2 Tu Ise do Tapasahat Tangiangta?
BOI DO sahat tangiangta tu Debata na sasada i nang pe marasing-asing cara ni jolma martangiang? Godang do halak na mandok songon i. Akka halak na marlomo ni roha tu pandangan rukun agama mandok, sude do agama dijalo Debata nang pe marasing-asing carana. Tutu do songon i?
Bibel paboahon, godang do tangiang na sala. Uppamana, tikki Bibel disurat, godang do halak na martangiang tu patung. Hape jotjot do diorai Debata jolma mangulahon i. Contohna, disurat do di Psalmen 115:4-6 taringot patung. Didok, “Adong do pinggolna, alai dang boi mambege.” Pasti dang olo hita martangiang tu akka na so boi mambege hita, dang i?
Takkas ma i taida sian na masa tu si Elia. Hea ma ditantang ibana akka panurirang ni Baal. Disuru ibana ma akka panurirang i martangiang. Si Elia mandok, molo boi do dialusi debata ni nasida tangiang i, berarti sittong do debata ni nasida. Alai molo dang, berarti palsu do debata ni nasida. Alani i, martangiang ma akka panurirang Baal i jala mangangguki. Leleng do nasida na martangiang i. Alai dang adong hasilna. Bibel mandok, “Dang adong na mangalusi nasida.” (1 Raja-Raja 18:29) Alai songon dia do molo si Elia?
Dung martangiang si Elia, pittor hatop do dialusi Debatana tangiang i. Ro ma api sian surgo manutung pelean naung diparade si Elia. Boasa? Ala diulahon si Elia do sada na penting di tangiangna. Aha ma i? Molo taida di 1 Raja-Raja 18:36, 37 jeppek do tangiang i. Molo di bahasa Heber holan 30 kata do i. Alai di ganup kalimat i tolu hali ma si Elia manjou goar ni Debata, i ma Jahowa.
Debata ni halak Kanaan do Baal na lapatanna “nappuna” manang “tuan”. Dipakke do tong hata “Baal” tu akka debata na asing. Alai istimewa do goar ni Jahowa, alana holan Ibana do na mamakke goar i. Didok Ibana do tu bangsona, “Au do Jahowa, i do goarhu, dang lehonokku hamuliaokku tu manang ise pe.”—Jesaya 42:8.
Menurut hamu, sarupa do na manjalo tangiang ni si Elia dohot na manjalo tangiang ni akka panurirang Baal? Manomba Baal mambahen akka halak gabe marlea. Manjual diri do nasida jala pamatehon jolma gabe pelean. Alai molo manomba Jahowa dang songon i. Gabe sangap do bangsona, i ma halak Israel. Alana dang dohot be nasida tu akka ulaon ni sisomba Baal. Pikkirhon ma on: Molo dikirim hamu surat tu sahalak dongan na sangap, mungkin do i sahat tu halak na asing goarna? Manang mungkin do sahat suratmuna i tu halak na so denggan pangalahona? Pasti daong!
Tantangan ni si Elia patuduhon dang sarupa tujuan ni sude tangiang
Molo martangiang hita tu Jahowa, hita martangiang tu Sitoppa saluhut, Ama ni sude jolma. * Ai didok si Jesaya do di tangiangna, “Ho do Amanami Ale Jahowa.” (Jesaya 63:16) Hea do didok Jesus tu akka siseanna, “Na lao ma au tu Damang i dohot Amamuna jala tu Debatakku dohot Debatamuna.” Jahowa do na nidok ni Jesus disi. (Johannes 20:17) Tu Jahowa do Jesus martangiang. Jala tu Jahowa do tong disuru Jesus akka siseanna martangiang.—Mateus 6:9.
Molo tajaha Bibel, hea do disuru hita martangiang tu Jesus, tu si Maria, tu santo, manang tu suru-suruan? Dang hea—holan tu Jahowa do. Boasa? Na parjolo, alana molo hita martangiang sarupa ma i songon manomba. Didok di Bibel, holan Jahowa do na ikkon tasomba. (2 Musa 20:5) Na paduahon, di Bibel didok do Jahowa “Sitangihon tangiang”. (Psalmen 65:2) Nang pe lomo roha ni Jahowa mangalehon tugas tu na asing, alai dang disuru Ibana manang ise pe lao manangihon tangiangta. Marjanji do Ibana, holan Ibana sandiri do na manangihon tangiangta.
Jadi molo lomo rohamuna asa ditangihon Debata tangiangmuna, ingot ma na didok di ayat on, “Malua do ganup halak na manjou goar ni Debata, i ma Jahowa.” (Ulaon ni Apostel 2:21) Alai sude do tangiang ditangihon Debata? Manang adong dope na asing na ikkon taboto asa ditangihon Jahowa tangiangta?
^ par. 9 Piga-piga tradisi agama mandok, dang boi tajou goar ni Debata, nang pe di bagasan tangiang. Hape molo taida di Bibel na parjolo, adong do 7.000 hali disurat goar ni Jahowa. Didok do goar i di bagasan tangiang, dohot di akka ende ni akka naposo ni Jahowa na setia.