1 Dikon Nos Mester Hasi Orashon?
ORASHON. Esaki ta un di e tópikonan bíbliko ku ta hala mas atenshon i lanta mas kuriosidat ku kualke otro tópiko. Tin shete pregunta ku normalmente hende sa hasi tokante orashon. Laga nos ban wak den e seri di artíkulonan akí kon Beibel ta kontestá e preguntanan ei. Ademas, e artíkulonan lo yuda nos siña hasi orashon òf mehorá nos orashonnan.
RÒNT mundu, hende di tur rasa i kredo ta hasi orashon. Nan sa hasi orashon sea nan so òf den grupo. Nan sa hasi orashon den iglesia, tèmpel, snoa, moské i na santuario. I nan sa usa tapeit, rosario, silinder chikitu di orashon, imágen, buki di orashon òf kuadro chikitu di orashon.
E echo ku hende por hasi orashon ta diferensiá nan for di tur e otro kriaturanan bibu. Ta bèrdat ku hopi kos ku nos ta hasi, bestia tambe ta hasi. Tantu hende komo bestia tin mester di kuminda, aire i awa. Ademas di esei, ámbos ta nase, biba i muri. (Eklesiastés 3:19) Pero, dikon ta hende so ta hasi orashon?
Simplemente bisá, hende ta sinti e nesesidat pa hasi esei. Por lo general hende ta konsiderá orashon komo un medio pa komuniká ku algu ku pa nan ta santu òf sagrado, i eterno. Beibel ta mustra ku ta Dios a pone esei den nan kurason. (Eklesiastés 3:11) Un biaha Hesukristu a bisa: “Felis [ta] esnan ku ta rekonosé ku nan tin mester di Dios.”—Mateo 5:3, BPK.
Ta e echo ku hende ta sinti ku nan tin mester di Dios ta pone ku nan ta traha asina tantu edifisio i opheto religioso i ta dediká asina tantu tempu na hasimentu di orashon. Klaru ku tin hende ta konfia den nan mes òf den otro hende pa satisfasé e nesesidat spiritual akí. Pero bo no ta sinti ku hende ta limitá den nan kapasidat pa yuda? Nos ta asina delikado, nos bida ta kòrtiku i nos no por wak futuro. Ta solamente un persona hopi mas sabí, poderoso i ku eksistensia eterno por duna nos loke nos tin mester. Kiko ta algun kos ku ta motivá nos pa hasi orashon?
Konsiderá lo siguiente: Bo a yega di sinti e deseo pa haña guia, sabiduria òf kontesta di preguntanan ku ta parse ku hende no por kontestá? Bo a yega di sinti e nesesidat di konsuelo na momento di un pèrdida doloroso òf di guia den kaso di un desishon pisá òf di pordon ora bo ta kibrá pa motibu di sintimentu di kulpa?
Segun Beibel, tur eseinan ta motibunan válido pa hasi orashon. Beibel ta e buki mas konfiabel pa duna bo informashon tokante orashon, i e ta kontené orashonnan di hopi hende hòmber i muhé fiel. Nan a hasi orashon pa haña konsuelo, guia, pordon i kontesta pa e preguntanan di mas difísil.—Salmo 23:3; 71:21; Daniel 9:4, 5, 19; Habakuk 1:3.
Maske ku e orashonnan ei tabata diferente, tur tabatin algu en komun. Kada un di esnan ku a hasi orashon a kumpli ku un rekisito masha importante pa nan orashon por ser skuchá, un rekisito ku hopi bes ta bai pèrdí i ku hende ta ignorá den e mundu di awendia. Nan tabata sa na ken nan mester hasi orashon.
