Prea—Wetin Mek Wi Nid fɔ Pre?
PREA. Na wan pan di tɔpik dɛn na di Baybul we pipul dɛn rili want fɔ no bɔt. Lɛ wi tɔk bɔt sɛvin kwɛstyɔn dɛn we pipul dɛn kin aks bɔt prea, dɔn lɛ wi si di ansa dɛn na di Baybul. Dɛn mek dɛn atikul dɛn ya fɔ ɛp yu fɔ pre, ɛn fɔ pre di kayn we we go mek Gɔd yɛri yu prea.
ƆLSAY na di wɔl, pipul dɛn frɔm difrɛn kɔlchɔ ɛn rilijɔn kin pre. Dɛn kin pre we na dɛn wangren de ɛn we dɛn de as grup. Dɛn kin pre na chɔch dɛn, na tɛmpul dɛn, na sinagɔg dɛn, na mɔks dɛn, ɛn na shrayn dɛn. Dɛn kin yuz mata dɛn fɔ pre, rosary beads, imej dɛn, prea buk dɛn, ɛn ɔda tin dɛn.
Prea na wan tin we mek mɔtalman dɛn difrɛn frɔm animal dɛn. Na tru se tin dɛn de we mɔtalman de du we animal dɛnsɛf de du. Jɔs lɛk animal dɛn, wi nid tin fɔ it, briz, ɛn wata. Dɛn de bɔn wi, wi de liv, ɛn wi de day. (Ɛkliziastis 3:19) Bɔt na mɔtalman dɛn nɔmɔ de pre. Wetin mek?
Sɔntɛm di simpul ansa na dat wi nid fɔ pre. Bɔku pipul dɛn si prea as wan we we dɛn kin tɔk to spirit, sɔntin we dɛn tink se oli, ɛn we go de sote go. Di Baybul sho se Gɔd mek wi di kayn we we mek wi kin want fɔ pre. (Ɛkliziastis 3:11) Jizɔs bin tɔk se: “Di wan dɛn we no se dɛn nid fɔ lan bɔt Gɔd gɛt gladi-at.”—Matyu 5:3.
So bɔku pipul dɛn no se dɛn nid fɔ wɔship Gɔd na dat mek bɔku rilijɔn dɛn de ɛn bɔku say dɛn de usay pipul dɛn kin go fɔ wɔship Gɔd ɛn pre. Fɔ tru, sɔm pipul dɛn abop pan dɛnsɛf ɔ ɔda pipul dɛn fɔ satisfay dɛn spirichwal nid. Bɔt yu nɔ fil se mɔtalman nɔ gɛt di pawa fɔ ɛp? Wi wik, wi nɔ gɛt lɔng layf, ɛn wi nɔ ebul fɔ si wetin go apin tumara bambay. Na pɔsin nɔmɔ we gɛt sɛns pas wi, gɛt pawa pas wi, ɛn we go de sote go, go ebul fɔ gi wi wetin wi nid. Wetin na sɔm pan di tin dɛn we kin muv wi fɔ pre?
Tink bɔt dis: Yu dɔn ɛva want pɔsin fɔ gayd yu, gi yu sɛns, ɔ ansa kwɛstyɔn dɛn we mɔtalman nɔ ebul fɔ ansa? Yu nid kɔrej we pɔsin we yu lɛk day, yu nid pɔsin fɔ gayd yu fɔ disayd sɔntin we nɔ izi, ɔ yu nid pɔsin fɔ fɔgiv yu bikɔs ɔf di bad tin we yu dɔn du?
Akɔdin to di Baybul, dis na sɔm pan di impɔtant rizin dɛn we mek wi nid fɔ pre. Na di Baybul nɔmɔ tɔk di kɔrɛkt tin bɔt dis tɔpik, ɛn i tɔk bɔt fetful man ɛn uman dɛn prea dɛn. Dɛn bin pre fɔ kɔrej, fɔ mek Gɔd gayd dɛn, fɔ fɔgiv dɛn, ɛn fɔ ansa kwɛstyɔn dɛn we nɔ izi fɔ ansa.—Sam 23:3; 71:21, NWT Daniɛl 9:4, 5, 19; Abakɔk 1:3, NWT.
Di prea dɛn we de na di Baybul difrɛn, bɔt dɛn gɛt sɔntin we kɔmɔn. Di wan dɛn we bin de pre, bin no wan impɔtant tin bɔt prea we bɔku pipul dɛn nɔ no. Dɛn bin no udat dɛn fɔ pre to.