MAʼAÑIC jumpʼejl cultura o ñopbalʌl maʼañic bʌ miʼ melob oración. An cabʌl baqui miʼ mejlel jiñi oración, ti templo, iglesia, sinagoga, mezquita, pagoda o santuario tac. I cabʌl chuqui miʼ cʼʌjñel ti oración, bajcheʼ rosario tac, alʌ libro tac chaʼan bʌ oración, imagen tac, alfombra, tablilla yicʼot alʌ cilindro tac baqui tsʼijbubil miʼ tilel jiñi oración tac. Pero mach yʌlʌyic baqui o bajcheʼ miʼ melob, tiʼ pejtelelob miʼ melob oración, i bajñelob jach o yicʼotob yambʌlob.

Joñon jachla wʌʼ ti Pañimil muʼ bʌ i mejlel lac mel oración. Jiñi añimal tac miʼ sʌclañob chuqui miʼ cʼux, miʼ japob jaʼ yicʼot miʼ japob icʼ chaʼan cuxulob, cheʼ bajcheʼ joñonla, pero maʼañic miʼ mejlelob ti oración (Eclesiastés 3:19). Cojach joñonla. ¿Chucoch?

Come i cʼʌjñibalʌch lac chaʼan. Cheʼ bʌ jiñi lac piʼʌlob miʼ chaʼleñob oración chaʼañʌch yomob i pejcan jiñi woli bʌ i chʼujutesañob. Jiñi Biblia miʼ pʌs chaʼan cheʼʌch tsaʼ mejliyonla (Eclesiastés 3:11). Jesús tsiʼ yʌlʌ: «Tijicñayob jiñi muʼ bʌ i ñaʼtañob chaʼan i cʼʌjñibalʌch i chaʼañob Dios» (Mateo 5:3).

Miʼ cʼotel lac chʼʌmben i sujm chucoch an cabʌl templo, cabʌl chuqui miʼ cʼʌjñel yicʼot miʼ yʌqʼuentel cabʌl i yorajlel chaʼan miʼ mejlel oración. I sujmʌch, cabʌl lac piʼʌlob miʼ bajñel sʌclañob chuqui yom i melob o miʼ cʼajtiñob i coltʌntel ti yambʌlob chaʼan miʼ mejlel i lʌcʼtesañob i bʌ ti Dios. Pero an muʼ bʌ i ñaʼtañob chaʼan mach i cʼʌjñibalic i chaʼañob Dios, ¿i sujmʌch ba iliyi? Joñonla pʼisbil jach chuqui miʼ mejlel lac mel, mach jalic cuxulonla i an cabʌl chuqui maʼañic bʌ mi lac chʼʌmben i sujm, la com chaʼan an majqui miʼ coltañonla. I cʼʌjñibal lac chaʼan juntiquil wen am bʌ i ñaʼtʌbal, wen pʼʌtʌl bʌ, yicʼot ñumen jal bʌ miʼ chumtʌl bajcheʼ joñonla. ¿I baqui la com coltʌntel?

Jumpʼejl ejemplo, ¿am baʼ ñusa jumpʼejl wocol i maʼañic majqui tsaʼ mejli i coltañet, i yʌqʼueñet wem bʌ ticʼojel, o miʼ subeñet jiñi i cʼʌjñibal bʌ a chaʼan? Cheʼ bʌ an a ñusa wocol, tajol cheʼ bʌ an majqui tsaʼ chʌmi a chaʼan, cheʼ bʌ an chuqui tsaʼ ñaʼta a mel o mi tsaʼ mele jumpʼejl tsʌts bʌ mulil, ¿tsaʼ baʼ wubi chaʼan maʼañic tsaʼ wen ñuqʼuesʌbentiyet a pusicʼal, chaʼan maʼañic tsaʼ taja jiñi wem bʌ ticʼojel o chaʼan maʼañic tsaʼ ñusʌbentiyet a mul maʼ wubin?

Jiñi Biblia miʼ yʌl chaʼan pejtelel iliyi miʼ pʌsbeñonla chaʼan yom mi lac mel oración, muʼ bʌ i yʌl jiñi Biblia chaʼan jiñi oración mucʼʌch i mejlel lac ñop. Miʼ chʼʌm tilel i yoración wiñicob yicʼot xʼixicob tsaʼ bʌ i cʼajtiyob chaʼan miʼ ñuqʼuesʌbentelob i pusicʼal, tsiʼ cʼajtiyob i coltʌntel yicʼot chaʼan miʼ ñusʌbentelob i mul, i miʼ yʌqʼuen i jacʼbal jiñi tsʌts tac bʌ cʼajtiya (Salmo 23:3; 71:21; Daniel 9:4, 5, 19; Habacuc 1:3).

Ili oración tac an junchajp chuqui miʼ pʌsbeñonla. Jiñi tsaʼ bʌ i meleyob an chuqui yujilob wen ñuc bʌ i cʼʌjñibal chaʼan miʼ ñʌchʼtʌbentelob i yoración, yujilob majqui yom miʼ pejcañob ti oración, ili jiñʌch muʼ bʌ i ñusañob ti pʼis cabʌl lac piʼʌlob ili ora.