Okulikuambela

1 Omokonda Yatyi?

ELIKUAMBELO. Otyo, otyimwe povipuka vikahi Mombimbiliya vitukalesa nesuko enene nolumbwe. Tala omapulo epandu-vali ehole okulingwa konthele yelikuambelo, iya atutale atuho kumwe oñgeni Ombimbiliya ikumbulula omapulo oo. Ononthele ombu mbapongiyua opo mbukukuateseko okulikuambela—okuhimbika ine okulinga vali nawa omalikuambelo ove.

MOUYE auho, ovanthu vonontheto mbelikalaila, no nongeleya, velikuambela. Valinga omalikuambelo tyina vekahi aveke, na tyina vekahi navakuavo. Valingila omalikuambelo avo movikapela, nomo nondyuo mbokufendela, nomo nomesquita, no komalangalo. Ovanthu ovo, pamwe vaundapesa onorosariu no notersu, nomalola omalikuambelo, novilolo, no nosanda, nomikanda viomalikuambelo ine omalikuambelo ahoneka pouvai oututu utulikwa koumutala.

Mokonda yokulikuambela, ovanthu velikalela novipuka aviho vina omuenyo kombanda yoohi. Tyotyili, mononkhalelo ononyingi tuelifwa novinyama. Ngovinyama, tuesukisa okulia, nomphepo, nomeva. Tupu, tutyitwa, tukala nomuenyo, tunkhia. (Eclesiastes 3:19) Mahi, ovanthu ovo vala velikuambela. Omokonda yatyi?

Tyafuile ekumbululo liapepuka vali, oliokuti onthue tuesukisa okulikuambela. Haunene, elikuambelo litalwa ngatyina onkhalelo yokufuena ku una ine kutyina vasoka okuti tyikola, nokuhena onthyulilo. Ombimbiliya ilekesa okuti onthue tualingwa nehando liovipuka ovio. (Eclesiastes 3:11) Nthiki imwe Jesus Kristu wati: “Vana vaimbuka omasuka-suka avo opamphepo, ovana-mbembwa.”—Mateus 5:3.

“Omasuka-suka opamphepo” ahindila ovanthu okulinga onondyuo mbokufendela, novilolo, nokupesela onoola ononyingi momalikuambelo. Ovanthu vamwe veliyumba onthumbi ovo muene ine vatala muvakuavo opo vafuisepo omasuka-suka avo opamphepo. Ove kutavela okuti ovanthu vetupu epondolo liokukuatesako nawa vakuavo? Onthue, katuakolele, omuenyo wetu omusupi, nokuna enoñgonoko lihehi. Kuna vala omunthu wike upona onthue, omunongo unene, nokuna epondolo enene, uhena nthyulilo, upondola okutuavela etyi tuesukisa. Omasuka-suka patyi opamphepo etuavela ondundo yokulikuambela?

Nkhele soka: Okuti ove lumwe wahandele okuvasa ehongolelo, nounongo, ine omakumbululo omapulo amwe ovanthu vehevili? Lumwe weliteheleleale okuti wesukisa eungumaneso mokonda yemone liotyiponga tyimwe, nokusuka nehongolelo pokulinga etokolo limwe enene, ine okuevelwa mokonda yonkhali walinga?

Ngetyi Ombimbiliya ilekesa, okulikuambela konthele yovipuka ovio aviho tyaviuka. Ombimbiliya omukanda wayumbua unene onthumbi konthele yokulikuambela. Ina omalikuambelo omanyingi ovalume ovanyingi novakai vekolelo. Velikuambelele okuita eungumaneso, nehongolelo, nokuevelwa, nokuovola omakumbululo omapulo epuiya unene.—Salmo 23:3; 71:21; Daniel 9:4, 5, 19; Habacuque 1:3.

Omalikuambelo oo, namphila ankho elikalaila, mahi ankho ena otyipuka tyelifwa. Vana velikuambela, kese umwe ankho una enoñgonoko liakolela opo alinge omalikuambelo aviuka. Iya ovanthu hono mouye vetupu enoñgonoko olio. Mahi, ovanthu vana ankho vetyii okulie vesukisa okulikuambela.