Ña̱ oración: ¿Nda̱chun xíniñúʼu keʼéyó oración?
ÑA̱ ORACIÓN, kúú iin ña̱ káʼa̱n Biblia ña̱ kútóoní na̱ yiví kunda̱a̱-inina xa̱ʼa̱. Nu̱ú tutu yóʼo ka̱ʼa̱nyó xa̱ʼa̱ u̱xa̱ pregunta ña̱ káʼa̱n xa̱ʼa̱ ña̱ oración ta saátu ña̱ káʼa̱n tu̱ʼun Ndióxi̱ xa̱ʼa̱ña. Ña̱ artículo yóʼo ka̱naña ña̱ chindeétáʼanña xíʼin na̱ yiví na̱ ta̱ʼán keʼé oración, ta chika̱a̱ña ndee̱ xíʼinna ña̱ va̱ʼa kixáʼana keʼénaña, ta saátu chindeétáʼanña xíʼin na̱ xa̱a̱ kéʼé oración ña̱ va̱ʼa viíka keʼénaña.
NDIʼIVA na̱ yiví ni nda̱a̱ ndáaka ñuuna á religiónna, ndiʼivana kéʼé oración. Kivi keʼénaña tá ndákutáʼan ku̱a̱ʼána ta saátu tá íyo iinlá miína, ta ku̱a̱ʼá nu̱ú kéʼéna ña̱yóʼo tá kúú ti̱xin veʼe-ñu̱ʼu, sinagoga, mezquita, pagoda á santuario, ta ku̱a̱ʼá ña̱ʼa xíniñúʼuna tá kéʼéna ña̱yóʼo, tá kúú rosario, devocionario, icono, alfombra, tablilla xíʼin cilindro ña̱ oración.
Iin ña̱ oración kúú ña̱ náʼa̱ ña̱ síín íyo na̱ yiví nu̱ú ndiʼika ña̱ táku ña̱ íyo nu̱ú ñuʼú yóʼo. Ta nda̱a̱ táki̱ʼva kéʼé kití, saátu kéʼé miíyó chi xíniñúʼu kuxuyó, koʼoyó ti̱kui̱í xíʼin ña̱ ndakiʼinyó ta̱chíyó. Saátu kákuyó, xáʼnuyó ta xíʼi̱yó (Eclesiastés 3:19). Soo iinlá na̱ yiví kúú na̱ kéʼé oración. ¿Nda̱chun?
Saáchi ña̱yóʼo chíndeétáʼanña xíʼin na̱ yiví ña̱ ka̱ʼa̱nna xíʼin ndióxi̱ ña̱ ndásakáʼnuna, chi saá kúú ña̱ ndákanixi̱nína ña̱ kúyatinna nu̱ú ndióxi̱na. Ta ña̱ Biblia káʼa̱nña, ña̱ xa̱a̱ saá na̱kuva̱ʼavayó ña̱ keʼéyó oración (Eclesiastés 3:11). Ta̱ Jesús ni̱ka̱ʼa̱nra ña̱yóʼo: “Si̱íní íyo na̱ kúnda̱a̱-ini ña̱ xíniñúʼuna Ndióxi̱” (Mateo 5:3).
Xa̱ʼa̱ ña̱ xíniñúʼu na̱ yiví Ndióxi̱ kúú ña̱ xáʼa̱nna templo á xíniñúʼuna inkaka ña̱ʼa ña̱ va̱ʼa ka̱ʼa̱nna xíʼinra, ta saátu ku̱a̱ʼání hora kéʼéna oración. Soo sava na̱ yiví, ña̱ kéʼéna kúú ña̱ káʼa̱nna xíʼin inkana xa̱ʼa̱ ña̱ ndóʼona á káʼa̱nna xíʼinna ña̱ chindeétáʼanna xíʼinna. Soo, ¿á su̱ví ña̱ nda̱a̱ kúú ña̱ kǒo ndee̱ ndaʼa̱ na̱ yiví ña̱ va̱ʼa chindeétáʼanna xíʼin inkana? Miíyó na̱ yiví kǒoví ndee̱ ndaʼa̱yó ta ni va̱ása ku̱a̱ʼá tiempo tákuyó, ta ni kǒo kúnda̱a̱ va̱ʼa iniyó xa̱ʼa̱ ndiʼi ña̱ kúu nu̱ú ñuyǐví yóʼo. Ña̱kán, iinlá na̱ íyo ndiʼi tiempo, na̱ ndíchiní na̱ íyoní ndee̱ kúú na̱ kivi chindeétáʼan xíʼinyó. Soo, ¿ndáa xa̱ʼa̱ kúú ña̱ kéʼéyó oración?
Tá kúú, ¿á xa̱a̱ sava yichi̱ túviún ña̱ nda̱a̱ ni iinna kǒo kívi chindeétáʼanna xíʼún, á ña̱ taxina consejo ndaʼún á ña̱ ka̱ʼa̱nna xíʼún ndáaña xíniñúʼu keʼún? Tá yáʼún nu̱ú tu̱ndóʼo ña̱ yo̱ʼvi̱ní, tá ni̱xi̱ʼi̱ iin na̱ veʼún á tá ndáka̱xiún iin ña̱ keʼún á tá ni̱ki̱ʼviún iin ku̱a̱chi ña̱ ndeéní, ¿á túviún ña̱ va̱ása nísandíkona-iniún xa̱ʼa̱ ña̱ ni̱ka̱ʼa̱nna xíʼún, ña̱ ta̱xina iin consejo ndaʼún á ña̱ ni̱ka̱ʼa̱nna xíʼún ña̱ íxakáʼnu-inina xa̱ʼún?
Ña̱ Biblia ña̱ va̱ʼaní káʼa̱n xa̱ʼa̱ ña̱yóʼo káchiña, ña̱ oración kúú ña̱ kivi chindeétáʼan xíʼinyó xa̱ʼa̱ ña̱ ndóʼoyó. Nu̱ú ña̱yóʼo va̱xi ku̱a̱ʼání oración ña̱ ke̱ʼé na̱ ta̱a xíʼin ná ñaʼá, ña̱ ni̱ka̱ʼa̱nna xíʼin Ndióxi̱ ña̱ ná sandíkora-inina, ña̱ ná taxira consejo ndaʼa̱na ta ixakáʼnu-inira xa̱ʼa̱na, ta saátu nda̱kuiinra ña̱ xi̱kuni̱na kunda̱a̱-inina xa̱ʼa̱ (Salmo 23:3; 71:21; Daniel 9:4, 5, 19; Habacuc 1:3).
Ndiʼi ña̱ oración yóʼo xa̱a̱ síín síín ni̱xi̱yoña. Soo na̱ ke̱ʼé ña̱yóʼo xi̱kunda̱a̱-inina ndáana káʼa̱nna xíʼin, ta tiempo vitin ku̱a̱ʼání na̱ yiví ni va̱ása xíni̱kana ndáana káʼa̱nna xíʼin.