HAPO ozongumbiro azehe ze yenda koruveze rumwe, kainatja kutja ovandu mave kumbu ku uṋe? Ndino, ovandu ovengi ve muna nao. Oumune mbwo u nana ombango yovandu ovengi mba suvera ozongamburiro pekepeke, nu mbe vanga kutja ozongamburiro azehe ze yakurwe i Mukuru, nandarire kutja za panguka. Hapo mape ya kutja oumune mbwo kauatjiri?

Ombeibela i tja povikando ovingi ovandu kave kumbu ku Mukuru watjiri. Moruveze Ombeibela tji ya tjangerwe, ya ri otjiṋa ovandu tjaave tjiti tjinene okukumba koviserekarera. Nandarire nao, Mukuru wa rakiza ovandu povikando ovingi ohunga notjiṋa ho. Otjotjihorera, Epsalme 115:4-6 ri tja nai ohunga noomukuru wovisenginina: “Ve nomatwi, nungwari kave zuu.” Epu ekahu. Kape vatere okukumba ku mukuru ngu hi nokuzuvira ozongumbiro zoye.

Ehungi rOmbeibela ri ṋunisa epu ndo nawa. Omuprofete watjiri Elia wa tjita ombatasaneno ku novaprofete va Baal, kutja ve kumbe ku mukuru wawo nu okuzambo Elia aa sokukumba ku Mukuru we. Elia wa tja Mukuru watjiri ma ziri nu ingwi woposyo ke nokuzira. Ovaprofete va Baal va yakura ombatasaneno ndjo, nu va kumba oukukutu ozongumbiro ozonde, nandarire va ura. Posi ya, kape nomundu ngu we ve zira. Ombeibela i tja: “Kapa ri eziriro, nu kapa zuvakere ombosiro.” (1 Ozombara 18:29) Hapo pa tjitwa tjike indu Elia tja kumba?

Elia tja za nokukumba, Mukuru we wa hakahana okumuzira mokuhinda omuriro mbwa za keyuru okuyekunyosa otjipunguhiro tja Elia. Hapo ombangu ya ri pi? Pa ri notjiṋa otjinanḓengu mongumbiro ya Elia, ndja tjangwa 1 Ozombara 18:36, 37. Oyo ongumbiro osupi tjinene. Meraka rOtjiheberi mu ya tjangerwe, ya ri nomambo ape 30 uriri. Nungwari, momambo omasupi ngo, Elia povikando vitatu wa ungurisa ena ra Mukuru, Jehova.

Ena ndi Baal ri heya “omuini wotjiṋa” poo “omuhona,” ngwa ri mukuru wOvakanaan, nu pa ri noomukuru ovengi mbaave ungurisa ena ndo. Posi yokutja ena ndi Jehova ena rapeke, nu ena re erike meyuru na kombanda yehi. Ombeibela i tja: “Ve tjiue, kutja Ove erike, ngu nena indi Jehova;: ingui Uokombanda kombanda jehi arihe.”—Epsalme 83:19, EEP.

Hapo ongumbiro ya Elia nozongumbiro zovaprofete va Baal za ya koruveze rumwe? Omerikotameneno wa Baal aaye tjiti kutja ovandu ve rirandise nokupunguha ovandu, mbya ri oviṋa oviyaukise. Nungwari, Jehova wa rakizire otjiwaṋa tje tjOvaisrael okurikotamena ku ye momuano mbwe yakura. Ku nao, ripura ohunga notjiṋa hi. Indu tji wa tjanga orutuu kepanga ndi wa tenga pondondo yokombanda, hapo mo undjire ko kutja orutuu ndwo maru i komundu warwe ngu he ri epanga roye, nu wongaro ndji ha hitasana ku noviṋa epanga roye ndi kambura mo? Kako katjiperi.

Indu tji matu kumbu ku Jehova, tu kumba kOmuute, Ihe wovandu avehe. a Omuprofete Jesaja wa tja nai mongumbiro: “Ove, Muhona, oOve ngu u ri Tate.” (Jesaja 63:16) Eye eengwi ngwa hungirwa i Jesus Kristus, indu tja raere ovemukongorere ve kutja: “Ami me yaruka ku Tate, wina ngu ri Iho yeṋu, na ku Ndjambi wandje, wina ngu ri Ndjambi weṋu.” (Johanes 20:17) Jehova oIhe ya Jesus. Eye oMukuru Jesus kaa kumbu nu Jesus wa raere ovemukongorere ve okukumba ku ye.—Mateus 6:9.

Hapo Ombeibela i tu raera kutja matu sokukumba ku Jesus, ku Maria, koviserekarera poo kovaengeli? Kako, matu sokukumba ku Jehova erike. Tara komapu yevari nga. Otjitenga, ongumbiro omuano womerikotameneno, nu Ombeibela i tja matu sokurikotamena ku Jehova erike. (Eksodus 20:5) Otjitjavari, Ombeibela i tja Jehova “u zuvira ozongumbiro.” (Epsalme 65:2) Nandarire kutja Jehova u yandja omerizirira omengi ku varwe, ihi otjiṋa tje hi na wa yandja komundu warwe. Eye oMukuru ngwa kwizika okuzuvira ozongumbiro zetu.

Indu tji mo vanga kutja ozongumbiro zoye ze zuvirwe i Mukuru, zemburuka etjangwa ndi: ‘Auhe ngu ma isana ena raMuhona [Jehova, NWT] ma yamwa.’ (Oviungura 2:21) Nu hapo Jehova u zuvira ozongumbiro ngamwa azehe, poo pe notjiṋa tjarwe tji matu hepa okutjiwa indu tji matu vanga ozongumbiro zetu ze zuvirwe i Jehova?

[Omambo wokehi]

 [Otjiperendero]

Ombatasaneno ndja ri pokati ka Elia novaprofete va Baal ya raisa kutja ozongumbiro azehe kaze i koruveze rumwe