NA ENTERO mundo, ta reza el maga gente maskin cosa el diila cultura y religion. Ta reza sila si solo; ta reza sila na grupo. Ta reza sila na maga iglesia, templo, sinagoga, mosque y na maga sagrao lugar. Posible sila usa maga prayer rug, rosario, prayer wheel, idolo, prayer book o maga rezo que escribido na un diutay board que ta hace cabit.

El rezo amo el un cosa que ta hace diferente con el maga gente na otro vivo creatura aqui na tierra. Manada kita cosa ta semeja na maga animal. Igual kanila, ta necesita kita comida, aire y agua. Igual kanila, ta nace kita, ta vivi y ta muri. (Eclesiastes 3:19) Pero, el maga gente lang el ta reza. Porque?

Posible, el de con todo simple contestacion amo cay necesita kita reza. Gane, el rezo amo el manera del maga gente para comunica con Dios con quien sila ta adora. El Biblia ta dale mira que ya crea kanaton que tiene ese natural deseo. (Eclesiastes 3:11) Si Jesucristo ya habla: “Alegre aquellos quien ta pensa el diila espiritual necesidad.”—Mateo 5:3, NWT.

Todo kita tiene “espiritual necesidad.” Amo se el razon si porque bien manada religion y bien manada lugar onde ta anda el maga gente para adora y para reza. Pero, el cuanto maga gente ta sinti que gendeh sila necesita con Dios. Deverasan ba se? Ciendo kita maga gente bien mahina, bien corto lang el vida y bien limitao lang el entendimiento, necesita kita ayuda. Necesita kita el ayuda del un persona quien mas sabio, mas poderoso y mas largo el vida que kanaton. Y cosa ayuda kita necesita?

Considera: Ya pruba ya ba tu busca ayuda, sabeduria o contestacion na de tuyu maga pregunta que nuay quien ya puede contesta? Ya sinti ya ba tu que necesita tu comforta, por ejemplo, cuando tiene quien ya muri que cerca contigo? O ya necesita ya ba tu ayuda cuando ta hace tu un bien importante decision o necesita perdon cuando ta sinti tu bien culpable?

Asegun na Biblia, maga valido razon se para reza. El Biblia puede ayuda kanaton para sabe si paquemodo reza y si cosa reza cay ta contene este maga rezo del manada fiel hombre y mujer. Ya reza sila para na comforta, guia, perdon y para contesta con el maga de con todo dificil pregunta.—Salmo 23:3; 71:21; Daniel 9:4, 5, 19; Habacuc 1:3.

Todo este maga rezo tiene un cosa que semejante. Este maga hombre y mujer sabe con el de con todo importante cosa acerca na rezo que manada del maga gente ahora ya ignora. Sabe sila si con quien debe reza.