Yuma Yayiwahi Yafumini Mukampeni Yadimena Yadiña muBulgaria

“Mbutu jajivulu jinahi dehi, ilaña akwakukalakala anakehi. Dichi lombenu kudi Mwanta wakumuna atemeshi akwakukalakala kukumuna kwindi.”—MAT. 9:37, 38.

AWA mazu ahosheliyi Yesu ashikijeweli chikupu mwituña daBulgaria, ituña damapidi dekalila kukabeta kambwela kaEurope. Akwakukalakala amavulu akeñekeleña chikupu kulonda ashimwini nsañu yayiwahi kudi antu akubadika hayihita yitanu nayiyedi ashakamaña munidi ituña. MuBulgaria mwekala akwakushimwina akushika ku 1,700, ilaña hiyatweshaña kuwanisha iluña dejimaku. Dihafumini Izaza Dalombolaña kwiteja nawu atambiki aYinsahu ahoshaña idimi daBulgaria kufuma kumatuña amavulu amuEurope kwinza nakuzataku kampeni yadimena yamu 2009. Iyi kampeni ayiloñesheli nawu akayizata hadi nyilungu yitanu nayiyedi munooña, kushika nimpinji yaKupompa kwaNkambi kwahosheleña nawu ‘Tonenuña!’ muAugust 14-16, 2009 mumusumba waSofia.

Amana Kwetu Amavulu Adihanini

Amana kwetu ahakasanji kamutayi muSofia elukili wanyi antu añahi akenza kufuma kuFrance, Germany, Greece, Italy, Poland, niSpain. Muloña antu akenza akadifwetela aweni nikuzatisha mafuku awu akunooka mumudimu wakushimwina. Wenowu muzañalu watiyiluwu hakumona antu amavulu anakusonekesha mulungu nimulungu, nochashikiluwu 292! Chineli antu amavulu asonekesheli, chadiña chaswayi kuyitwala kunyisumba yisatu yamuBulgaria yaKazanlak, Sandanski, niSilistra. Ankoñi endaña amuBulgaria atambikili apayiniya amunidi ituña niakwakushimwina kulonda niwena azatiku iyi kampeni. Nkumininaku, antu adihanini 382 adikitili chikupu mumudimu wakushimwina mumaluña mwabulileñawu kuvula kushimwinawu nsañu yayiwahi.

Amana kwetu amuyipompelu yekala kwakwihi ayitemesheleñahu dehi nawu ayi akaloñeshi kwakushikena. Afweteli mali atupeka nimatala amapumwinu abula kukola wuseya. Amana kwetu akudina iluña azatili nañovu hakutambwila enyi enjileña nikuyiloñeshela yuma yakeñeleñawu. Munyisumba yejima yisatu, afweteleli maluña akuhumañena. Amana kwetu enjili ayinkeli mudimu wakulombola kupompa kwachipompelu. Chatuzañalesheli hakumona mumaluña mwabulili aYinsahu, akwakushimwina 50 atachikili kupompa nakumuhameka Yehova.

Amana kwetu afumini kumatuña acheñi enjili kukampeni adiña nampwila yayeni yakuzata iwu mudimu. Nampinji yanooña, mpepela muBulgaria yatataña nakushika 40 digilizi. Hela chochu, kwosi chuma chatwesheli kukañesha amana kwetu niahela adikita. Musumba waSilistra wekala kuKaloña kaDanube mwekala antu akubadika 50,000, munyilungu yisatu yakutachikilahu amana kwetu ashimwininumu chikupu. Kuhiñahu, amana kwetu adikitili chikupu ashikili nikunyikala yekala kwakwihi, ashikili nikuTutrakan, mukala wekala kumujika waSilistra, hakwenda makilomita 55. Atachikileña mudimu wakushimwina nantentemena nampinji ya 9:30. Hanyima yakudya kwahachayili, atwalekeleñahu nakushimwina kushika nimpinji ya 7:00 yawufuku hela kubadikahu. Chochimu, hamuloña wakusweja kudikita kwawana kwetu, kampeni kamumusumba waKazanlak niSandanski kashikili nimunyikala yekala kwakwihi nimunyisumba.

 Yumanyi Yafumini Muniyi Kampeni?

