En Tayog e Thin Rodad e Ngiyal’ Ney

“Me yan nrogon be’ ni ma gel ko mahl ni nge yan ko mahl nge gel.”​—REV. 6:2.

1, 2. (a) Uw rogon ni be weliy e Bible e n’en ni be rin’ Kristus ni ka nap’an ni mang pilung ko duw ni 1914? (b) Mang boch ban’en ni ke rin’ Kristus u nap’an ni ke pilung?

 I MANG Kristus e Pilung u Gil’ilungun Got ko duw ni 1914. Uw rogon yaan u wan’um e chiney? Ir reb e pilung ni ke par nga tagil’ ni bayi n’en me gad e gachin nga fayleng ni nge guy ko mang e be rin’ e ulung rok? Faanra aram rogon u wan’dad mab t’uf ni ngad thilyeged e lem rodad. Fa gal ke babyor ni Psalms nge Revelation u Bible e be weliy yaan ni ir reb e pilung nib pasig ni bay u daken ba os ni be yan nrogon be’ ni “ma gel ko mahl” ni nge yan ko mahl nge “gel.”​—Rev. 6:2; Ps. 2:6-9; 45:1-4.

² Nap’an ni pilung Kristus ma n’en nth’abi som’on ni rin’ e gel ngak “fare dragon nge pi engel rok.” I yin’ Kristus ni ir Mikael ni pilungen e engel, Satan nge pi engel rok nga daken e fayleng. (Rev. 12:7-9) Ma aram mar bow e Chitamangin ni ke mang ta “mol’og” ni ngar yaliyew fare tempel ni be yip’ fan ban’en. (Mal. 3:1) I pufthinnag e teliw ko Kristiano ni googsur ni aram e n’en nth’abi kireb ko fare “Babylon nib Gilbuguwan,” me dugliy nib kireb e rok ko mathang fan ni i tay nge ngongolen e am ko re fayleng ney ni i un ngay.​—Rev. 18:2, 3, 24.

Ke Machalbognag Kristus e Tapigpig Rok u Fayleng

3, 4. (a) Mang maruwel e rin’ Jesus ni ir e ta “mol’og” rok Jehovah? (b) Fare tempel ni kan yaliy e be dag e mang, ma mang e ke rin’ Jesus ni ir lolugen e ulung?

³ Nap’an ni yib Jehovah nge ta “mol’og” rok ni ngar fal’egew i yaliy fare tempel nib fanathin mar guyew ba ulung i Kristiano u fayleng ni darur uned ko pi teliw ko Kristiano ni googsur.  Yugu aram rogon, ma mus ko pi Kristiano nem ni kan dugliyrad ara “pi prist” e ba t’uf ni ngan machalbognagrad. Aray rogon ni yiiynag Malaki ni profet ni gaar: “Bay yib [Jehovah] ni bod be’ ni ma [ranrannag] e silber ko nifiy nge par ndaki maathuk ban’en ngay. Bayi machalbognag e pi prist ni bod rogon e silber nge gol ni yima [ranrannag] ko nifiy nge par ndakuriy ban’en nib maathuk ngay. Ma aram e bay ra pied ngak Somol e mit i n’en nib mat’aw ni nga ni pi’ ngak ni maligach.” (Mal. 3:3) I fanay Jehovah e ta “mol’og” rok ni aram Jesus Kristus ni nge machalbognag e pi Kristiano nem ni kan dugliyrad.

⁴ Machane ki guy Kristus e pi Kristiano nem ni yad be rin’ e tin rayog rorad ni fan e ngar pied e tin nib t’uf ko piin taareb e michan’ rorad ni fan ko tirok Got ban’en. Ka nap’an e duw ni 1879 ni yad be ngongliy e pi babyor ney ni bay e thin riyul’ riy ni murung’agen Gil’ilungun Got. Ke yiiynag Jesus nnap’an nra “sul” ni nge fal’eg i yaliy e maruwel ni be tay e tin ka bay e tapigpig rok ko “ngiyal’ ni ke chugur nga tomren e re m’ag ney,” ma ra pirieg ba tapigpig ni be “pi’ garad ko ngiyal’ ni yima pi’ riy.” Ra felfelan’ ko re tapigpig nem ma ra pag fan “urngin ban’en rok ngak.” (Matt. 24:3, NW; 24:45-47) Bochan ni Kristus lolugen e ulung ni Kristiano ma ke tay fare “tapigpig nib yul’yul’ ma ba gonop” ni nge ayuweg e tirok ban’en u fayleng ni fan nga Gil’ilungun. Ma pow’iy e “tin ka bay e tapigpig” nge “yugu boch e saf” ni yad ba muun ngorad u daken ba Ulung ni Ma Pow’iyey.​—John 10:16.

