Usi-uwhowho Obọdẹ Evaọ Bulgaria O Wha Emamọ Iyẹrẹ Ze

“Ivuẹvu na i ghine bu, rekọ iruiruo e rẹ kakao. Fikiere wha lẹ Olori ivuẹvu na re o vi iruiruo kpobọ ivuẹvu riẹ.”—MAT. 9:37, 38.

ẸME Jesu yena ọ nwani kiehọ uyero ẹkwotọ Bulgaria gaga, orẹwho uwowoma jọ nọ o rrọ ofẹ ẹkpẹlobọ obọze ovatha-ọre Europe! Ẹgwọlọ ọ ginẹ riẹ ruaro kẹ eta-usiuwoma nọ i re whowho emamọ usi na kẹ ahwo nọ a bu vi ima ihrẹ (7,000,000) nọ e rrọ ẹkwotọ yena. Oware wọhọ iwhowho-uvie odu ọvo gbe egba ihrẹ (1,700) e rrọ Bulgaria, rekọ a kawo vi epanọ a sai ro ru ẹkwotọ na kpobi. Fikiere, Ugboma Esuo na o tẹ whobọhọ ọruẹrẹfihotọ na inọ a zizie Isẹri nọ e rẹ jẹ ẹvẹrẹ Bulgaria no erẹwho Europe sa-sa ziọ Bulgaria rọkẹ usi-uwhowho obọdẹ evaọ 2009. Ekpoka ihrẹ a ma fihọ inọ a ti ro ru usi-uwhowho na evaọ etoke uvewhru, nọ o te whrẹrẹ ruọ etoke Okokohọ Ubrotọ “Wha Jaja Aro Vi Ẹsikpobi!” nọ a ti ru evaọ ẹwho Sofia evaọ August 14-16, 2009.

Inievo Buobu E Jẹ Uzizie na Rehọ

Inievo nọ e rrọ uwou ogha Sofia a riẹ hẹ sọ inievo nọ i ti no France, Germany, Greece, Itali, Poland, gbe Spen ze a ti bu omojọ. O te gwọlọ nọ inievo nọ e te jẹ uzizie na rehọ kpobi a rẹ rọ ugho obọrai jofa ziọ Bulgaria, jẹ rehọ oke-ilivi rai wobọ evaọ usi-uwhowho na. O jọ oware evawere gaga nọ a rọ ruẹ inọ noka toka unu ahwo nọ a je vi edẹ rai ze inọ a gwọlọ jariẹ wobọ a je dhe ebuebu, bẹsenọ a ro te egba ivẹ gbe udhone gbe ikpegbivẹ (292)! Fikinọ ahwo na a bu, o te lọhọ re a ghale ae fihọ ewho Bulgaria esa: Kazanlak, Sandanski, gbe Silistra. Esẹro ọnyawariẹ nọ e rrọ Bulgaria a te zizie ekobaro gbe iwhowho-uvie orẹwho na re a kuomagbe usi-uwhowho obọdẹ na. Ukuhọ riẹ, inievo egba esa gbe udhone gbivẹ (382) nọ e fialoma ze a tẹ rueva ekwotọ nọ a rẹ kaki te he na nyae ta usiuwoma.

A vi inievo nọ e rrọ ikoko ekẹloma karo nyai ru ọruẹrẹfihotọ kẹ iwou nọ inievo na a ti wohọ. A tẹ haya iwou gbe ehọtẹle nọ e ghare tere he. Inievo nọ e rrọ ikoko ekẹloma na a ru iruo gaga rọ ruẹ nọ inievo nọ i bi no erẹwho efa ze na a wohọ iwou na, jẹ ruẹ nọ a rẹrote ẹgwọlọ rai. Evaọ ewho esa na, a haya iwou nọ a re jo kokohọ. A ru ọruẹrẹfihotọ re inievo nọ i no erẹwho efa ze na a rẹrote iwuhrẹ ukoko. O jọ oware omawere nọ ma rọ ruẹ inọ evaọ eria nọ uvumọ Osẹri Jihova ọ jọ dede he, inievo udhuvẹ gbikpe i je kuomagbe jiri Jihova.

