2 Mẹnu Wẹ Mí Dona Nọ Hò E Hlan?
Odẹ̀
2 Mẹnu Wẹ Mí Dona Nọ Hò E Hlan?
BE ODẸ̀ lẹpo wẹ nọ yì mẹdopolọ dè mahopọnna yẹwhe he sin yinkọ yè ylọ ya? To egbehe, nuhe susu gbẹtọ lẹ tọn nọ saba lẹn niyẹn. Linlẹn enẹ sọgbe to nukun mẹsusu he yiwanna kọndopọ sinsẹ̀n voovo tọn lẹ tọn mẹ, podọ yé nọ jlo dọ yè ni kẹalọyi sinsẹ̀n lẹpo eyin nuyise yetọn lẹ tlẹ gbọnvo. Ṣigba, e yọnbasi dọ linlẹn enẹ ma sọgbe.
Na nugbo tọn, Biblu plọnmẹ dọ suhugan gbẹtọ lẹ tọn ma nọ hodẹ̀ hlan mẹhe jẹ lọ. To ojlẹ he mẹ Biblu yin kinkan te, gbẹtọ lẹ nọ saba hodẹ̀ hlan boṣiọ pipà lẹ. Ṣogan, Jiwheyẹwhe na yé avase pludopludo sọta aṣa enẹ. Di apajlẹ, Salmu lẹ 115:4-6 dọ gando boṣiọ pipà lẹ go dọmọ: “Yé tindo otó, ṣigba yé ma gán sènu.” Etẹwẹ yin nuagokun lọ? E họnwun dọ e ma na yin nuyọnẹnnu nado hodẹ̀ hlan yẹwhe de he ma nọ sènu.
Kandai Biblu tọn he fọnjlodotenamẹ de tá hinhọ́n do nuagokun ehe ji dogọ. Yẹwhegán nugbonọ lọ Elija ze tẹnpọn de donukọnna yẹwhegán Baali tọn lẹ, bo biọ to yé si nado hodẹ̀ hlan yẹwhe yetọn, enẹgodo, Elija lọsu na hodẹ̀ hlan yẹwhe etọn. Elija dọ dọ Jiwheyẹwhe nugbo lọ na siọ emi, amọ́ yẹwhe lalo lọ ma gán siọ yewlẹ. Yẹwhegán Baali tọn lẹ yigbe na tẹnpọn lọ, bo jẹ dẹ̀ho ji vivẹvivẹ, bosọ yí ogbè lélé do to awhádo po awubla po na ojlẹ dindẹn, amọ́ yẹwhe yetọn ma siọ yé! Kandai lọ dọmọ: “Mẹdepope ma siọ; mẹdepope ma na yé ayidonugo.” (1 Ahọlu lẹ 18:29) Amọ́, whenue e jẹ Elija tọn ji, etẹwẹ jọ?
To whenue Elija hodẹ̀, Jiwheyẹwhe etọn siọ ẹ to afọdopolọji, bo do miyọ́n hlan sọn olọn mẹ nado fiọ avọ́nunina he Elija wleawuna lọ. Etẹwẹ yin vogbingbọn lọ? Elija donù onú titengbe de go to odẹ̀ etọn mẹ, he yin kinkandai to 1 Ahọlu lẹ 18:36, 37 mẹ. Odẹ̀ etọn ma dite paali; nudi hogbe 30 poun wẹ e bẹhẹn to Heblugbe dowhenu tọn mẹ. Etomọṣo, to odẹ̀ kleun enẹ mẹ, whla atọ̀n wẹ Elija ylọ Jiwheyẹwhe po yinkọ jọnun etọn Jehovah po.
Baali, he zẹẹmẹdo “núnọ” kavi “klunọ,” wẹ yin yẹwhe Kenaninu lẹ tọn, podọ wunmẹ yẹwhe ehe tọn susu lẹ tin sọn lẹdo de mẹ jẹ devo mẹ. Ṣigba, yinkọ Jehovah tọn ma pé awe, podọ Omẹ dopo gee wẹ nọ yinmọ to wẹkẹ lọ blebu mẹ. Jiwheyẹwhe dọna omẹ etọn lẹ dọmọ: “Yẹn wẹ Jehovah. Yinkọ ṣie niyẹn; yẹn ma na jo gigo ṣie na mẹdevo depope.”—Isaia 42:8.
