Kampeni Yaibela mu Bulgaria Yalyendele Bwino

“Umulimo wa kulobolola ukalamba, lelo ababomfi bena nabacepa. E ico, lombeni Umwine wa mulimo wa kulobolola ukuti atume ababomfi mu mulimo wakwe uwa kulobolola.”—MAT. 9:37, 38.

AYA mashiwi Yesu alandile nayalingana bwino ne filecitika mu Bulgaria, mu calo icisuma icabela lwa ku kapinda ka ku kulyo aka Europe! Muli ici calo bakasabankanya balefwaikwa sana aba kushimikila abekashi babamo abacila 7,000,000. Mu Bulgaria mwaba bakasabankanya mupepi na 1,700, lelo tabakumanisha ukushimikila mu calo conse. Ici calengele ukuti Ibumba Litungulula lisuminishe bamunyina ku Bulgaria ukwita ba Nte mu fyalo fimbi ifya mu Europe abaishiba iciBulgaria ukubombako muli kampeni yaibela mu 2009. Batantike ukuti kukabe kampeni pa milungu 7 mu nshita ya lusuba, ukuyafika na pa nshita ya Kulongana kwa Citungu ukwaleti: “Mulelola!” ukwabelele mu Sofia, pa August 14-16, 2009.

Abaipeeleshe Ukubomba Balifulile Sana

Bamunyinefwe pa maofeshi ya Nte sha kwa Yehova mu Sofia baletwishika nga ca kuti ku France, Germany, Greece, Italy, Poland, na Spain kwali no kufuma abantu abengi. Aba bantu bali no kubomfya indalama shabo ne nshiku sha kutuusha ku kuyabomba umulimo wa kushimikila. Ala caliweme ukumona abalembeshe ukuyabombako balefulilako cila mulungu, mpaka bafika na 292! Apo bakasabankanya abaile balifulile, calengele babasalanganye mu misumba iyi itatu: Kazanlak, Sandanski, na Silistra. Bakangalila ba miputule mu Bulgaria bakoseleshe bapainiya na bakasabankanya muli ici calo ukubombako. Bonse pamo abaipeeleshe ukubombako uyu mulimo mu fifulo umo bakasabankanya bacepa sana bali 382.

Bamunyinefwe ukufuma mu filonganino fya mupepi balibatumine ukuyapekanishisha libela umwa kufikila abeni. Balisonkele imiputule ne mahotela ayashakosele imitengo. Bamunyinefwe mu Bulgaria balibombeshe ukwafwa abeni ukukwata ifyalekabilwa pa kuti batendeke ukubomba umulimo baendeele. Mu imisumba yonse itatu, balisonkeele ififulo fya kulonganinamo. Balitantike ukuti bamunyinefwe abeni baletungulula ukulongana. Caliweme ukumona mu fifulo umushali Nte nangu umo bakasabankanya 50 balelongana mu kulumbanya Yehova.

Bamunyinefwe abafumine mu fyalo fimbi bali abacincila sana. Mu nshita ya lusuba ku Bulgaria kulakaba icine cine. Na lyo line, bamunyinefwe na bankashi balibombeshe. Imilungu itatu iya kubalilapo, bamunyinefwe balishimikile sana mu musumba wa Silistra uwaba mu lulamba lwa mumana wa Danube kabili abantu ababamo balicila 50,000. Ne ci calengele bamunyinefwe ukushimikila na mu mishi ya mupepi, ukufika fye na ku mushi wa Tutrakan apa kwenda amakilomita 55 ukulola ku masamba ya Silistra. Ilingi line baletendeka ukushimikila ulucelo muli ba 9:30hrs. Pa numa ya ca kulya ca kasuba, balekonkanyapo ukubomba mpaka 19:00hrs no kucilapo fye. Mu Kazanlak na Sandanski, namo mwine bamunyinefwe balibombeshe ica kuti baileshimikila na mu mishi ne misumba ya mupepi.

 Finshi Fyafuminemo?