A rẹ ruẹ unu gbiku ajọwha inievo nọ i no erẹwho efa ze na ha. Evaọ etoke uvewhru na, uvo o rẹ jọ gaga evaọ Bulgaria. Dede na, oware ovuovo u ru oma lọhọ inievo nana nọ ajọwha ọ d’oma fia na ha. Ekpoka esa ọsosuọ orọ usi-uwhowho na, a ta usiuwoma kẹ enwenọ ohwo kpobi evaọ okpẹwho Silistra, nọ o rrọ abotọ Ethẹ Danube, onọ u wo ahwo nọ a bu vi idu udhuvẹ gbikpe (50,000). Kẹsena inievo na a te kpohọ iwhre nọ e kẹle oyena, tube ru te ẹwho nọ a re se Tutrakan nọ o rọ emaele ọgba gbisoi thabọ no Silistra evaọ ofẹ ukiediwo-ọre. Ighọjọ izii gbabọ ohiohiẹ a jẹ hai ro muhọ. Nọ a tẹ re emu uvo je serihọ no, a vẹ ruabọhọ usiuwoma ota rite ighọjọ ihrẹ owọwọ hayo tube lehie viere. Epọvo na re, ajọwha inievo nọ i ru usi-uwhowho na evaọ ẹwho Kazanlak gbe Sandanski u ru nọ a ro kpohọ ewho gbe iwhre nọ e kẹle oyena re.

 Iyẹrẹ vẹ I No Usi-Uwhowho na Ze?

A ta usiuwoma gaga evaọ ekpoka ihrẹ na. Wọhọ epanọ o jọ evaọ oke ikọ na, ahwo ekwotọ nọ inievo na e jọ ta usiuwoma na a sae ta nọ, ‘Wha rehọ ewuhrẹ rai vọ ẹkwotọ mai no.’ (Iruẹru 5:28) Inievo nọ i wobọ evaọ usi-uwhowho na a fi emagazini nọ i te oware wọhọ idu udhuvẹ gbikpe (50,000) họ ada je mu ebe-iwuhrẹ Ebaibol họ nọ i te egba ene gbe udhone gbivẹ (482). U woma kẹhẹ, eva September 1, 2009 a to ukoko ọsosuọ họ evaọ Silistra, a tẹ jẹ rehọ itu uwuhrẹ Isẹri Jihova mu evaọ ẹwho Kazanlak gbe Sandanski. O rrọ oware evawere nọ ma be rọ ruẹ ahwo nọ a yo emamọ usi na evaọ etoke usi-uwhowho na nọ a be nyaharo evaọ abọ-ẹzi enẹna.

Evaọ oka ọsosuọ usi-uwhowho na, oniọvo-ọmọtẹ jọ nọ ọ rrọ ọkobaro obọdẹ nọ ọ rẹ jẹ ẹvẹrẹ Bulgaria nọ o no obọ Spen ze ọ ta usiuwoma kẹ Karina, aye jọ nọ ọ jẹ jọ iyẹrẹ zẹ ebe-usi evaọ ẹwho Silistra. Oware nọ Karina o yo u si rie urru, o te kpohọ ewuhrẹ. Ọ tẹ nwane rọwo inọ a ru uwuhrẹ Ebaibol kugbei. Ọzae riẹ yọ ohwo nọ ọ vro inọ Ọghẹnẹ ọ rrọ họ, fikiere Karina ọ tẹ ta nọ a hai kpohọ ogege-arozaha kẹ uwuhrẹ Ebaibol na. A je ru uwuhrẹ Ebaibol na kugbei avọ emetẹ ivẹ riẹ. Uwuhrẹ Ebaibol na o were ọrọ ọmọtẹ ọkpako na gaga, ọnọ a re se Daniela. O se obe Ebaibol Wuhrẹ na re evaọ oka ovo je ru lele uzi Ebaibol nọ o ta nọ o thọ re a rehọ emema ru iruo evaọ egagọ. Kẹsena ọ tẹ jẹ vuẹ egbẹnyusu riẹ eware nọ o wuhrẹ. Nọ o kpohọ ewuhrẹ ukoko evaọ orọ ọsosuọ riẹ no, eka esa ọvo e ruemu kẹsena ọ tẹ ta kẹ oniọvo-ọmọtẹ nọ o bi ru uwuhrẹ kugbei na inọ: “O rrọ omẹ oma wọhọ ẹsenọ mẹ rrọ omọvo rai no. Eme me re ru re mẹ sai mu usiuwoma họ ẹta re?” Daniela avọ oniọvo ọmaha riẹ gbe oni rai a gbẹ be nyaharo ziezi evaọ abọ-ẹzi.

