Guriguri—Daika Dekenai?
HEREVANA taunimanima be daika dekenai idia guriguri, to Dirava ese edia guriguri ia kamonai, a? Hari inai negai, taunimanima idia laloa Dirava ese edia guriguri ia kamonai henia. Momo be tomadiho idauidau ida idia gaukara hebou totona idia noinoi bona idia ura unai tomadiho ibounai idia abia dae, herevana edia gaukara daladia be idauidau. To, oi laloa unai lalohadai be momokani, a?
Baibel ese ita ia hadibaia, nega momo taunimanima be Dirava momokanina dekenai idia guriguri lasi. Baibel negadiai, taunimanima be vaia kaivakuku idauidau idia guriguri henia. To, Dirava ese unai kara ia taravatua. Hegeregere, Salamo 115:4-6 ese kaivakuku be inai bamona ia herevalaia: “Idia be mai edia taiana, to idia kamonai diba lasi.” Ia hedinarai goevagoeva, oi ia kamonai henia lasi diravana oi guriguri henia be anina lasi.
Baibel ena sivarai ta ese unai ia hahedinaraia namonamo. Peroveta tauna momokanina Elia ese Bala ena hahelaga taudia ia boiboi henia edia dirava idia guriguri henia totona, unai murinai Elia be ena Dirava ia guriguri henia. Elia ia gwau, Dirava momokanina be guriguri ia kamonai bona dirava koikoina be ia kamonai lasi. Bala ena hahelaga taudia be unai boiboi idia abia dae, bona edia dirava dekenai idia guriguri mai boiboi bada danu, to gau ta ia vara lasi. Baibel ia gwau: “Haere ta be lasi, bona regerege ta idia kamonaia lasi.” (1 King Taudia 18:29) To Elia ia guriguri neganai, dahaka ia vara?
Elia ia guriguri murinai, ena Dirava be maoromaoro iena guriguri ia haerelaia, bona guba amo lahi ia siaia Elia ena boubou gauna ia gabua. Bala ena hahelaga taudia edia guriguri bona Elia ena guriguri edia idau be dahaka? Elia ena guriguri 1 King Taudia 18:36, 37 (BHğ *) lalonai be mai anina bada gauna ta ia hahedinaraia. Ia be guriguri kwadogina ia gwauraia—Heberu gado ai unai guriguri herevadia ibounai be 30 bamona. To, unai hereva ta ta lalonai, Elia be nega toi Dirava ena ladana, Iehova, ia gwauraia.
Bala ena anina be “biaguna,” ia be Kanana taudia edia dirava, bona unai bamona dirava momo idia noho. To, Iehova ena ladana be idau momokani, guba bona tanobada ibounai lalonai, unai ladana be Ia sibona ia herevalaia. Dirava ese ena taunimanima ia hamaoroa: “Lau sibona be Iehova, egu ladana be unai. Egu hairaina be ta dekenai lau henia lasi.”—Isaia 42:8, BHğ.
Dahaka dainai Elia ena guriguri be Dirava ese ia kamonai, to Bala ena hahelaga taudia edia guriguri ia kamonai lasi? Bala tomadiho henia taudia be matabodaga karadia idia karaia bona taunimanima idia bouboulaia. To, Iehova be Israela taudia ia hadibaia, mai hemataurai ida Ia do idia tomadiho henia, bona kara dika idauidau amo ia ruhadia. Mani inai oi laloa: Bema oi ura revareva ta be oi matauraia bada turana ta dekenai oi siaia, oi laloa emu turana ena ladana ia diba lasi bona emu turana ia abia dae gaudia ia laloa bada lasi tauna amo unai revareva oi siaia diba, a? Lasi!
Elia ena boiboi Bala ena hahelaga taudia dekenai ese ia hamomokania guriguri haida be Dirava ese ia kamonai henia lasi
Bema Iehova oi guriguri henia, oi be Havaraia Tauna bona Tamana oi hereva henia unai. * Peroveta tauna Isaia be ena guriguri lalonai ia gwau: “Oi Iehova be aiemai Tamana.” (Isaia 63:16, BHğ) Iesu Keriso ese iena murinai idia raka taudia ia hereva henia neganai, Iehova ia gwauraia: “Egu Tamana bona emui Tamana, egu Dirava bona emui Dirava dekenai do lau daekau.” (Ioane 20:17) Iehova be Iesu ena Tamana. Ia be Iesu ese ia guriguri henia Diravana bona iena murinai idia raka taudia ia hadibaia unai Dirava do idia guriguri henia.—Mataio 6:9.
Baibel ese ita hadibaia, Iesu, Maria, mase taudia o aneru dekenai ita guriguri, a? Lasi—Iehova sibona dekenai ita guriguri be namo. Ena badina rua mani ita laloa. Ginigunana be, guriguri be tomadiho ena kahana ta, bona Baibel ia gwau Iehova sibona ita tomadiho henia be namo. (Esodo 20:5) Iharuana be, Baibel ese ia hahedinaraia Iehova be ‘guriguri ia kamonai’ Diravana. (Salamo 65:2) Ena be Iehova be ma haida dekenai maduna idauidau ia henia, to guriguri kamonai henia ena maduna be ma ta dekenai ia henia lasi. Ia gwauhamata iseda guriguri do ia kamonai henia.
Unai dainai, bema oi ura Dirava ese emu guriguri ia kamonai henia, namona be inai siri oi laloatao: “Iehova ena ladana dekenai idia boiboi taudia ibounai be hahemauri do idia abia.” (Kara 2:21, NW) To, Iehova ese guriguri ibounai ia kamonai henia, a? Eiava Iehova ese iseda guriguri ia kamonai henia totona, gau ma haida ita diba be namo, a?
^ par. 6 Motu Buka Helağa dekenai inai bamona ia gwau: “Boubou henia negana ia ginidae neganai, peroveta tauna Elia be boubou patana badinai ia gini, ia guriguri, ia gwau, ‘Iehova e, Aberahamo bona Isako bona Iakobo edia Dirava e, hari dina do oi hedinaraia momokani oi be Israela ena Dirava, bona lau, oiemu hesiai tauna, ese inai kara oiemu oda dekenai lau karaia noho. Iehova e, lau dekenai do oi haere, mani oi haere, vadaeni inai bese taudia do idia diba, oi Iehova sibona be Dirava momokani. Bona oi ese idia edia lalona do oi hagiroa lou oi dekenai.’”
^ par. 9 Tomadiho oreadia haida idia gwau, guriguri lalonai Dirava ena ladana korikori idia gwauraia be kerere. To, Heberu gado ai idia torea Baibel lalonai, unai ladana be nega 7,000 bamona ia hedinarai, Iehova idia abidadama henia hesiai taudia edia ane bona guriguri lalonai unai ladana idia gaukaralaia.