Lesolo le le Kgethegilego le a Atlega Kua Bulgaria

“Puno ke e kgolo, eupša badiri ke ba sego kae. Ka baka leo, kgopelang Mong wa puno gore a romele badiri punong ya gagwe.”—MAT. 9:37, 38.

RURI mantšu a a Jesu a swanela boemo bja Bulgaria, naga e botse ya Balkan yeo e lego ka borwa-bohlabela bja Yuropa! Go tloga go nyakega badiri ba ba oketšegilego bakeng sa go iša ditaba tše dibotse go baagi ba fetago dimilione tše šupago. Go na le bagoeledi ba 1 700 kua Bulgaria, eupša ga ba kgone go akaretša tšhemo ya bona ka moka. Ka baka leo, Sehlopha se Bušago se ile sa dumelela gore go laletšwe Dihlatse tšeo di tsebago se-Bulgaria go tšwa dinageng tše mmalwa tša Yuropa go tla go tšea karolo lesolong leo le kgethegilego la 2009. Lesolo leo le be le rulaganyeleditšwe dibeke tše šupago nakong ya selemo gomme la latelwa ke Kopano ya Selete ya “Dulang le Phakgame!” kua Sofia ka August 14-16, 2009.

Karabelo e Kgahlišago e le Ruri

Bana babo rena ba ofising ya lekala ya Sofia ba ile ba ipotšiša gore ke batho ba bakae bao ba bego ba tla arabela go tšwa Fora, Jeremane, Gerika, Italy, Poland le Sepania. Se se be se tla bolela gore motho o swanetše go tšea leeto la go ya Bulgaria ka ditshenyagalelo tša gagwe le go diriša matšatši a gagwe a maikhutšo a dira boboledi. Go be go thabiša kudu go bona palo ya bao ba dirago dikgopelo e dutše e oketšega beke le beke, go ba go fihla e dira palo ya batho ba 292! Ka ge go be go arabetše batho ba bantši ka tsela ye, go be go tla kgonega gore baithapi ba ba abelwe go ya ditoropong tše tharo tše dikgolo tša Bulgaria: Kazanlak, Sandanski le Silistra. Balebeledi ba tikologo ba Bulgaria ba ile ba laletša babulamadibogo le bagoeledi ba kgaufsi go thekga lesolo leo. Mafelelong, baithapi ba 382 ba be ba bolela ka mafolofolo mafelong ao a bego a fihlelelwa ka sewelo ka ditaba tše dibotse.

Bana babo rena ba diphuthegong tša kgaufsi ba ile ba kgopelwa e sa le pele go rulaganya marobalo. Ba ile ba hira diphapoši gomme ba beeletša dihotele tše di sa bitšego kudu. Bana babo rena ba ba ile ba šoma ka thata go thuša baithapi ba go hwetša marobalo le go hlokomela dinyakwa tša bona. Ditoropong tše tše tharo ka moka, mafelo a go kopanela a be a hirilwe. Go ile gwa dirwa ditokišetšo tša gore diboka tša phuthego di swarwe ke bana babo rena ba baeng. Go be go thabiša go bona gore mafelong ao go bego go sa dule le Hlatse e tee, bagoeledi ba 50 ba kopane bakeng sa go tumiša Jehofa.

Bao ba tlilego lesolong ba e-tšwa dinageng tše dingwe ba ile ba bontšha phišego e kgolo kudu. Sehleng sa selemo, thempheretšha ya Bulgaria e be e fihla go di-degree Celsius tše 40. Lega go le bjalo, ga go na seo se bego se ka šitiša bana babo rena ba le dikgaetšedi ba mafolofolo. Silistra, motse wo o lego kgaufsi le Noka ya Danube wo o nago le baagi ba 50 000, o ile wa newa bohlatse ka botlalo dibekeng tše tharo tša mathomo. Ka baka leo, bana babo rena ba ile ba dira maiteko a go tshelela metsaneng ya kgaufsi, gaešita le go fihla Tutrakan, yeo e lego dikhilomithara tše 55 ka bodikela bja Silistra. Gantši ba be ba thoma modiro wa bona wa boboledi ka 9:30 mesong. Ka morago ga nako ya matena ba be ba tšwela pele go fihla ka 7:00 mantšiboa goba go feta moo. Ka mo go swanago, lesolo la kua Kazanlak le Sandanski  le ile la tšwela pele go ba go fihla metseng le metsaneng ya kgaufsi, ka baka la phišego ya baithapi ba.

Ke Eng Seo se Fihleletšwego?