Ke T’ar Wom’engin e Woldug u Fayleng

5. Mang e guy apostal John ni be rin’ e pilung ko fare Gil’ilungun e Messiah u nap’an ni pig e changar rok?

⁵ I pig e changar rok apostal John me guy ban’en ni yugu ba thil nra rin’ fare Messiah ni pilung u nap’an “fare Rran Rok Somol” u tomuren ni ke pilung ko duw ni 1914. I yoloy John ni gaar: “Mu gu sap mu gguy bangi manileng nib wechwech, ni ke par be’ nga daken ni bod yaan be’ nib moon, ni ba’ e teeliyaw u lolugen nib gol ma ba’ bangi kama u pa’ nib m’uth.” (Rev. 1:10; 14:14) I rung’ag John lungun ba engel rok Jehovah ni be yog ko ra ta mokun woldug ney ni nge th’ab wom’engin e woldug ko kama rok “ya ke taw nga nap’an ni ngan t’ar wom’engin e woldug u fayleng!”​—Rev. 14:15, 16.

6. Mang e yog Jesus nra buch?

⁶ Re “wom’engin e woldug u fayleng” ney ni yira t’ar e be puguran ngodad fare fanathin rok Jesus ni murung’agen e wheat nge pan. I taarebrogonnag ir ngak be’ nib moon ni wereg awochngin e wheat u milay’ rok ni be athapeg e ngiyal’ ni nge t’ar wom’engin, ni aram e be yip’ fan e “girdi’ ni Got e be gagiyegnagrad,” ara tin riyul’ e Kristiano ni ke dugliyrad ni ngar uned ngak ko gagiyeg u Gil’ilungun. Me reb e nep’ me yib be’ ni toogor rok ni aram “pilungen e moonyan’,” i wereg awochngin e pan ni be yip’ fan e “girdi’ ni Faanem nib kireb e ir e be gagiyegnagrad.” Me yog fare moon ngak chon e maruwel rok ni ngar paged fapi wheat nge pan ngar ilalgad u taabang nge mada’ ko ngiyal’ ni ngan t’ar wom’engin e woldug ni aram e  “ngiyal’ ni ke chugur nga tomren e re m’ag ney.” Ngiyal’ nem e ra l’og e pi engel rok ni ngar kieged e wheat ko pan.​—Matt. 13:24-30, 36-41, NW.

7. Uw rogon ni be t’ar Jesus “wom’engin e woldug u fayleng”?

⁷ Kab kafram i yib ni be t’ar Jesus wom’engin e woldug u fayleng ni fan e nge lebug e n’en ni guy John u nap’an ni pig e changar rok. I tabab i “t’ar wom’engin e woldug u fayleng” u nap’an ni kunuy e piin ni kar mageygad ko fare 144,000 ni yad e “girdi’ ni Got e be gagiyegnagrad,” ara “fare wheat” ko fanathin rok Jesus. Tomuren e Bin Som’on e Mahl ko Fayleng mi ki tamilang boch ban’en nib thil u thilin e tin riyul’ e Kristiano nge tin nde riyul’, ma re n’ey e bay rogon ko n’en ni migid ni yira rin’ u nap’an ni yira “t’ar wom’engin e woldug u fayleng” ni aram e ngan kunuy e tin ka bay e saf. Pi cha’ ney e gathi yad e “girdi’ ni Got e be gagiyegnagrad” ya yad e “girdi’ ni ke muulung ni pire’ ni pire’” ni yad ra par u tan Gil’ilungun Got. Pi girdi’ ney e kar bad u “gubin e nam, nge ganong, nge gubin mit e girdi’.” Ma yad ma fol u Gil’ilungun fare Messiah ni aram Kristus Jesus nge fare 144,000 ni yad ‘girdien fare Got ni ir e th’abi tolang’ ni yad ra un ngak ko gagiyeg ko re am nu tharmiy nem.​—Rev. 7:9, 10; Dan. 7:13, 14, 18.

