Le oracionoʼ

1 ¿Baʼaxten unaj k-beetik?

LE ORACIONOʼ. Tiʼ tuláakal le baʼax ku kaʼansik le Bibliaoʼ, le oracionoʼ letiʼe baʼax maas jach kʼaʼanaʼan u yilik le máakoʼoboʼ. Le xookoʼob ken k-il beoraaʼ yaan u tʼaanoʼob tiʼ siete kʼáatchiʼob suuk u beetaʼal yéetel ku tsolkoʼob le baʼax ku yaʼalik le Biblia tu yoʼolaloʼ. Le xookoʼobaʼ yaan u yáantik le máaxoʼob maʼatech u oraroʼob utiaʼal ka u beetoʼoboʼ, yéetel le máaxoʼob ku oraroʼoboʼ yaan u yáantik utiaʼal ka u maas maʼalobkíint bix u beetkoʼob.

ÓOLIʼ tuláakal le religionoʼob yéetel tuláakal tuʼuxoʼ, le máakoʼoboʼ ku oraroʼob. Yaʼabeʼ ku orar u múuchʼ yéetel uláakʼ máakoʼob yéetel uláakʼoʼobeʼ tu juunaloʼob. Le máakoʼobaʼ ku oraroʼob tiʼ iglesias, sinagogas, mezquitas, pagodas wa santuarios. Yéetel ku meyajtiʼob jejeláas baʼaloʼob jeʼex, rosarios, devocionarios, iconos, alfombras, tablillas yéetel uláakʼ baʼaloʼob.

Tiʼ tuláakal le baʼaxoʼob kuxaʼanoʼob way Luʼumaʼ chéen wíinik ilik u kʼaʼanaʼanil le oracionoʼ. Jeʼex le wíinikoʼoboʼ, le baʼalcheʼoboʼ ku jaanloʼob, ku yukʼikoʼob jaʼ yéetel ku chʼaʼik u yiikʼoʼob. Láayliʼ xan ku síijloʼob, ku nuuktaloʼob, yéetel ku kíimloʼobeʼ (Eclesiastés 3:19). Baʼaleʼ chéen wíinik ku orar. ¿Baʼaxten?

Tumen junpʼéel baʼal kʼaʼanaʼan tiʼ toʼon. Le oracionoʼ junpʼéel baʼal ku meyaj utiaʼal u náatsʼal máak tiʼ baʼax kiliʼich yéetel minaʼan xuʼulul tiʼ. Le Bibliaoʼ ku yaʼalikeʼ le u taakil u náatsʼal máak tiʼ baʼax kiliʼichoʼ junpʼéel baʼal yaantoʼon desde ka beetaʼaboʼon tumen Dios (Eclesiastés 3:11). Jesuseʼ tu yaʼalaj: «Kiʼimak u yóol le máaxoʼob ku tsʼáaikoʼob cuenta kʼaʼabéet u nuʼuktaʼaloʼob tumen Diosoʼ» (Mateo 5:3).

Le baʼaloʼobaʼ ku yeʼesik baʼaxten jach yaan temploʼob, jejeláas baʼaloʼob ku meyaj tiʼ yaʼab religionoʼob utiaʼal u adorartikoʼob Dios yéetel baʼaxten jach yaʼab tiempo ku orar máak. Yaan máakoʼobeʼ tu lugar u beetkoʼob lelaʼ, tu juunaloʼob ku kaxkoʼob baʼax ken u beetoʼob utiaʼal u yuʼubkubaʼob maʼalob wa ku kaxkoʼob u yáantaj uláakʼ máakoʼob. Baʼaleʼ kex ka u beetoʼobeʼ láayliʼ ku yuʼubkoʼob bey yaan baʼax ku bineltiktiʼobeʼ. U jaajileʼ wíinikeʼ maʼ tu kʼuchul u naʼat tubeel tuláakal baʼal yéetel chéen junpʼíit u kʼiinil u kuxtal. Chéen juntúul máax jach yaan u naʼat yéetel minaʼan xuʼulultiʼ jeʼel u páajtal u tsʼáaik baʼax kʼaʼabéettoʼoneʼ. Baʼaleʼ ¿baʼaxoʼob péekskoʼon orar?

¿Mix juntéen wa a wuʼuy bey mix máak jeʼel u páajtal u yáantkech wa u páajtal u tsolnuʼuktikech maʼalobeʼ? Maʼ xaaneʼ ken yanaktech talamiloʼob, jeʼex ken kíimik wa máax a yaabiltmaj, ken a chʼaʼtukult junpʼéel baʼal jach kʼaʼanaʼan ichil a kuxtal wa ken a beet junpʼéel baʼax maʼ maʼalobeʼ, ¿tsʼoʼok wa a wuʼuyik bey mix baʼal u biilal u líiʼsaʼal a wóol, a tsolnuʼuktaʼal wa a perdonartaʼaleʼ?

Le Bibliaoʼ ku yeʼesikeʼ maʼalob ka orarnakoʼon yoʼolal le baʼaloʼobaʼ, tumen le tsolnuʼukoʼob ku taaskoʼ jach jeʼel u yáantkoʼoneʼ. Tsʼoʼoleʼ ku tʼaan tiʼ yaʼab oracionoʼob beetaʼab tumen xiiboʼob yéetel koʼoleloʼob tu kʼáatoʼob áantaj, tsolnuʼuk, perdón yéetel tu kʼáatoʼob jujunpʼéel baʼaloʼob taak u yojéeltkoʼob kaʼachi (Salmo 23:3; 71:21; Daniel 9:4, 5, 19; Habacuk 1:3).

Le oracionoʼobaʼ yaan tiʼ baʼax chíikaʼanoʼob. Le máaxoʼob beetoʼ yaan junpʼéel baʼal u yoojloʼob jach kʼaʼanaʼan utiaʼal ka uʼuyaʼakoʼob. Lelaʼ junpʼéel baʼal maʼatech u beetaʼal teʼ kʼiinoʼobaʼ: u yoojloʼob kaʼach tiʼ máax unaj u oraroʼob.