2 ?Long Hu?
Prea
2 ?Long Hu?
?I TRU se God i harem olgeta prea blong man, nomata se oli singaot hem long wanem nem? Long wol tede, plante man oli tingting olsem. Oli gat tingting ya from we oli wantem se evri jos oli joen wanples, mo oli wantem se man i agri long olgeta jos, i nomata wanem tijing blong olgeta. ?Be olsem wanem? ?Tingting ya i stret?
Sore tumas, Baebol i tijim se plante prea oli no stap go long God. Long taem we oli raetem Baebol, plante man oli stap prea long ol pija we oli katem long wud no ston. Be God i talem plante taem long ol man blong hem se fasin ya i no stret. Ol Sam 115:4-6 i tokbaot ol aedol se: “Oli gat sora, be oli no save harem samting.” Tok blong vas ya i klia nomo. ?Yu ting se i stret blong prea long wan god we i no save harem yu?
I gat wan stori long Baebol we i soemaot samting ya i klia nomo. Hemia stori blong profet Elaeja we hem i wan man blong tru God. Elaeja i talem long ol profet blong god ya Bal se bambae oli prea long god blong olgeta, nao biaen Elaeja bambae i prea long God blong hem. Elaeja i talem se God ya we i tru bambae i ansa, be hemia we i giaman bambae i no save ansa. Ol profet blong Bal oli agri blong mekem wanem we Elaeja i talem. Ale oli prea strong mo oli prea longtaem, we oli stap singsingaot bigwan. Be i no gat samting i hapen. Stori blong Baebol i talem se: “I no gat wan ansa i kam, mo oli no harem wan tok nating.” (1 King 18:29) ?Olsem wanem long prea blong Elaeja?
Afta we Elaeja i finisim prea blong hem, wantaem nomo God i sanem faea i kamdaon, i bonem sakrefaes ya we Elaeja i putum long olta. ?From wanem God i harem prea blong Elaeja be i no harem prea blong ol profet blong Bal? I gat wan samting we Elaeja i talem long prea blong hem, we yumi save ridim long 1 King 18:36, 37. * Prea blong Elaeja i sot nomo. I gat raonabaot 30 tok nomo long prea blong hem we hem i talem long lanwis ya Hibru. Be long sotfala prea ya nomo, Elaeja i singaot God long prapa nem blong hem, hemia Jeova. Hem i talem nem ya 3 taem.
Bal, hem i nem blong god blong ol man Kenan. Nem ya Bal i minim “masta.” Ol man long kantri ya Kenan oli yusum defdefren nem blong talem god ya Bal. Oli stap putum nem blong god ya folem ples no taon blong olgeta. Be long heven mo long wol, i gat wan God nomo we i karem nem ya Jeova. God ya i talem long ol man blong hem se: “!Mi nomo mi Hae God [Jeova]! !Hemia nao nem blong mi! Bambae ol man oli no mas leftemap nem blong narafala god, we long semtaem nomo, oli stap leftemap nem blong mi.”—Aesea 42:8.
?Yu ting se God i agri long prea blong Elaeja mo long semtaem i agri long prea blong ol profet blong Bal? Taem ol man oli mekem wosip long Bal, oli mas mekem sam fasin we i nogud olgeta. Ol man mo ol woman oli stap slip olbaot, mo oli stap kilim man mo pikinini tu i ded, olsem sakrefaes we i go long Bal. Wosip blong Jeova i defren olgeta. Taem ol man Isrel oli mekem wosip long Jeova, oli mas gat ol gudfala fasin, mo oli mas lego ol fasin we oli nogud. Taswe, traem tingbaot samting ya: Sipos yu raetem wan leta i go long wan haeman we i fren blong yu mo yu gat bigfala respek long hem, ?bambae yu raetem nem blong hu long leta ya? ?Bambae yu raetem nem blong wan narafala man, we nem blong hem i defren olgeta long nem blong fren blong yu? ?Bambae yu raetem nem blong wan man we fasin blong hem i nogud tumas, i no sem mak nating long fasin blong fren blong yu? !Nogat!
Taem yu prea long Jeova, yu stap prea long God ya we i mekem olgeta samting, hem i Papa blong olgeta man. * Profet Aesea i prea long Jeova se: “!Yu yu Papa blong mifala!” (Aesea 63:16) God ya nao we Jisas Kraes i stap tokbaot, taem hem i talem long ol man blong hem se: “Mi mi stap gobak long Papa blong mi we hem i Papa blong yufala tu, mo i God blong mi mo i God blong yufala tu.” (Jon 20:17) Jeova, hem i Papa blong Jisas. Hem i God ya we Jisas i prea long hem, mo tu hem i God ya we Jisas i tijim ol man blong hem blong oli prea long hem.—Matiu 6:9.
?Olsem wanem? ?Baebol i talem se yumi mas prea long Jisas, Meri, ol tabu man, mo ol enjel? Nogat. Yumi mas prea long Jeova nomo. I gat tu risen. Faswan risen se, prea hem i wan fasin blong wosip. Baebol i talem se yumi mas mekem wosip long Jeova nomo. (Eksodas 20:5) Namba tu risen se, Baebol i talem se God nomo i ‘stap ansa long ol prea blong yumi.’ (Ol Sam 65:2) Nating se Jeova i givim plante wok long ol narafala man blong oli mekem, be hem i no givim wok ya blong harem prea long wan narafala man. Jeova i God ya we i mekem promes se bambae hem i harem ol prea blong yumi wanwan.
Taswe sipos yu wantem we God i harem prea blong yu, yu mas tingbaot tok ya blong Baebol se: “Olgeta man we oli singaot mi long nem blong mi, mi bambae mi sevem olgeta.” (Ol Wok 2:21) ?Be hemia i min se Jeova i stap harem enikaen prea nomo? ?I gat sam samting moa we yumi mas save long saed blong prea sipos yumi wantem we Jeova i harem ol prea blong yumi?
[Ol futnot]
^ par. 6 Long Baebol long Bislama nem ya yumi save faenem long futnot blong Eksodas 3:14 we i tokbaot Hibru tok ya YHWH, se: “Plante man oli ting se fasin blong talem nem ya, se Yawe no Jehova. Long Baebol blong yumi, yumi yusum nem ya Hae God blong talem nem ya YHWH.”
^ par. 9 Sam jos oli folem kastom ya se i tabu blong talem prapa nem blong God, mo oli talem se taem yu prea tu yu no mas talem nem ya. Be nem ya Jeova i stap klosap 7,000 taem long ol faswan hanraet blong Baebol we ol man oli raetem long lanwis blong bifo. Mo plante long ol taem ya, nem ya i stap long ol prea mo ol Sam blong ol gudfala man blong wok blong Jeova.
[Tok blong pija long pej 5]
Stori blong Elaeja wetem ol profet blong god ya Bal, i soemaot se i no olgeta prea evriwan we oli stap go long God