En Tayog e Thin ko Ulung

8, 9. (a) Mang e be dag ni gathi kemus ni ma yaliy Kristus e ulung ni ga’ngin, ya ku ma yaliy e girdi’ riy ni be’ nge be’? (b) Mang e “tirok Satan ban’en nrib mith” ni bay ko page 29 ni ngad paloggad riy?

⁸ Kad filed ko fa binem e thin rogon ni i yaliy Kristus rarogon e pi walag u lan e ulung ko bin som’on e chibog C.E. Ngiyal’ ney ni ke Pilung ma ‘kan pag fan urngin ban’en ngak u tharmiy ngu but’,’ e be maruweliy e maruwel rok ni ir lolugen e pi ulung rok Got u fayleng i yan nge piin ni yad be ayuweg e pi ulung nem. (Matt. 28:18; Kol. 1:18) Ke pi’ Jehovah Jesus ngak fare ulung ni kan dugliyrad ni ir e nge mang ga’ rorad “u urngin ban’en.” (Efe. 1:22) Ere dariy ban’en ni yima rin’ u lan fa 100,000 i ulung ko Pi Mich Rok Jehovah u fayleng nde nang.

⁹ I pi’ Jesus e thin nge yan ko ulung nu Thyatira kakrom ni gaar: “Baaray e thin ni ke pi’ faanem ni Fak Got, ni be gal ramaen lan mit ni gowa daramram u ba nifiy, . . . ‘Gu manang e n’en ni ga be rin’.’” (Rev. 2:18, 19) I ginang e re ulung nem ni bochan e ngongol nib kireb ni ur rin’ed ni gaar: “Gag faanem ni ir e manang laniyan’ e girdi’ nge tin ni be athapeg e girdi’. Ma bayi bigimed mu gu pi’ puluwon ni bod rogon e ngongol rok.” (Rev. 2:23) Re thin ney e be tamilangnag ni gathi kemus ni ma yaliy Kristus e ulung ni ga’ngin ya ku ma yaliy e girdi’ riy ni be’ nge be’. Pi Kristiano ko ulung nu Thyatira ndar folgad ko “tirok Satan ban’en nrib mith” e yog Jesus nib fel’ e n’en ni kar rin’ed. (Rev. 2:24) Ngiyal’ ney e kub fel’ u wan’ Jesus e piin ni yad ma siyeg e “tirok Satan ban’en nrib mith” ni bay ko Internet, ara pi video games ni yaan e cham, ara ur folgad ko machib ni girdi’ e sum rorad. Ri ma felfelan’ ni ma guy e pi Kristiano e ngiyal’ ney ni yad ma athamgil ni ngar folwokgad rok ni gubin ngiyal’.

10. (a) Uw rogon ni kan weliy rogon ni be pow’iy Kristus e piin piilal ko ulung? (b) Mang e ba t’uf ni nge nang e pi piilal ney?

¹⁰ Ma yaliy Kristus e ulung rok u fayleng u daken e piin piilal. (Efe. 4:8, 11, 12) Nap’an e bin som’on e chibog ma gelngin Got nib thothup e ir e i dugliy e piin piilal. Kan weliy murung’agrad u Revelation ni yad fapi t’uf ni bay u lan e ba’ ni mat’aw i pa’ Kristus. (Rev. 1:16, 20) Ngiyal’ ney e yooren e piilal ko ulung e yad ba muun nga yugu boch e saf. Yima dugliyrad u tomuren ni kan yibilayrad ngu tan gelngin Got nib thothup ya nge yog ni m’ug ni yad bay u tan pa’ Kristus. (Acts 20:28) Machane, yad manang ni be fanay Kristus fare Ulung ni Ma Pow’iyey ni yad bang ko pi Kristiano ni kan dugliyrad ni ngar pow’iyed pi gachalpen u fayleng.​—Mu beeg e Acts 15:6, 28-30.