Evaọ Kazanlak, oniọvo jọ nọ a re se Orlin, nọ ọ rrọ ohwo Bulgaria nọ o no Itali ze kẹ usi-uwhowho na o je zihe kpohọ oria nọ o wohọ nọ a ku usiuwoma họ no ẹdẹjọ. Orlin ọ rọ uvẹ na ta usiuwoma kẹ emezae ivẹ jọ nọ e keria akpala othethe evaọ ogege-arozaha. O fi obe Ebaibol Wuhrẹ na họ ada kẹ ae je ru ọruẹrẹfihotọ nọ o ti ro zihe okiokiọ riẹ. Nọ Orlin o zihe, o te mu uwuhrẹ Ebaibol họ kugbe Svetomir, jẹ wariẹ zihe okiokiọ riẹ kẹ uwuhrẹ na. Evaọ edẹ izii, Orlin o ru uwuhrẹ kugbe Svetomir isiaree soso. Svetomir ọ ta nọ: “Edẹ ivẹ nọ i kpemu taure whọ tẹ ta usiuwoma kẹ omẹ na, mẹ lẹ se Ọghẹnẹ inọ o fi obọ họ kẹ omẹ riẹ ọyomariẹ. Yọ mẹ ya eyaa kẹe inọ o te fi obọ họ kẹ omẹ, mẹ te rọ uzuazọ mẹ mudhe kẹe.” Nọ Orlin o zihe kpohọ Itali no, inievo ẹkwotọ na a ruabọhọ uwuhrẹ na kugbe Svetomir, enẹna o bi ru uzẹme na họ oriẹ.

 Eghale Rọkẹ Ahwo nọ A Wo Ẹzi Omolahiẹ

Ẹvẹ oma o jọ ahwo nọ a rọ unevaze raha oke-ilivi rai gbe ugho obọrai jofa kpohọ orẹwho ofa kẹ iruo usiuwoma ota na? Ọkpako ukoko jọ evaọ obọ Spen o kere nọ: “Usi-uwhowho na u ru usu inievo ẹvẹrẹ Bulgaria evaọ obọ Spen kpekpe viere no. Inievo nọ i wobọ evaọ usi-uwhowho na a reawere riẹ ziezi.” Ọzae-avọ-aye jọ nọ a no Itali ze a kere nọ: “Ọnana họ amara nọ ọ mai woma kpaobọ evaọ edẹ uzuazọ mai kpobi!” A fibae nọ: “Usi-uwhowho na u nwene uzuazọ mai! Enẹna, eriwo mai o nwene no.” Ọzae-avọ-aye nana a te muhọ eroro kpahe ẹkwa kpohọ Bulgaria kẹ iruo usiuwoma ota evaọ oria nọ ẹgwọlọ ọ jẹ mae rro. Carina yọ oniọvo-ọmọtẹ nọ ọ re te rọo ho nọ ọ rrọ ọkobaro oke-kpobi nọ o no Spen ze, ọnọ o wobọ evaọ usi-uwhowho na evaọ ẹwho Silistra. Nọ o no usi-uwhowho na kpo no, o te no iruo nọ ọ jọ jẹ kwa kpohọ Bulgaria re ọ ruẹse rọ uketha kẹ ukoko okpokpọ nọ a t’ohọ evaọ ẹwho Silistra na. O koko ugho họ obọ nọ ọ rẹ sae rọ rẹrote omariẹ ẹgbukpe ọsoso evaọ obei. Carina ọ ta kpahe iroro-ejẹ riẹ na inọ: “Eva e were omẹ gaga inọ Jihova ọ kẹ omẹ uvẹ nọ me bi ro wobọ evaọ iruo riẹ evaọ Bulgaria obonẹ, yọ o rrọ irẹro mẹ inọ mẹ te jọ obonẹ krẹkri. Me wo emọ-uwuhrẹ Ebaibol isoi no, yọ esa evaọ usu rai a be ziọ ewuhrẹ.”

Oniọvo-ọmọtẹ jọ evaọ obọ Itali ọ gwọlọ wobọ evaọ usi-uwhowho na, rekọ fikinọ o mu iruo họ obọ, o ri te ohwo nọ o re wo oke-ilivi hi. Dede na ọ kẹ uvẹ hẹ re onana o whaha iẹe, ọ yare nọ a kẹe amara ọvo re a siẹe osa ba ẹhwa evaọ amara yena, yọ ọ gba riẹ mu inọ a gbẹ kẹe uvẹ na ha o re no iruo na. U gbe rie unu nọ ọga iruo riẹ ọ ta kẹe nọ: “U woma, rekọ whọ rẹ rọwo nọ who ti ru oware jọ k’omẹ: Inọ who ti vi ekade-uyere no Bulgaria se omẹ.” Oniọvo-ọmọtẹ na ọ riẹ inọ Jihova o yo olẹ riẹ na.

