Kamupeini Takake i Purukaria kua Puapingaia

“Te maata ua nei te mou, te iti nei ra te aronga e kokoti: E teianei, e pure kotou i te Atu o te mou, kia unga mai aia i tetai aronga ei rave i taua mou nana ra.”​—MATA. 9:37, 38.

KUA tau tikai taua au tuatua ra a Iesu ki te turanga i Purukaria, e enua manea no Balkan i te tua apatonga itinga o Europa! Te inangaro maataia ra kia maata atu te aronga angaanga i te apai i te tuatua meitaki ki te au tangata tere atu i te itu mirioni e noo ra i reira. Mei tetai 1,700 papuritia i Purukaria, inara kare e kako ia ratou te ngai tutuanga pouroa. No te reira, kua ariki te Pupu Akaaere kia patiia te Au Kite tuatua reo Purukaria mei te au enua o Europa, kia piri mai ki teia kamupeini takake i te mataiti 2009. Kua akanooia te kamupeini no te itu epetoma i te tuatau maana, taopenga atu ki te Uruoaanga Tapere “Kia Vai Matakite Ua!” i Sofia, ia Aukute ra 14 ki te 16, mataiti 2009.

E Arikianga Maata Tikai

Kua akamanako te au taeake i ko i te opati manga i Sofia e, me eia ra ka ariki mai mei Varani, Tiamani, Ereni, Itaria, Porani, e Paniora. Tera te aiteanga, ka tutaki rai teia aronga ia ratou uaorai i te aere mai ki Purukaria, e ka taangaanga i to ratou tuatau orote i te tutu aere. Mataora tikai i te kite atu i te numero o te aronga tei ariki i te patianga e maata maira i te au epetoma i aereia, e taea uaia atu te 292! No te maata i te aronga tei ariki mai, ka rauka i reira i te tuku i teia aronga tauturu ki te au oire tukeke e toru o Purukaria: ko Kazanlak, ko Sandanski, e Silistra. Kua pati te au akaaere kotinga i Purukaria i te au painia e te au papuritia o taua ngai ra kia turuturu katoa i te kamupeini. I te openga, e 382 aronga tauturu tei tutu maroiroi aere i roto i te au ngai kare e taea putuputuia ana e te tuatua meitaki.

Kua tonoia atu te au taeake o te au putuputuanga i te pae mai na mua ake, kia akanoo i te au ngai nooanga. Kua tarau ratou i te au apatimani e kua tapao i te au otera mama ua. Kua maroiroi tikai te au taeake i reira i te tauturu i te aronga tauturu tei tae mai, kia noo ma te meitaki e kia akonoia i to ratou au anoanoia. Kua tarauia te au ngai no te uipaanga i roto pouroa i te au oire e toru. Kua akanooia na te au taeake tei aere mai, e akaaere i te au uipaanga putuputuanga. Mataora tikai i te kite e i roto i te au ngai kare takiri e Kite i reira, te uipaanga ra e 50 papuritia i te akapaapaa ia Iehova.

E mea umere tikai te maroiroi o te aronga tei aere mai mei te au enua ke ke no te kamupeini. I te tuatau maana, e taea ana te vaito vera ki te 40 tuma tikiri Celcius, i Purukaria. Inara, kare e rauka i te tapu i te maroiroi o teia au taeake e te au tuaine. E akakitekiteanga meitaki tikai tei raveia i te au epetoma mua e toru i Silistra e oire i te pai Kauvai Danube, e 50,000 tuma tangata e noo ra i reira. Tei tupu mai, kua akamaata atu te au taeake i ta ratou tautaanga ki te au oire i te pae mai, e kua tae rava atu ki Tutrakan, e 55 kiromita i te pae opunga o Silistra. E akamata ana ratou i ta ratou angaanga orometua i te ora 9:30 i te popongi. I muri ake i te ora kaikai i te avatea, e angaanga ana ratou e tae ua atu ki te ora 7:00 i te aiai me kore i muri ua ake. Mei te reira rai i Kazanlak e Sandanski,  no te maroiroi maata o teia aronga tauturu, kua tae te kamupeini ki te au tapere e te au oire i te pae mai.

Eaa ra Tei Tupu?

