Mañakuy

1 ¿Imaraykutaq mañakuna?

MAÑAKUY. Runasqa, Diosmanta mañakunamanta mayta parlayta munanku. Kay yachaqanapiqa, mañakuymanta qanchis tapuykunata Diospa Palabranwan sutʼinchasun. Kay yachaqanaqa, Diosmanta mañakuyta qallarinankupaq yanapanqa, mañakuyta yachaqkunamantaq, mañakuyninku aswan sumaq kananpaq yanapanqa.

RUNASQA religionniyuq kaspapis, manapis Diosmanta mañakuyta yachankupuni. Iglesiaspi, sinagogaspi, mezquitaspi, santuariospi ima, rosarioswan, lantiswan, cruzkunawan, mañakunku. Sapanku chayri wakkunawan, tukuy mañakunku.

Jallpʼapiqa tukuy kawsayniyuqkunamanta runaslla Diosmanta mañakunku. Runasqa uywasjina mikhunata, yakuta, samayta ima, necesitanchik. Chantapis paqarikunchik, wiñanchik, miranchik, wañunchik ima (Eclesiastés 3:19). Chaywanpis runalla Diosmanta mañakuyta yachan. ¿Imaraykutaq?

Imaraykuchus, mañakuyta tukuypis necesitanchik. Mañakuyniqta, runaqa santo kaqman, wiñaypaq kaqman ima, qayllaykun. Biblia nisqanmanjina chay munayniyuq kanchik (Eclesiastés 3:11). Chayrayku, Jesús nirqa: “May cusiskas cancu sonkoncupi Diosmanta pisiskas caskancuta khawacojcunaka”, nispa (Mateo 5:3, Dios Parlapawanchej).

Chayrayku, achkha iglesias tiyan Diosmanta mañakunankupaq, tukuy imatataq apaykachanku, may chhika unaytataq mañakunku. Wakinkunaqa, sunqunkuta juntʼachiyta munaspa, paykunapi atienekunku, mana chayqa wak runaspi. Chaywanpis, runaqa mana yanapayta atiwasqanchikta, ¿manachu rikunchik? Imaraykuchus, runasqa mana kallpayuq, pisi kawsayniyuq, yachayniyuq ima. Chayrayku wiñay kawsayniyuq, tukuy atiyniyuq, may yachayniyuq kaqlla, imatachus necesitasqanchikta, quyta atiwasunman. Chantá, ¿imataq Diosmanta mañakunapaq tanqawanchik?

Sutʼincharinapaq, ichapis yuyaychasunankuta, tapuykunasniykiman kutichisunankuta, maykʼaqllapis munarqanki, ni pi yanapayta atisusqanpi, ¿rikukurqankichu? Familiaykimanta pillapis wañupuptin, kawsayniykipi imata ruwanaykipaqpis, chayri juchachakusqaykirayku, runaspa yuyaychaynin mana yanapayta atisusqanta, ¿reparankichu?

Bibliaqa chiqata yachachiwanchik. Chayrayku mañakuylla, sunqu juntʼasqa kanapaq, yanapanawanchikta niwanchik. Chantapis Diospa kamachisnin, pay sunquchananta, yuyaychananta, juchasninku pampachasqa kananta ima, mañakuyniqta maskʼasqankuta willawanchik. Mana kutichiy atina tapuykunasman kutichisqanta rikuchin (Salmo 23:3; 71:21; Daniel 9:4, 5, 19; Habacuc 1:3).

Kay mañakuykunaqa mana juk riqchu karqa, chaywanpis rikchʼakunku. Imaraykuchus, pimantachus mañakuchkasqankuta chantá imatachus ruwanankutapis, uyarichikunankupaq allinta riqsirqanku. Kunanqa, runas pimantachus mañakunankuta yachaspapis manapis qunqapunku.