GUÜ̃ I NAANEWA, ngetámare i cultura urü religiãowa, muũma i duü̃ü̃gü nayumüẽgü. Ngẽma duü̃ü̃gü nayumüẽ wüitama urü natücumüwa; nayumüẽ i tupaucagüwa, sinagogagüwa, mesquitagüwa rü santuáriogüwa. Bemana nayumüẽ i tütatchinüruü̃wa, rosáriogü, urü nabotchimüü̃ nanayumüẽgüü̃caꞌ, urü naugutae yumüẽarü librugü, natchicünaꞌãgücaꞌ nayumüẽgü.

Rü yumüẽ nüü̃ nawe na duü̃ü̃gü rü natoraü̃ü̃ niĩ na togüarü na maẽü̃ i nuã i naanewa. Tomagü tiĩgü rü ngẽgumaraü̃ü̃ i naeü̃gü erü inawaꞌe õna, buanecü rü deá. Rü ta erü duü̃ü̃gü nabu, namaẽ rü yicama nayu. (Eclesiastes 3:19) Notürü duü̃ü̃güicatama nayumüẽ. Tüꞌcüü̃?

Erü inawaꞌeü̃ iyumüẽgü. Rü yumüẽwa muũma i duü̃ü̃gü Tupanamaã nideatchaü̃. Rü duẽẽgücaꞌ ngẽguma iyumüẽgügu nüü̃ natautcha na dauü̃cüãꞌgümaã idea, rü ta duẽẽgücaꞌ ngemagü üüneü̃ iĩcü rü taguma iyue. Rü Tupanaarü Ore nüü̃ nawe ga Tupana yemaacü nanaü yema duü̃ü̃gü. (Eclesiastes 3:11) Wüi ngunẽü̃gu, Ngetchutchu rü nhanagürü: “Tataãẽgü ya yíema nüü̃ icuaꞌãtchitanüẽ na inawaꞌe Tupanatchiga icuaꞌgüü̃.” — Mateu 5:3, TNM.

Ngema Ngetchutchuarü ore nüü̃ nawe na yiema inawaꞌe Tupanaü̃ icuaꞌgüü̃ erü muü̃tchi i tupaucagü nangema rü tupananetatchicunaꞌãgü ngemaü̃ rü ta guü̃ i natchicawa muü̃tchi i ngoragü nayumüẽgü ya duẽẽgü. Rü nümaü̃ i duü̃ü̃gü nügügu nayaõ urü togü nayaõ na nüü̃ narüngü̃ẽẽ i ngematchiga. Notürü, rüeꞌna ngema duü̃ü̃gü nüü̃ nacuaꞌgü i taꞌacü meü̃ i ucüẽgü? Yiema ya duü̃ü̃gü turaü̃ tiĩgü rü tama guü̃ma nüü̃ icuaꞌgü. Ngemagagu Tupanaicatama ya poracü niĩ tüna naã i taꞌacü inawaꞌeü̃. Notürü, tüꞌcüü̃ inawaꞌe iyumüẽgüü̃?

Nagu narüĩnü i ngẽma: Rüeꞌna marü nagu curüĩnü i taꞌacü tama nüü̃ cucuaꞌü̃ rü ta bemana cuma nagu rüĩnü na tauema nüü̃ nacuaꞌü̃ i norü ngãü̃gü na cuü̃ narüngü̃ẽẽü̃caꞌ? Eꞌna marü cunawaꞌe na togü cuü̃ naporaẽẽ yeguma gutchaü̃ nangupetügu, urü yeguma cuaꞌ cunawaꞌegu na meã cuunetaü̃ urü yeguma poraãcü cungetchaü̃gu yerü ga tchieü̃ cuüü̃?

Rü Tupanaarü Orewa tüü̃ nawe na inawaꞌe Tupanacaꞌ iyumüẽgü i tórü gutchaü̃gütchiga. Rü Tupanaarü Ore wüi popera niĩ na inawaꞌe nagu iyaõgüü̃ i yumüẽtchiga rü ta nangema cuaꞌãrüü̃gü na meü̃ i yatügü rü ngeü̃gü na Tupanacaꞌ iyumüẽgü. Nümagü rü iyumüẽgü nacaꞌ ínaca na nüü̃ naporaẽẽü̃caꞌ rü na nüü̃ narüngü̃ẽẽü̃caꞌ rü na nüü̃́ nüü̃ nangetchaü̃ü̃caꞌ i norü pecadugü rü ta na nüü̃ nacuaꞌgüü̃caꞌ i norü cagüarü ngãü̃gü na tama nacuaꞌgüü̃ i norü maü̃wa. — Salmo 23:3; 71:21; Daniel 9:4, 5, 19; Habacuque 1:3.

Woo yema yumüẽgü muũtchi nacümagü nangemagu, yema yumüẽgü nüü̃ nawe na yema ga duẽẽgü nüü̃ yacuaꞌgüü̃ na teécaꞌ iyumüẽgü. Nhuꞌma muũma i duü̃ü̃gü tama nüü̃ nacuaꞌgü na teécaꞌ nayumüẽ.