IN TE KANS welt, un in ale kultuer un relichyoone tuun ti layt peete. Tii peete aleen orer in krup; peete in khërich, thempel, sinakooke, meskitas un hayliche pletse. Fiilaycht tuun se tapete fon kepeete penutse, roose krans, kepeete in krup, piicher fon kepeete, pilter un pretche fon kepeete aan ti want hënge.

Tas kepeet macht tas ti layt kans anerste sin, wii ale kriatsyoone fon ti eyert. Is woer tas meyer fiile tings eenlich wii tas fii hon. Soo wii tas fii, prayche mer ese, luft, un waser. Soo wii tas fii, khome mer uf te welt, leepe, un xtërpe. (Eklesyastes 3:19) Awer ploos ti layt peete. Warom?

Im xtant, ti keweenlichst antwort is: Wayl mer ti neetichkheet hon fer se peete. Wayl ti meyerst tsayt is tas kepeet een aat woo ti layt wole sich tichter mit ti kaystlich welt xpiire, etwas woo fer ti layt haylich, weyertlich un heerlich is. Ti Piipel tsaycht tas meyer mit tëm wunx kemacht kep sin. (Eklesyastes 3:11) Selich mool, hot Yeesus kesaat: “Froo sin tii woo sayn kaystliche neetichkheete erkhëne”. — Mateus 5:3.

“Kaystlich Neetichkheete” — was fer anere ausleyung khent yemant kepe fer ti kanse thempel, un kaystliche tinge, un ti fiile xtune woo aus kep sin in kepeet? Is woer tas etliche tuun aan sich selepst klaape orer aan anere persoone fer sayn kaystlich neetichkheete tsufriite lose. Awer was mënst tuu, hon ti layt wërklich ti kapasiteet fer in een richtich aat helfe? Meyer sin xwach, leepe khorts tsayt un siin net ales. Ploos yemant woo kluucher is, kewalticher un woo fiil mee wii meyer leepe tuut, khan uns kepe was meyer prayche. Awer was fer sin ti kaystlich neetichkheet woo uns aan krayfe fer se peete?

Tenk aan tas: Must tuu xon een taach fiil oryentiirunge hon, kluucheet orer antworte woo aus kesiin hon khee mënx khëntnis hët fer se antworte? Must tuu xon ketreest wëre wiis tuu yemant orer etwas ferloer host, orer must tuu oryentiirunge hon fer xlime entxluse mache, orer fertsayert wëre wiis tuu tich xlecht kexpiirt host, wayls tuu etwas ferkheertes kemacht host?

Tëm noo ti Piipel, tas sin fiile uersache fer se peete. Ti Piipel is een puuch woo meyer mee traue khene iwer soo kexichte un in te Piipel sin fiil payxpiile fon troye mëne un fraae woo kepeet hon. Tii hon kepeet fer troost, oryentiirunge, un fertsayung ferlange un antworte fer sayn xlimste frooche fon tas leepe. (Psalm 23:3; 71:21; Tanyël 9:4, 5, 19; Hapakuk 1:3)

Wëns aach fiil unerxiitliche kepeete waare ti hate etwas eenliches. Al tii woo kepeete hon wuste was tas haupste weyer fer Kot sayn kepeete aan heere, etwas woo in te welt hayt net kekhent is. Tii wuste fer weem se peete solte.