Munyilungu yitanu nayiyedi antu amavulu ayishimwinini chikupu. Neyi chiyahosheluwu mumafuku awapostolu, antu amuniyi nyisumba ahosheli nawu, ‘Munenzeshi musumba wetu nantañishilu yenu.’ (Yil. 5:28) Awa Yinsahu ahanini magazini 50,000 nawa atachikili atudizi aBayibolu 482. Wenowu muzañalu watiyiluwu, chashikiluwu haSeptember 1, 2009, mumusumba waSilistra mwekalili chipompelu chachiha, nawa muKazanlak nimuSandanski mudi mazanvu amakwawu. Okuwaha hakumona antu atiyili nsañu yayiwahi katachi hampinji yakampeni anakukulilaku kuspiritu.

Mumulungu wakutachika kampeni, muhela wahoshaña idimi daBulgaria payiniya wadimena wafumini kuSpain wamushimwinini Karina, mumbanda washakamaña muSilistra walandishileña yipapilu yansañu mumukwakwa. Karina wetejeli nsañu yayiwahi nawa wenjili kukupompa. Washikeneni dakwiteja kutachika kudiza Bayibolu. Chineli nfumwindi wakaanaña nindi Nzambi kwosi, Karina wamwilili muhela nindi akudizilaña Bayibolu mupaaki. Hakudiza Bayibolu wasendeleña nianyanindi awambanda ayedi. Wamukulumpi, Daniela, wahamekeli chikupu chalala chamuBayibolu. Watañili mukanda waChatañishaña Bayibolu mumulungu wumu nawa hohenohu wazatishili chahoshaña Bayibolu hakuzatisha ankishi hakudifukula. Kuhiñahu watachikili kulejaku amabwambu jindi chalala chadizileñayi. Chimwahitili hohu nyilungu yisatu kufuma hayiliyi nakupompa kuchipompelu katachi, wamulejeli muhela wamudizishileña nindi: “Nakutiya neyi nekala dehi Chinsahu. Chumanyi chinatela kwila kulonda ninami niyena nakushimwina?” Daniela natwalekuhu kuyilaku hambidi, hamu namama yindi nimuhelindi wakansi.

Mumusumba waKazanlak, mana kwetu wahoshaña idimi daBulgaria wejina daOrlin, wenjili kukampeni kufuma kuItaly, wadiña nakuya kwakamineñayi hanyima yakufuma mumudimu wakushimwina. Munjila, Orlin washimwinini akwenzi ayedi ashakamini hachitwamu chachilehi chadiña mupaaki. Wayinkeli mukanda waChatañishaña Bayibolu nawa wayikanini nindi wukafunta ifuku dahiñiluhu. Chafuntiliyi, Orlin watachikili kudiza kwaBayibolu naSvetomir nawa atwalekeluhu nakudiza ifuku dalondeleluhu. Mumafuku atanu nawana, Orlin wadizili naSvetomir mapampa katanu nasatu. Svetomir wahosheli nindi: “Henohu kanda muhiti mafuku ayedi nakushika hitwadibulakeni nanenu, nalombeli kudi Nzambi nami yakwashi kulonda nimwiluki. Nawa nahosheli kudi Nzambi nami neyi yankwasha, nakahana wumi wami kudi yena.” Orlin chafuntiliyi kuItaly, amana kwetu amunidi iluña atwalekeluhu nakudiza naSvetomir, nawa nakuzatisha chikupu chalala muwumi windi.

 Nkisu Jajivulu Jatambwilañawu Antu Adihanaña

Indi antu azatishili chikupu mafuku awu akunooka nimali awu nakuya kwituña dacheñi kulonda akashimwini nsañu yayiwahi atiyili ñahi? Eluda wazatilaña muSpain wasonekeli nindi: “Kampeni kaleñeleli amana kwetu amwiluña dakushimwinamu muBulgaria muSpain kunuñañana. Nawa amana kwetu azatiluku mudimu wakampeni ahetelelumu chikupu.” Antu adisumbula afumini kuItaly asonekeli nawu: “Muchihandilu chetu aka kadiña kakweji kakawahi chikupu.” Atwalekeluhu nawu: “Kampeni kahimpili chihandilu chetu! Ichi tunahimpiki chikupu.” Awa adisumbula atachikili kutoñojoka nawu atuntukili kuBulgaria nakushakamaku kulonda akazatileña kudi kukankila kwawakwakushimwina. Carina himuhela mujiki nawa hipayiniya wampinji yejima wenjili kukampeni muSilistra kufuma kuSpain. Walekeli mudimu wazatileñayi muSpain nawa watuntukilili kuBulgaria nakukwasha chipompelu chachiha chamuwuna musumba. Wahembeli mali amavulu akudikwasha nachu muBulgaria hadi chaaka chimu. Kutalisha hakufuukula kwindi Carina wahosheli nindi: “Nidi namuzañalu nankashi hakwila Yehova nañiteji kuzatila munu muBulgaria, nawa nakuhweleli nami nikutwalekahu kushakama munu hadi mpinji yayilehi. Nikweti atudizi aBayibolu atanu, nawa asatu ayaña nakupompa.”