Bohlatse bjo bogolo bo ile bja newa dibekeng tše tše šupa. Ka ge go boletšwe mehleng ya baapostola, badudi ba metse ye ba be ba ka bolela gore, ‘Le tladitše motse wo ka thuto ya lena.’ (Dit. 5:28) Dihlatse tšeo di tšerego karolo di sepedišitše dimakasine tše e ka bago tše 50 000 gomme tša thoma dithuto tša Beibele tše 482. Se se thabišago ke gore go ile gwa hlongwa phuthego kua Silistra go tloga ka September 1, 2009, gomme go na le dihlopha Kazanlak le Sandanski. Go ruthetša pelo go bona batho bao ba kwelego ditaba tše dibotse ka lekga la mathomo nakong ya lesolo le ba dira tšwelopele e botse ya moya.

Bekeng ya mathomo ya lesolo le, kgaetšedi wa mmulamadibogo yo a kgethegilego yo a bolelago se-Bulgaria yo a tšwago Sepania o ile a neela bohlatse go mosadi yo a bitšwago Karina, yo a bego a rekiša dikuranta setarateng. Karina o ile a bontšha kgahlego gomme a tla dibokeng. Ka lethabo o ile a amogela thuto ya Beibele. Monna wa gagwe e be e le moila-modimo, ka gona mosadi yo o ile a kgopela go swarelwa thuto ya Beibele phakeng. Thuto ye ya Beibele e ile ya akaretša le barwedi ba gagwe ba babedi. Yo mogolo, Daniela, o ile a bontšha tebogo e kgolo kudu ya therešo ya Beibele. O badile puku ya Seo Beibele e se Rutago ka beke gomme kapejana a dira seo Beibele e se bolelago mabapi le go se diriše diswantšho borapeding. Ke moka o ile a thoma go abelana therešo le bagwera ba gagwe. Ka morago ga dibeke tše tharo feela a bile gona dibokeng ka lekga la pele, o ile a botša kgaetšedi yo a bego a mo swarela thuto gore: “Ke ikwa bjalo ka yo mongwe wa lena. Ke swanetše go dira’ng gore ke thome go ya bodireding?” Daniela o tšwela pele gabotse gotee le mmagwe le moratho wa gagwe.

Kua Kazanlak, ngwanabo rena wa mo-Bulgaria yo a bitšwago Orlin, yo a bego a tlile lesolong a e-tšwa Italy, o be a e-tšwa tšhemong gomme a lebile moo a dulago gona. Ge a le tseleng, Orlin o ile a nea bohlatse go masogana a mabedi ao a bego a dutše pankeng ya phaka. O ile a ba sepedišetša kopi ya Seo Beibele e se Rutago gomme a rulaganya go boela go bona letšatšing leo le latelago. Leetong leo, Orlin o ile a thoma thuto ya Beibele le Svetomir, yeo ba ilego ba e tšwetša pele letšatšing le le latelago. Matšatšing a senyane, Orlin o be a ithutile le Svetomir ka makga a seswai. Svetomir o itše: “Matšatši a mabedi pele ga ge nka kopana le wena, ke rapetše Modimo gore a nthuše go mo tseba. Ke ile ka mo holofetša gore ge a ka nthuša, ke tla ineela go yena.” Ka morago ga gore Orlin a boele Italy, bana babo rena ba moo ba ile ba šala ba ithuta le Svetomir gomme o tšwela pele a phelela therešo.

 Ditšhegofatšo Tšeo di Humilego Bakeng sa Bao ba Ilego ba Ikgafa

Bao ba ilego ba gafa matšatši a bona a maikhutšo ba tšea leeto la go ya nageng e nngwe ka ditshenyagalelo tša bona ba ikwa bjang? Mogolo yo a hlankelago Sepania o ngwadile gore: “Lesolo le le dirile gore bana babo rena ba tšhemong ya se-Bulgaria kua Sepania ba batamelane kudu. Le bile le tutuetšo e kgolo go bana babo rena bao ba tšerego karolo go lona.” Banyalani ba bangwe ba go tšwa Italy ba ngwadile gore: “Ye e bile kgwedi e kgahlišago kudu maphelong a rena!” Ba okeditše ka gore: “Lesolo le le fetotše maphelo a rena! Ga bjale re batho bao ba fetogilego.” Banyalani ba ba ile ba thoma go naganišiša ka go hudugela Bulgaria gore ba hlankele mo go nyakegago bagoeledi ba oketšegilego. Carina ke kgaetšedi wa mmulamadibogo wa ka mehla yo a sego lenyalong yo a tšwago Sepania yo a ilego a thekga lesolo la kua Silistra. Ka morago ga moo o ile a tlogela mošomo wa gagwe kua Sepania gomme a hudugela Bulgaria go thekga phuthego e mpsha motseng woo. O be a bolokile tšhelete ye e lekanego bakeng sa go ka phela Bulgaria ngwaga ka moka. Carina o bolela ka phetho ya gagwe gore: “Ke thabišwa ke gore Jehofa o ntumeletše go hlankela mo Bulgaria, e bile ke holofela gore ke tla kgona go dula mo nako e telele. Ke šetše ke ithuta Beibele le batho ba bahlano gomme ba bararo ba bona ba a kopanela.”

