Cifukwa Wuli Tikwenera Kulomba?
LUROMBO njimoza mwa nkhani za mu Baibolo izo ŵanthu ŵakunweka nazo comene. Wonani mafumbo ghankhondi na ghaŵiri agho ŵanthu ŵakufumba comene pa nkhani ya lurombo, ndipo mwendere nase lumoza apo tikusanda mazgoro agho Baibolo likupeleka. Nkhani izi zalembeka kuti zimovwirani umo mungalombera, kuti mumanye umo mungambira kulomba panji ivyo mungacita kuti mulombenge makora.
ŴANTHU ŵa mafuko na visopa vyose pa caru cose capasi ŵakulomba. Ŵakulomba paŵekha ndiposo pagulu. Ŵakulomba mu machalichi, matempele, masunagoge, mu mizikiti, panji pa malo ghanyake agho ŵakugomezga kuti ngakupatulika. Pakulomba, ŵanyake ŵakugwiliskira nchito tumathawuro, majuda, tuvingelengele, tuvikozgo, mabuku gha lurombo, panji malurombo ghakulembekerathu agho ghakuŵa mu mafulemu.
Mphambano yimoza pakati pa ŵanthu na vilengiwa vinyake njakuti ŵanthu ŵakulomba. Mbunenesko kuti taŵanthu na vinyama tikuyana mu vinandi. Nga ni vinyama, nase tikukhumbikwira cakurya, mphepo, na maji. Nga ni vinyama, nase tikubabika, kukhalapo kanyengo na kufwa. (Mupharazgi 3:19) Kweni ŵanthu pera ndiwo ŵakulomba. Cifukwa wuli?
Panji zgoro lipusu ndakuti ndimo tili kulengekera. Nakuti lurombo ni nthowa yekha iyo ŵanthu ŵakuwona kuti ŵangayowoyeskerana na vilengiwa vyauzimu, ivyo ŵakugomezga kuti ni vituŵa, vyakupatulika, ndiposo vyamuyirayira. Baibolo likulongora kuti tikalengeka na khumbo lakuti tilombenge. (Mupharazgi 3:11) Nyengo yinyake Yesu wakati: “Mbakukondwa awo ŵakumanya kusoŵerwa kwawo kwauzimu.”—Mateyu 5:3.
Nchakuwonekerathu kuti nyumba zose zapacanya zakusoperamo izo tikuwona, vikozgo, ndiposo maora ghose agho ŵanthu ŵakumalira pa kulomba, mbukaboni wakuti tili na ‘kusoŵerwa kwauzimu.’ Ŵanthu ŵanyake kuti ŵakhorweske njara yawo yauzimu ŵakujigomezga ŵekha panji ŵakugomezga ŵanthu ŵanyawo. Kweni asi mukujiwonera mwekha kuti ŵanthu ŵakutondeka kovwira ŵanyawo pa cigaŵa ici? Tilije nkhongono, tili na umoyo ufupi, ndipo tilije vinjeru. Uyo wangatovwira wakwenera kuŵa na vinjeru vinandi, nkhongono zinandi, ndiposo wa umoyo utali kujumpha ise. Kasi ni vinthu wuli vyauzimu ivyo tikusoŵerwa ivyo vikutipangiska kuti tilombenge?
Ghanaghaniranipo mafumbo agha: Kasi muli kupenjapo ulongozgi, vinjeru, panji mazgoro gha mafumbo agho mukawonanga kuti palije uyo wangazgora? Kasi muli kukhumbapo cipembuzgo pamanyuma pakuti munthu uyo mukamutemwanga comene watayika panji kupenja ulongozgi apo mukasoŵanga cakucita pa nkhani yinyake? Kasi muli kupemphapo cigowokero cifukwa cakuti njuŵi yikamusuzganinge?
Baibolo likulongora kuti vyose ivi ni vifukwa vyakupulikikwa vyakulombera. Baibolo ni buku lakugomezgeka comene pa nkhani iyi, ndipo muli malurombo ghanandi gha ŵanalume na ŵanakazi ŵakugomezgeka. Ŵakalombanga cipembuzgo, ulongozgi, cigowokero, ndiposo kuti ŵamanye mazgoro gha mafumbo agho ghakaŵasuzganga.—Salmo 23:3; 71:21; Daniel 9:4, 5, 19; Habakuk 1:3.
Nangauli malurombo ghawo ghakaŵa ghakupambana, kweni ghakayananga vinthu vinyake. Awo ŵakalombanga ŵakamanyanga ico cikukhumbikwa kuti Ciuta wapulike lurombo lwawo, ico ŵanthu ŵanandi mazuŵa ghano ŵakucimanya makora yayi panji ŵakuŵikako mahara yayi. Ŵakamanyanga uko malurombo ghawo ghakwenera kuluta.