E akakiteanga maata tikai tei raveia i roto i taua itu epetoma ra. Mei tei tuatuaia i te tuatau o te au apotetoro, ka rauka i te aronga no ratou taua au oire ra kia karanga e, ‘Kua ki rava to matou oire i ta kotou tuatua.’ (Anga. 5:28) Mei tetai 50,000 makatini tei orongaia e te Au Kite tei piri atu, e kua akamataia e 482 apii Pipiria. Te mea mataora ra, i roto ia Tepetema ra 1, mataiti 2009, kua akamataia tetai putuputuanga i Silistra, e pera katoa tetai au pupu i Kazanlak e Sandanski. E pumaana tikai i te kite i te aronga tei akarongo i te tuatua meitaki no te taime mua i roto i teia kamupeini, e tere meitaki ra i te pae vaerua.

I te epetoma mua o te kamupeini, kua tuatua atu tetai tuaine tuatua reo Purukaria, e painia takake no Paniora mai kia Karina, e vaine i Silistra e okooko nuti pepa ra i runga i te mataara. Kua akarongo mai a Karina e kua aere mai ki te uipaanga. Papa ua aia i te ariki i tetai apii Pipiria. Kare tana tane e irinaki ana e e Atua tetai, no reira kua pati aia kia raveia te apii Pipiria ki roto i tetai paka. Kua piri mai tana nga tamaine ki te apii Pipiria. Te mataiapo ko Daniela, kua akaari i te arikianga oonu no te tuatua mou o te Pipiria. Kua tatau aia i te puka ta te Pipiria e Apii Maira i roto i te epetoma e i te reira taime rai, kua taangaanga i ta te Pipiria e akakite ra e, eiaa e taangaanga i te au tiki i roto i te akamorianga. E oti kua akamata aia i te akakite i te tuatua mou ki tona au oa. I muri ua ake i te toru epetoma i tona aere mua anga ki te uipaanga putuputuanga, kua karanga aia ki te tuaine e akaaere ra i te apii e: “Inangaro au kia riro mei ia kotou rai. Eaa taku ka rave kia rauka katoa iaku te tutu aere?” Te meitaki ua atura te turanga o Daniela, tona mama e tona teina.

I roto ia Kazanlak, ko tetai taeake Purukaria ko Orlin te ingoa, tei aere mai mei Itaria no te kamupeini, te oki ra ki tona ngai nooanga i muri ake i te angaanga tutu aere. Iaia e aere ra, kua akakitekite atu a Orlin ki tetai nga mapu e noo ra i runga i te nooanga i roto i tetai paka. Kua oronga atu aia i tetai kopi o te puka ta te Pipiria e Apii Maira kia raua e kua akanoo i te oki akaou atu i tera mai ra. I tona oki atu anga, kua akamata a Orlin i tetai apii Pipiria kia Svetomir tei rave akaouia i tera mai ra. I roto i te iva ra, kua apii a Orlin ia Svetomir e varu taime. Kua tuatua a Svetomir e: “E rua ra i mua ake ka aravei ei au ia koe, kua pure au ki te Atua no te tauturu kia kite au no runga iaia. E kua taputou au e me ka tauturu mai aia iaku, ka akatapu au i toku oraanga kiaia.” I muri ake i te oki anga a Orlin ki Itaria, kua apii ua atu te  au taeake o te reira ngai ia Svetomir, e te akariro nei aia i te tuatua mou e nana uaorai.

Akameitakianga Mou no te Aronga Tei Akaatinga

Eaa te manako o te aronga tei taangaanga maoraora ua i to ratou orote, e tei tutaki i to ratou uaorai patete i te aere ki tetai enua ke i te tutu aere? Kua tata tetai tangata pakari e tavini ra i Paniora e: “Kua riro te kamupeini ei akapiri vaitata i te au taeake i roto i te ngai tutuanga o Purukaria i Paniora. E akakeuanga maata tikai no te au taeake tei piri atu ki te reira.” Tetai tokorua mei Itaria kua tata e: “Ko te marama mataora roa atu teia i roto i to maua oraanga!” Kua akakite raua e: “Kua taui te kamupeini i to maua oraanga! E nga tangata tuke ake rai maua i teianei.” Kua akamanako meitaki teia tokorua i te neke atu ki Purukaria noo ei kia tavini i te ngai e inangaro maataia ra te tauturu. Ko Carina, e tuaine painia tauturu kare i akaipoipo, no Paniora, tetai tei turuturu i te kamupeini i Silistra. I muri poto ua mai kua akaruke aia i tana ngai angaanga i Paniora e kua neke atu ki Purukaria i te turuturu i te putuputuanga ou i roto i taua oire ra. Kua rauka iaia i te akaputu i tana moni kia noo i Purukaria no tetai mataiti. Kua tuatua a Carina no runga i tana ikianga e: “Rekareka tikai au no tei akatika a Iehova iaku kia tavini i Purukaria nei, e te inangaro nei au kia rauka iaku te noo i konei no tetai tuatau roa. Kua rauka takere iaku e rima apii Pipiria, e te aere mai nei e toru ia ratou ki te au uipaanga.”