Kgaetšedi yo mongwe wa Motaliana o be a nyaka go tšea karolo lesolong, eupša ka ge a be a sa tšwa go thoma mošomo o mofsa, o be a se a tšwa a e-ba le matšatši a maikhutšo. A se a nyamišwa ke seo, o ile a kgopela go ikhutša kgwedi ka moka a sa lefše, e bile o be a ikemišeditše go rola modiro ge kgopelo ya gagwe e ka se amogelwe. O ile a makatšwa ke ge mothwadi wa gagwe a re: “Go lokile, ge feela o ka ntirela selo se tee: O swanetše go nthomela poskarata ya go tšwa Bulgaria.” Kgaetšedi o ile a lemoga gore Jehofa o arabile dithapelo tša gagwe.

Stanislava, kgaetšedi yo monyenyane yo a tšwago motseng wa Varna wo o lego Bulgaria, yo ka mehla a bego a šoma mošomo o lefago gabotse, o ile a tšea matšatši a go ikhutša gomme a a dirišetša go tšea karolo lesolong la kua Silistra. Ge a bona lethabo la babulamadibogo ba bantši bao ba bego ba e-tšwa kgole gomme ba tlile go bolela ditaba tše dibotse nageng ya gabo, o ile a sekiša megokgo. O ile a thoma go naganišiša ka seo a bego a se dira bophelong, go phegelela mošomo wa boiphedišo. Ge a boetše gae ka morago ga dibeke tše pedi, o ile a tlogela mošomo wa gagwe gomme a ba mmulamadibogo wa ka mehla. Ga bjale o ikwa a thabile e le ka kgonthe, ge a gopola Mmopi wa gagwe e sa le yo mofsa.—Mmo. 12:1.

Ruri ke tšhegofatšo go ba mafolofolo tirelong ya Jehofa. Ga go na selo se sekaone seo o ka se dirago go feta go gafa nako ya gago le matla modirong wo o bohlokwa wa go ruta le go bolela ditaba tše dibotse. Na go na le ditsela tšeo o ka katološago go tšea ga gago karolo modirong wo wa go phološa maphelo? Go ka ba go e-na le mafelo a mangwe nageng ya geno ao go ona go nyakegago bagoeledi ba oketšegilego. Na o ka hudugela lefelong le bjalo? Goba o ka nagana ka go ithuta leleme le lengwe gore o thuše batho ba nageng ya geno bao ba nyoretšwego therešo ya Beibele. Go sa šetšwe diphetogo tšeo o ka di dirago go katološa bodiredi bja gago, o ka kgonthišega gore Jehofa o tla go šegofatša ka mo go humilego.—Die. 10:22.

[Lepokisi/​Seswantšho go letlakala 32]

Letšatši le le sa Lebalegego

Bontši bja bao ba tlilego ba e-tšwa dinageng tše dingwe tša Yuropa go tla go thekga lesolo le le kgethegilego la Bulgaria, ba ile ba itokišeletša go ba gona Kopanong ya Selete ya “Dulang le Phakgame!” kua Sofia. E be e le kgothatšo e kgolo go bana babo rena le dikgaetšedi ba moo go kopana le baeng ba bantši ba tšwago dinageng tše di fapa-fapanego. Batho ba 2 039 bao ba bego ba le gona ba ile ba thaba gakaakang ge Ngwanabo rena wa Sehlopha se Bušago, Geoffrey Jackson a lokolla New World Translation of the Holy Scriptures e feletšego ka se-Bulgaria! Ka moka bao ba bego ba le gona ka Labohlano leo ba ile ba bontšha ka lethabo tebogo ya bona e tšwago pelong ka go opa magofsi nako e telele. Ba bantši ba ile ba ba ba lla ka lethabo. Phetolelo ye e nepagetšego yeo e kwešišegago gabonolo e tla thuša bana babo rena ba botegago ba Bulgaria go tseba Jehofa.

[Mmapa go letlakala 30, 31]

(Bakeng sa mongwalo o beakantšwego ka mokgwa wa kgatišo, bona kgatišo ka boyona)

BULGARIA

SOFIA

Sandanski

Silistra

Kazanlak

[Diswantšho go letlakala 31]

Go neilwe bohlatse bjo bobotse dibekeng tšeo tše šupa