼankgo kʼakgapun nichuna nalilakgaputsakgo, nipara tiku kgalhkgalhimakgolh nalatamakgo unu kKatiyatni. Wata natlawakgo tuku Jesús wa: «Katalakayawatit, na kaʼukxilhtit nkatalhman, xampi wa mintalakgtaxtunkan, lakatsuwa wij» (Mateo 24:29, 30; Lucas 21:25-28).
15. ¿Tuku natlawa Cristo akxni namin?
15 Pero akxni nina a masputukgo nawan putum xtalamakgasitsin, Jesucristo atanu tuku natlawa chuna la xla xlichuwinanita: «Na akxni namin Xkam nchixku, natamin xlipaks xlikakni, chu xlipaks xʼángeles [...]; akxni nchu natawilay kxlaktawilh xlitlanka xpumapakgsin. Na paks natamakgstokgkgoy kxlakatin xlipaks nchixkuwin; na namapapitsikgoy nchatunu amakgapitsin, xtachuna lantla matanujkgoy nkgalhnilu [o borregos] kxlakgstipan tintsun [o cabras] wa nti xmapuchwanina. Na anta kxpakgstakgat [o kpakgkana] nawiliy wa kalhniluj, chi nchu wa ntintsun, anta nawiliy kxpakgxuki» (Mateo 25:31-33). Uma tachuwin limasiya pi akxni namin Cristo chatum Juez nalitaxtu xlakata pulakti nakamapitsi latamanin «xala kaxanikawa tiyat». Lakatum natawilakgo «nkgalhnilu», tiku kamakgtayakgo xnatalan Mapakgsina, tiku kalaksakkanit xlakata naʼankgo kʼakgapun nema wilakgolhku kKatiyatni chu alakatum natawilakgo «tintsun» o cabras tiku «ni kalhakgaxmatkgoy xatlan xtamakatsinin nkimPuchinakan Jesucristo» (2 Tesalonicenses 1:7, 8). Borregos, tiku na kalimapakuwikan «xalakwan», namakglhtinankgo «latamat xlipan» o latamat nema ni kgalhi xlisputni unu kKatiyatni pero cabras «xliputum kilhtamaku nakamasputukan» (Mateo 25:34, 40, 41, 45; 46, NM).
Jesús masputukgo putum xtalamakgasitsin
16. ¿La natlajanan kinPuxkukan?
16 Akxni takgatsikgonita nawan tiku namapakgsinankgo chu sacerdotes, chu tiku litaxtukgo borregos anta wilakgolha nawan xpakgstakat Jesús xlakata nakalakgmaxtukan, kinPuxkukan “na tlajanan” (Apocalipsis 5:9, 10; 6:2). Jesús chu xʼángeles nachuna xnatalan tiku lakastakwanankgonita nawan—, putum namalakgsputukgo políticos, soldados chu putum laklanka stananin xla Satanás (Apocalipsis 2:26, 27; 19:11-21). Akxni malakgsputunita nawan uma xalixkajni kakilhtamaku, natlajanan. Alistalh nakalakgachinu Satanás chu xdemonios niku xakapulhman, niku nila katitaxtulh akgtum mil kata (Apocalipsis 20:1-3).
17. ¿Niku nakalin Cristo amakgapitsi borregos akxni namapakgsinan Akgtum Mil Kata chu kilitlawatkan akinin?
17 Apóstol Juan wa uma tuku kalichuwinalh «lhuwa tachixkuwitat» o latamanin nema nalakgtaxtukgo akxni namin lanka talakgaputsit. «Xampi wa nkalhnilu nti wi kxlikitat laktawilh wa namakgtakgalhkgoy, na wa napulaliyankgo ntani anan ntaxtunu nchuchut xla latamat.» (Apocalipsis 7:9, 17.) Chuna la akxilhaw akxni Cristo namapakgsinan Akgtum Mil Kata chuntiyaku nakapulalin amakgapitsi borregos, nema kgalhakgaxmatkgo chu nakamakgtaya xlakata nakgalhikgo latamat nema ni kgalhi xlisputni (kalikgalhtawakga Juan 10:16, 26-28). ¡Putum kilhtamaku kastalaniw kiMapakgsinakan, kinPuxkukan nema kinkaliman kxasasti kakilhtamaku nema kinkawanikanikan pi nakinkamaxkikanan!
Tuku akxilhwi
• ¿Tuku tlawalh Cristo akxni mapakgsina tlawaka?
• ¿Tiku kalimaklakaskin Jesús xlakata napulalinkgo congregaciones?
• ¿Tuku nalitasiya akxni namin kinPuxkukan?
• ¿La chuntiya nakinkapulalinan Cristo kxasasti kakilhtamaku?
[Takgalhskinin]
[Epígrafe xla página 31]
Jesús nalimasiya pi kinkatawilan akxni namalakgsputu xalixkajni xkakilhtamaku Satanás