MIVAVAKE iaby o ndatio ndra ino ndra ino ty firenena misy aze. Mivavake mitokagne iareo ndra miarake maromaro. Va’e ho am-piangonagne agne zay ndra amo o tempolio agne, ndra amo o synagogao agne ndra amy ty toeragne masigne. Ty ila’e mampiasa sapile ndra sarevongagne, le ty ila’e ka mitongalake amy ty tapis kedekede. Ty ila’e ka magnodikodigne kapoake misy tognom-bavake naho fa mivavake, ndra mamaky bokem-bavake, ndra mamaky tognom-bavake misoratse amy ty tabilò kede mihantogne.

Ty mivavake ty mampiambake o ndatio amy ty raha managne aigne hafa an-tane etoy. Maregne fa maro ty raha itovizantikagne amo o bibio, agnisa izay ohatse tihoe aterake tika, le mihabey sady mate naho fa avy eo. (Mpitoriteny 3:19) Mipay hanegne naho tioke vaho rano ka tika. Faie o ndatio avao ty mivavake. Ino ty anto’e?

Ty vale’e tsotra le tihoe, satria mila manao izay tikagne. Mihevetse ty ankamaroa o ndatio fa ty mivavake ro fomba ifandrambesagne amy ty raha ivavaha’e amy ty tontolo ara-pagnahy agne. Aseho ty Baiboly fa niforognegne hivavake tika. (Asan’ny Apostoly 17:24, 27) Hoe ty Jesosy Kristy: “Sambatse ze mahatsiaro fa mipay an’Andrianagnahare.”—Matio 5:3.

Trea tie “mipay an’Andrianagnahare” o ndatio naho fa henteagne o tragno fivavahagne abo bey io, ty raha maro ampiasaegne mba hivavahagne, naho ty lera tsy vita isake ivavahagne. Faie tsy tena magnarine an’Andrianagnahare ty ila’e, fa miantehetse amy ty tegna’e ndra amy ty ndaty hafa, mba hahazoagne tari-dalagne. Tsy mahatsapa vao rehe fa voafetra avao ty fagnampeagne azo o ndatio meigne? Maleme tikagne olombelogne, fohe ty androntikagne, sady tsy mahataka-davitse tika. Mipay mpagnampe hendre, naho mahery vaho ela nivelomagne noho itika tika mba hagnomey ze raha ilaentikagne.

Mila tari-dalagne naho fahendreagne tika sady te hahafantatse ty vale ty fagnonteneagne tsy hay o ndatio valeagne reo. Mipay fampionagnagne ka tika naho fa mamoe ty longontikagne. Va’e mipay toro-hevetse ka tika naho fa misy fanapahan-kevetse mampivali-doha antikagne, sady mipay famelagne naho fa mahatsiaro tegna ho meloke.

Tena ilaegne areke ty mivavake mba hahazoagne ireo hoe ty Baiboly. Ty Baiboly ro boke tena azo atokisagne, sady rehafegne ao ty vavake natao ty lahilahy naho ty ampela tsy nivalike. Nivavake iareo mba hahazo fampionognagne, tari-dalagne, famelan-keloke, naho mba hahazoagne ty vale ze fagnonteneagne fara’e sarotse.—Salamo 23:3; 71:21; Daniela 9:4, 5, 19; Habakoka 1:3.

Sambe hafa i vavake rey, faie misy raha raike itoviza iareo, le tihoe raike avao ty Andrianagnahare nivavaha iareo. Tena lahibey zay ndra tie tsy raharahae o ndatio aza. Ia areke ty toko’e hivavahantikagne?