Kua inangaro tetai tuaine Itaria i te piri ki te kamupeini, koi akamata ua akera ra aia i tetai angaanga ou, kare ona orote. Kua pati aia kia noo mei te angaanga e tai marama kare e tutaki, e kua papa ua i te akaruke i te angaanga me kare e akatikaia mai. Tona poitirere, kua karanga mai tona pu e: “Ae, tera ra: Akau mai koe i tetai kati naku mei Purukaria.” Irinaki tikai te tuaine e kua pau mai a Iehova i tana pure.

Ko Stanislava, e tuaine mapu no Varna i Purukaria, e ngai angaanga tinamou e te tutaki meitakiia tana, kua orote mai aia mei te angaanga kia piri ki te kamupeini i Silistra. Tona kite anga i te tu mataora o te au painia, tei aere mai mei te ngai mamao i te tutu aere i te tuatua meitaki i tona enua, kua aue aia. Ina kua akamanako aia i tona oraanga, iaia e aruaru ra i te angaanga kimi moni. E rua epetoma i muri ake i te oki anga ki te kainga, kua akaruke aia i tana ngai angaanga e kua riro mai ei painia tamou. Mataora tikai aia i teianei, i te akamanako anga i Tei Anga iaia i tona ou anga.​—Kohe. 12:1.

E akameitakianga tikai te tu maroiroi i te tavini anga ia Iehova. Te angaanga meitaki roa atu, kia akapou i toou taime e te maroiroi i roto i te angaanga puapinga i te apii e te tutu aere i te tuatua meitaki. E au mataara ainei tetai ka rauka ia koe i te piri maata atu ki teia angaanga orometua akaora tangata? Penei e au ngai tetai i toou enua e anoano maataia ra te tauturu. Ka rauka ainei ia koe i te neke ki reira? Penei ka inangaro koe te apii i tetai reo ke i te tauturu i te tangata i toou enua, e kaki ra i te tuatua mou o te Pipiria. Noatu eaa taau ka rauka i te rave kia piri maata atu ki te angaanga orometua, papu ia koe e ka akameitaki maata mai a Iehova ia koe.​—Mase. 10:22.

[Pia/​Tutu i te kapi 32]

E Ra Puapinga Tikai kia Akamaaraia

Manganui te aronga tei aere mai mei te au enua o Europa i te turuturu i teia kamupeini takake i Purukaria, tei parani kia tae atu ki te Uruoaanga Tapere “Kia Vai Matakite Ua!” i Sofia. E akamaroiroianga maata tikai no te au taeake e te au tuaine i taua ngai ra i te aravei i te au manuiri e manganui no te au enua tukeke. Mei teaa atura te mataora o te 2,039 aronga tei tae mai i te tuku anga mai te Taeake ko Geoffrey Jackson, te komono o te Pupu Akaaere, i te New World Translation of the Holy Scriptures i roto i te reo Purukaria! Kua akaari mai te katoatoa rava i ta ratou akameitakianga i taua Varaire ra, na roto i tetai pokarakara anga maruarua e te roa. Maata te aronga i aue no te mataora. Ka tauturu teia urianga tano tikai i roto i te reo mama ua i te marama, i te au tangata ngakau tae o Purukaria kia kite ia Iehova.

[Mapu i te kapi 30, 31]

(No runga i teia, akara i te puka)

PURUKARIA

SOFIA

Sandanski

Silistra

Kazanlak

[Au Tutu i te kapi 31]

E akakitekiteanga puapinga tikai tei raveia i taua itu epetoma ra