Mañakuy: ¿Imanirtan Diosman mañakushwan?
MAÑAKUY. Nunakunaqa Bibliachö mañakuypaq ima ninqantam masqa yachakuyta munayan. Këchömi yachakushun, Diosman imanö mañakunapaq qanchis tapukuykunapita. Bibliachömi tsë tapukuykunapaq ima ninqanta tarishun. Kë yachatsikuykunaqa, Diosman manaraq mañakoqkunatam imanö mañakuyänampaq kaqta yachatsinqa, y Diosman mañakoqkunatanam mas alli mañakuyänampaq yanapanqa.
MËPITA KARPIS y ima religionpita karpis Diosmanqa mañakuyanmi, juk ishkëllam Diosmanqa mañakuyantsu. Iglesiakunaman, sinagögakunaman, mezquïtakunaman y santuariukunaman ëwëkurmi mañakuyan. Mañakuyänampaqqa utilizäyan rosariukunata, rëzu librukunata, cuadrukunata y pintashqa alfombrakunatam. Y manam tsëllatsu, atskaq juntakëkur o japallankunapis mañakuyanmi.
Nunakunaqa Diosman mañakuyta puëdiyanmi, peru Patsachö imëka kawaqkunaqa manam. Nunakunaqa animalkunanöllam wanantsik mikuyta, yakuta y shutëta. Tsënöllam yurikuntsik, winantsik y wanukuntsik o wañukuntsik (Eclesiastes 3:19). Tsënö kaptimpis, ¿imanirtan nunakunalla Diosmanqa mañakuyan?
Wanarninmi, nunakunaqa Diosman mas witiyänampaq mañakuyan, tsëqa sagrädu y mana ushakaqmi. Bibliachöqa nin Dios nunakunata kamanqantam, tsëmi nunakunaqa Diosta wanayan (Eclesiastes 3:11). Jesusmi kënö nirqan: “Kushikuyätsun Diosta wanayanqanta musyaqkuna” (Mateu 5:3).
Mëtsika iglesiakuna y mañakuyänampaq utilizäyanqan mëtsika cösaskuna y mëtsika hörakuna mañakuyanqanmi rikätsikun nunakunaqa Diosta wanayanqanta. Wakinkunaqa Diosta wanarmi shonqunkunachö mañakuyan y wakinkunanam juk nunakunaman ëwayan yanapayänanta ashir. Tsënö kaptimpis, kikinkunallaqa manam Diosman witita puëdiyantsu. Nunakunaqa wallka tiempullam kawantsik, manam llapantaqa imatapis musyëta puëdintsiktsu. Teyta Diosllam alläpa yachaq y puëdeq, pëllam yanapamënintsikta puëdin. Peru ¿imanirtan Diosta wanantsik? ¿Imanirtan Diosman mañakuntsik?
Këllaman pensari: ¿pillapis yanapashunëkita, consejashunëkita y tapukuynikikunapa respuestanta nishunëkita wanarqunkiku? ¿Familiëki wanuptin o wañuptin shoqayäshunëkita wanarqunkiku? ¿Imatapis decidinëki kaptin consejayäshunëkita wanarqunkiku? O mana allita rurariptiki, ¿perdonayäshunëkita wanarqunkiku?
Bibliachöqa mañakuypaqpis willakunmi. Diosman mañakunqantsikqa yanapamantsikmi. Y willakunmi ollqukunapis y warmikunapis Diosman mañakuyanqanta. Pëkunaqa, perdonanampaq, consejanampaq, y shoqanampaqmi mañakuyarqan. Tsënöllam tapukuyaptimpis Diosqa yaskirqan (Salmus 23:3; 71:21; Daniel 9:4, 5, 19; Habacuc 1:3).
Mañakuyninkunaqa igual-llam karqan. Teyta Diosmanmi mañakuyarqan y pëqa wiyarqanmi. Kanan witsanqa, musyëkarpis manam Teyta Diosman mañakuyantsu.