Te oración: ¿Bin yuʼun te ya jpastike?
TE ORACIÓN. Bayal ants winiketik ya skʼan ya snaʼik te bin ya yal te Biblia ta swenta te oración. Ta revista ini ya kilbeytik skʼoplal jukeb jojkʼoyeletik ta swenta te oración sok te sujtib ya yakʼ te sKʼop Diose. Te articuloetik ini ya stijbey yoʼtan ta skʼoponel Dios te machʼatik mato skʼoponik sok ya xkoltayotik ta slekubtesel te s-oracionik te machʼatik kʼayemikix ta spasele.
SPISIL te ants winiketik ya spasik oración manchukme yanyantik sreligionik o stsʼumbalik. Yanyantik-a te banti ya spasik te oracione, jich bitʼil ta iglesiaetik, sinagogaetik o temploetik, ya spas ta stukelik o ya sjokin sbaik ta spasel; ya stuuntesik rosario, libroetik, santoetik sok yantikxan.
Te ants winiketik sok te chambalametik ya xweʼik, ya yuchʼik jaʼ sok ya yichʼik ikʼ. Jaʼnix jich ya x-ayinik, ya xchʼiik sok ya xlajik (Eclesiastés 3:19). Pero jaʼnax te ants winiketik ya spasik oración. ¿Bin yuʼun?
Jaʼ yuʼun te jich ya kaʼiytik te ya skoltayotike. Te oración ya stuuntesik ta skʼoponel te sdiosik te ichʼbil ta mukʼ yuʼunike. Jich bitʼil ya yal te Biblia, jich pasbilotik te ya jkʼan ya jkʼopontik te Diose (Eclesiastés 3:11). Jich la yal te Jesuse: «Tseʼelnaxme yoʼtanik te machʼatik ya snaʼik te ya skʼan ya sleik te koltayel yuʼun te Diose» (Mateo 5:3, La Biblia. Traducción del Nuevo Mundo edición 2019 ta español).
Ta skaj te jich pasbilotik te ya jletik te Diose, ay bayal religionetik sok temploetik. Jaʼnix jich te ants winiketik bayal ya skʼoponik te Diose, pero ay machʼatik jaʼiknix ya sleik te bitʼil lek ya yaʼiy sbaike o ya sleik koltayel ta stojol yantik. Ya yalik te maba ya xtuun yuʼunik te koltayel yuʼun te Diose, pero ¿melelbal-abi? Maʼuk. Te joʼotike chʼichʼbakʼetotik ay bayal te bintik maba ya kichʼbeytik swentaile sok puersa ya jkʼantik koltayel. Jich yuʼun, jaʼnax ya xjuʼ ya skoltayotik te machʼa kʼax pʼij, te bayal yuʼel sok te ma xlaje. Pero ¿bintik-a te ya stijbotik koʼtantik ta spasel oracione?
¿Aybal bin-ora ay bin la akʼan la anaʼbey skʼoplal te maʼyuk machʼa juʼ la skoltayate? Te kʼalal ay machʼa laj awuʼun, te ay bin la ata ta nopel spasel o te ay banti chʼayate, ¿jichbal la awaʼiy te maba tikʼat-a te bin la awichʼ albeyele, te tojobtesel o te perdón la awichʼe?
Bueno, te Biblia ya yal te jaʼ te bin ya xjuʼ ya jkʼantik ta oracione. Jaʼnix jich tey ya jtabeytik skʼoplal ants winiketik te la sta smukʼul yoʼtanik te kʼalal la skʼoponik te Diose, la staik koltayel sok perdón, jaʼnix jich la stabeyik sujtib te bin ya skʼan ya snaʼbeyik skʼoplal-ae (Salmo 23:3; 71:21; Daniel 9:4, 5, 19; Habacuc 1:3).
Ay bin pajal yuʼun te ants winiketik te la spasik oración. Jaʼ te snaʼojik ta lek te machʼa ya skʼoponike, melel snaʼojik te jaʼnax jich ya x-aʼiybotik te skʼopike, yan stukel te ants winiketik ta kʼajkʼal ini ma snaʼik te machʼa ya skʼoponik ta oracione.