MELAK miyekej kichiuaj teoyotl, kema, maski san kanon tiaskej niman maski ipan san katlejua religión tinemiskej, tikitaskej ika yejuamej kichiuaj teoyotl. Sekimej kichiuaj teoyotl ipan teopantin, sinagogas, mezquitas niman ipan okseki teokaltin. Niman miyekej, ijkuak kichiuaj teoyotl, kinkuij rosarios, libros teoyoamoxtin, imágenes, petlamej, tepalkamej noso okseki tlemach. Sekimej inselti kichiuaj teoyotl niman oksekimej san kichiuaj ijkuak nemij imiuan oksekimej, san ika, tikitaj ika nochimej kichiuaj teoyotl.

Itech nochi tlen yoltika ipan yejuin tlaltikpaktli, san tejuamej tiknotsaj toTajtsin. Melauak, tejuamej, ijkon ken yolkamej, noneki titlakuaskej, tatliskej niman tijyotiskej. Kema, ajsi se tonajli ijkuak titlakatij, ijkuak toskaltiaj niman ijkuak timikij (Eclesiastés 3:19). San ika, san tejuamej tiknotsaj toTajtsin. ¿Tleka?

Pampa melak noneki. Teoyotl techpaleuiya más matitlaneltokakan itech on tlen tikneltokaj niman matitlajtokan iuan toueyiTajtsin. Biblia kijtoua ika ijkon tikchiuaj pampa ijkon otexchijchiuj toTajtsin (Eclesiastés 3:11). Jesús okijto yejuin: “Yolpakij akin kimatstokej ika kipiya ika kitejtemoskej tlen ualeua itech toTajtsin, pampa yejuamej intlatki Tekiuajyotl tlen onka iluikak” (Mateo 5:3, TNM).

Aman, yonochijchiujkej miyek teopantin, tajtsitsintin, niman miyekej melak uejkauij ijkuak kichiuaj teoyotl. Nochi yejuin ijkon nochiua pampa tinochimej tikpiyaj ipan toyojlo ika noneki tiktejtemoskej toTajtsin niman nochi tlen itech ualeua. Ijkuak ijkin tikchiuaj, kuajli tomachiliaj. Melauak, miyekej kinemiliaj ika uelis kuajli nomachiliskej tla yauej intech oksekimej niman san no yejuamej nopaleuiyaj. San ika, ¿melauak tepaleuiya yejuin? Ka, tejuamej xtikojtikej, xtiyolchikaujkej, nimantsin timikij niman xnochi tikasikamatij. Yejua ika, noneki tonisiuiskej itech yakaj akin maka keman mamiki, akin matlamachilise niman akin melak makojtik. Tla ijkon tikchiuaj, kuajli tomachiliskej pampa tikchiujtoskej tlen techtlajtlanilia toyojlo. San ika, ¿tlenon techyolmapeua matikchiuakan teoyotl?

Xnemili yejuin, ¿itlaj mopan yonochiujka niman tiknekiya yakaj mamitsyekana, mamitspaleui noso mamitsnankili tlen timotlajtoltiaya? ¿Kanaj ijkuak omik se mochanejkauj tiknekiya yakaj mamitsyolseui? ¿Noso kanaj ijkuak nonekiya tiktlapejpenis itlaj tlen ueyi kijtosneki tiknekiya mamitspaleuikan? ¿Noso tiknekiya mamitstlapopoluikan noso mamitsyolseuikan ijkuak otimopopoloj?

Biblia kijtoua ika nochi yejuin uelis tiktlajtlaniskej ipan teoyotl. Noijki techijlia kenon miyekej tlakamej niman siuamej okichiujkej teoyotl kampa kitlajtlaniliayaj toTajtsin makinyolseui, makinyekana niman makintlapopolui. Itechkopa teoyotl, noijki okitlajtlanilijkej toTajtsin makinnankili tlen notlajtoltiayaj (Salmo 23:3; 71:21; Daniel 9:4, 5, 19; Habacuc 1:3).

Maski xsan noijki tlen okitlajtlankej, kema okinkakej inteoyouan. ¿Tleka? pampa okichiujkej itlaj tlen miyekej xkichiuaj ipan yejuin tonaltin: okinotskej akin kema kinkaki toteoyouan.