ONGUMBIRO. Ovandu ovengi ve vanga okutjiwa ovingi ohunga nokukumba. Tara komapuriro hambombari nge purwa tjinene ohunga nongumbiro. Okuzambo ngatu tare komuano Ombeibela mu i zira omapuriro ngo. Otupa twi twa tjangerwa okukuvatera kutja u ute okukumba poo okupwisa ozongumbiro zoye.

OVANDU mozombazu nomozongamburiro azehe mouye ve kumba. Ve kumba tji ve ri aveyerike poo movimbumba. Owo ve kumbira pozokereka na potuveze twarwe pekepeke. Owo ve kumba momiano pekepeke tjimuna koomukuru wovisenginina.

Ongumbiro ondji tjita kutja ovandu ve panguke koviutwa avihe mouye. Otjiperi kutja pe noviṋa mbya sana pokati kovandu novipuka. Eṱe tu hepa ovikurya, omuinyo omusuvanwa nomeva tjimuna vyo. Wina tu kwatwa, atu hupu natu koka. (Omuzuvarise 3:​19) Posi yokutja ovandu aveyerike ombe kumba. Omena raye?

Eziriro ekahu omena rokutja tu hepa okukumba. Ongumbiro omuano ovandu mu ve kondja okuhakaena notjiṋa ovandu tji ve vara kutja otjiyapuke, nu otjikarerere. Ombeibela i raisa kutja ovandu va ungurwa kutja ve kare nonḓero otja indjo. (Omuzuvarise 3:​11) Jesus Kristus wa tja: “Omundu ka hupu momboroto porwayo, nungwari u hupisiwa i embo arihe Ndjambi ndi ma hungire.”​—Mateus 4:4.

Ku nao ovandu ve hepa okurikotamena ku Mukuru. Nu ihi tji tjita kutja pe kare ozongamburiro ozengi notuveze ovandu ku ve yenda okukerikotamena nokukumba. Otjiperi kutja ovandu tjiva ve riyameka ku wo oveni, poo ku varwe okumuna ombatero. Hapo ko nokumuna nao kutja ovandu kamaave yenene okutuvatera? Eṱe katu hupu orure, katu nomasa nu katu tjiwa kutja muhuka mari eta ye. Omundu onongo okukapita eṱe, omunamasa tjinene nu ngu karerera, ongu ma yenene okutupa imbi mbi matu hepa. Nu hapo ovikwaye mbi tjita kutja tu kumbe?

Ripurira ku imbi: Hapo ove o vanga okupewa omuhunga, ounongo poo omaziriro komapuriro ovandu ngu va ha yenene okuzira? Hapo o hepa okuhuhumiṋwa indu tji wa ri kehi youzeu ounene, poo okupewa ondunge indu tjoo hepa okutoora omukambo omunanḓengu poo okuisirwa indu tjoo rimunu ondjo?

Otja kOmbeibela, oviṋa avihe mbyo oomapu omasemba wokukumba. Ombeibela ondi ri embo ku twa sokuṱaṱera tjinene, nu mu ro mwa tjangwa ozongumbiro zovarumendu novakazendu ovengi ovaṱakame. Owo aave kumbu kutja ve mune omahuhumiṋino, ounongo, ondjesiro nokumuna omaziriro komapuriro nga ri omazeu tjinene.​—Epsalme 23:3; 71:21; Daniel 9:​4, 5, 19; Habakuk 1:3.

Nandarire kutja ozongumbiro nḓo za pangukire, ozo aaze hitasana. Owo aave kumbire oviṋa ovinanḓengu, mbi varwa otjoviṋa mbi hi nonḓengu mouye wandino. Owo aave tjiwa kutja mave sokukumba ku uṋe.

 [Otjiperendero]