SEKEDA orang ke rindu nyampurka agama madah, kitai ulih besampi ngagai sapa-sapa aja laban semua sampi nuju ngagai endur ti sama. Mayuh orang mega setuju enggau runding tu. Tang, nama penemu nuan?

Bup Kudus bisi nyebut, mayuh sampi ke enda didingaka Petara. Tu ketegal sida besampi ngagai patung, tang Petara begedika pengawa tu. Masmur 115:4-6 madah, patung “bisi pending, tang enda ulih ninga.” Nya alai, kati nuan deka besampi ngagai seseiku orang ke enda ulih ninga?

Bisi siti chunto Bup Kudus, ke nunjukka pengamat pekara tu. Maya jeman nabi Elijah, iya nguji bala nabi Baal besampi ngagai petara sida. Udah nya, Elijah mega besampi ngagai Petara iya. Petara ke nyaut sampi, nya meh Petara ke bendar. Bala nabi Baal nerima penguji tu, lalu berengkah bebendar besampi ngagai petara sida. Pengudah lama ngangauka Baal, nama utai ke nyadi? Bup Kudus madahka, “Sida majak rauh-rauh besampi nyentuk ngagai ngalih hari. Tang nadai ga Baal nyaut sida. Siti pen nadai meh saut didinga.” (1 Raja 18:29) Tang baka ni enggau sampi Elijah deh?

Pengudah Elijah abis besampi, Petara lalu ngasuh api nurun ari langit sereta nganguska pemeri. Nama kebuah sampi Elijah disaut? Kunchi iya bisi ba 1 Raja 18:36, 37. Dalam jaku asal, sampi Elijah ngundan kira-kira 30 leka jaku. Tang ba sampi iya ti pandak nya, iya udah ngena tiga kali nama Petara ti bendar, iya nya Jehovah.

Baal, nya petara orang Kanaan. Leka jaku “Baal” mai reti “orang ke bempu” tauka “tuan.” Ba mayuh endur, mayuh orang nyembah Baal nitihka chara sida empu. Tang nama Jehovah nya unik, laban nya semina ditujuka ngagai seseiku orang ke bekuasa atas alam semesta. Petara Jehovah madah ngagai bala nembiak Iya, ‘Aku aja ti Petara [Jehovah]. Nadai petara bukai tau enggau bempu mulia Aku.’—Isaiah 42:8.

Nya alai, endang terang ukai semua sampi datai ngagai endur ti sama. Ke bendar iya, Baal jauh bebida ari Petara ti bendar. Orang ke nyembah Baal patut ngereja mayuh pengawa ti enda manah, baka ulah seks ti kamah indah sanggup nyadika anak sida pemeri. Tu enda sama enggau penyembah Jehovah ke diajar idup tuchi, sereta nyeliahka diri ari ngereja pengawa ti enda manah. Gambarka chunto tu, enti nuan nulis surat ngagai kaban ke dikesayau sereta dipebasa, tentu nuan enggai surat nya datai ngagai seseiku orang ke jai, enda pia?

Baka nya mega enggau sampi kitai. Enti nuan besampi ngagai Jehovah, nuan benung madahka asai ati nuan ngagai Apai sereta Penempa kitai. * Nabi Isaiah besampi, ‘Nuan Jehovah, endang Apai kami.’ (Isaiah 63:16) Kelimpah ari nya, Jesus mega ngajar utai ti sama. Ku iya madah ngagai bala rasul iya, ‘Aku niki ngagai Apai Aku enggau Apai kita, ngagai Petara Aku enggau Petara kita.’ Au, Jesus besampi ngagai Petara Jehovah, iya nya Apai iya. Iya mega ngajar kitai ngereja utai ti sama.—Matthew 6:9.

Sekeda orang besampi ngagai Jesus, Maria, saint, tauka melikat. Tang nama utai ke diajar Bup Kudus? Bup Kudus madah, kitai patut besampi ngagai Jehovah aja. Nama kebuah? Tu ketegal, sampi nya sebagi ari sembah kitai ngagai Petara, lalu kitai patut nyembah Petara Jehovah aja. (Pemansut 20:5) Kelimpah ari nya, semina Jehovah ke “nyaut sampi.” (Masmur 65:2) Jehovah enda kala meri pengawa tu ngagai orang bukai. Iya besemaya deka ningaka semua sampi kitai.

Nya alai, enti nuan deka sampi nuan didinga Petara, kingatka meh jaku lalau ba ayat Bup Kudus tu: ‘Barang sapa ngangauka nama Jehovah, deka diselamatka.’ (Surat Kereja Rasul 2:21) Tang, kati semua sampi diterima Iya? Nama agi utai bukai ke patut dikereja kitai enti kitai deka sampi kitai diterima Jehovah?