Balishimikile sana muli ilya milungu 7. Nga filya cali mu nshiku sha batumwa, kuti twatila abekashi ba muli iyi misumba nabo balisosele ukuti, ‘Namusalanganya isambilisho lyenu mu misumba yesu yonse.’ (Imil. 5:28) Ba Nte ababombeleko uyu mulimo bashalike magazini 50,000 kabili batendeke amasambililo ya Baibolo 482. Ilyashi lisuma lya kuti, icilonganino calipangilwe mu Silistra pa September 1, mu 2009, kabili mu Kazanlak na mu Sandanski mwalipangwa amabumba ya Nte sha kwa Yehova. Cilawama sana ukumona abaumfwile imbila ya nsuma pa muku wa kubalilapo ilyo kwali kampeni balelunduluka.

Mu mulungu wa kubalilapo fye muli iyi kampeni, nkashi umo, painiya waibela uulanda iciBulgaria uwafumine ku Spain ashimikile Karina, namayo uwa mu Silistra uwaleshitisha inyunshipepala mu musebo. Karina alitemenwe kabili alile na mu kulongana. Alisumine no mutima onse ukusambilila Baibolo. Umulume wakwe tasumina muli Lesa, e ico Karina aebele Nte ukuti balesambilila Baibolo mu parka. Na bana bakwe abakashana babili balesangwapo pe sambililo. Daniela, umwana wakwe umukalamba, alitemenwe sana ifyo alesambilila mu Baibolo. Apwishishe ukubelenga icitabo ca Baibolo Isambilisha mu mulungu fye umo, apo pene atendeka no kukonka ifyo Baibolo isambilisha kabili alilekele no kubomfya ifipasho mu kupepa. Lyena atampile ukwebako ifibusa fyakwe ifyo alesambilila. Ilyo asangilwe ku kulongana pa muku wa kubalilapo, papitile fye imilungu itatu aeba na Nte uwalemusambilisha ati: “Ndeumfwa kwati na ine ndi Nte. Finshi mfwile ukucita pa kuti na ine nkatampe ukushimikila?” Daniela alitwalilila ukulunduluka pamo na banyina no mwaice wakwe.

Mu Kazanlak, bushiku bumo, Orlin munyinefwe umwina Bulgaria, uwikala ku Italy ashimikile abalumendo babili abaletuusha mu parka ilyo alebwelelamo ukufuma mu kushimikila. Abashilile icitabo ca Baibolo Isambilisha kabili abalaile ukubwelelako ubushiku bwakonkelepo. Ilyo Orlin abweleleko, alitampile ukusambilila Baibolo na Svetomir, kabili isambililo lyalikonkenyepo no bushiku bwakonkelepo. Mu nshiku 9, Orlin atungulwile isambililo kuli Svetomir imiku 8. Svetomir atile: “Ilyo waishile ninshi papitile fye inshiku shibili ukutula apo napepele kuli Lesa ukuti angafwe ukumwishiba. Kabili nalilaile ukuti nga angafwa, nkaipeela kuli ena.” Ilyo Orlin abwelelemo ku Italy, bamunyinefwe kulya balitwalilila ukusambilila na Svetomir, kabili alakonka ifyo asambilila.

 Abaipeeleshe Ukuyabombako Balipaalilwe Sana

Bushe balya ababomfeshe inshiku shabo isha kutuusha no kubomfya indalama shabo ukuya ku calo cimbi ku kushimikila imbila nsuma baumfwile shani? Eluda umo uwa ku Spain alembele ukuti: “Ilya kampeni yalikatenye bamunyinefwe mu Spain abalanda iciBulgaria. Ababombeleko balikoseleshiwe sana.” Abaupana babili aba ku Italy balembele ukuti: “E mweshi wawamishe mu bumi bwesu!” Basosele no kuti: “Ilya kampeni yalyalwile ubumi bwesu.” Aba abaupana batendeke ukutontonkanyapo sana pa kukuukila ku Bulgaria pa kuti bakalebombela uko aba kushimikila bacepa sana. Carina, nkashi umushimbe kabili painiya wa nshita yonse uwa ku Spain, na o alile ku Bulgaria no kuyabombako uyu mulimo mu Silistra. Pa numa ya kubombako uyu mulimo, alilekele incito alebomba ku Spain no kukuukila ku Bulgaria ku kwafwa icilonganino cipya mu Silistra. Alisungile indalama isha kumwafwa ukwikala mu Bulgaria pa mwaka umo. Umfweni ifyo Carina alandile pa co apingwilepo ukucita. Atile: Nintemwa sana ukuti Yehova nansuminisha ukubombela mu Bulgaria kabili kuti natemwa ukubombela kuno pa nshita iikalamba. Kale kale nalikwata amasambililo ya Baibolo yasano, kabili batatu pali aba balitendeka ukulongana.