Be mẹdopolọ dè wẹ odẹ̀ Elija tọn po yẹwhegán Baali tọn lẹ tọn po yì ya? Sinsẹ̀n-bibasi Baali tọn nọ de yẹyi sọn gbẹtọ lẹ go, na e nọ bẹ hùnwhẹ zanhẹmẹ tọn hẹn, gọna gbẹtọ yíyí do sanvọ́. Amọ́ to vogbingbọn mẹ, sinsẹ̀n-bibasi Jehovah tọn nọ doyẹyigona omẹ etọn lẹ, yèdọ Islaelivi lẹ, bosọ gọalọna yé ma nado nọ doalọ to aṣa gblezọn mọnkọ lẹ mẹ. Lẹnnupọndo ehe ji: Eyin a do wekanhlanmẹ de hlan họntọn towe he mẹlẹ nọ na sisi taun de, be e na jlo we dọ wekanhlanmẹ lọ ni yin zize na mẹdevo de he yinkọ etọn gbọnvona họntọn towe tọn, bosọ tindo jijọ po pọndohlan ylankan he họntọn towe ma nọ kẹalọyi paali lẹ po ya? Gbede pọ́n!
Eyin a nọ hodẹ̀ hlan Jehovah, yọnẹn dọ Mẹdatọ lọ, yèdọ Otọ́ gbẹtọvi lẹpo tọn wẹ a to dẹ̀ho hlan. * Yẹwhegán Isaia dọ to odẹ̀ etọn de mẹ dọmọ: “Hiẹ wẹ Otọ́ mítọn, Jehovah E.” (Isaia 63:16) Mẹdopolọ pẹẹ hodọ wẹ Jesu Klisti te whenue e dọna hodotọ etọn lẹ dọmọ: “Yẹn hẹji jei Otọ́ ṣie po Otọ́ mìtọn po dè podọ jei Jiwheyẹwhe ṣie po Jiwheyẹwhe mìtọn po dè.” (Johanu 20:17) Jehovah wẹ yin Otọ́ Jesu tọn. Ewọ wẹ Jiwheyẹwhe he Jesu nọ hodẹ̀ hlan podọ ewọ wẹ Jesu sọ na tuli hodotọ etọn lẹ nado nọ hodẹ̀ hlan ga.—Matiu 6:9.
Be Biblu na tuli mí nado nọ hodẹ̀ hlan Jesu, Malia, omẹ wiwe lẹ, kavi angẹli lẹ wẹ ya? Lala—kakatimọ hlan Jehovah kẹdẹ. Whẹwhinwhẹ́n awe delẹ die he wutu e do yinmọ. Tintan, dẹ̀hiho yin adà sinsẹ̀n-bibasi tọn de, podọ Biblu dọ dọ Jehovah kẹdẹ wẹ mí dona nọ basi sinsẹ̀n hlan. (Eksọdusi 20:5) Awetọ, Biblu sọ dohia dọ ewọ wẹ nọ yin yiylọdọ “Sisètọ odẹ̀ tọn.” (Salmu lẹ 65:2) Dile etlẹ yindọ Jehovah ma nọ whleawu nado deazọ́nna mẹdevo lẹ, e ma de azọngban ehe uwọ na mẹdevo gbede. Ewọ wẹ Yẹwhe dopo gee lọ he dopà dọ emi lọsu wẹ na nọ dotoaina odẹ̀ mítọn lẹ tlọlọ.
Enẹwutu, eyin a jlo dọ Jiwheyẹwhe ni nọ sè odẹ̀ towe lẹ, nọ hẹn wefọ ehe do ayiha mẹ to whepoponu: “Mẹdepope he dawhá ylọ oyín Jehovah tọn wẹ na yin whinwhlẹngán.” (Owalọ lẹ 2:21) Amọ́ be odẹ̀ depope poun wẹ Jehovah nọ sè ya? Kavi be nudevo gbẹ́ tin he mí dona yọnẹn eyin mí jlo dọ Jehovah ni nọ sè odẹ̀ mítọn lẹ wẹ ya?
[Nudọnamẹ odò tọn]
^ par. 9 Sinsẹ̀n delẹ nọ plọnmẹ dọ e ma sọgbe nado nọ ylọ yinkọ jọnun Jiwheyẹwhe tọn, etlẹ yin to odẹ̀ mẹ. Ṣigba, yinkọ enẹ sọawuhia nudi whla 7 000 to ogbè dowhenu tọn he mẹ Biblu yin kinkando lẹ mẹ, titengbe to odẹ̀ po salmu devizọnwatọ nugbonọ Jehovah tọn lẹ tọn po lẹ mẹ.
[Yẹdide]
Tẹnpọn he Elija zedonukọnna yẹwhegán Baali tọn lẹ dohia dọ odẹ̀ lẹpo ma nọ yì mẹdopolọ dè