УЛО тӱня мучко кажне культур ден религийыште еҥ-влак кумалыт. Нуно тидым шкетын але тӱшка дене ыштат. Нуно кумалыт черкыште, храмыште, синагогышто, мечетьыште да святыня ончылан. Тидлан нуно кумалтыш коврикым, чётко-влакым, кумалтыш мут книгам але юмоҥам кучылтыт.

Мландыште илыше-влак кокла гыч еҥ-влак веле кумалыт. Мутат уке, ме янлык-влак дене шуко шотышто икгай улына. Нунын семынак мыланна кочкаш, йӱаш да шӱлаш кӱлеш. Нунын семынак ме шочына, илена да колена (Экклезиаст 3:19). Но еҥ-влак веле кумалыт. Молан?

Икманаш, кумалтыш мут мыланна чот кӱлеш. Но эн ончыч кумалтыш мут еҥ-влаклан духовный сфере дене (мом нуно святойлан да курымашлыклан шотлат) кылым кучаш йӧным пуа. Библийыште возымо дене келшышын, ме духовный кӱлешлык дене ыштыме лийынна (Экклезиаст 3:11). Икана Иисус Христос каласен: «Юмо деке лишемаш кӱлешлыкым умылышо-влак пиалан улыт» (Матфейын 5:3, УТ).

Тыгела, еҥ-влак Юмо деке лишемаш кӱлмым умылат. Теве молан нуно религиозный зданий-влакым чоҥат, тӱрлӧ кумалтыш арверым кучылтыт да кумалашлан шуко жапым ойырат. Конешне, южо еҥ-влак шке семын Юмо деке лишемаш тыршат але тидлан весе-влак деч полышым йодыт. Но шукыж годым мыланна чучеш, пуйто нунын полшымыж деч нимогай пайда уке. Ме вийдыме, кӱчык ӱмыран улына да ончыкылыкым пален она керт. Но чынжымак мыланна тудо веле полшен кертеш, кӧ мемнан деч уш-акыланрак, виянрак да шукырак ила. Тугеже кумалаш мемнам мо тарата?

Айста теве мо нерген шоналтен налына: лийын мо тендан тыгай, кунам тыланда виктарымаш ден уш-акыл кӱлыныт але йодышда-влак лийыныт, кудыштлан, тендан шонымаште, ик айдемат вашмутым пуэн огеш керт? Тыланда кӱлын мо ойго годым лыпландарымаш, решенийым лукмо годым полыш але титакым шижме годым проститлымаш?

Чыла тиде, Библийыште возымым шотыш налаш гын, кумалаш таратен кертеш. Тиде теме почеш эн чын информацийым Библийыште муаш лиеш. Тушко Юмылан ӱшанле шуко пӧръеҥ ден ӱдырамашын кумалтыш мутыштым пуртымо. Нуно лыпландарымаш, полыш, проститлымаш нерген йодыныт да эн йӧсӧ йодышыштлан вашмутым муашлан кумалыныт (Псалом 22:3; 70:21; Даниил 9:4, 5, 19; Аввакум 1:3).

Нине кумалтыш мут икте-весе деч ойыртемалтыныт гынат, нунын икгайлыкышт уло. Чыла ту кумалше-влак кумалтыш мут шотышто паленыт тудым, мом еҥ-влак мемнан кечылаште шотыш огыт нал. Кумалтыш мутышт колмо лийже манын, нуно паленыт, кӧлан кумалаш кӱлеш.