1 ¿Tiquʼn il tiʼj tuʼn qnaʼn Dios?
AJU NAʼJ DIOS. Atzun jun kyxol qe xnaqʼtzbʼil kyaj xjal tuʼn tok kybʼiʼn. Toj kʼloj xnaqʼtzbʼil lu, tzul tqʼoʼn Tyol Dios tzaqʼwebʼil kyiʼj wuq xjel in tzaj kyqanin xjal tiʼj naʼj Dios. Che onil xnaqʼtzbʼil lu kyiʼj qeju mintiʼ ojtzqiʼn kyuʼn tzeʼn tuʼn kynaʼn Dios. Ax ikx kʼonil qiʼj qkyaqilx tuʼn kyok qnaʼj Dios te mas tbʼanel.
KWEST tuʼn tkanet jun okslabʼil moqa jun tnam quʼn jatumel mintiʼ in che naʼn xjal Dios. In chʼexpaj tten alkye tten in che naʼn xjal Dios. Ateʼ junjun in cheʼx toj jun iglesia, in cheʼx twi jun witz, in nok kychmon kyibʼ, in che ajbʼen junjun sant kyuʼn, qe uʼj moqa toj junjuntl tumel. Pero kykyaqilx in che naʼn Dios.
Junxitl qe xjal kywitz qe txkup tuʼnju in che naʼn Dios. Ax tok, il tiʼj tuʼn qwaʼn, tuʼn qkʼan aʼ ex tuʼn qxewin ik tzeʼn in bʼant kyuʼn txkup. Ax ikx in qo ul itzʼj, in qo chʼiy ex in qo kyim (Eclesiastés 3:19). Noqtzun tuʼnj, oʼkx qe xjal in che naʼn Dios. ¿Tiquʼn?
Tuʼnju in najbʼen qe. In nonin naʼj Dios kyiʼj xjal tuʼn kyyolin tukʼil Dios ex in nok kyqʼoʼn jlu te xjan. In tzaj tqʼamaʼn Xjan Uʼj qa e kubʼ bʼinchaʼn xjal tuʼn tten kyamiwbʼil tukʼil Dios (Eclesiastés 3:11). Ex tqʼama Jesús jlu: «At tzalajbʼil kye qeju nneʼl kynikʼ tiʼj qa at tajbʼen Dios kye» (Mateo 5:3).
Tuʼn jlu in nel qnikʼ tiʼj tiquʼn ateʼ nim iglesia, tiquʼn ateʼ nim sant ex tiquʼn in nel kypaʼn xjal nim or tuʼn kynaʼn Dios. Ax tok, ateʼ junjun in cheʼx jyol onbʼil kyukʼil junjuntl xjal tuʼntzun tkubʼ kynaʼn bʼaʼn. Noqtzun tuʼnj, ¿axpe tok in kanet onbʼil kyuʼn kyukʼil txqantl? Chʼixmi tkyaqil maj mintiʼ in kanet kyuʼn. ¿Tiquʼn? Tuʼnju mintiʼ kyipumal xjal tuʼn kyonin ex mintiʼ in nel kynikʼ tiʼj tkyaqil. Tuʼntzunju, oʼkx jaku tzʼonin jun xjal tiʼj juntl qa at mas tnabʼil ex qa at mas tipumal. Pero ¿tiquʼn nim toklen tuʼn tnaʼna Dios?
Jun techel, bʼalo o tzʼok weʼya twitz jun nya bʼaʼn ex ni jun tzaj qʼonte onbʼil teya nix jun consej. Ex aj tkyim jun toj qja, aj tkubʼ qximen tuʼn tbʼant jun tiʼ nim toklen quʼn moqa aj qel txalpaj, at maj in kubʼ qnaʼn qa nya oʼkx qaj tuʼn ttzaj qʼuqbʼaʼn qkʼuʼj, tuʼn ttzaj yekʼin qbʼe moqa tuʼn tkubʼ najsaʼn qil.
¿Tiʼ jaku tzʼonin qiʼj kyoj ambʼil lu? In tzaj tyekʼin Tyol Dios qa jaku tzʼonin naʼj Dios qiʼj. Ax ikx, in tzaj tqʼamaʼn qa ateʼ junjun xjal te ambʼil ojtxe xi kyqanin qʼuqbʼil kykʼuʼj, onbʼil tuʼn ttzaj yekʼin kybʼe ex najsam tiʼj kyil. Ax ikx in tzaj tqʼoʼn tzaqʼwebʼil kyiʼj junjun tiʼchaq mintiʼ in nel qnikʼ kyiʼj (Salmo 23:3; 71:21; Daniel 9:4, 5, 19; Habacuc 1:3).
Noqtzun tuʼnj, kykyaqilx xjal bʼant jun tiʼ kyuʼn. Ojtzqiʼntoq kyuʼn alqe e naʼn Dios. At maj mintiʼ in nok kyqʼoʼn xjal kywiʼ tiʼj jlu toj ambʼil jaʼlo.