CHI JUN SUUT I AKʼAL, chuʼnchel taqeh kʼachareel inkibʼan kitiij. Wilik i reh reh wach yeʼaabʼ ahaʼ wiiʼ inkibʼan kitiij, jeʼ rukabʼ pan jenoʼ iglesia, pan jenoʼ paat abʼaj, inkikoj woʼ i rosario eh taqeh tyoox reh rubʼanariik kitiij. Xa reʼ laʼ, chi kutkeel oon chi wilik kuchʼihil, chu’nchel inkibʼan kitiij.

Reʼ tiij irubʼan chi reʼ hoj maʼ jenaj ta qawach ruukʼ taqeh chikop oon ruuk’ xa chajariik wilik naah ak’al. Jeʼ rukabʼ taqeh chikop, re’ hoj inqaaj qawaʼ, qahaaʼ eh teew. Eh qojʼasjik, qojkʼihik eh qojkimik (Eclesiastés 3:19). Xa reʼ laʼ, xa reʼ woʼ i hoj inqabʼan qatiij. ¿Chaaj woʼ reet?

Ruum chi ko ruman chi qeh. Re’ tiij iruyeew qʼabʼ qeh reh chi ne qojqʼorik ruukʼ i Dios, reʼreʼ qʼeʼ looqʼ eh reh chi juneliik. Re’ Santo Laj Huuj iruk’uhtaaj chi aajwaal wach chi qeh i tiij, ruum chi jeʼ reʼ xojrutzʼuhkrisaj i Dios (Eclesiastés 3:11). Reʼ Jesús jeʼ wilih xuqʼor: «Atoobʼ keh awach inkireq chi riij chi ko wilik i ajwaal wach chi keh ruukʼ i kinimanik» (Mateo 5:3).

Ruum chi wilik i aajwaal wach pan qanimaniik, wilik kʼih taqeh iglesia eh taqeh tyoox, eh wilik k’ih taqeh k’achareel inkikʼsaj kʼih hora chi rub’anariik kitiij. Kʼih taqeh kʼachareel inkaaj kikowem i kinimaniik chi kutkeel, eh wilik pech inkisikʼ tokoom chik kʼachareel reh rub’anariik i wilih. Xa reʼ laʼ, xa maʼ irubʼan ta woʼ chi kiwach taqeh kʼachareel chi ne inkiyeew i aajwaal wach chi keh pan kinimaniik chi kutkeel. Reʼ hoj kʼachareel, xa maʼ hoj ta wo’ kow, xa hoj ikʼeel eh maʼ chuʼnchel ta inqareq chi riij. Xa jenaj i najt rooq i rukʼachariik, i wilik runaʼojbʼal eh wilik rajaawriik ne iruyeew qeh i aajwaal wach chi qeh pan qanimaniik. Xa reʼ laʼ, ¿ahaʼ wilik taqeh aajwaal wach chi qeh pan uxlabʼal re’ inkib’an chi ne inqab’an qatiij?

Jenaj ehtalil, ¿hat na ikʼinaq pan jenoʼ kʼaxkilal eh inawaaj naq chi ne inkikʼam abʼeeh oon chi ne naq inkiqʼor aweh i inawaaj anabʼeem? Noq kʼahchiʼ naq awikʼiik pan tiʼ kʼaxik, noq xkimik jenoʼ afamiliar, noq wilik naq i k’axik chaweh ruchihariik pan akʼachariik oon noq xatmahkunik, ¿xawikʼraaj na chi maʼ manlik ta aweh i kowiil kʼuxliis oon i toob’inik xakʼul oon xakapaaj chi maʼ manlik ta xa ruuk’ chi xkikuy amahk?

Xa reʼ laʼ, re’ Santo Laj Huuj, re’ huuj re’ ne irub’an chi ne inqakoj qak’ux ruuk’, iruq’or chi ne inqareq chu’nchel i wilih mi inqab’an qatiij. Eh chupaam inqareq taqeh kʼihaal chi tiij kibʼanam taqeh winaq eh ixoq korik wach kikʼux i xkipahqaaj kowiil kʼuxliis, naʼojbʼal eh kuybʼal kimahk eh xkipahqaaj chi ne kiq’orik chi riij i kipahqanik (Salmo 23:3; 71:21; Daniel 9:​4, 5, 19; Habacuc 1:3).

Chuʼnchel taqeh tiij wilih jenaj naq kiwach, ruum chi xibʼirjik. Ruum chi reʼ taqeh xkibʼan kitiij kehtʼal naq ajwach uukʼ nakibʼanam kitiij.