Akam

1 Ntak Emi Ikpọbọn̄de?

AKAM. Iwakke ukpepn̄kpọ Bible emi mme owo ẹmade nte ukpepn̄kpọ aban̄ade akam. Kere ban̄a mbụme itiaba oro mme owo ẹsiwakde ndibụp mban̄a akam, ekem tiene se ibọrọ oro Bible ọnọde. Ẹwet mme ibuotikọ emi man ẹn̄wam fi esibọn̄ akam—oro edi, man ọtọn̄ọ ndibọn̄ akam m̀mê man ọbọn̄ ke usụn̄ oro Abasi edikopde.

KE OFỤRI ererimbot, mme owo ẹsibọn̄ akam ke kpukpru obio ye ke kpukpru ido ukpono. Mmọ ẹsibọn̄ akam ke ini ẹdude ikpọn̄, ẹsinyụn̄ ẹbọn̄ ke otu. Mmọ ẹsibọn̄ akam ke ufọkabasi, ke temple, ke synagogue, ke itie utuakibuot mme Muslim, ye ke mme itieuwa. Mmọ ẹkeme ndikama mbri akam, n̄kwa akam, mme wheel akam, ndisọi mbiet, n̄wed akam, m̀mê akam emi ẹwetde ke n̄kpri kad ẹkọn̄ ke kọbọd.

Akam anam mme owo ẹkpụhọde ye kpukpru mme odu-uwem n̄kpọ eken ke isọn̄. Edi akpanikọ ke enyene ediwak n̄kpọ emi mme owo ye mme unam ẹsinamde. Ukem nte mme unam, nnyịn imoyom udia, ofụm, ye mmọn̄. Ukem nte unam, ẹsimaman nnyịn, nnyịn imenyene uwem, imesinyụn̄ ikpa. (Ecclesiastes 3:19) Edi mme owo kpọt ẹsibọn̄ akam. Ntak-a?

Ata mmemmem ibọrọ edi ke ana nnyịn ibọn̄ akam. Idem n̄kpọ, n̄kọ ẹda akam nte usụn̄ ndida nnyene nneme ye se ẹkponode. Bible owụt ke ẹkebot nnyịn ye udọn̄ ndinam emi. (Ecclesiastes 3:11) Jesus Christ ama ọdọhọ ini kiet ko ete: “Inemesịt edi eke mmọ oro ẹkerede ẹban̄a unana mmọ ke n̄kan̄ eke spirit.”—Matthew 5:3.

Mmọn̄ọ, ndi idịghe ‘unana ke n̄kan̄ eke spirit’ esinam ẹbọp ikpọ ufọkabasi, ẹbot ikpọ ndisọi mbiet, ẹnyụn̄ ẹda ekese ini ẹbọn̄ akam? Edi akpanikọ, ndusụk owo ẹsiberi edem ke idemmọ m̀mê ke idem ekemmọ owo man ẹnọ mmọ se inanade mmọ ke n̄kan̄ eke spirit. Kpa ye oro, ndi ukwe ke mme owo isikemeke ndinen̄ede n̄n̄wam? Nnyịn idi mme anana mfọnmma, idụhe uwem ibịghi, ifiọkke se iditịbede ke ini iso. Owo emi enen̄erede ọfiọk n̄kpọ, okopde odudu, onyụn̄ ebịghide uwem akan nnyịn ekeme ndinọ se nnyịn iyomde. Nso idedi mme n̄kpọ eke spirit emi ẹsinamde nnyịn ibọn̄ akam mi?

Kere ban̄a emi ise: Ndi akanam afo omoyom ndausụn̄, ọniọn̄, m̀mê ibọrọ mbụme oro ẹyan̄ade owo ifiọk? Ndi akanam omoyom ndọn̄esịt ke ini osobode akwa nnama, oyom ndausụn̄ ke ini anade anam ọkpọsọn̄ ubiere, mîdịghe oyom ẹfen ẹnọ fi ke ini esịt enen̄erede obiom fi?

Bible ọdọhọ ke kpukpru emi ẹdi nti ntak emi akpanamde ibọn̄ akam. Bible edi n̄wed emi ọnọde mfọnn̄kan ndausụn̄ ke nte ẹkpebọn̄de akam, ndien enye ọdọn̄ọ akam ediwak iren ye iban oro ẹkesọn̄ọde ẹda ẹnam n̄kpọ Abasi. Mmọ ẹma ẹbọn̄ akam ẹyom ndọn̄esịt, ndausụn̄, edifen nnọ, ye ibọrọ n̄kpọsọn̄ mbụme.—Psalm 23:3; 71:21; Daniel 9:4, 5, 19; Habakkuk 1:3.

Okposụkedi emi akam mmọ ẹkedide nsio nsio, enyene se mmọ ẹdade ẹbiet kiet eken. Owo mmọ kiet kiet ama ọfiọk akpan n̄kpọ oro ẹyomde man ẹkop akam mmọ, kpa n̄kpọ oro ẹsiwakde ndifụmi ke ererimbot mfịn. Mmọ ẹma ẹfiọk owo emi ẹkpebọn̄de akam ẹnọ.