Muhela wakuItaly wakeñeleña kuzataku kampeni, ilaña chineli dihatachikili kuzatayi, hadiña namafuku akunookaku. Chumichi hichamufuntishili hanyimaku, walombeli ñondu wumu wakunooka chakadi kutambula nfwetu yindi nawa wadikasili mumuchima windi nindi neyi amukaaninini wadi kuleka mudimu. Wahayamini hakutiya chahosheli mukulumpi wanyidimu nindi: “Kukala kwosi, ilaña watela kuñilila chuma chimu: Wakantemesheli kaadi yakuBulgaria.” Muhela welukili chikupu nindi Yehova wakwili kulomba kwindi.

Stanislava, muhela wakansi wamumusumba waVarna wamuBulgaria wazatileña mudimu watambwileñayi nfwetu yayivulu, watambwili mafuku akunooka kulonda yakazatuku mukampeni yadiña muSilistra. Chamweniyi muzañalu wadiñi nawapayiniya amavulu afumini kwakulehi enjili nakushimwina nsañu yayiwahi mwituña mwashakamañayi, wadilili. Watachikili kutoñojoka hayuma yelileñayi muchihandilu chindi, yakufwila yuma yakumujimba. Chafuntiliyi kwitala hanyima yanyilungu yiyedi, walekeli mudimu wazatileñayi nawa watachikili mudimu wawupayiniya wampinji yejima. Chayinu mpinji wudi namuzañalu chikupu, nakwanuka Nleñi yindi mumafuku awunkaña windi.—Mukwa. 12:1.

Kudikita chikupu mumudimu waYehova mwafumaña nkisu jajivulu. Kuzata chikupu mumudimu wakutañisha nikushimwina nsañu yayiwahi dimudimu wabadika. Kuduhu njila jimwatela kuzatisha kulonda mudikiteña chikupu iwu mudimu wakupulwisha mawumi awantu? Mwituña mumwashakama hadaha mudi maluña adi mukukankila chikupu. Komana munateli kuya nakuzatila kumaluña amuchidowu? Ntahindi mwatela kudiza idimi dikwawu kulonda mukwashi antu amwituña denu adi nanzala yachalala chamuBayibolu. Ilukenu nenu neyi muhimpa chihandilu chenu kulonda muzati chikupu mumudimu wakushimwina Yehova wukuyikiswila chikupu.—Yish. 10:22.

[Chikasha/Mwevulu wudi hefu 32]

Ifuku Dakanukañawu Chikupu

Antu amavulu afumi kumatuña amakwawu amuEurope enjili nakuzataku kampeni yadimena muBulgaria afuukwiluhu kuya kuKupompa kwaNkambi muSofia, kwahosheleña nawu “Tonenuña!” Amana kwetu niahela amunidi iluña azañaleli chikupu hakutambwila enyi amavulu afumini kumatuña amboka-mboka. Amana kwetu enjili nakupompa 2,039 azañaleli chikupu chelili Mana kwetu Geoffrey Jackson waMwizaza Dalombolaña yedishi Bayibolu yamukuma yaNew World Translation of the Holy Scriptures mwidimi daBulgaria. Antu ejima enjili nakupompa hefuku daChitanu amwekesheli kusakilila kuhitila mukusakilila nkoshi chikupu hadi mpinji yayilehi. Amavulu aholweli madilu amuzañalu. Iyi Bayibolu yabalumunawu munjila yoloka nawa yaswayi kutiya yikukwasha antu akweti mpwila muBulgaria kumwiluka Yehova.

[Mapu yidi hefu 30, 31]

(Neyi munakukeña kumona ntanjikilu yejima talenu mumukanda)

BULGARIA

SOFIA

Sandanski

Silistra

Kazanlak

[Nyevulu yidi hefu 31]

Munyilungu yitanu nayiyedi antu amavulu ayishimwinini chikupu