“Moy, Somol Jesus”

11. Mang fan nri gad be athapeg ni nge yib e En Tayog e Thin rodad nib gur?

¹¹ Bay in yay ni dag Jesus ngak apostal John nra yib nib gur. (Rev. 2:16; 3:11; 22:7, 20) Dariy e  maruwar riy ni be weliy murung’agen e ngiyal’ nra yib ni nge pufthinnag e Babylon nib Gilbuguwan nge urngin ban’en ko re m’ag rok Satan ney. (2 Thess. 1:7, 8) Ri baadag apostal John ni nge guy ni ke lebug urngin ban’en ni kan yiiynag, ere gaar: “Nge par riy ni bod ni ka mog. Moy, Somol Jesus!” Gad e piin ni gad be par ko tin tomuren e rran ko re m’ag nib kireb ney e ri gad be athapeg ni ngad guyed e En Tayog e Thin ma ir e Pilung rodad ni nge tolangnag fithingan e Chitamangin nge mat’awun ko gagiyeg.

12. Mang maruwel e ra mu’nag Kristus u m’on ni yira pag fare nifeng nra gothey e m’ag rok Satan?

¹² U m’on nra thang Jesus e ulung rok Satan u fayleng, ma yira tay e pow ngak e tin tomur i girdien fare 144,000. Ba tamilang ni be yog e Bible ndab ni pag fare nifeng nra gothey e m’ag rok Satan ndawori m’ay i tay e pow ngak urngin i girdien fare 144,000.​—Rev. 7:1-4.

13. Uw rogon nra gagiyelnag Kristus ni bay u nap’an nra tabab fare “gafgow” nib ga’?

¹³ Ngiyal’ ney ni “bay” Kristus ni tabab ko duw ni 1914 e yooren e girdi’ e de nang. (2 Pet. 3:3, 4, NW) Machane, dabi n’uw nap’an ma yira nang ni bay Kristus ya ra pufthinnag e re m’ag rok Satan ney. “Faanem nib kireb” ara pi tayugang’ ko pi teliw rok e pi Kristiano ni googsur ni yira thang e aram e ngiyal’ nra gagiyel ni “bay” Kristus. (Mu beeg e 2 Thessalonika 2:3, 8. *) Re n’ey e ku ra micheg ni be maruwel Kristus ni ir e Ta Pufthin rok Jehovah. (Mu beeg e 2 Timothy 4:1.) Magothgoth ni yira tay ko n’en nth’abi kireb ko fare Babylon nib Gilbuguwan e aram tabolngin e magothgoth ni yira tay ko piyu yurba’ i teliw ni googsur ko re fayleng nib kireb ney. Ra tay Jehovah nga laniyan’ e pi tayugang’ ko am ni ngar thanged e re ppin nem ni ma pi’ ir ni chuway’. (Rev. 17:15-18) Ireram tabolngin fare “gafgow” nib ga’.​—Matt. 24:21.

14. (a) Mang fan ni yira ngochnag nap’an e n’en nra buch u tabolngin fare gafgow nib ga’? (b) Mang fan ndabi rus e girdi’ rok Jehovah u nap’an nra “m’ug e pow ko en ni Fak e Girdi’”?

¹⁴ Ke yog Jesus ni kan lichnag e rran ko fare gafgow nib ga’ “ni bochan e piin ni girdien ni ke mel’egrad” ni aram e piin ni kar mageygad ko fare ulung i Kristiano ni kan dugliyrad. (Matt. 24:22) Dabi pag Jehovah ni ngan thang mit e pi Kristiano ni kan dugliyrad nge tin ni ka bay e saf nib muun ngorad. Ki yog Jesus ni “nap’an ni yugu ra m’ay e re gafgow nem ko pi rran nem,”  ma ra m’ug e pow u mit e yal’, ngu mit e pul, ngu mit e pi t’uf, “ma aram e bayi m’ug e pow ko en ni Fak e Girdi’ u lan e lang.” Re n’ey e ra k’aring e pi nam nu fayleng ni ngar “yorgad.” Machane, gathi aram e n’en nra buch ko piin ni kan dugliyrad ni yad be athapeg e yan nga tharmiy nge piin ni yad be athapeg e par u fayleng, ya yad ra ‘sak’iy ngar changargad nga lang, ya aram e ke chugur ni ngan chuwegrad u fithik’ e gafgow.’​—Matt. 24:29, 30; Luke 21:25-28.

