Bulgariapin askha runakunaman predicakurqan

“Cosechanaqa askhapunin, llank’aqkunataq ichaqa pisilla. Chayrayku, chakrayoqta valekuychis cosechanman llank’aqkunata kachamunanpaq.” (MAT. 9:37, 38.)

CHAY textopi Jesuspa nisqanman hinan Bulgaria nacionpi askha predicaqkuna necesitakushan, chayqa tarikun Europapi Inti lloqsimuy ladowan uray ladowan tupay cheqaspi. Chaypin tiyanku 7.000.000 runakuna, iñiqmasinchiskunataq 1.700 kanku, chaymi mana atinkuchu hinantin Bulgariapi predicayta. Chayraykun Bulgariapi kaq sucursalqa Umalli T’aqamanta permisota mañakuspa Europa ladopi tiyaq búlgaro simita rimaq iñiqmasikunata invitarqan, 2009 watapi qanchis semana predicaypi yanapakunankupaq. Tukupunantaq karqan “¡Makilla kashaychis!” nisqa hatun huñunakuywan, chaymi aparikurqan 14-16 agosto killata Sofía llaqtapi.

Askhan hamurqanku

Sucursalmanta hermanokunaqa manan yacharqankuchu Alemania, España, Francia, Grecia, Italia, Polonia nacionkunamanta hayk’a iñiqmasikunachus hamunankuta. Paykunaqa gastonkuwanmi hamunanku karqan, vacacionninkupitaq predicaspa pasananku karqan. Semanakunaq pasasqanman hinan askha solicitudkunata chaskirqanku, llapanqa karqan 292. Chaymi yuyaykurqanku kinsa llaqtakunapi predicakunanpaq: Kazanlak, Sandanski, Silistra llaqtakunapi. Bulgariapi iñiq t’aqakunata watukuq umallikunapas askha predicaqkunata precursorkunatawan nirqanku predicaypi yanapakunankupaq. Chaymi hamuqkunapiwanqa 382 iñiqmasikuna rirqanku maynillanpi predicasqanku llaqtakunapi predicamunankupaq.

Predicananku llaqtakunaq qayllallanpi tiyaq iñiqmasikunatan nikurqan hamuqkunapaq alojamientota maskhamunankupaq. Chaymi askha cuartokunata alquilarqanku, hotelkunapipas separachirqankun cuartokunata. Chayamuqtinkutaq yanaparqanku alojamientonkuman pusaspanku, sapa p’unchaytaq imachus necesitasqankuta qorqanku. Chaymantapas alquilarqankun wasikunata, hamuq hermanokuna chaykunapi huñunakuykunata aparinankupaq. Testigokunaq mana kasqan llaqtakunapin huñukurqanku 50 iñiqmasikuna hina, chayqa ancha kusikunapaqmi karqan.

Huk nacionkunamanta hamuq iñiqmasikunaqa ancha kusikuywanmi predicarqanku. Manan nishu ruphaypas hark’arqanchu, chay tiempopiqa 40°C masraqmi temperaturaqa. Kinsa semanallapin Silistra llaqtapi predicayta tukurqanku, chay llaqtaqa Danubio mayu patapin tarikun, 50.000 runakunataq chaypi tiyanku. Chaymi chay iñiqmasikunaqa hawa llaqtakunaman predicaq rirqanku, Tutrakan llaqtakaman chayarqanku (chayqa Inti haykuy ladoman 55 kilometrospi hinan kashan). Las nueve y media tutamantantan predicayta qallariqku, almuerzanallankupaqmi samariqku, chaymantataq las sietekama predicaqku. Kazanlak, Sandanski llaqtakunapipas  yaqa chhaynan karqan, chaymi chaypipas huk llaqtakunatawan predicarqanku.

Askhan uyarikurqanku

Imaynan ñawpaq tiempopi apostolkunapas ‘Jerusalén llaqtaman yachachikuyninkuwan hunt’aykurqanku’ chhaynatan chay iñiqmasinchiskunapas qanchis semanantin predicarqanku (Hech. 5:28). 50.000 revistakunatan runakunaman saqemurqanku, 482 estudiokunatataq qallarirqanku. Chaymantapas 2009 watapi 1 septiembre killapin Silistra llaqtapi huk iñiq t’aqa qallarirqan, Kazanlak, Sandanski llaqtakunapitaq askha grupokuna. Chayllaraq allin willakuykunata uyariq runakunapas allintan iñiyninkupi wiñashanku.

España nacionmanta precursora especial hermanan ñawpaq semanallapi Silistra llaqtapi periodicokunata vendeq Karina sutiyoq warmita predicarqan. Warmiqa uyarirqanmi, huñunakuyman risqan qhepamantaq Biblia estudiayta qallarirqan. Ichaqa parquepi yachachinankutan munarqan qosanqa Diospi mana creeq kasqanrayku. Iskaynin ususikunantinmi estudiaq, kurak kaq ususin Danielaqa ancha allinpaqmi qhawariq Bibliaq yachachikuyninkunata. Huk semanallapin Imatapunin nisqa librota leerqan, chaymi Bibliaq nisqanman hina manaña imagenkunaman rezakurqanñachu. Yachashasqanmantaqa amigonkunamanpas willarqanmi. Huñunakuyman risqan kinsa semana qhepallamanmi estudiachiqnin hermanata nirqan: “Iñiqmasiykichis hinan sientekuni, ¿imatan ruwanay qankunawan predicanaypaq?” nispa. Danielaqa allintan iñiypi wiñashan, hinallataq mamanpas sullk’anpas.

