VAWLEICUNG pumpi ah a ummi zei biaknak asiloah zei bantuk nunphung paoh nih thla an cam cio. A phu ning zongin an cam. Cun church, biakinn, pumhnak, muslim biakinn le khuahrum bo hna ah thla an cam hna. Thla an cam tikah pher, ṭhi, thlacamnak leng, milem, thlacamnak cauk hna kha an hman asiloah thlacamnak ca pawl kha an ṭial i vapang ah an taar.

Thalcamnak nih minung kha a dang thilnung pawl he a kan theidanter. Minung le saram cu kan i lawhnak tampi a um. Kannih zong saram bantukin rawl, thli le ti kan herh. Cun saram bantukin hrin kan si, kan nung i kan thi. (Phungchimtu 3:​19) Asinain minung lawng nih thla kan cam khawh. Zeicah?

A phi cu thlacam kan herh caah a si. Mi tampi nih thlacamnak cu a liannganmi thlarau pawl he pehtlaihnak tuah khawhnak lamkhat a si tiah an ruah. Baibal nih cu bantuk tuah thil duhnak lungthin ngeih awkah Pathian nih a kan ser tiah a ti. (Phungchimtu 3:​11) Jesuh Khrih nih voikhat cu “mi chambau kan si ti aa hngalmi cu lunglawmmi nan va si dah” tiah a ti.​—Matthai 5:3.

Mi nih suimilam tampi​—chung thla an cammi, biaknaklei inn hna le tuanbialei thilri pawl kan zoh tikah “mi chanbau” kan si i Pathian i bochan kan hau tinak a si ko lo maw? Mi cheukhat nih mah chambaunak kha tlinter awkah anmahle anmah kha an i bochan. Cheukhat nih cun midang kha an i bochan hna. Asinain minung nih cun tling tein a kan bawmh kho lo tiah na ruat ko lo maw? Minung cu kan chan a tawi, khawnden kan fawi i fimnak zong kan ngei tuk lo. Cucaah minung nakin a fim deuhmi, a ṭhawng deuhmi le a nun khua a sau deuhmi lawng nih kan chambaunak kha a tlinter khawh lai. Thlacam awkah a kan forhtu thil cu zeidah a si lai?

Ruathmanh: Lamhruainak le fimnak asiloah minung ruahnak nih a phanh khawh lomi biahalnak i a phi kha hngalh na duh bal maw? Dawtmi pakhatkhat thihnak ruang i na ngaih a chiat lioah hnemhnak ka herh tiah na ruat bal maw? Asiloah a harmi biakhiahnak tuah na herh tikah lamhruainak ka herh tiah na ruat bal maw? Asiloah na sualnak ruang i na ngaih a chiat lioah ngaihthiamnak ka herh tiah na ruat bal maw?

Baibal ningin mah thil sining hna cu thla kan cam awk a sinak a ruangṭha hna an si. Mah kong he aa tlaiin zumhawk a tlak bikmi cauk cu Baibal a si. Zeicahtiah zumhfekmi hna an thlacamnak cu Baibal ah langhter a si caah a si. Annih cu hnemhnak, lamhruainak, ngaihthiamnak hmuh awk le a har bikmi biahalnak i a phi hna kha hngalh awkah thla an rak cam.​—Salm 23:3; 71:21; Daniel 9:​4, 5, 19; Habakkuk 1:3.

A hmasa ah langhtermi David, Daniel le Habakkuk ti bantuk hna i an thlacammi cu aa khat lo nain an thlacamnak ah aa khatmi pakhat cu a um. Annih nih an thlacamnak ngaihpiak awkah a biapimi a kong pakhat kha an telhchih. Tuchan ah mah a biapimi a kong kha mi tampi nih zei ah an rel lo. Asinain annih nih aho sinah dah thla kam awk a si ti kha an hngalh.