15. Mang maruwel e ra rin’ Kristus u nap’an nra yib?

¹⁵ U m’on nra mu’nag e en Fak e Girdi’ e mahl nra tay ni nge gel, ma ra yib u yugu reb e kanawo’. I yiiynag ni gaar: “Ngiyal’ nra yib e en ni Fak e Girdi’ riy ni ke pilung, ni ke un urngin e pi engel ngak, e bay par nga tagil’ nib pilung, ma urngin girdien e pi nam nu fayleng ni bay ni kunuyrad nga p’eowchen. Ma ere weregrad ngar l’agruw ulunggad, ni bod rogon e en ni ma gafaliy e gamanman ni ma fek e saf nge chuwegrad u fithik’ e kaming: bayi tay e saf nga ba’ ni mat’aw rok, me tay e kaming nga ba’ ni gilay’ rok.” (Matt. 25:31-33) Re n’ey e be yip’ fan e pufthin nra tay Kristus nga girdien e “pi nam nu fayleng” ngar l’agruw ulunggad ni aram e: piin ni yad bod e “saf” ni yad e piin ni ur ayuweged pi walagen (Kristiano ni kan dugliyrad u fayleng) nge piin ni yad bod e “kaming” ni yad e piin “ndarir folgad ko Thin nib Fel’ ni yib rok Got ni murung’agen e Somol rodad i Jesus.” (2 Thess. 1:7, 8) Piin ni yad bod e saf ni ka nog ni “yad mmat’aw” e ra yog ngorad e “yafos ndariy n’umngin nap’an” u fayleng, machane piin ni yad bod e kaming e yira “pi’rad ko gechig ndariy n’umngin nap’an.”​—Matt. 25:34, 40, 41, 45, 46.

Ke Gel Jesus ko Mahl

16. Uw rogon nra gel Kristus ko mahl?

¹⁶ Nap’an nra gaman urngin e piin ni yad ra un ngak Kristus ko gagiyeg ni yad e pilung nge prist, ma ke gagiyel ko chon mini’ e saf ni yad bay u ba’ ni mat’aw i pa’ Kristus, ma aram e ngiyal’ nra “yan ko mahl nge gel.” (Rev. 5:9, 10; 6:2) Ma aram e ra gothey urngin ban’en nib milfan ngak Satan u fayleng u daken e pi engel nge pi walagen ni kar fasgad ko yam’. (Rev. 2:26, 27; 19:11-21) Ra mus nap’an e mahl nra tay Kristus u tomuren ni ke thang e re m’ag rok Satan nib kireb ney. Ma aram me kalbusnag Satan nge pi engel rok u lan bbiyu’ e duw.​—Rev. 20:1-3.

17. (a) Mang e ra pow’iy Kristus e tin ka bay e saf rok ngay u lan fare Biyu’ i Duw nra Gagiyeg? (b) Mang e thingar da rin’ed?

¹⁷ Nap’an ni be weliy apostal John murung’agen e “girdi’ ni ke muulung ni pire’ ni pire’” ara fare ulung nib ga’ ni yad ra magey u tomuren fare gafgow nib ga’, me yiiynag murung’agen fare Fak e Saf ni ba’ u lulukngun i tagil’ ni be “gafaliyrad ni bod e en ni ma gafaliy e saf, me pow’iyrad ko fapi alublub ni bay e ran ko yafos riy.” (Rev. 7:9, 17) Arrogon, nap’an nra gagiyeg Kristus u lan fare Biyu’ i Duw, ma ra ulul ni nge pow’iy e tin ka bay e saf ni yad ma motoyil ngak ma ra pow’iyrad ko yafas ndariy n’umngin nap’an. (Mu beeg e John 10:16, 26-28.) Ere manga yugu da ululgad ngaud leked e En Tayog e Thin rodad e chiney i yan nga lan fare m’ag nib beech ni ke micheg Jehovah!

[Footnote]

Ngan Sul u Daken

• Mang e ke rin’ Kristus u tomuren ni ke pilung?

• Mini’ e ma fanay Kristus u fayleng ni nge pow’iy e ulung rok?

• Uw rogon nra yib Kristus ni En Tayog e Thin rodad?

• Uw rogon nra i pow’iydad Kristus i yan nga lan fare m’ag nib beech?

[Study Questions]

[Picture on page 31]

Ra nang urngin e girdi’ ni bay Kristus u nap’an nra thang e re m’ag rok Satan ney