Pure—No Teaa Ra?
PURE. Kare atu e apinga tei akatupu i te manako inangaro kia kite maata atu i roto i te tangata. Ka akamanako ana e itu uianga matauia no runga i te pure; e oti ka akara tatou i te pauanga a te Pipiria ki teia au uianga. Ka tauturu teia au atikara ia koe kia pure—kia akamata i te pure me kore kia akameitaki atu i taau pure.
TAKAPINI i teianei ao, i roto i te au peu e te au akonoanga katoatoa, e pure ana te tangata. Ka pure ratou ko ratou anake ua e ka pure ratou ei pupu. Ka pure ratou i roto i te are pure, te iero, te sunago, te are pure na te akonoanga Muslim, e te au ngai tapu. Penei ka taangaanga ratou i tetai moenga no te pure, te taura ei pūpū rotario, taramu porotaka tei roto te au pure tei tataia, te au tiki, puka pure, e te au papa pure tei tamouia ki runga i te paruru.
Na te pure e akatuke i te tangata mei te au mea ora i te enua nei. E tika, e maata te au mea aiteite i rotopu i te tangata e te manu. Mei te au manu rai, ka anoanoia tatou kia kai, kia akaea, e kia inu i te vai. Pera katoa, ka anau, ka ora, e ka mate tatou. (Koheleta 3:19) Inara ko te tangata ua tei pure. No teaa ra?
Penei te pauanga meitaki, koia oki ka anoanoia tatou kia pure. Irinaki te manganui e e ravenga te pure no te karangaranga atu ki te ao vaerua, e mea tapu e te puapinga. Akaari mai te Pipiria e kua angaia tatou kia akatupu i teia anoano. (Koheleta 3:11) Karanga a Iesu Karaiti: “E mataora to te aronga te manako i to ratou anoano i te pae vaerua.”—Mataio 5:3.
Te “anoano i te pae vaerua”—ko te tumu ïa e maata ai te au are pure maatamaata e te au apinga tapu no te akamorianga, pera katoa te tumu i pure ei te tangata e manganui. Ka irinaki tetai pae ia ratou uaorai me kore i tetai ke no te akatupu i to ratou anoano pae vaerua. Inara, i toou manako ka rauka ainei te tangata i te tauturuia mai? E tu paruparu, apikepike, e te kamakura to te tangata. Ka anoanoia tetai tei pakari roa atu, tei ririnui, e tei ora e tuatau ua atu kia akatupu i to tatou anoano. Eaa i reira teia anoano pae vaerua tei akakeu ia tatou kia pure?
Akamanako ana: Kua anoano ainei koe i te aratakianga, te pakari, me kore te pauanga ki te au uianga ngata tikai kare e rauka i te tangata i te pau? Kua anoano ainei koe kia akapumaanaia me tupu tetai tumatetenga, te aratakianga no te rave i tetai ikianga ngata tikai, e me ngakau taitaia toou e te inangaro kia akakoreia taau ara?
Akakite mai te Pipiria, e e au tumu meitaki teia kia pure. Ko te Pipiria te puka meitaki roa atu e te irinakiia no te pure, e tei roto i te reira te pure a te au tane e te au vaine akarongo. Kua pure ratou no te akapumaana, te aratakianga, kia akakoreia ta ratou ara, e no te pauanga ki te au uianga ngata roa atu.—Salamo 23:3; 71:21; Daniela 9:4, 5, 19; Habakuka 1:3.
Noatu e tukeke ta ratou pure, e apinga aiteite tetai. Kua kite ratou i te ravenga puapinga kia akarongoia mai ta ratou pure, ki tetai ravenga tei ngaro me kore tei kopaeia i roto i teianei ao. Kua kite papu ratou e ka pure ratou kiaai.