ПРАЙ чир ӱстӱнде — полған на культурада, полған на религияда — пазырчалар. Чалғызан даа, чыылызып алып таа пазырчалар. Тигіриблерзер, храмнарзар, синагогаларзар, мечетьтерзер паза ызых нимелер хыринзар пазырарға чӧрчелер. Пазырҷаң ковриктернең, четкаларнаң, пазырҷаң теербеннернең, молитвенниктернең, обырастарнаң тузаланчалар. Ідӧк, чардыда пазылған пазырыстарнаң пазырып алып, аны ӧнетін тимнелген орында іл салчалар.

Чирде пар тіріг нимелернің аразында кізілер ле пазырчалар. Піс, малларох чіли, чіпчебіс, ісчебіс паза тынчабыс. Оларох чіли, тӧріпчебіс, чуртапчабыс паза ӱреп парчабыс (Экклезиаст 3:19). Че кізілер ле пазырчалар. Ноға?

Хысхаҷахти нандырза, піс анзында кирексінчебіс. Иң пурнада, кізілер пазырыс пастыра ызых паза мӧгі хуттарзар айланчабыс тіп сағынчалар. Библияда кізі мӧгі нимелерзер тартылар иде чайалған тіп чоохталча (Экклезиаст 3:11). Пірсінде Иисус Христос теен: «Часкалығлар Хан Худайны киректепчеткеннер» (Матфей 5:3).

Я, кізілер Худайға пазырарға салылғаннар. Андағ полбаза, ноға олар андағ илбек религиознай храмнар пӱдірчелер, пазырыста тузаланҷаң аймах-пасха нимелер итчелер, санап таа полбас тус пазырыста иртірчелер? Сынында пірее кізілер духовнай кирексіністерін постары толдырарға кӱстенчелер алай пасхаларынаң полызығ сурынчалар. Че кізілер удаа духовнай полызығ пир полбинчатханын сизінгезер бе? Піс алнынзархызын кӧр полбинчабыс, кӱзібіс асхынах паза пістің чуртазыбыс уғаа хысхаҷах. Пістің кирексіністерібісті пістең хай-хай хыйға, хай-хай кӱстіг паза хай-хай ӱр чуртапчатхан личность ла толдыр полар. Пісті пазыртчатхан духовнай кирексіністер нимедір ол?

Сірерге хаҷан-да устағ, хыйға сағыс паза кізі нандыр полбас сурығларға нандырығ кирек полған ма? Хаҷан-да, чағын кізі чідір салған ӱчӱн, чӱрееңер ағырып, часхарыс кирексінгезер бе? Алай, хайди поларға пілбин, устағ таппин турғазар ба? Алай, пыросынып, пыро тастирын кирексінгезер бе?

Библия хоостыра, прай пу нимелернің ӱчӱн пазырарға чарир. Ол киндеде пазырыстаңар иң ізестіг информация пирілче. Анда Худайға киртістіг иреннернің паза ипчілернің пазырыстары пазыл парған. Олар, часхарыс, устағ, пыро тастирын паза иң сидік сурығларға нандырығ тілеп, пазырғаннар (Псалом 23:3; 71:21; Даниил 9:4, 5, 19; Аввакум 1:3).

Ол аймах-пасха пазырыстарны пір ниме піріктірче. Пазырған кізілернің полғаны ла аарлығ ниме пілген. Олар кемге пазырарға пілгеннер. Амғы туста, тізең, анзына кӧбізі хайығ салбинча.