Nkashi umo umwina Italy alefwaya sana ukubombako muli iyi kampeni, lelo e lyo atendeke fye incito kabili takwete inshiku sha kuila pa cuti. Na lyo line alipwishe ku ncito nga kuti aya pa cuti umweshi umo ukwabula ukufola kabili ali-ipekenye ukuleka incito nga tabamusuminishe. Alipapile ilyo umukalamba wa ncito amwebele ukuti: “Pali fye bwino, cikulu fye ukantumineko kardi apaba ifya ku Bulgaria.” Uyu nkashi alishininwe ukuti Yehova alyaswike amapepo yakwe.

Stanislava, nkashi wacaice uwikala ku Bulgaria mu musumba wa Varna, uwalebomba incito iisuma uko alefola indalama ishingi, alipokele cuti no kuya ku Silistra mu kubombako muli iyi kampeni. Ilyo amwene insansa shakwete bapainiya bafumine ukutali no kuyashimikila imbila nsuma mu calo ekala, alililile. Atendeke ukutontonkanya pa mulimo alebomba. Ilyo abwelele uko ekala, pa numa ya milungu ibili, alilekele incito no kutendeka bupainiya bwa nshita yonse. Ino nshita alikwata sana insansa, ukuti alebukisha Kabumba wakwe mu nshiku sha bwaice bwakwe.—Luk. Mil. 12:1.

Lipaalo icine cine ukubombesha mu mulimo wa kwa Yehova. Tapali ico mwingacita icingawama ukucila ukubomfya inshita yenu na maka mu mulimo wacindama uwa kusambilisha no kushimikila imbila nsuma. Bushe kuliko fimo ifyo mwingacita pa kuti mulebomba sana uyu mulimo wa kupususha abantu? Kufwile kwalibako ififulo fimo mu calo cenu uko bakabila ba mbila nsuma bacepa. Bushe te kuti mutemwe ukukuukila ku fifulo fya musango yu? Nelyo kuti mwatontonkanyapo pa kusambilila ululimi lumbi pa kuti muleafwa abantu mu calo cenu ababa ne cilaka ca kumfwa icine ca mu Baibolo. Yehova akamupaala nga nshi pali fyonse ifyo mukacita pa kuti mulebomba sana umulimo wa kushimikila.—Amapi. 10:22.

[Akabokoshi ne Cikope pe bula 32]

Ubushiku Bashakalabe

Abengi abafumine mu fyalo fimbi ifya ku Europe ku kwisabombako umulimo wa kushimikila ilyo kwali kampeni yaibela mu Bulgaria, balisangilweko na ku Kulongana kwa Citungu ukwaleti, “Mulelola” ukwabelele mu musumba wa Sofia. Bamunyinefwe na bankashi ku Bulgaria balikoseleshiwe sana ukuba na beni abengi abafumine mu fyalo fyalekanalekana. Abantu 2,039 abasangilwe ku kulongana balitemenwe icine cine ilyo munyinefwe Geoffrey Jackson uwa mwi Bumba Litungulula afumishe Baibolo iituntulu iya Malembo ya Calo Cipya mu ciBulgaria! Bonse abasangilweko pali Cisano ilyo Baibolo yafumine, balitotele sana ku kulanga ukuti balitemenwe icine cine. Abengi balelukusha ne filamba ku nsansa. Iyi Baibolo iyaba mu lulimi ulwayanguka ukumfwa ikafwa abena Bulgaria abengi aba mitima isuma ukwishiba Yehova.

[Mapu pe bula 30, 31]

(Nga mulefwaya ukumona mapu, moneni muli magazini)

BULGARIA

SOFIA

Sandanski

Silistra

Kazanlak

[Ifikope pe bula 31]

Bamunyinefwe balishimikile sana muli ilya milungu 7