КОТЬКЫӴЕ шаерысь, котькыӵе калыкысь но религиысь адямиос вӧсясько. Кин ке ас понназ вӧсяське, нош кин ке — мукетъёсыныз ӵош люкаськыса. Адямиос вӧсясько черкъёсын, храмъёсын, сӥнагогаосын, мечетьёсын яке мукет интыосын. Вӧсяськыкузы соос пыдуллёгет вылэ пыдесъясько, мудор азе султо, весьсузьетэз киязы куто яке молитваосын книгаосысь вӧсяськонъёсты лыдӟо.

Музъем вылын вӧсясько адямиос гинэ. Адямиослэн пудо-животъёсын трос огкадез вань. Милемлы но, пудо-животъёслы но кулэ сиськыны, юыны, шоканы. Пудо-животъёс кадь ик, ми но вордӥськиськомы, улӥськомы но кулӥськомы (Екклесиаст 3:19). Но вӧсясько адямиос гинэ. Малы?

Вакчияк но огшоры кылъёсын вераса, малы ке шуоно ми озьы кылдытэмын вал. Но нырысь ик вӧсяськон юрттэ малпаськыны со сярысь, мае адямиос святоен лыдъяло. Библиын верамын, Инмар адямиез кылдытӥз, солэн Инмар сярысь тодэмез мед потоз шуыса (Екклесиаст 3:11). Одӥг пол Иисус вераз: «Духовной кулэяськонъёссэс валасьёс шудоесь, малы ке шуоно соослэн Ин Эксэйлыксы вань» (Матфей 5:3, «Выль дунне» берыктэм (ВД)).

Адямиослэн потэ Инмар сярысь тодэмзы но солы матэ кариськемзы. Соин ик соос черкъёс, мечетьёс пукто, трос часъёс ӵоже вӧсясько. Куд-ог адямиос асьсэос Инмарез утчало яке мукет адямиосты куро юрттыны соослы Инмарез шедьтыны. Но ӵем дыръя адямиос юрттыны уг быгато, малы ке шуоно адямилэн улон даурез вакчи но со ваньзэ уг тоды. Милемлы юрттыны быгатэ со гинэ, кин милесьтым визьмогес, кужмогес но кемагес улэ. Нош мар косэ адямиез Инмарез утчаны но солы вӧсяськыны?

Вал-а тӥляд улонады сыӵе вакыт, куке тӥледлы визь-кенеш кулэ вал яке тӥляд юанды кылдӥз, кудӥзлы, тӥ малпамъя, нокыӵе адями но валэктон сётыны уг быгаты? Оло нош, тӥляд матысь адямиды кулӥз но тӥледлы буйгатон кулэ вал. Яке тӥледлы быръён лэсьтоно вал, нош тӥ уд тодӥське, мар карыны. Оло нош, тӥ асьтэды туж янгышен шӧдӥськоды вал но тӥляд потэ вал, тӥледыз простить мед карозы шуыса. Вал-а сыӵе вакытъёсты?

Библиысь адӟиське, ӵапак та выллем учыръёсы сюрыса, адямиос вӧсяськыны кутско шуыса. Библиын трос верамын вӧсяськон сярысь. Отын Инмарлы оскымон пиосмуртъёслэн но кышномуртъёслэн вӧсяськонъёссы гожтэмын. Соос Инмарлэсь буйгатскон, визь-кенеш утчазы, сьӧлыкъёссэс куштыны куризы но Инмарлы юанъёс сётъязы (Псалтирь 22:3; 70:21; Даниил 9:4, 5, 19; Аввакум 1:3).

Библиын гожтэм вӧсяськонъёс туж пӧртэмесь ке но, соослэн огкадез вань. Адямиос, кудъёсыз вӧсяськизы, тодо вал, мар кароно, вӧсяськемзэс мед кылозы шуыса. Соос тодо вал, кинлы вӧсяськоно.