Samba

1 Sambu na Nki Beto Fwete?

KISAMBU. Kele ve ti masolo mingi ya Biblia ya kebendaka dikebi mingi mpi kepusaka bantu na kusosa kuzaba mambu mingi. Beto tadila bangyufula nsambwadi yina bantu keyulaka mingi na yina metala kisambu; ebuna beto tala bamvutu yina Biblia kepesaka. Masolo yai kele ti lukanu ya kusadisa nge na kusamba​—kusadisa nge na kuyantika kusamba to kusala na mpila nde Nzambi kuwa bisambu na nge.

NA NSI-NTOTO ya mvimba, na bisika yonso yina bantu kevandaka mpi na mabundu yonso, bantu kesambaka. Bo kesambaka ntangu bo kele bo mosi to na kimvuka. Bo kesambaka na banzo-nzambi, na batempelo, na basinagoga, na ba mosquée, mpi na bisika ya santu ya lusambu. Bo kesadilaka batapi, bashapele, bisambu ya bo kevutukilaka mbala na mbala, bifwanisu, babuku ya bisambu, to bisambu ya bo kesonikaka na mwa mabaya ya fyoti yina bo mekangisaka na kima mosi buna.

Kisambu keswaswanisaka bantu ti bima yonso yankaka ya kele na luzingu na ntoto yai. Ya kyeleka, beto mefwanana ti bambisi na mambu mingi. Bonso bo, beto kevandaka ti mfunu ya madya, ya mupepe, mpi ya masa. Bonso bo, beto kebutukaka, kezingaka, mpi kefwaka. (Longi 3:19) Kansi, kaka bantu kesambaka. Sambu na nki?

Ziku mvutu ya kuluta pete kele nde beto kevandaka na mfunu ya kusamba. Nkutu, mbala mingi bantu kemonaka kisambu bonso mwaye yina bo lenda kuma na nkadilu ya bo kemonaka bonso ya santu mpi ya kezingaka ntangu mingi. Biblia kemonisa nde Nzambi kugangaka beto ti mpusa ya mambu ya mutindu yai. (Longi 3:11) Kilumbu mosi, Yezu Kristu kutubaka nde: “Kyese na bantu yina kezabaka kinsukami na bo ya kimpeve.”​—Matayo 5:3, NW.

Kana yo kele ve sambu na ‘kinsukami ya kimpeve,’ inki lenda vanda kikuma ya kesala nde banzo-nzambi ti bima ya lusambu yina bantu meyidikaka mbote kuvanda, mpi bantu kulutisa bangunga mingi na kusamba? Ya kyeleka, bantu yankaka kekuditudilaka ntima to ketulaka ntima na bantu yankaka sambu na kulungisa bampusa na bo ya kimpeve. Kansi, keti nge mebakisaka nde bantu kele ve ti makuki ya kupesa lusadisu yina mefwana? Beto kele ngolo mpenza ve, luzingu na beto kele nkufi, mpi beto kemonaka ntama ve. Kaka muntu yina kele mayele mingi, ngolo mingi, mpi ya kezingaka mingi kuluta beto lenda pesa beto bima ya beto kele ti yo mfunu. Inki kele bampusa yai ya kimpeve ya kepusaka beto na kusamba?

Yindula fyoti: Keti nge mevandaka dezia ti mpusa ya ngolo ya lutwadisu, ya mayele, to ya bamvutu na bangyufula yina kemonanaka bonso nde yo meluta nzayilu ya bantu? Keti nge mevandaka dezia ti mfunu ya ndembikilu ntangu nge mefwila muntu, ya lutwadisu ntangu nge kezola kubaka desizio mosi ya mpasi, to ya ndolula ntangu nge kewa bonso nde nge menata makambu?

Na kutadila Biblia, yai kele bikuma ya mfunu yina fwete pusa beto na kusamba. Sambu na dyambu yai, Biblia kele buku yina beto fwete tudila ntima kuluta babuku yonso, mpi yo kele ti masolo mingi ya bisambu ya babakala ti ya bankento mingi ya kwikama. Bo sambaka sambu na kulomba ndembikilu, lutwadisu, ndolula, mpi bamvutu na bangyufula ya kuluta mpasi.​—Nkunga 23:3; 71:21; Daniele 9:4, 5, 19; Habakuki 1:3.

Ata bisambu yai kuswaswanaka, yo vandaka ti kima mosi ya vandaka kuvukisa yo. Bantu yonso yina vandaka kusamba kuvandaka ti kima mosi ya mfunu sambu kisambu kuvanda ya mbote, kima yina bantu ya nsi-ntoto ya bubu kevilaka mbala mingi to ketudilaka ve dikebi. Bo zabaka muntu yina bo fwete samba.