Oniọvo-ọmọtẹ ọmoha jọ nọ a re se Stanislava evaọ ẹwho Varna evaọ Bulgaria, ọnọ o bi ru iruo oke-kpobi avọ emamọ ugho nọ a be hwae ọ rehọ oke-ilivi riẹ re ọ ruẹsi wobọ evaọ usi-uwhowho na evaọ ẹwho Silistra. Nọ ọ ruẹ oma nọ o be were ekobaro nọ i no ugbothabọ ziọ orẹwho riẹ kẹ usi-uwhowho na, u duobọtei udu te epanọ aro o ro su ei ame. O te muhọ eroro kpahe oware nọ ọ be rehọ uzuazọ riẹ ru, bi le utee akpọ. Nọ ọ rọ eka ivẹ wobọ evaọ usi-uwhowho na je zihe kpo no, o te no iruo riẹ jẹ ruọ iruo ọkobaro oke-kpobi. Enẹna, ọ be wereva ziezi nọ ọ be rọ kareghẹhọ Ọnọ ọ ma riẹ evaọ oke ọmoha.—Ọtausi. 12:1.

Uvi oghale o rrọ nọ ohwo o te bi wobọ ziezi evaọ iruo Jihova. Oware ofa nọ u woma vi onana o rrọ họ nọ whọ tẹ be rọ oke gbe ẹgba ra wobọ evaọ iruo usiuwoma ota gbe ahwo owuhrẹ nọ i wuzou gaga na. Kọ idhere jọ e riẹ nọ whọ sai ro fiba odibọgba ra evaọ iruo nana nọ e rẹ wha esiwo se ahwo na? Ẹsejọhọ eria jọ e rrọ orẹwho ra nọ ẹgwọlọ kẹ eta-usiuwoma ọ jẹ mae rro. Kọ whọ sae kwa kpohọ oria utioye na jọ? Whọ sai je roro kpahe ewuhrẹ ẹvẹrẹ ọfa nọ whọ sai ro fi obọ họ kẹ ahwo nọ e rrọ orẹwho ra nọ uruame uzẹme na u bi kpe. Oghẹrẹ enwene kpobi nọ whọ rẹ sai ru ro ru odibọgba ra kẹre, jọ u mu owhẹ ẹro inọ Jihova ọ te ghale omodawọ ra ziezi.—Itẹ 10:22.

[Ẹkpẹti/Uwoho nọ e rrọ ẹwẹ-obe avọ 32]

Ẹdẹ nọ Ọ rẹ Thọrọ Ẹro Ho

Ibuobu inievo nọ i no erẹwho Europe efa ziọ usi-uwhowho obọdẹ evaọ Bulgaria na a ma omaa nọ a re ro kpohọ Okokohọ Ubrotọ “Wha Jaja Aro Vi Ẹsikpobi!” na evaọ ẹwho Sofia. O jọ uduotahawọ ulogbo kẹ inievo nọ e rrọ emotọ na nọ a ro kuomagbe inievo buobu nọ i no erẹwho sa-sa ze. O jọ oware omawere gaga kẹ ogbotu nọ o bu te idu ivẹ gbe ọgba gbizii (2,039) nọ e jọ okokohọ na nọ Brọda Geoffrey Jackson, omọvo Ugboma Esuo na, o si obọ no Ebaibol New World Translation of the Holy Scriptures evaọ ẹvẹrẹ Bulgaria! Ahwo kpobi nọ a jọ okokohọ na Edisoi-Oka yena a dhesẹ epanọ eva e were rai te ẹkwoma abọ nọ a tehe krẹkri. Irui oviẹ i tube no ibuobu rai aro ze fiki oghọghọ na. Ebaibol nana nọ a fa gbagba avọ eme nọ e rẹ lọhọ ese na u ti fi obọ họ kẹ ahwo Bulgaria nọ a ginẹ gwọlọ riẹ Jihova.

[Udhesẹ-oria nọ o rrọ ẹwẹ-obe avọ 30, 31]

(Rọkẹ onọ a ruẹrẹhọ ziezi, rri obe na)

BULGARIA

SOFIA

Sandanski

Silistra

Kazanlak

[Iwoho nọ e rrọ ẹwẹ-obe avọ 31]

A ta usiuwoma gaga evaọ ekpoka ihrẹ na