Italia nacionmanta Orlin sutiyoq hermanotaqa Kazanlak llaqtamanmi kacharqanku. Huk kutinmi alojamientonman kutimpushaspa parquepi iskay waynakunaman predicarqan, hukninmi Svetomir karqan. Paykunamanmi qorqan Imatapunin nisqa librota, nirqantaq paqarisninta kutinanpaq. Chaymi kutispa Svetomirwan Biblia estudiayta qallarirqan. Paqarisnintapas estudiarqankun, chay waynaqa isqon p’unchaypi pusaq kutitan estudiarqan. Chaymantan Orlinta nirqan: “Parquepi predicawasqaykimanta iskay p’unchay ñawpaqtan Diosmanta mañakurqani: ‘Qanta reqsinaypaq yanapawanki chayqa, wiñaypaqmi servisqayki’, nispay”, nispa. Orlin Italiaman kutipuqtinqa chay llaqtapi tiyaq iñiqmasikunan Svetomir waynataqa yachachishallarqanku, payqa yachasqanman hinataqmi kawsashan.

 Ancha kusikuytan tarirqanku

Vacacionninku tiempopi gastonkuwan Bulgariaman riq iñiqmasikunaqa maytan kusikurqanku chaypi predicasqankumanta. España nacionmanta watukuq umallin qelqarqan: “Españapi serviq búlgaro rimaq iñiqmasikunataqa chay llaqtakunapi predicamusqankun astawan hukllacharqan, anchatataqmi paykunata yanaparqan”, nispa. Italiamanta casado warmi-qharin nin: “Imapas sucedewasqankumantaqa chaypi predicasqaykun aswan munay karqan. [...] Chay llaqtakunapi predicamusqaykuwanmi kunanqa huknirayta yuyaykuyku”, nispa. Chay warmi-qhariqa Bulgariaman ripuspa chaypi predicaypi yanapakunankupaqmi yuyaykushanku. Silistrapi predicamuq Carina sutiyoq precursorapas Españaman kutipuspaqa saqepurqanmi llank’ananta, hinaspa chay llaqtaman kutirqan chaypi chayllaraq qallariq iñiq t’aqapi yanapakamunanpaq. Askha qolqetan waqaychakusqa Bulgariapi huk wata kamunanpaq. Chay ruwasqanmanta imayna sientekusqanmantan willakun: “Anchatan Jehová Diosta agradecekuni kayman hamusqaymanta, unaytan qhepakuyta munani. Phisqa estudiokunatañan qoshani, kinsataq hamushankuña huñunakuykunaman”, nispa.

Italiamanta huk hermananchispas munarqanmi chay predicaypi yanapakuyta, ichaqa manan vacacionta horqoyta atirqanchu chayllaraq llank’ashasqanrayku, chaywanpas mañakurqanmi huk killa mana pagoyoqta permisota qonankupaq, mana chayqa saqepunanmi karqan. Jefenqa qosqan permisota, ichaqa nisqan: “Bulgariamantan huk postalta apachimuwanki”, nispa. Chaymi hermanaqa yuyaykurqan: “Diosmi mañakusqayman hina yanapawashan”, nispa.

Varna llaqtapi tiyaq Stanislava hermananchispas mañakurqanmi llank’ananmanta permisota Silistrapi predicamunanpaq, payqa allintan ganaq. Chayman chayaspaqa ancha kusisqatan rikurqan wak nacionmanta hamuq iñiqmasikunata, chaywanmi waqasqaraq sonqon ch’allaq niqtin. Chaymi yuyaymanarqan imayna kawsashasqanta, iskay semanamanta wasinman kutipuspaqa llank’ananmantan lloqsipurqan precursora regular kananpaq. Kunanqa kusisqan sientekun sipas kayninpi Kamaqninta servishasqanmanta (Ecl. 12:1).

Tukuy sonqonkuwan Jehová Diosta serviqkunaqa ancha kusikuytan tarinku. Tukuy kallpanchiswan tiemponchiswanpas runakunaman Bibliamanta yachachispaqa aswan allin llank’aytan ruwashanchis, chaywanmi kikinchispas uyariwaqninchiskunapas wiñay kawsayman aypanqaku. ¿Kallpachakuwaqchu chay llank’aypi astawan yanapakunaykipaq? Yaqapas tiyasqayki llaqtapi predicaqkunaq necesitakusqanman riwaq. Otaq wak rimayta yachawaq, chhaynapi chay rimaypi munaqkunaman Bibliamanta yachachinaykipaq. Imataña ruwanki astawan yanapakunaykipaq chaypas, anchatan Jehová Diosqa yanapasunki (Pro. 10:22).

[32 paginapi foto recuadropiwan]

Mana qonqanapaq p’unchay

Chay ancha sumaq predicaypi yanapakuqkunaqa askhan rirqanku “¡Makilla kashaychis!” nisqa hatun huñunakuyman, chayqa aparikurqan Sofía llaqtapin. Bulgaria nacionmanta iñiqmasikunaqa kusisqan sientekurqanku Europa lado nacionkunamanta iñiqmasikunata reqsispanku. Chaymantapas Umalli T’aqapi llank’aq Geoffrey Jackson iñiqmasinchismi viernes p’unchayta presentarqan Traducción del Nuevo Mundo de las Santas Escrituras nisqata búlgaro rimaypi. Chay huñunakuypi 2.039 kaqkunaqa ancha kusikuymantan askhata agradecekuspanku t’aqllakurqanku, wakinqa waqarqankuraqmi. Chay Bibliaqa entiendenankupaq hinalla allin t’ikrasqan kashan, chaywanqa askha allin sonqoyoq runakunamanmi Jehová Diosmanta yachachinqaku.

[30, 31 paginakunapi mapa]

(Imaynapuni kasqanta yachanaykipaq, qelqata qhaway)

BULGARIA

SOFÍA

Sandanski

Silistra

Kazanlak

[31 paginapi fotokuna]

Qanchis semanan allinta predicakurqan