Lemo

1 Dwarore Nikech Ang’o?

LEMO. Achiel kuom weche mayudore e Muma kendo mamako pach ji ahinya, en wach lemo. Non ane penjo abiriyo ma ji thoro bedogo kuom wach lemo; kae to wane dwoko ma Muma chiwo. Sulagi ondiki mondo okonyi ng’eyo kaka onego ilem​—ojiwi ichak lemo, kata omi lamo magi omed bedo maber moloyo.

E PINY mangima, e kit ogendini koda e dinde duto, dhano lemo. Gilemo ng’ato ka ng’ato kende; kendo gilemo ka gin kanyachiel. Gilemo e kanise, e hekalu, e sunagoke, e muskiti, kata kuonde mamoko moyiedhi mag lamo. Ginyalo pedho gik moko kama ilemoe, ginyalo tiyo gi rosari, gik miwinyo, piche mag din, buge mag lemo, kata somo lemo mondiki e bepe matindo molier kamoro.

Lemo en achiel kuom gik mamiyo dhano bedo mopogore gi chuech mamoko mangima e pinyni. En adier ni wachal gi le e yore mang’eny. Mana kaka gin, wan bende dwarore ni wachiem, wati gi muya, koda pi. Kendo mana kaka gin, inyuolowa, wadak, kendo watho. (Eklesiastes 3:19) Kata kamano, dhano kende ema lemo. Nikech ang’o?

Dwoko mayot en ni, wan gi dwarono e chunywa. Ji mang’eny neno lemo kaka yo ma dhano nyalo tudorego gi joma odak e polo, joma gineno ni ler, kata madak nyaka chieng’. Muma nyisowa ni ne ochwewa gi gombo mar timo kamano. (Eklesiastes 3:11) Kinde moro Yesu Kristo nowacho niya: “Mano mor manadi ni jo man gi chan e chunygi.”​—Mathayo 5:3.

Ng’ato nyalo lero nade gimomiyo oger udi mag lamo mang’eny, kendo itiyo kod gik mang’eny koda seche mogundho e lemo? En nikech ‘chan mar chuny.’ En adier ni jomoko neno ni ginyalo loyo chan mar chuny ma gin-go giwegi, to moko ng’iyo dhano wetegi mondo olonegi channo. Donge in bende ineno ni nyalo ma dhano nigo orem ahinya mamiyo ok onyal konyo chuth kaka dwarore? Wayom yom, ngimawa chuok, kendo ok wanyal neno mabor. Mana ng’at machielo mariek ahinya, ma nigi teko maloyowa, madak nyaka chieng’ ema nyalo chopo dwarowa. To gin chan magego mamiyo wabedo gi dwaro mar lemo?

Par ane: Be isegagombo mondo otayi, kata iyud rieko, kata iyud dwoko mag penjo mineno ni okalo pach dhano? Be isegagombo ni ohoyi sama iyudo chandruok moro maduong’, kata mondo otayi sama ing’ado paro kuom wach moro machando chunyi ahinya, kata ni oweni richo sama chunyi chandi ahinya nikech iketho?

Kaluwore gi Muma, mago duto gin gik manyalo miyo walem. Muma e buk minyalo gen chuth kuom wachni, kendo oting’o lemo mag chwo gi mon ma nohero Nyasaye. Ne gilemo ka gikwayo mondo ohogi, otagi, owenegi richogi, kendo mondo giyud dwoko mag penjo ma korgi tek moloyo.​—Zaburi 23:3; 71:21; Daniel 9:4, 5, 19; Habakuk 1:3.

Kata obedo ni lamogo ne opogore, lamogo duto ne nyiso gimoro achiel. Ng’ato ka ng’ato kuom joma ne lemogo nong’eyo wach moro maduong’ ma ne dwarore mondo owinj lamogi, wach ma thoth ji ok okawo mapek e piny masani. Ne ging’eyo ni lemo maggi nonego odhi ne ng’a.