1 Kungani Kufanele Sithandaze?

UMTHANDAZO. Kunetihloko letimbalwa letitfolakala eBhayibhelini letivusa inshisekelo kanye nelilukuluku letfu lekwati. Cabanga ngemibuto lesikhombisa levamise kubutwa mayelana nemthandazo, bese uhlola kanye natsi timphendvulo tayo letitfolakala eBhayibhelini. Injongo yaletihloko kukusita kutsi ukwati kuthandaza—kungaba kutsi ucale kuthandaza, nobe utfutfukise indlela lothandaza ngayo.

EMHLABENI wonkhe, bantfu labaphila ngaphansi kwetimo letingafanani, nalabasetinkholweni letehlukene bayathandaza. Bathandaza babodvwa; baphindze bathandaze njengemacembu. Bathandaza emasontfweni, emathempelini, emasinagogeni, etindzaweni tekuthandaza temaMoslem, kanye nakuletinye tindzawo tekukhontela. Basebentisa tingubo tekuthandaza, buhlalu, emasondvo ekuthandaza, titfombe, tincwadzi temithandazo, nobe imithandazo lebhalwe emabhodini.

Umthandazo nguwo lowenta bantfu behluke kuto tonkhe tintfo letiphilako letisemhlabeni. Kuliciniso kutsi kunekufanana lokutsite emkhatsini wetfu netilwane. Njengato, siyakudzinga kudla, umoya kanye nemanti. Natsi siyatalwa, siphile futsi sife. (Umshumayeli 3:19) Kodvwa bantfu kuphela labathandazako. Kungani kunjalo?

Imphendvulo lemelula nje kutsi tsine sinesidzingo sekuthandaza. Umthandazo utsatfwa njengendlela yekusondzela endzaweni lengcwele nalehlala njalo. LiBhayibheli litsi sadalwa sinesifiso sekwenta njalo. (Umshumayeli 3:11) Jesu Khristu watsi: “Babusisiwe labamphofu emoyeni, ngobe umbuso welizulu wabo.”—Matewu 5:3.

‘Kuba mphofu emoyeni’ ngiko lokubangela kutsi kube netindzawo kanye netintfo letinyenti tekukhonta, futsi kucitfwe nema-awa lamanyenti kuthandazwa. Labanye bantfu batetsemba bona nobe betsembe labanye kute benetise sidzingo sabo sekwati Nkulunkulu. Awucabangi yini kutsi bantfu bete emandla lenele ekusisita? Sonkhe site emandla, siphila sikhatsi lesifishane, futsi kucabanga kwetfu kufishane. Ngumuntfu lohlakaniphe kusendlula sonkhe, lonemandla lamakhulu, nalokwati kubeketela kwendlula tsine longasinika loko lesikudzingako. Ngutiphi letidzingo takamoya letisenta kutsi sithandaze?

Asewucabange ngaloku: Uke wasilangatelela yini sicondziso, kuhlakanipha nobe timphendvulo temibuto lokubonakala kungasimelula kutitfola? Uke wativa yini udzinga kudvudvutwa ngemuva kwekuva buhlungu bekulahlekelwa, udzinga sicondziso nakufanele utsatse sincumo lesitsintsa kuphila kwakho, nobe udzinga kutsetselelwa nawutiva unelicala?

Ngekusho kweliBhayibheli, leti tizatfu letibalulekile lokufanele tisente sithandaze. LiBhayibheli liyincwadzi lesingayetsemba kulendzaba, futsi licuketse imithandazo leminyenti yemadvodza kanye nebesifazane labetsembekile. Bathandaza bacela indvudvuto, sicondziso, kutsetselelwa, kanye netimphendvulo temibuto lokumatima kutitfola.—Tihlabelelo 23:3; 71:21; Danyela 9:4, 5, 19; Habakhuki 1:3.

Lemithandazo beyehlukehlukene, kodvwa kunalokutsite lebeyifanana ngako. Ngamunye walabo labebathandaza abenesici lesibaluleke kakhulu lesenta umthandazo wakhe uphendvulwe, labanye labangasati nobe labangenandzaba naso lamuhla. Bebati kutsi kufanele bathandaze kubani.